MARKA

MARK THAWNGṬHA

I: JESUH MIPI LAK  I PHUNG A CHIM HLAN 

1.Baptisma petu Johan thawngthanhnak

       1.Pathian Fapa, Jesuh Khrih kong thawngṭha aa thawk ning cu hiti hin a si. 2 Profet Isaiah chung ah hiti hin aa ṭial: “Zoh hmanh, na lamsialtu ding ah ka lamkaltu cu na hmai ah ka thlah lai. 3 Ramcar lak i a au mi aw pakhat cu: Bawipa ca ah lam kha sial ulaw a lam cu dinter u,” ti a si. 4 Baptisma petu Johan cu ramcar lak ah khan a um i sual ngaihthiamnak ca ah sual ngaihchihnak Baptisma kong kha a thanh. 5 Judea ram dihlak le Jerusalem mi dihlak cu a sin ah an ra i Jordan tiva ah khan Baptismanak an hmuhpah in an sual an i phuang.  6 Johan cu Kalauk phaw angki aa hruk, cun ramlak khuaihliti le khaubawk in a nung. 7 Cuti i phung a chim lio ah khan amah nih: “Ka hnu in keimah nakin a lianngan deuh mi mizeimaw a ra lio, kei cu a toi ah khukbil in a kedan hri phoihtu hmanh ah kaa tlak lo. 8 Kei nih ti in Baptisma kan pek hna, sihmanhsehlaw anih nih cun ThiangThlarau in Baptisma an pek hna lai,” tiah a ti hna.

Jesuh Baptisma a ing

     9 Cu liote ah cun Jesuh cu Galilee peng Nazareth khua in a ra i Johan nih Jordan tiva ah Baptisma a pek. 10 Cun ti chung in a hung chuah ah khan, van kha aa cheu i Thiang Thlarau cu ṭhuro bang a cung ah a run i fut kha a hmuh. 11 Cun vancung in a ra mi aw awkhat nih, “Nangmah cu ka dawt mi ka Fapa na si; ka dawtnak cu na cung ah a um,” ti hi a si.

Ramcar lak i hneksaknak

12 Cun hmakhatte ah Thlarau nih ramcarlei ah a ṭhawl, 13 cun cuka ah cun ni sawmli chung a um, Satan nih a tukforh. Saram hna he a um, cun vancungmi hna nih an zohkhenh.

II: GALILEE I RIANTHIANG A ṬUANNAK

Jesuh cu thawngṭha phuan hram a thawk

       14 Johan an tlaih hnu ah khan, Jesuh cu Galilee ah a kal. Cuka ah cun Pathian sin in thawngṭha kha hiti hin a chim: 15 “A caan a tling cang, cun Pathian pennak cu a nai tuk cang. Nan sual i ngaihchih u, cun thawngṭha kha zum u.” ti in a thanh.

Zultu hmasa bik pali a auh hna

    16 Galilee Rili kam i aa chawh lio ah khan rili i sur a chep lio mi Simon le a nau Andru kha a hmuh hna – zei cah tiah annih cu ngatlai an si. 17 Cun Jesuh nih annih kha, “Ka hnu ka zul ulaw mitlaitu ah kan ser hna lai,” tiah a ti hna. 18 Cun hmakhatte ah an sur cu an chiah i an zulh.

19 Tlawmpal a kal deuh ah khin, Zebedi fapa Jeim le a nau Johan kha a hmuh hna; annih zong cu an lawng chung ah an um i an sur an belh lio a si. 20 Hmakhatte ah a kawh hna, an pa Zebedi kha, nihlawh in an phalh mi hna he lawng chung kaltak in a hnu an zulh.

Jesuh nih Kapernaum ah a cawnpiak hna i khuachia a ngei mi kha a damter hna

      21 Kapernaum tiang an kal, cun Sabbath ni ah pumhnak inn ah khan a lut colh i a cawnpiak hna. 22 Cun a cawnpiaknak nih an lung a suk ngaingai hna, zei cah tiah phungbia cawnpiaktu hna bantuk si lo in, nawlngeihnak he a cawnpiak hna. 23 Cun an i pumhnak ah cun thlarau ṭha lo nih a tuah mi pakhat a um i amah nih, 24 “Nazarethmi Jesuh, zeiti tuah dah na kan duh? Kanmah hrawh awk ah maw na rat cang? Nang cu Pathian i a Thiang mi Pa na si cu kan in hngalh ko,” ti in an au. 25 Sihmanhsehlaw Jesuh nih, “Dai, amah chung in hung chuak,” tiah a hro. 26 Thlarau ṭha lo nih fak pi in a thin i aw thangpi in a aupah in mipa chung cun a chuak. 27 Mi cu an khuaruah a har tuk caah pakhat le pakhat kha hi vialte hi zei sullam dah a si: Hihi cawnpiaknak thar a si, nawlngeihnak aa tel, thlarau ṭha lo tiang kha nawl a pek hna i an ngaih,” ti in an i hal. 28 A minthannak nih cun chikkhatte ah khuazakip le Galilee pawng tlangram vialte a cul dih.

Peter a pi damternak

    29 Cun pumhnak inn in a chuah cangka in Simon le Andru inn ah khan Jeim le Johan he dingteo in a kal. 30 Atu Simon i a pi cu a zaw i ihkhun ah a ril ko, cun  Jesuh kha an chimh colh. 31 A va lut, a kut in a vun tlaih i a thawhter. Cun a zawtnak nih a kaltak i annih kha a bultawl hna.

Mi tampi damternak

       32 Cu zanlei, ni a tlak hnu ah khan, a zaw mi vialte le khuachia nih a tuah mi vialte cu an ratpi hna. 33 An khuapi tein innka hram ah cun an i bu, cun 34 zawtnak phunphun in a zaw mi tampi kha a damter hna i khuachia tampi zong kha a ṭhawl hna, nain khuachia nih aho a si ti kha an hngalh caah annih kha bia kaakhat hmanh a chimter hna lo.

Jesuh cu Kapernaum khan aho hmanh nih hngalh lo in a chuak i Galilee peng a va tlawng

       35 Zinglei khuadei hlan ah, Jesuh cu a tho, cun inn in hmunking ah a chuak i cuka ah cun thla a va cam. 36 Simon le a hawile hna cu amah kawl ah an chuak, cun 37 an hmuh tikah amah kha “Mikip nih an in kawl,” tiah an ti. Amah nih, “Kaa khatkhat ah, pawngkam khuapi hna ah, kal hna usi, cuti cun cuka zong ah thawngṭha ka chim khawh ve lai, cucu ka rathnawh chan a si” tiah a ti hna. 39 Cu caah Galilee peng kha a cul dih, pumhnak inn ah khan a cawnpiak hna i khuachia cu a ṭhawl hna.

Ṭihnung thinghmui hma a ngei mi a damternak

40 Ṭihnung thinghmui hma a ngei mi pakhat a sin ah a ra, a khuk aa bil i amah kha, “Na duh ahcun na ka thianter khawh,” ti in a nawl. 41 Jesuh nih a zaang a fah caah a kut a samh, a tongh i amah kha, “Ka duh, thiang ko cang,” tiah a ti. 42 Hmakhatte ah a thinghmui nih a kaltak i a thiang. 43 Cun Jesuh nih a kalter colh i amah kha; 44  “Aho hmanh chimh lo ding ah vaa ralring, kal law tlangbawi vaa zohter, cun zapi ca tehte si ding ah Moses nih a ṭialtak bang in na thiannak caah thawinak va tuah,” tiah a ti. 45  Mipa cu a chuak, sihmanhsehlaw cu kong cu a duhduh in a thanh i mikip kha a chimh hna, cu tikah Jesuh cu khuazei hmanh ah langhngan in a kal kho ti lo i khualeng ramlak tu ah a um. Cu hmanh ah cun mi nih a kenkip in an rak fuhpanh.

2.   A zeng mipa a damternak

1. Capernuam ah a rak kir ṭhan tikah caan tlawmpal ah inn ah a um ko ti kha a thang, 2 cun mi tam tuk an rat caah innleng hmanh ah khan an i tlum ti lo. Pathian bia a chimh hna lio ah khan. 3 mizeng pa pakhat cu mi pali nih an rak i zawn, 4 sihmanhsehlaw mipa cu mibupi lak in a sin i an luhpi khawh lo caah, Jesuh a umnak zawn inncung kha an bauh i a awng an tuah hnu ah mizengpa cu a ihphah he an vun ṭhumh. 5 An zumhnak kha a hmuh tikah Jesuh nih mizengpa cu, “Ka fapa, na sualnak cu ngaihthiam a si cang,”tiah a ti. 6 Atu khika i a ṭhu mi phungbia cawnpiaktu cheukhat hna nih an lungchung in, “Hipa nih zei tin dah hiti hin a chim khawh? Pathian a thangchiat cang. Pathian dah ti lo aho dah sual a ngaihthiam kho,” tiah an ti. 8 Jesuh nih an lungchung i ruahnak cu a hngalh caah, hmakhatte ah, annih kha, “Zei cah dah nan lung chung ah hi bantuk ruahnak hna hi nan ngeih? 9 Mizengpa sin ah zei hi dah chim a fawi deuh? “Na sual cu ngaihthiam a si cang,” ti maw asilole, “Tho, na ihphah i lak law kal,’ ti dah? 10 Sihmanhsehlaw mi Fapa cu hi vawlei ah hin sual ngaihthiamnak nawl a ngei ti langhternak caah 11 mizengpa cu,“Tho, na ihphah i lak law inn ah va ṭin kan ti,” tiah a ti. 12 Mipa cu a tho, a ihphah aa lak zau i mikip hmai ah khan a kal, cu tikah mi cu an khuaruah a har tuk i, “Hi bantuk thil hi kan hmu bal rih lo,” ti in Pathian cu an thangṭhat.

Levi kawhnak

13 Galilee rili kam ah khan a va kal ṭhan; cun mi vialte cu a sin ah an ra i a cawnpiak hna. 14 Cuti aa chawh lioah khan Alfeas fapa Levi cu ngunkhuai zung i a ṭhut ko kha a hmuh,  cun amah kha, “Ka zul” tiah a ti. Cun a tho i a zulh.

