July 30.2024
Zarkel Zarh (17)nak Nihnih Ni
Lectionary: 402
Cucaah annih na chimh ding hna bia cu mah hihi a si: Chun zan in ka mitthli cu hul loin luang camcin ko seh, Zeicahtiah ka mi hna ngaknu thiang cu kuai cikcek in den a si i fak piin hma a ing. 18 Lo i ka va chuah tikah vainam nih a thahmi hna an rilh liangluang ko kha ka hmuh hna; Khua chung i ka va luh ah, mangṭam in a thi cuahmahmi kha ka va hmuh hna; Profet hna le tlangbawi hna cu rawl hal in ram chungah an vak lengmang i dinh mui an hmu lo. 19 Judah cu na hlawt hrimhrim ko cang maw? Zion cu na fih ko cang maw? Kan caah damnak a um khawh ti lo tiangin zeicahdah na kan tuk? Zeicahdah caan ṭha deuh cu na kan ruahchanter ṭung, zeihmanh a ṭhami kan hmuh ṭung lo, Zeicahdah damnak caan cu na kan ruahchanter ṭung i rawknak lawnglawng a si ṭung? 20 Kan ṭhat lonak le kan pupa hna sualnak kha na sinah kan phuan ko, Maw Bawipa, na cungah kan sual ko. 21 Na min a umnak kha zeirello in um hlah law A sungmi na bawiṭhutdan cung zongah nihsawhnak phakter hlah. Kan sin i na biakam cu philh hlah law pakpalawng ah ser sawh hlah. 22 Miphun dang pathian, pathian deu a simi hna lakah ruah surter kho an um maw? Asiloah, van hna nih khin ruahpi an surter kho maw? Nangmah cu kan in bochan nakhnga, Pathian na si lo maw, Maw Bawipa ? Hi thil vialte hna a tuahtu hi nangmah lawnglawng na si.
R.Bawipa, na min sunparnak caah kan khamh ko.
Kan pupa hna nih sualnak an tuahmi ruangah cun kannih cu dan kan tat hlah, ruahchan awk zeihmanh kan ngeih ti lo caah zaangfahnak tu kan cungah ngei ko.
9 Na min upatnak ding caah kan bawm tuah, Maw Pathian kan Khamhtu; kan chuah law kan sualnak cu kan ngaithiam ko.
11 Thongtla pawl cu an aihramnak kha theihpiak ko sawh hna, thah awkin biakhiah cangmi cu a liannganmi na ṭhawnnak in luatter ko hna.
13 Cun kannih na mi, na tuurun chung tuu hna nih hin, zungzal in kan in lawmh lai i kan hmailei hna.
R. Alleluia, alleluia.
Thlaici cu Pathian bia a si, Khrih cu thlaici tuhtu a si;
a sin i a rami vialte cu zungzal in an nung lai.
Thawngthabia,Mt 13:36-43
36 Jesuh nih mizapi cu a kaltak hna i inn chungah a lut. A zultu cu a sinah khan an ra i, "Lo chung belh bianabia sullam kha kan chim tuah," an ti. 37 Jesuh nih cun a leh hna i, "Thlaici ṭha a tuhtu cu Mi Fapa hi a si, 38 lo cu vawlei hi a si; thlaici ṭha cu Vancung Pennak chung i a ummi hi an si; belh cu Mi Ṭhalopa minung kha an si. 39 Cun belh a tuhtu kan ral kha Khuachia a si. Rawl ṭuan caan hi, chan dongh caan a si i rawl ṭuantu hna cu vancungmi hi an si. 40 Belh cu an pumh hna i an khangh hna bantuk hin chan donghnak ah cun a si te lai: 41 Mi Fapa nih hin vancungmi kha a thlah hna lai i a Pennak chung i ṭhat lonak a tuahtu vialte hna le mi a sualtertu vialte hna kha an pumh hna lai i 42 meiphu chungah an paih hna lai, cuka ah cun an ṭap lai i an hacang an rial lai. 43 Cun Pathian mi hna cu an Pa Pennak chungah ni bangin an ceu lai. Cucaah hna nan ngeih ahcun, thei ko u," tiah a ti.