Misual hna he rawl dumṭinak

15 Jesuh cu a inn i zanriah a ei a lio ah khan, ngunkhuai khawltu tlawmpal le misual hna cu Jesuh le a zultu hna cabuai ah khan an ṭhu ve; zei cah tiah annih lak i mitampi cu a zultu an si. 16 Cu tikah Farasimi phu i phungbia cawnpiaktu hna nih ngunkhuai khawltu le misual hna he a eiṭi kha an hmuh tikah a zultu hna kha, “Zei cah dah ngunkhuai khawltu hna le misual hna he rawl a ei,” tiah an ti. 17 Jesuh nih cu bia a theih tikah annih kha, “Siibawi a herh mi cu a dammi si lo in a zaw mi an si. Miding si lo in misual auh awk ah ka ra,” tiah a ti hna.

Rawl ulhnak kong ceihkhannak

18 Johan zultu hna le Farasimi hna cu rawlulhnak an tuah, cu tikah mi cheukhat cu an ra i amah kha, “Johan zultu hna le Farasimi zultu hna cu rawl an ul nain zei ruang ah dah na zultu hna cu an ulh ve lo?” tiah an ti. 19 Jesuh nih, “Nupi ṭhi tlangvalpa an sin a um chung poh cu a kawile hna cu rawl an ul kho hrim lai lo? 20 Sihmanhsehlaw nupi ṭhi tlangvalpa an sin in an kalpi caan a phan te lai, cu tikah an ulh te lai. 21 Aho hmanh nih thilpuan hlun belhnak ah thilthaan thar an hmang bal lo. An hman ahcun thilthaan thar nih a hlun mi cu a thleh chin hna lai i a pemnak a kau chin lai. 22 Cun aho hmanh nih mitsurzu a hrim kha saphawcua a hlun ah an rawn bal lo. An rawn a si ahcun mitsur zu nih khan saphawcua cu a pemh lai; cun mitsurzu a zut dih lai, cun saphawcua zong an rawk lai. Mitsurzu hrim cu saphawcua a thar ah rawn phung a si,” tiah a ti hna.

Sabbath ni ah favui zuunnak

23 Thil a cang mi pakhat cu Sabbathni fang lo lak i aa chawh lio ah khan a zultu hna cu favui sihpah in lam an sial. 24 Cu tikah Farasimi hna nih khan, “Zoh hmanh, zei cah dah Sabbath ni i tuah lo ding ti mi thil cu an tuah?” tiah an ti. 25 Cun anih nih, “David siangpahrang nih a herh caan, amah le a hnuzul hna an rawl a ṭaam lio ah khan, zei dah a tuah? – 26 Abiathar tlangbawi a si lio – zei tin dah Pathian innchung ah a lut i Tlangbawi hna lawng ei phung a si mi pekchanh mi changreu cu a ei, cun zei tin dah a cheu kha a hawile a pek ve hna ti kha nan rel bal lo maw?” ti in a leh hna. 27 Cun annih kha, “Minung hi Sabbath ca si lo in Sabbath hi minung ca ah ser a si, 28 cucaah mi Fapa cu Sabbath ni hmanh i Bawi a si,” tiah a ti hna.

                       3.A kut a zeng mi pa a damternak

      1. Ni dang ah pumhnak inn ah khan a va kal ṭhan, cun cuka ah cun a kut a zeng mipa pakhat a rak um. 2 Cun annih nih khan sualphawt khawhnak lam hmuh ding ruahchan in, Sabbath ni ah a damter hnga maw tiah an ngiat. 3 Amah nih a kut a zeng mipa cu, “Tho law a laifang ah dir tuah,” tiah a ti. 4 Cu hnu ah annih kha, “Sabbath ni ah hin ṭhatnak tuahnak nawl maw a um chiatnak tuahnak nawl dah; nunnak khamhnak nawl maw a um thahnak nawl dah?” tiah a ti hna. Nain zei hmanh an chim lo.  5 Cun a hung i mer i a zoh hna, an lung a khawn hringhran kha a hmuh hna tikah a ngaih a chia, cun a kut a zeng mipa kha, “Na kut samh tuah,” tiah a ti. A kut a samh i a kut cu a dam ṭhan. 6 Farasi pawl cu an chuak i Herod minung hna he amah thah nakding khua an khang colh, zei tin dah kan hrawh lai ti kha an ceih.

Mibupi nih Jesuh an zulh

           7 Jesuh cu a zultu hna he rilikamlei ah aa zuk, Galilee in mibu nganpi nih an zulh. Annih cu Judea ram in, 8 cun Jerusalem in, cun Idumea,  Jordan varal hna le Tair le Sidon in an si, a rak tuah mi thil kong a thei mi mi tampi cu a sin ah an ra.  9 “Mibupi ruang ah, mi nih amah kha an pah sual nakhnga lo lawng pakhat kha timhcia in chiahpiak awk ah a zultu hna cu a chimh hna. 10 Mi tam tuk a rak damter hna caah zawtnak a phunphun a ngei mi hna cu tongh awk ah amah cu an buk.11 Cun thlarau ṭha lo a ngei mi hna nih, an hmuhnak kip ah, a hmai ah an bawk i amah cu, ‘Nangmah cu Pathian Fapa na si,” ti in an au. 12 Sihmanhsehlaw anmah kha, “Midang aho hmanh theihter lo ding fak ngai in ralrinnak a pek hna.

Lamkaltu hleihnih a thim hna

          13 Atu cu tlang ah a kai i a duh mi kha a auh hna. Cucaah a sin ah an ra, cun 14 hleihnih kha a thim hna; annih cu a hawile si ding le thawngṭha phuan awk ah thlah ding mi le 15 khuachia kha nawlngeihnak in a ṭhawl ding an si.  16 Cucaah hleihnih cu a thim hna: Peter ti min a pek mi Simon, 17 Zebedi fapa Jeim le Khuari min a pek mi Jeim naupa Johan, 18 Andru, Filip, Barthelomew, Matthai, Thomas, Alfeas fapa Jeim le Thaddaeus, phunṭanh Simon 19 le amah a rawitu ding Judas Iskariot hna an si.

A chungkhar cu Jesuh kong ah an lungre a thei

           20 Inn ah a ṭin, cun mibupi tampi an rak i pumh ṭhan caah rawl ei caan hmanh an ngei kho lo. 21 Hihi a chungle nih an theih tikah amah zohkhenh awk ah an i thawh; annih nih, “A thluak a hmaan ti lo,” an ti.

Phungbia cawnpiaktu hna sualphawtnak

22 Jerusalem in a ra mi phungbia cawnpiaktu hna nih, “A chung ah Beelzebul aa hrolh, cun, “Khuachia bawi thawng in khuachia a ṭhawl hna,” tiah an ti. 23 Cucaah annih kha a auh hna i hi bianabia hi a chimh hna. “Zei tin dah Satan nih Satan a ṭhawl khawh lai? 24 Pennak pakhat cu aa ṭhen a si ahcun a hmun kho lai lo. 25 Cun chungkhar ah pakhat le pakhat an i doh ahcun a hmun kho ve lai lo. 26 Atu Satan cu amah le amah aa doh ahcun a hmun ve lai lo - cucu lohtlau hram aa thawk a si. 27 Sihmanhsehlaw miṭhawngpa kha ṭem hmasa lo in aho hmanh a innchung ah lut in a thilri kha an la kho lai lo. Cu hnu lawng ah a thilri cu an chuh khawh lai.

28 Biatak kan chimh hna, minung sualnak vialte, cun Pathian thangchiatnak vialte cu ngaihthiam a si lai; 29 sihmanhsehlaw Thiang Thlarau a thangchiat mi poh cu ngaihthiam an si bal lai lo, zungzal sualnak a tuah cang. 30 Hihi cu, “A chung ah thlarau thiang lo aa hrolh,” an ti caah a si. 

Jesuh chungkhar taktak

31A nu le a unau hna cu an rak phan, inn leng ah an dir, cun bia an cah i an auhter.  Mibupi nih an buk liote ah khan, “Zoh hmanh, ‘Na nu le na unau hna le na farle hna cu nangmah an i kawl i leng ah an dir ko,” ti mi bia cu a sin ah a phan. 33 Cu tikah amah nih, “Aho dah ka nu le ka unaule hna cu an si?” ti in a leh hna. 34 Cun a velchum i a ṭhu mi hna kha a zoh hna i anih nih, “Hika ah hin ka nu le ka unaule hna cu an um ko hih.  35 Pathian duhnak a tuah  mi poh cu ka unau le ka farle ka nu an si,” tiah a ti hna.

         4Thlaici vorhtu bianabia

1. Rili kam ah khan a cawnpiak ṭhan hna, a velchum i aa pum mi cu an tam tuk caah ti cung i lawng chung ah a lut i a ṭhu. Mibupi cu rilikam vawlei ah khan an ṭhu. 2 Bianabia in tampi a cawnpiak hna, cun a cawnpiak hna lio ah khan annih cu, 3 “Ngai hmanh u, thlaici vorhtu cu thlaici vorh awk ah aa thawh ti usih. 4 Atu thil a cang mi cu, thlaici a vorh ah khan, a cheu cu lamkam ah an tla, cun vate cu an ra i an ei dih hna. 5 A cheu cu vawlei a tlawmnak lung lak ah an tla i chikkhatte ah an kheo zau, vawlei a pan caah, 6 ni a hung chuah tikah ni nih a emh, cun a hram a thuh lo caah, a uai zau. 7 A cheu cu hling lak ah an tla, hling cu an tho i a khuh dih hna, cu tikah theipar zei hmanh an chuahpi lo.  8 Cun a cheu cu vawlei ṭhatnak ah an tla, an ṭhawng an sang, cun theipar tampi an chuahpi, a theihtlai cu a let sawmthum, a let sawmruk, a let zakhat tiang an si,” tiah a ti. 9 Cun, “Ngaihnak hna a ngei mi poh nih ngai hna seh,” tiah a ti hna.

Zei ruang ah dah Jesuh nih bianabia in a chim

10 Amahte lawng in a um lio ah khan, hleihnih hna nih, an phu ah aa tel mi midang hna he, hi bianabia sullam an hal. 11 Amah nih, “Nannih cu Pathian Pennak biathli pek nan si, sihmanhsehlaw lenglei mi hna tu cu zeizongte hi bianabia in a ra, cucu

12 “Annih cu an zoh len nain an hmuh bal nakhnga lo, an ngaih len nain an fian bal nakhnga lo; cucu, an nun an i thlen i damnak an hmuh nakhnga lo caah a si,” tiah a ti hna.

Thlaici vorhtu bianabia fianternak

         13 Annih kha, “Hi bianabia hi nan lung a fiang lo maw?’ Cuti a si ahcun zei tin dah a dang bianabia hna cu nan fian khawh lai?’ 14 Thlaici vorhtu nih a vorh mi cu Pathian bia a si. 15 Pathian bia vorhnak lamkam i a um mi hna cu Pathian bia an theih tlawmpal ah Satan cu a ra i an thinlung chung i vorh mi Pathian bia a lakpiak mi hna an si. 16 Cu bantuk in lunglak i vorh mi bantuk minung hna cu, Pathian bia kha voikhatnak an theih tikah lunglawmhnak in an cohlan colh. 17 Sihmanhsehlaw thukpi ah an hram an bunh lo caah an hmun lo, Pathian bia ruang ah hneksaknak le hremnak an ton sual ahcun chikkhatte ah an tlu zau. 18 Cun hling lak i vorh mi bantuk minung an um. 19 Hi hna nih hin Pathian bia cu an theih, sihmanhsehlaw vawleicung retheinak, rumnak i lemsoinak le a dang duhfahnak vialte an chuak i Pathian bia cu an khuh dih, cucaah zei hmanh an tlai lo. 20 Cun vawlei ṭhatnak ah vorh mi bantuk minung an um; Pathian bia kha an theih i an cohlan i a theipar kha a let sawmthum, a let sawmruk, a let zakhat tiang an chuahpi,” tiah a ti hna.

Jesuh cawnpiaknak cohlannak le chanhchinnak

             21 Cun hi zong hi a chimh hna: “Mei-inn cu sei le ihkhun tang chiah ding ah maw an luhpi? Meitung ah chiah ding a si lo maw? 22 Zei cah tiah phuan lo ding mi thil zei hmanh a um lo, khuaceu ah chuahpi lo ding biathli zei hmanh a um lo.  23 Ngaihnak hna a ngei mi poh nih an ngaih awk a si!.

Tahnak bianabia

           24 Cun hi zong hi a chimh hna: “Atu nan theih mi vialte hi i chinchiah u. Nan hman mi tahnak cu nanmah tahnak ah hman a si ve lai - cun tam deuh zong nan co rih lai. 25 A ngei mi poh cu chap an si lai; a ngei lo mi poh cu a ngeihcia mi hmanh lakpiak a si lai,” tiah a ti.

Amah tein a ṭhang mi thlaici bianabia

        26 Hi zong hi a chim rih hna: “Vancung Pennak cu hi bantuk hi a si. Mi pakhat nih vawlei ah thlaici a vorh. 27 Nikhat le zankhat a it, a hun i hlauh tikah, thlaici cu a keuh i a ṭhang cang; zei tin a si a hngal lo. 28 Vawlei nih amah tein a pakhatnak ah a kungno, cun a vui, cun a mu he a khat mi a fang kha a chuahter.  29 Cun fang cu a hmin, a cut tikah, thlaizun caan a phak caah hleh hram a thawk colh.”

Anṭam ci bianabia

          30 Hi zong hi a chim hna: “Vancung Pennak cu zei he dah kan tahchunh khawh rih lai?  Zei bianabia dah kan hmuh rih hnga? 31 Vorh lio ah vawlei cung thlaici lak i a hme bik mi anṭam ci bantuk a si. 32 Nain voikhat vorh hnu in cun  ramkung lak i a ngan bik mi ah aa chuah i van vate hna nih a naidem ah an i dinh khawh nakhnga a ṭengnge cu a zam hna.

Bianabia hmannak sullam

        33 Hi bantuk bianabia tampi hmang in Pathian bia cu a chimh hna, an lung a fian khawh chung in a fian naklai a cawnpiak hna. 34  Bianabia lawng in a cawnpiak hna, sihmanhsehlaw a zultu hna tu cu zeizongte kha anmahte lawng an um lio ah a fianh hna. 

Thlichia daihternak

         35 Cu ni zanlei a phak tikah annih kha “Khattelei ral ah va kal hna usih,” tiah a ti hna. 36 Mibupi kha kaltak in amah cu khati lawng chung a um bu khan an kalpi, a dang tilawng zong amah he an um ve. 37 Thlichia a tho i ti cu lawng chung ah an luh dih caah a phum hnik cang. 38 Sihmanhsehlaw amah cu tilawng lulei ah khan chantling i tlinh in aa hngilh huar ko. An ṭhangh i amah kha, “Bawipa, kan thi dih cang lai hih, na zei a poi lo maw?” tiah an ti. 39 Cu tikah aa hlau i rili cu, “Atu ngol law dai tein um tuah,” tiah a hro. Thli cu a dai, rili cu dai zirziar in a um. 40 Cun, “Zei ruang ah dah cu tluk in nan ṭih?’ Zumhnak nan ngei ti lo maw?” tiah a ti hna. 41 Annih cu an khuaruah a har tuk i pakhat le pakhat kha, “Hihi aho dah a si hnga? Thli le rili hmanh nih pei a nawl an ngaih hi,” tiah an i ti.

                5.Gerasene i khuachia

          1 Annih cu tidil ral i Jerasinmi hna ram kha an va phan, 2 cun lawng chung in a hung chuah ah khin, thlarau thiang lo a ngei mi pakhat cu thlanhmun in a rak chuak i amah cu a rak fuh colh. 3 Mipa cu thlanhmun ah khua a sa i aho hmanh nih, thirhri hmanh in an tlai kho lo, 4 zei cah tiah cikcin le hreng in voi tampi an ṭem nain cikcin in aa phoih i hreng cu a chah dih hna, cun aho hmanh nih an tlai kho lo. 5 Chun nitlak le zan khuadei, thlaan lak le tlangpar hna ah, a aukhuang i amah le amah kha lung in fahnak aa pe tawn. Jesuh cu lamhlatpi in a hei hmuh tikah a va tli i a hmai ah cun a kun, cun a aw dih-um in, “Cungnung bik Pathian Fapa, Jesuh, zei ti tuah dah na ka duh? Pathian min in ka hrem sawh hlah!” tiah a ti. 8 Zei cah tiah Jesuh nih amah cu, “Thlarau thiang lo, mipa chung in ra chuak,” a ti caah a si. 9 “Na min aho dah a si,” ti in a hal tikah amah nih, “Ka min cu Legion a si, zei cah  tiah kannih cu kan tampi,” tiah a leh.10 Cun annih kha cu peng cun a ṭhawl hna nakhnga lo Jesuh cu biatak tein a nawl. 11 Cu lio ah cun tlangram ah vokruun nganpi an tlonglen ko, 12 cu tikah thlarau thiang lo nih, “Vokruun ah kan thlah ko, an chung ah lut ko usih,” ti in a nawl. 13 Cucaah a chuahter hna. Cu tikah thlarau thiang lo hna cu an chuak i vok hna chung ah an lut, cu tikah vokruun thonghnih hrawng cu chengpalang in rili ah an zuang i an thi dih. 14 Cu tikah a cawngtu hna cu an zaam i thil an ton mi cu khualipi le a pawngkam khua hna ah khan an va chimh hna; cun mi cu zei dah a cang taktak ti hmuh awk ah an ra chuak. 15 Jesuh sin ah an rak phan i khuachia nih a tuah mipa cu a rak ṭhu ko - Legion nih an rak tuah mi pa cu -thilpuan kha ṭhate in aa hruk i a lung a fim ngai – cu tikah an ṭih ngai. 16 Cun a hmu mi hna nih khan khuachia nih a tuah mipa le vok cung ah a cang mi thil hna kong cu an chimh hna. 17 Cu tikah an pawngkam in a chuah nakhnga Jesuh cu an nawl. 18 Lawng chung a luh ah khan  khuachia a rak ngei mi pa nih khan a sin i kal ve awk ah a nawl.  19 Sihmanhsehlaw Jesuh nih aa zulhter lo, amah tu kha, “Na mi hna sin ah va kir law Bawipa nih a zaangfahnak in an tuahpiak mi kha va chim hna,” tiah a ti. 20 Cucaah mipa cu a kal i Dekapoli ram ah khan Jesuh nih a tuahpiak mi vialte cu a thanh. Cun mikip cu an khuaruah a har dih.

Jairus fanu a nunter ṭhannak le thichuak mi nu a damternak

21Jesuh cu khatlei ral ah lawng in a peh ṭhan tikah mibu nganpi nih an zual i tidil kam ah khan a um. 22 Cun Jairus an ti mi pumhnak inn uktupa a hung chuak, amah kha a hmuh tikah a ke hram ah a bawk i amah kha, 23 “Ka fanute a zual ngai, khamh a si i a nun nakhnga, ra law a cung ah na kut rak chuang hram ko,” ti in a nawl. 24 Jesuh cu amah he a kal i mibupi nih an zulh i a zual in an zual.

25 Mahka ah cun kum hleihnih chung a thi a chuak mi minu pakhat a um. 26 Siibawi tampi sin ah aa thlop i a ngeihchiah zong a dih cang nain damlei si lo in a zual chin. 27 Jesuh thawng kha a theih tikah zapi lak ah cun hnulei in a ra i Jesuh puan kha a tong. 28 Amah nih, “A puante tal ka tongh khawh ahcun ka dam ko lai,” tiah a zumh. Cun hmakhatte ah a thichuah cu a pit i a dam kha a takpum nih a hngalh. 30 Cun hmakhatte ah Jesuh nih a chung in huham a chuah kha a hngalh tikah mibupilei ah aa mer i, “Aho dah ka puan a tawng?” tiah a ti hna. 31 A zultu hna nih khan, “Mibupi nih a zual in an in zual cu na hmuh ko ṭung; zei tin dah, “Aho dah a ka tong na ti?” tiah an ti. 32 Sihmanhsehlaw cutin a tuah mi cu aho a si ti hngalh a duh caah a velchum kha a zoh. 33 Cu tikah minu cu a cung i a cang mi thil kha a hngalh caah ṭih le ther bu in a hung chuak, a kehram ah a bawk i a si ning vialte kha a chimh dih. 34 Jesuh nih “Ka fanu, na zumhnak nih an damh cang, daihnak he va kal law na inntuarnak in luat cang ko tuah” tiah a ti.

35 Bia a chim lio ah khan, pumhnak inn uktupa inn in cheukhat cu an ra i amah kha, “Na fanu cu a thi cang, zei cah dah na Bawipa cu retheih na pek duh ti?” tiah an ti. 36 Sihmanhsehlaw an chim mi cu Jesuh nih a thli tein a theih ve i pumhnak inn uktupa kha, “Phang hlah; zumhnak lawng ngei ko,” tiah a ti. 37 Cun Peter, Jeim le Jeim naupa Johan dah ti lo aho hmanh amah he kal ding ah a onh hna lo. 38 Cucaah pumhnak inn uktupa inn ah khan an ra, cun i sumnak um lo in ṭahnak le hramnak lawngte a si kha a hmuh. 39 A chung ah a lut i annih kha, “Hi ngaihchiatnak le ṭahnak vialte hi zei dah an si?’ Ngakchia cu a thi lo, aa hngilh,” tiah a ti hna. 40 Sihmanhsehlaw an nihsawh men. Cucaah leng ah a chuahter dih hna, ngakchia i a nu le a pa le amah phu hna lawng kha i ṭhit in ngakchia a ihnak khaan ah cun a lut. 41 Cun ngakchia kha a kut in a lak i amah kha, “Thalitha kum,”tiah a ti, a sullam cu, “Nute, tho tuah kan ti,” tinak a si. 42 Nute cu hmakhatte ah a tho i aa chawk len, zei cah tiah minu cu kum hleihnih a si cang.  43 Hmakhatte ah khuaruahharnak in an khat, cun kha kong cu aho hmanh theihter lo ding ah fakpi in ralrinnak a pek hna, cun ei awk pakhatkhat pek awk ah a chimh hna.

               6. Nazareth a va tlawnnak

            1.Kha pengtlang kha kaltak in, a chuahnak khua ah a kal, cun a zultu hna nih an zulh. 2Sabbath ni a phanh tikah pumhnak inn ah a cawnpiak hna, a bia an theih tikah a tam-u cu an khuaruah a har. Annih nih, “Hipa nih hi vialte hi khua zei ah dah a va lak? Hi a hmuh mi fimnak hi zei fimnak dah a si, cun a sin in a cang mi khuaruahharnak hna hi zei bantuk khuaruahharnak hna dah an si?  3Hihi lehtama, Maria i fapa, James le Josef, Judas le Simon hna i unau a si hrimhrim ko? A farle hna zong hika ah hin kanmah he an um ve a si lo maw?’ tiah an ti. Cuti cun an cohlang duh lo. 4Cu tikah Jesuh nih annih kha, “Profet cu a ram, a chungle hna lak le a inn lawng ah nautatnak a tong,’ tiah a ti hna, 5Cucaah a kut chuan in tlawmpal a damter hna dah ti lo cu khuaruahharnak tampi a tuah kho lo.  6 Zumhnak an ngeih lonak kha a khuaruah a har.

Hleihnih hna mission

         7Khuatelei ah khan a kal i a cawnpiak hna. Cun hleihnih kha a kawh hna i pahnih pahnih in a thlah hna i thlarau thiang lo hna ṭhawl khawhnak nawl a pek hna.8 “Cun khualtlawnnak ah thiangṭhunh dah ti lo, - changreu, zaal le tangka zong i ken hlah u. 9Kedan cu nan i danh lai, sihmanhsehlaw angkileng pahnih i ken hlah u,” tiah a chimhchih hna. 10Cun annih kha, “Khuazei a si zong ah inn pakhatkhat ah nan luh ahcun kha peng in nan chuah hlan cu inn ah cun um u. 11Cun hmunkhat ah an i cohlan hna lo i nan bia an ngaih duh lo a si ahcun, nan chuah tikah tehte caah nan ke i leidip kha thin hnawhtak hna u,” tiah a ti hna. 12Cucaah sual ngaihchihnak thawngṭha thanh awk ah an i thawh, 13khuachia tampi kha an ṭhawl hna, cun mizaw tampi kha chiti an thuh hna i an damter hna.

Herod le Jesuh

         14 Herod siangpahrang nih a thawng cu a theih ve, zei tin tiah atu cu a min a thang tuk cang. Micheu nih, ‘Baptisma petu Johan kha thihnak in a nung ṭhan, cucaah a sin in khuaruahhar ṭhawnnak a chuak,’ an ti. 15A dang  nih, “Amah cu Elijah a si,” an ti, a dang ve nih, “Amah cu kan ngeih tawn mi profet hna bantuk profet pakhatkhat a si ko,” tiah an ti. 16Sihmanhsehlaw Herod siangpahrang nih hi kong a theih tikah, ‘Amah cu a lu ka tan mi Johan a si; thihnak in a tho ṭhan cang,’ tiah a ti.

Baptisma petu Johan lu tannak

          17 Johan tlaih awk ah mi a rak thlahtu kha hi Herod ṭhiamṭhiam a si, cucu a ṭhit mi a nau Philip nupi Herodias ruang ah a si, amah kha thong ah a rak hren. 18Zei cah tiah Johan nih Herod cu, ‘Na naupa nupi na ṭhit cu a phung a si lo,’ tiah a rak ti.  19Cucaah Herodias cu a thin a hung i amah kha thah a duh, sihmanhsehlaw a that kho lo, 20a ruang cu Herod nih Johan cu mi ṭha le midingfel a si ti kha a hngalh caah a ṭihzah i him tein a chiah. A chim mi bia a theih tikah a lung si a vaang, nain a bia ngaih cu a duh ngai.

        21 Herod nih a chuah ni ah, a zung bawi hna, a ralbawi hna le Galilee peng hruaitu upa deuh hna kha, rawldanghnak a tuahpiak hna tikah Herodias ca ah caanrem a phan. 22 Herodias fanute cu a rung lut i a laam tikah Herod le a bawile hna cu an lung a tling ngaingai; cucaah siangpahrang nih nute cu, “Na duh mi poh ka hal law kan pek lai,” tiah a ti. 23Cun chiatserh in bia a kamh i, “Na ka hal mi poh, ka ram i hnarcheu tiang hmanh, kan pek lai,” tiah a ti. 24 Nute cu a chuak i a nu cu, “Zei dah ka hal lai?’ tiah a va ti. A nu nih, “Baptisma petu Johan lu,” tiah a rak leh. 25Nute cu Siangpahrang sin ah khulrang in a va tli i amah kha, “Baptisma petu Johan lu kheng in na ka pek ahcun ka duh,’ tiah a va chimh.  26Siangpahrang cu a ngaih a chia ngaingai, sihmanhsehlaw, chiatserh in bia aa kamnak le a khual hna kha a ruah hna tikah nute a kamh mi bia cu hrawh a duh lo. 27Hmakhatte ah Siangpahrang nih Johan lu rak put awk ah ralvengtu pakhat cu a thlah colh. Cupa cu a chuak i thong chung ah a lu cu a va tan; 28Cun a lu cu kheng in a rak put i nute cu a rak pek, cun nute nih a nu a pek. 29Johan zultu hna nih hi kong an theih tikah an ra i a ruak cu an lak i thlaan pakhat ah an vui.

Changreu khuaruahharnak a voikhatnak

         30Lamkaltu hna cu Jesuh he an rak i fon ṭhan i an tuah mi le an cawnpiak mi hna vialte kha an chimh, 31cun annih kha, “Nanmahte lawng nan um khawhnak hmunking ah rak chuak ulaw tlawmpal i din tuah u,” tiah a ti hna; zei cah tiah mi lutchuak an tam tuk caah rawlei caan hmanh an ngei lo.  32Cucaah anmah lawngte an um khawh nakding hmunking pakhat ah lawng in an i thawh. 33Sihmanhsehlaw mi nih an kal kha an hmuh hna i mi tampi nih an i chinchiah hna; cucaah khuakip in khulrang in an i thawh i anmah hlan ah a hmun cu an va phan. 34Tikam a vun kai ah khin mibu nganpi cu a hmuh hna; annih cu khaltu ngei lo tuu bantuk an si caah a zaangfah hna i caan lak in a cawnpiak hna. 35Atu khua a tlai tuk cang, cucaah a zultu hna cu an ra i amah kha, “Hihi a kinnak ram a si i khua zong a hnu tuk cang, 36cucaah pawngkam lo le khua hna ah ei awk pakhatkhat an i cawk khawh nakhnga annih cu thlah ko hna,” tiah an ti. 37Anih nih, “Ei awk zeimaw pe ko hna u,” tiah a ti hna. Annih nih, “Kan kal lai i maw anmah ca changreu cawknak ah denari zahnih cu kan va hman lai?” tiah an ti. 38Amah nih, “Changreu hlum zeizat dah nan ngeih? Va zoh tuah u,” tiah a ti hna. An va zoh tikah annih nih,’Par nga, cun nga pahnih,” tiah an ti. 39Cu tikah mi kha ram cung ah a bubu in a ṭhutter hna, 40 mi cu vawlei ah khan sawmnga bu, zakhat bu, ti in a kulh in an ṭhu. 41Cun changreu panga le nga pahnih kha a lak, van a cau i thluachuah bia a chim; cun chang cu a cheu i phawt awk ah a zultu hna kha a chanh hna. Nga pahnih zong a phawt dih hna. 42An zapi tein an duhzat an ei. 43Changreu le nga ṭilṭawt cu sei hleihnih khat an khawmh. 44A ei mi hna cu pa lawngte thongnga an si.

Jesuh ti cung ah a kal

45Cun hmakhatte ah a zultu hna cu tilawng ah a kaiter hna i Bethsaida pawng khattelei ral ah khan a kalter chung hna i amah cu mibupi kha a thlah hna. 46Anmah kha a thlah hna hnu ah amah cu thlacam awk ah fingbo pakhat ah a kai. 47Zanlei a hung si tikah lawng cu lamhlapi ah khin a um ko, cun amah cu amah te lawng rilikam ah a um . 48Anmahlei ah thli a hran caah har ngai in lawng an zah kha a hei hmuh hna; cun zanlei suimilam pali hrawng ah khin, rili cung in a kal i an sinah a rak ra. Anmah kha lonh hnik a zal, 49sihmanhsehlaw rili cung i a kal kha an hmuh tikah mithla ah an ruah i an ai,  50zei cah tiah an dihlak in an hmuh i an lau tuk. Sihmanhsehlaw hmatkhatte ah a chawnh hna i annih kha, “Hnangam tein um u!  Keimah ka si! ṭih hlah u,” tiah a ti hna. 51Cun lawng cung ah a kai ve i thlitu cu a dai. An khuaruah a har tuk ah zei hmanh an chim kho lo, 52zei cah tiah changreu khuaruahharnak sullam kha an hngal rih lo; an lung a pem rih lo.

Genesaret i a damter hna nak

53Rili an tan hnu ah Genesaret an phan i cuka ah cun an i din. 54Lawng in an hung chuah cangka in mi nih amah cu an hngalh colh, 55cun tlangram vialte kha an vak i amah a um an tinak poh ah mizaw cu an ihphah he an rak ratpi hna. 56A kalnak poh, khuate ah siseh, khuapi ah siseh, lothlam ah siseh, mizaw kha lamlai ah an ihter hna, cun a puanpar tal tonghter hna awk ah amah cu an nawl. Cun amah a tawng mi vialte cu khamh an si.

6.  Farasi hna phunglam

       Farasi hna le Jerusalem in a ra mi phungbia cawnpiaktu cheukhat hna cu a pawngte ah khan an i pum, 2 cun annih nih a zultu cheukhat hna cu kut hnawm, i ṭawl lo in, an ei kha an hmuh hna. 3Zei cah tiah Farasi hna, cun Jew hna zong upa hna phunglam kha an zul i an kut kha an kiu tiang ṭawl lo in an ei bal lo, 4cun dawr in an ṭin tikah ti i theh hmasa lo in an ei bal lo. Cu lawng si lo in darhrai, um, kheng ṭawlnak kong ah an pupa hna nih an chanhchin mi hna zulh awk tampi an ngei rih. 5Cucaah Farasi le phungbia cawnpiaktu hna nih amah cu, “Zei cah dah na zultu hna nih upa hna phunglam kha upat lo in an kuthnawm in an ei?’ ti in an hal. 6Amah nih, “Hi cathiang ah hin profet Isaiah nih nannih midepde hna kong zei tluk hmaan in dah a rak chim chung. A chim mi cu:

“Hi mi hna nih hin an kaa lawng in an ka upat, an lungthin cu keimah he an i hlat tuk. 7Annih i upatnak cu man a ngei lo; An cawnpiak mi fimnak cu zei hmanh si lo in minung nawlbia men an si.

8Minung phunglam zulh duh ah Pathian nawlbia cu nan hlawt,’ tiah a leh hna. 9Cun annih kha, “Nan phunglam kilven duh ah zeitluk fim in dah Pathian nawlbia cu nan hlawt! 10Zei  cah tiah Moses nih: “Na nu le na pa va upat hna, cun, a nu le a pa chiat a serh mi cu thah a si lai,’tiah a ti. 11Sihmanhsehlaw nannih nih, ‘Mi pakhatkhat nih a nu asilole a pa kha: “Nangmah bawmhnak ca ah ka hman ding mi poh cu Korban (cucu, Pathian sin pekchanhmi)’ a si a ti ahcun 12 cu caan thawk in a nu le a pa a bawmh zei hmanh a herh ti lo,’ nan ti. 13Hiti hin nannih nih nan i chanhchin mi nan phunglam hna ruang ah Pathian bia cu hmual ngei lo ah nan ser. Cun hi bang hin tampi nan tuah rih,” tiah a ti hna.

A thiang mi le a thiang lo mi kong

14Mi cu a sin ah a auh ṭhan hna i annih kha, “Nan dihlak in ngai ulaw nan lung fiang seh. 15Leng in a lut mi zei hmanh nih mi kha a thurter lo; a chung in a hung chuak mi nih mi cu a thurter. 16Ngaihnak hna a ngei mi poh nih an ngaih awk a si,” tiah a ti.

17 Mibupi he aa hlatnak ah a um mi inn pakhat i a luh tikah a zultu hna nih kha bianabia kong cu an hal. 18 Anih nih, “Nannih zong nan lung a fiang lo maw?” Leng in chunglei a lut mi zei hmanh nih mi a thurhnawmhter kho lo, 19zei cah tiah annih cu lungthin chung ah lut lo in paw chung ah a lut i tanglei in a chuak. (Cucaah rawl vialte cu a thiang ti a thanh). 20 Cun a peh rih mi cu, mi a thurtertu cu mi chung in a chuak mi kha a si. 21 Zei cah tiah chunglei in, lungthin in, ruahnak ṭha lo, nulepa sualnak, firnak, lainawnnak, ṭangdangpom sualnak, hakkauhnak, zertiannak, hlenthawinak, dawhcah lonak, nahchuahnak, mithangchiatnak, porhlawtnak le hruhnak, vialte cu an chuak. 23 Hithil ṭha lo vialte cu chunglei in a hung chuak i mi kha a thurter hna,” tiah a ti hna.

III:   GALILEE PENG LENG A KHUALTLAWNNAK

Siro-Foinisia minu i fanu a damter

24 Cu hmun cun a chuak i Tair ramlei ah aa thawh. Cuka ah cun inn pakhat ah a lut i cuka i a um cu aho an hngalh hmanh a duh lo, sihmanhsehlaw aho hmanh hngalh lo cun a um kho lo.  25 Hmakhatte ah thlarau thiang lo nih a tuah mi fanu a ngei mi minu pakhat nih amah kong cu a theih caah a rak lut i a kehram ah a bawk. 26 Atu hi nu cu a chuahnak in Siro-Foinisia mi, miphun dang a si i a fanu chung i khuachia kha ṭhawlpiak ding in a nawl. 27 Cu tikah amah kha, ‘Mah fale cu pek hmasa ding a si ko, zei cah tiah fale hna rawl kha i lak in uifa tete hna pek cu a dik lo,” tiah a ti. 28 Sihmanhsehlaw minu nih, “A si ko bawipa, asinain cabuai tang i a ṭiltlawt cu ui fa tete hna zong nih an ei ve ko,” ti in a leh. 29 Cun anih nih minu cu, “Hiti na chim caah nuam tein na ṭin kho; khuachia cu na fanu chung in a chuak cang,” tiah a ti. 30 Cucaah minu cu inn ah a va ṭin i ngaknute cu ihkhun cung a rak it i khuachia cu a rak chuah cang kha a hmuh.

Hnachet mi damternak

31Tair peng in a rak kir tikah Sidon lamlei in, Galilee Tililei ah a kal mi lam kha a zawh i Dekapoli peng kha a laimacer in a tan. 32 Cun a holh a har i a hna a chet mipa cu Jesuh sin ah an ratpi, cun a cung i a kut chuan nakhnga an nawl. 33 Amah nih mibupi he an i hlatnak, anmahte lawng an um khawhnak ah a kalpi, a kutdong cu a hnakhaw chung ah a hrolh i a cil in a lei cu a tongh. 34 Cu hnu ah van a cau i a thawpi a chuah, cun mipa kha,“Effatha” tiah a ti,  cucu “I hung tuah” tinak a si. 35 Cun a hna cu an awng, cun hmakhatte ah a lei cu a cang ṭhan i fiang tein a holh kho. 36 Cun hi kong hi aho hmanh chimh lo ding in Jesuh nih a cah hna. Sihmanhsehlaw a thlauh deuhdeuh hna an phuan deuhdeuhnak tu a si. 37 Cun an khuaruah a har ning cu chim khawh a si lo, annih nih, “A tuah mi vialte cu an ṭha, hnachet kha a theihter i holh-aa cu bia a chimter,” tiah an ti.

                8.     A voihnihnak changreu khuaruahharnak

        1.Cun mibu nganpi an rak i pum ṭhan, cun ei awk zei hmanh an ngei lo. Cucaah a zultu hna cu a sin ah a auh hna i annih kha, 2“Hi vialte hna hi ka zaang an fak, atu hi keimah he nithum chung an um cang i ei awk zei hmanh an ngei lo. 3Rawlṭam in ka ṭinter hna ahcun lampi ah an buhri sual lai, micheu cu lamhla pi in a ra mi an si,” tiah a ti hna. 4 Zultu hna nih  khan, “Hi thetse ram ah hin aho nih dah hi vialte hna ca za ding in changreu cu a hmuh khawh lai,” ti in an leh. 5 Annih kha, “Hlum zeizat dah nan ngeih,” tiah a hal hna. Cu tikah annih nih, “Hlum sarih,” tiah an leh. 6 Mibupi cu vawlei ah ṭhutter ding in a chimh hna, cun changreu hlum sarih kha aa lak i lawmhnak bia a chim hnu ah, a cheu i phawt awk ah a zultu hna cu a pek hna, cun annih nih mibupi kha an phawt hna. 7 Nga hme tete zong kha tlawmpal an ngei rih, cun hi hna zong kha thluachuah a pek ve hna i phawt awk ah a chimh hna. 8 An duhzat in an ei i a tang mi cu seisarih khat in an char. 9 Mi cu thongli tluk an si.10 Annih kha a kalter hna, cun hmakhatte ah, a zultu hna he lawng cung ah an kai i Dalmanutha ram ah an kal.

Farasi pawl nih vancung in hmelchunhnak an hal

11Farasi pawl cu an rak chuak i amah he bia an i ruah; hneksak duh ah van in hmelchunhnak an hal.  12  Cu tikah a thawpi chuah in, “Zei ruang ah dah hi chan minung nih hin hmelchunhnak an hal hnga? Biatak kan chimh hna, hi chan minung hi zei hmelchunhnak hmanh pek an si lai lo,” tiah a ti .13 Cun, annih kha chiata in lawng ah a kai i khattelei ral ah a kal.

Farasi le Herod i thilnu

14 A zultu hna cu changreu ken an philh i lawng chung ah cun changreu hlumkhat lawng an ngei. 15  Cu tikah ralrinnak a pek hna,  “Nan mit au ulaw Farasi hna thilnu le Herod thilnu cu i ralring u,” tiah a ti hna. 16 Annih nih pakhat le pakhat kha, “Changreu kan i ken lo ruang ah a si,” an i ti. 17 Cucu Jesuh nih a hngalh i annih kha, “Zei ruang ah dah changreu a um lonak kong cu nan chim? Nan lung a fiang rih lo maw? nan theithiam rih lo maw?  Nan lung maw a pit? 18 A hmu lo mi mit le a thei lo mi hna maw nan ngeih? Asilole nan i cinken rih lo maw? 19 Minung thongnga ca ah changreu panga ka cheu tikah a ṭiltlawt sei zeizat khat dah nan char,” tiah a ti hna. Annih nih, “Hleihnih,” an ti. 20 Cun minung thongli ca ah changreu hlumsarih ka cheu tikah a ṭiltlawt sei zeizat khat dah nan khawmh,”a ti hna. Annih nih, “Seisarih,” ti an leh. 21 Cun annih kha, “Nan theithiam rih lo maw?” tiah a ti hna.

Bethsaida i mitcaw damternak

22 Bethsaida kha an phan i mizeimaw nih mitcaw pakhat cu a sin ah an ratpi i a kut in a tongh nakhnga an nawl. 23 Mitcawpa cu a baan in aa hruai i khualeng ah a chuahpi. Cun a mit kha a cil a buah i a cung ah a kut a chuan, cun “Zei tal na hmu khawh maw?” tiah a hal. 24 Khua hmuh hram aa thawk mi pa nih cun, “Minung cu ka hmuh ko hna, nain annih cu an vah tikah thingkung ko an lo,” tiah a leh.” 25 Cu tikah a mit cung ah a kut a chuan ṭhan i mipa cu fiang tein khua a hmu; a dam; cun zeizongte kha fiangte le tliang ngai in a hmuh khawh. 26 Cun Jesuh nih mipa cu, “Khuachung hmanh ah va lut hlah,” tiah bia a cah i inn ah a ṭinter.

Peter nih a zumhnak a phuan

27 Jesuh le a zultu hna cu Sisaria Filipi pawngkam khua hna tlawn ah an i thawh. Lam ahcun a zultu hna cu hi biahalnak hi a tuah hna: “Mi nih aho a si an ka ti dah?” tiah a ti hna.  28 Annih nih, “Baptisma petu Johan, micheu nih Elijah, adang nih profet pakhatkhat a si’ an in ti,” tiah an ti. 29 Cun annih kha, “Nannih tah aho a si nan ka ti dah?” tiah a hal hna. Peter cu a tho i amah kha, 30 “Nangmah cu Khrih na si,” tiah a ti. Cun a kong cu aho hmanh an chimh hna nakhnga lo ralrinnak a pek hna, “tiah a ti hna.

A temh-innak kong a voikhatnak a chim

31 Cun annih kha, “Mi Fapa cu temh-innak fak ngai huah ding in khaukhih mi a si, upa hna le tlangbawi ngan hna le phungbia cawnpiaktu hna nih an hlawt lai, an thah lai, cun nithum hnu ah a tho ṭhan lai,” ti in a cawnpiak hna; 32 cun hi vialte cu fiang tein a chimh hna. Cu caah Peter nih amah kha hmun dang ah a kalpi i a mawhchiat. 33 Sihmanhsehlaw aa mer i a zultu hna kha a hmuh hna, cun Peter cu a mawhchiat i amah kha, “Satan, ka hnulei ah i thawn! Zei cah tiah Pathian bang khua na ruat lo, minung bang in na ruah, “tiah a ti.

Khrih zultu si can ning

34 Mipi le a zultu hna kha a sin ah a kawh hna i annih kha, “Mi pakhatkhat nih ka hnuzul si a duh ahcun amah le amah i hlaw seh, a vailam i put seh law ka zul seh. 35 A nunnak khamh a duh mi nih a nunnak a sung lai i keimah ruang le thawngṭha bia ruang ah a nunnak a sung mi nih a nunnak a khamh lai. 36 Mi pakhat cu vawlei pumpaluk hi co hmanh seh law a nunnak a sungh ahcun zei dah a ṭhahnem? 37 A taktak ti ahcun mi pakhatkhat nih a nunnak cu zei in dah a cawk ṭhan khawh lai? 38 Atu chan ṭha lo le zumhtlak lo chan ah hin keimah le ka bia a zahpi mi poh cu Mi Fapa zong nih a Pa sunparnak in van mithiang hna he a rung ṭum tikah a zahpi ve lai,” tiah a ti hna.

                    9 .Muisam thlennak

        Cun annih kha, “Biatak kan chimh hna, hika i a dir mi hna lak ah hin Pathian Pennak cu a  ṭhawnnak he a rat hlan lo thihnak a tep  lo ding nan um,” tiah a ti hna.

Muisam thlennak

2 Niruk hnu ah khin, Jesuh cu Peter le Jeim le Johan kha aa auh hna i anmahte lawng in um awk ah tlangsang ah a hruai hna. Cuka ah cun an hmaika ah  khan a muisam aa thleng: 3 a hnipuan cu a tleu in an tleu, aho vawlei thil sutu hmanh nih cu tluk rang cun an su kho lai lo. 4 Elijah cu Moses he a rak lang; cun Jesuh kha bia an ruah. 5 Cu tikah Peter nih Jesuh cu, “Rabbi, hika um hi khuaruahhar ngai a si; cu caah nangmah ca pakhat, Moses ca pakhat le Elijah ca pakhat ti in deuthlam pathum in sa usih,” tiah a ti. 6 Zei a chim ti a hngal lo, zei cah tiah an thin a phang tuk.  7 Cun minmei a hung zam i a thladem nih a khuh hna, cun minmei chung cun aw pakhat a rak chuak i, “Hihi ka dawt mi ka Fapa a si. A bia ngai u,” tiah a ti. 8 Cun hmakhatte ah an velchum kha an zoh tikah, Jesuh dah ti lo cu mi zei hmanh an hmu ti hna lo.

Elijah kong biahalnak

9 Cun tlang in an rung ṭum lio ah khan annih cu, “Mi Fapa thihnak in a thawh hlan cu an hmuh mi kha, aho hmanh an chimh hna nakhnga lo ralrinnak a pek hna.10 Ralrinnak a pek mi hna cu fel tein an zulh nain anmah lak ah cun ‘thihnak in thawh ṭhan,’ ti mi cu zei dah a sawh duh hnga ti an ceihlen. 11 Cun amah kha, “Zei ruang ah dah phungbia cawnpiaktu hna nih Elijah a ra hmasa lai an ti?” ti in biahalnak an tuah.12 Amah nih,“Zeizongte hi an si ning tein chiah ṭhan awk ah Elijah cu a ra hmasa ding taktak a si; nain cathiang nih Mi Fapa kong ah amah cu temh-innak fakpi a tuar lai i an serhsat lai tiah  zei tin dah a chim ning a si? 13 Sihmanhsehlaw kan chimh hna, Elijah cu a ra cang i, cathiang nih amah kong a chim bang in amah cu an duhduh in an tuahto,” tiah a ti hna. 

Khuachia a ngei mi ngakchiapa kong

14 A zultu hna he an i fonh ṭhan ah khan mibupi nih annih cu an kulh hna i phungbia cawnpiaktu cheukhat hna nih bia an al len hna kha an hmuh hna. 15 Amah kha ruah lopi in an hmuh tikah mibupi cu an lau ngaingai i amah ton awk ah an rak tli. 16 Cun annih kha, “Anmah he zei dah nan i al len,” tiah a ti hna. 17 Mibupi lak khan mipakhat nih, “Bawipa, khuachia nih a tuah mi ka fapa cu na sin ah ka ratpi; a holh kho lo, 18 cun khuachia nih a tlaih poh ah vawlei ah a hlonh, a kaa in buanbara a tawh i a hacang a rial, a pum zong a tom dih. Cun ṭhawl ding ah na zultu hna cu ka chimh hna i an ṭhawl kho lo,” tiah a ti. 19 “Zumhnak ngei lo chan minung, zei caan dah kan umpi rih hna lai? Zei caan dah nan lak ah khua ka sak rih lai? tiah a ti hna. Ka sin ah ratpi u,” tiah a ti. 20 Ngakchiapa cu a sin ah an ratpi, cun khuachia nih ngakchiapa cu fak pi in a thin i vawlei ah a hrilh, a kaa in a buanbara a tawh i a tom. 21 Jesuh nih a pa cu, “Hiti a sinak hi zei can dah a si cang,” tiah a hal. Amah nih, “A ngakchiat tein, 22 cun amah kha hrawh duh ah mei le ti chung ah atu le atu a thlak. Zei tal na tuah khawh a si ahcun ka zaangfah law ka bawm hram ko,” tiah a ti. 23 Jesuh nih, “Na tuah khawh ahcun e, zumhnak a ngei mi hna ca ah cun zeizongte a si kho,” ti in a bia a tan. 24  Cu tikah a pa cu a au colh i, “Zumhnak ka ngei ko, ka zumhnak a tlawm caah ka bawm ko!” tiah a ti. 25 Cun mibupi an rak i pumh lulh kha Jesuh nih a hmuh tikah thlarau thiang lo cu a hro. Amah nih, “Mitcaw le hnachet thlarau, hipa sin in chuak law zei tik hmanh ah lut ṭhan ti hlah,” tiah a ti. 26 Ngakchiapa cu fak pi in a thintak i aupah in a chuak, ngakchiapa cu mithi bang cawl lo in a um caah mitam u nih cun, ‘A thi cang ko,’ an ti. 27 Sihmanhsehlaw Jesuh nih a kut in a lak i a thawhter, cun a dir kho. 28 Cun inn chung ah an lut, anmah te lawng an um lio ah khan a zultu hna nih amah cu, “Zei cah dah kan ṭhawl khawh lo?” tiah an hal. 29 Amah nih, “Hi bantuk cu thlacamnak lawng in ṭhawl khawh mi a si,” tiah a ti hna.

A temhinnak kong a voihnihnak a chim

30 Cuka hmun cun an chuak i Galilee ram kha an cul; cun mizei an hngalh hmanh a duh lo, zei cah tiah amah nih a zultu hna kha a cawnpiak hna lio a si, 31 annih kha, “Mi fapa cu minung kut ah chanh a si lai, cun an thah lai; cun a thih hnu nithum ah a tho ṭhan lai,”  tiah a chimh hna. 32 A chim mi cu an lung a fiang lo nain an hal ngam lo.

Ho dah a ngan bik

33 Kapernaum ah an ra, cun inn chung an luh tikah annih kha, “Lam ah khan zei kong dah nan i al len,” tiah a hal hna. 34 Zei hmanh an chim lo, zei cah tiah lampi i an i al len mi cu anmah lak ah khan aho dah a ngan bik ti a si. 35 Cun a ṭhu, hleihnih hna cu a auh hna i annih kha, “Mi pakhat nih pakhatnak si a duh ahcun nauta bik le mizapi i sal ah aa ser ding a si,” tiah a ti hna. 36 Cu hnu ah an lak i a chiah mi ngakchiate cu a lak i a pom, 37 cun annih kha, “Hi bantuk ngakchia pakhat kha ka min in a cohlang mi paoh cu keimah a ka cohlan a si, cun keimah a ka cohlang mi poh cu keimah si lo in a ka thlahtupa kha a cohlan a si,” tiah a ti hna.

Jesuh min hman ning

38 Johan nih a thawh i, “Bawipa, kanmah lak ah aa tel lo mi pakhat nih na min in khuachia a ṭhawl kan hmuh, cun amah cu kanmah lakah aa tel mi a si lo caah kan thlauh,” tiah a ti. 39 Sihmanhsehlaw Jesuh nih, “Nan thlauh lai lo, ka min in khuaruahharnak a tuah mi aho hmanh nih tlawmpal ah ka thangchiatnak a chim colh lai lo.  40 A kan doh lo mi poh cu bawmtu an si,” tiah a ti hna.

Khrih zultu hna cung langhter mi dawtnak

41 Bia ngaite kan chimh hna, “Khrih zultu nan si ruang ah ti hraikhat te an pe mi hna poh cu a laksawng a sung hrimhrim lai lo.

Midang kha lampialpinak

42 “Sihmanhsehlaw zumhnak a ngei mi hi ngakchia hna pakhatkhat a tlukter mi poh cu amah ca ah cun a hngawng ah facang rialnak lung tumpi thlaih in rili ah thlak a ṭha deuh lai. 43 Cun na kut nih an tlukter ahcun tan ko; kut pahnih he hell, zungzal a mit lo mi mei chung i tlak nakcun, kut bul in zungzal nunnak co a ṭha deuh, 45 Na ke nih an tlukter ahcun tan ko, ke pahnih he hell chung tlak nakcun kebul in zungzal nunnak co a ṭha deuh. 47 Cun na mit nih an tlukter ahcun khoih ko, mit pahnih he hell chung tlak nakin mit pakhat he Pathian Pennak chung luh a ṭha deuh, 48 cuka ahcun an tho lung cu an thi bal ti lo i an mei zong a mit bal ti lo. 49 “Zei cah tiah mikip cu cite phulh  bang mei in phulh an si te lai. 50 Cite cu thil  ṭha a si, sihmanhsehlaw a alnak a loh ahcun zei tin dah alter ṭhan khawh a si ti lai? Nan chung ah cite i ngeih ulaw pakhat le pakhat i rem u,” tiah a ti hna.

44 cuka ah cun an tholung cu an thi ti lo i mei cu a mit ti lo.

                          10  Nu le va ṭhennak kong

         1.Cuka hmun in a chuah hnu ah Judea le Jordan-ral ramlei ah a ra. Cun mibupi nih an zual ṭhan, cun a tuah tawn bang in, a cawnpiak ṭhan hna. 2 Farasi cheukhat nih an fuh  i amah kha, “Pa nih a nupi a ṭhen awk a si maw?” tiah an hal. Hihi cu amah hneksak duh ah a si. 3 Annih kha, “Moses nih zei tin dah an cah hna,” tiah a hal hna. 4 Annih nih, “Moses nih thlahnak ca ṭial in mak a kan onh,” ti in an leh.  5 Cun Jesuh nih annih kha, “Nan lung a hah tuk caah Moses nih hi nawlbia an ṭialpiak mi hna a si. 6 Sihmanhsehlaw ser hramthawk ah cun nu le pa in a ser hna, 7 hi caah hin pa nih a nu le a pa kha a kaltak hna lai, cun thisa khat an cang lai. 8 Annih cu pahnih an si ti lo, pakhat an si cang. 9 Cucaah Pathian nih a komh cang mi cu mi nih ṭhen hna hlah seh,” tiah a ti.10 Inn an rak ṭin ṭhan tikah a zultu hna nih hi kong cu an hal ṭhan, 11 cu tikah annih kha, “A nupi a ma i nu dang a ṭhi mi poh cu ṭangdangpom sualnak a tuah cang.12 Cun nu zong nih a vaa kha a kaltak i pa dang a vat ahcun ṭangdangpom sualnak a tuah ve, “tiah a ti hna.

Jesuh le ngakchia hna

        13 A kut in a tongh hna nakhnga mi nih ngakchia cu a sin ah an ratpi hna. Annih kha zultu hna  nih an sik hna, sihmanhsehlaw cucu Jesuh nih a hmuh hna tikah a lung a ṭha lo i annih kha, 14 Ngakchia cu ka sin ah ra ko hna seh, kham hna hlah u, zei cah tiah Vancung Pennak cu hi bantuk hna ta a si. 15 Biatak kan chimh hna, Vancung Pennak kha hi ngakchia hna bang in a cohlang lo mi poh cu an co kho bal lai lo,” tiah a ti hna.16 Cu hnu ah annih cu a pom hna, an cung ah a kut a chuan i thluachuah a pek hna.

Mirum tlangvalpa kong

   17 Khualtlawn aa thawh ah khan mi pakhat cu a rak chuak, a hmai ah a khuk aa bil i hiti hin biahalnak a tuah, “Saya ṭha, zungzal nunnak co awk ah zei dah ka tuah lai?” tiah a ti. 18 Jesuh nih, “Zei ruang ah dah mi ṭha na ka ti? Pathian lawng pei a ṭha mi a si ko cu. 19 Lai va nawng hlah, ṭangdangpom sualnak tuah hlah, va fir hlah, a hmaan lo mi tehte va khang hlah, lihbia va chim hlah, na nu le na pa va upat hna,” ti mi nawlbia cu na hngalh ko ṭung hna,” tiah a ti. 20 Cu tikah mipa nih khan, “Bawipa, hi vialte cu ka ngakchiat lio tein ka rak tuah dih cang hna,” tiah a ti. 21 Jesuh nih dengteo in a zoh i dawtnak lungthin he a khat, cun amah kha, “Na tuah ding pakhat a um rih. Va kal law na ngeih mi kha va zuar hna, tangka cu misifak va ṭhen hna, cun vancung ah chaw na ngei lai, cun ra law ka zul,” tiah a ti. 22 Sihmanhsehlaw cu bia a theih tikah mipa cu a hmai a chia i ngaihchia in a kal, zei cah tiah amah cu mirum ngaingai a si.

Rumnak ṭihnung

23  Jesuh cu aa mer i a zultu hna cu, “Chawva a ngei mi hna ca ah Vancung Pennak chung luh cu a va har hringhran dah,” tiah a ti hna. 24 Hi bia nih a zultu hna cu an khuaruah a harter hna, sihmanhsehlaw Jesuh nih, “Ka fale hna, Vancung Pennak chung luh cu zeitluk in dah a har! 25 Mirum, nih Vancung Pennak luh nakcun kalauk nih ṭhimka chung luh a fawi deuh,” tiah a ti ṭhan hna. 26 Cu tikah an khuaruah a har chinchin i pakhat le pakhat kha, “Cu ti a si ahcun aho dah khamhnak a co kho kun lai,” tiah an hal. 27 Jesuh nih a zoh hna i annih kha, “Minung si ning in cun a si kho lo, nain Pathian ca ah cun a si kho, zei cah tiah Pathian ca ah cun zeizongte hi a si kho dih ko,” tiah a ti hna.

Pumpeknak i laksawng

28 Peter cu a tho i amah kha, “Zoh hmanh, zeizongte kaltak in kan in zulh cang,” tiah a ti. 29 Jesuh nih, “Biatak kan chimh, keimah le thawngṭha bia ruang ah a inn, a unau, a nu, a pa, a fale asilole, a lo a kaltak mi aho hmanh, 30  atu chan ah, inn, unau, farle  nule, fale hna le lo a let zakhat - cun hremnak zong- cun a ra lai mi chan ah zungzal nunnak a hmu lo mi an um lai lo. 31 A hmasa bik mi tampi cu hmanung bik an si lai, cun hmanung bik cu hmasa bik an si lai,” tiah a ti hna.

A temh-innak kong a chimchung a voithumnak

32 Jerusalem ah an kal, lam tanṭim ah a si; Jesuh nih an hmai in a chawhkanh hna; annih cu an lung a fiang lo, cun hnu in a zul mi hna cu an lau ngaingai. Hleihnih hna kha kaa dang ah au in, annih kha a cung i a tlung ding mi thil cu hiti hin a chimh hna: 33 “Atu cu Jerusalem ah kan kai lai, cun Mi Fapa cu tlangbawi ngan hna le phungbia cawnpiaktu hna kut ah chanh a si cang lai. Annih nih thi ding in bia an ceih lai i Jentailmi hna kut ah an chanh lai, 34 annih nih amah kha an cawhdeh lai, cil an chak lai, an tuk an velh lai i an thah lai; cun nithum hnu ah a tho ṭhan lai,” tiah a ti hna.

Zebedi fapale hna nih bawmhnak an hal

35 Zebedi fapale a si mi Jeim le Johan nih an fuh i amah kha, “Bawipa, Bawmhnak na kan pek naklai kan duh ko,” an ti. 36 Anih nih, “Tuahpiak nan duh mi cu zei dah a si?” tiah a ti hna. 37Annih nih, “Na Sunparnak ah na orhlei ah pakhat na kehlei ah pakhat ti in ṭhutnak nawl kan pe ko,” tiah an ti. 38 Sihmanhsehlaw Jesuh nih, “Nan hal mi hi zei a si nan hngal lo. Ka din ding mi hrai cu nan ding kho lai maw?’ asilole ka in ding mi Baptismanak cu nan ing kho lai maw?” tiah a ti hna.  39 Annih nih, “Ding kho,” tiah an leh. Jesuh nih, “Ka din ding mi hrai cu nan din khawh lai i ka in ding mi Baptismanak zong cu nan in khawh ve lai, 40 sihmanhsehlaw ka orhlei le ka kehlei i ṭhutnak nawl cu keimah nih pek ding mi an si lo; hi hna cu rak hampiak cia mi hna ta a si, “tiah a ti hna.

Rian in ṭhithruainak

41 Hi kong hi zultu dang pahra nih an theih tikah Jeim le Johan cung ah an lung a tling ti lo, 42 cucaah Jesuh nih a auh hna i annih kha, “Jentailmi hna lak ah cun uktu ti an auh mi hna nih an lal hnawh hna, cun an milian hna nih an nawlngeihnak cu an theihter hna ti cu nan hngalh ko. 43 Nannih lak ah cun hihi a si awk a si lo. Nan lak i milian si a duh mi cu nan sal a si awk a si, 44 cun nan lak i pakhatnak si a duh mi cu nan sal a si awk a si.  45 Zei cah tiah Mi Fapa hrimhrim hi mi nih rianh awk ah si lo  in midang rianh awk ah, cun mi tampi tlanhnak ca i a nunnak pek awk ah pei a rat cu,” tiah a ti hna.

Jeriko i mitcawpa 

46 Jeriko an phan; cun a zultu hna le mibu nganpi he Jeriko in a chuah ah khan, Bartimaeus-cucu Timaeus fapa tinak – mitcaw kutdok, cu lam pawng ah khan a rak ṭhu ko. 47 Nazarethmi Jesuh a si ti kha a theih tikah, “David Fapa, Jesuh, ka zaangfah ko,” tiah a au. 48 Cun mi tampi nih amah kha dai tein um awk ah an sik, sihmanhsehlaw anih nih, “David fapa, ka zaangfah ko,” ti in thang chinchin in a au. 49 Jesuh cu a dir i annih kha, “Hika ah ratpi u,” tiah a ti hna. Cucaah mitcawpa cu, “Na tha chia hlah, tho; an auh cang,” ti in an hei auh. 50 Cun  a puan kha a hlonh, aa hlawk i Jesuh sin ah a kal. 51 Jesuh nih, “Zei tuahpiak dah na duh?” tiah a hal. Mitcawpa nih, “Rabuni, khua hmu ṭhan hram ko ning,” tiah a ti. 52 Jesuh nih, “Va kal, na zumhnak nih an khamh cang,” tiah a ti. Voikhatte ah khua a hmu ṭhan i Jesuh hnu a zul colh.

IV: JERUSALEM I RIANTHIANG A ṬUANNAK

        11.Messiah cu Jerusalem ah a lut

      1 Jerusalem an hei naih,  Oliv Tlang pawng i Bethphage le Bethani an phak tikah a zultu pahnih kha a thlah chung hna i 2 annih kha, “Nan hmai khua ah khin va kal u, cun khua chung nan luh cangka aho hmanh nih an i cit bal rih lo mi laa note pakhat aa hren ko kha nan hmuh lai. A hri kha phoih ulaw hika ah ratpi u. 3 Mizeimaw nih, ‘Zei dah nan tuah? an in ti hna ah cun, ‘Kan Bawipa nih a herh i hika ah kan rak thlah ṭhan colh ko lai,’ va ti u,” tiah a chimh hna. 4 An chuak i lamkam innka hram ah an hren mi laa note cu an va hmuh. A hri an phoih tikah, 5 cuka i pa cheukhat nih khan, “Laa hri nan phoih len cu zei dah nan tuah?” tiah an ti hna. 6 Jesuh nih a chimh hna bang in an leh hna, cucaah an phoiter hna. 7 Cun laa cu Jesuh sin ah an rak hruai i an puan cu laa keng ah an danh i Jesuh nih aa cit. 8 Mi tampi nih an puan kha lam ah an phah, cun micheu nih cun thinghnah hring kha an sah i an phah hna. 9 Cun hmai ah a kal mi he hnu in a zul mi he,

“Hosanna! Pathian min in a ra mi cung ah

thluachuahnak um ko seh.

10 A ra ding mi kan pa David pennak cung ah

thluachuahnak um ko seh!

Van sang bik ah Hosanna!” ti in an au.

11 Jerusalem ah a lut i Biakinn ah a kal; cun zeizong vialte kha a ngiatthlai dih hnu ah, atu cu khua a tlai cang caah a chuak i hleihnih hna he Bethani ah a kal.

A cing  mi (a tlai lo mi) theipi kung

12 A thaizing, Bethani in an chuah tikah khan a rawl a ṭam. 13 Lamhlat nawn ah khin a hnah hringpi he theipi kung pakhat a hei hmuh i a thei a um hnga maw ti in a va fuh, a va phak tikah theipi a tlai caan a si lo caah a hnah lawng kha a va hmuh. 14 Cu tikah theipi kung kha, “Mi zei hmanh nih na thei in ei bal ti hna hlah seh,” tiah a ti. Cun a zultu hna nih hihi a chim cu an theih.

Thilzuar hna Biakinn chung in ṭhawl hnanak

15  Cun Jerusalem kha an va phanh i Biakinn chung ah a lut, cuka i thilzuar le thilcaw hna kha a ṭhawl dih hna; tangka thlengtu hna an cabuai le laileng zuar hna an ṭhutdan cu a leh dih hna.16 Cun Biakinn pal in aho hmanh thilri luhchuahpi a sianh hna lo. 17 Cun a cawnpiak hna i a ti mi hna cu, “Cathiang nih, ‘Ka inn cu mi vialte ca ah thlacamnak inn a si lai,’ a ti a si lo maw? Sihmanhsehlaw nannih nih cun, “Damiah kua ah nan ser cang,” tiah a ti hna. 18 Hi bia cu tlangbawi ngan hna le phungbia cawnpiaktu hna nih an theih tikah amah hloh nakding lam zei tal a um hnga maw ti in an kawl; amah cu an ṭih, zei cah tiah mi cu a cawnpiak hnanak nih khan a hruhter cang hna. 19 Cun zanlei a hung si tikah khualipi i leng ah a chuak.

A car mi theipi kung: Zumhnak le thlacamnak

20 A thaizing an palpah ah khan, theipi kung cu a hram in a rak car cang kha an hmuh. 21 Peter nih aa chinchiah. Amah nih Jesuh cu, “Zoh hmanh, Rabbi, chiat na serh mi theipi kung cu a uai cang,” tiah a ti. 22  Jesuh nih, “Pathian kha zumh ko. 23 Biatak kan chimh, mi pakhatkhat nih lungawṭawm lo in a si hrimhrim lai ti zumhnak he hi tlang hi, ‘I phoi law rili ah va i paih,’ a ti ahcun a ca ah tuahpiak a si hrimhrim lai. 24 Cucaah, kan chimh hna, thlacam in nan hal mi poh cu kan hmuh cang ti zum u, cun nanmah ta a si lai. 25 Cun thlacam awk i nan dir tikah na cung i a sual mi poh kha nan ngaihthiam hna lai, cuti cun vancung i nan pa zong nih nan sualnak an ngaihthiam ve hna lai,” tiah a ti hna..

26 Sihmanhsehlaw midang sualnak kha nan ngaihthiam hna lo ahcun, vancung nan Pa zong nih an ngai thiam ve hna lai lo

Jesuh nawlngeihnak kha an suthlat

27 Jerusalem ah an rak phan ṭhan, cun Jesuh cu Biakinn chung i aa chawhlen lio ah khan tlangbawi luban hna, phungbia cawnpiaktu hna le 28 upa hna cu an ra i amah kha,“Hi thil na tuah hi zei nawlngeihnak dah na ngeih?  Asilole, hiti tuah awk ah aho nih dah nawl an pek?” tiah an ti. 29  Jesuh nih, “Kei nih bia kan hal ve hna lai, pakhatte lawng; ka let ulaw a ho nawl in dah hiti hin ka tuah ti cu kan chimh ve hna lai. 30 Johan i Baptismanak kha khuazei in dah aa thawk, van in maw, asilole minung sin in dah? Ka let tuah u,” tiah a ti hna. 31Cu tikah annih cu hiti hin bia an i al, “Vancung in kan ti ahcun, amah nih, ‘Zei ruang ah dah nan zumh kun lo?’ a kan ti lai. 32 Sihmanhsehlaw minung sin in kan ti ngam lai maw - ṭih awk mipi kan ngei, zei cah tiah mikip nih Johan cu profet in an cohlan. 33 Cucaah Jesuh an leh mi cu, “Kan hngal lo,” ti a si. Jesuh nih, “Hiti ka tuah ca i ka nawlngeihnak cu  kan chimh ve hna lai lo,” tiah a ti hna.

                      12. Hlanh mi, mi ṭha lo hna bianabia

           1.Bianabia hmang in cawnpiaknak a peh. “Mipa pakhat nih mitsurdum a ngeih; a kulh dih, mitsur nennak khor a cawh i parthlam zong a sak; cun a dum cu mi a hlanh hna i ramdang ah a kal. 2  A caan a phanh tikah a hlanh mi hna sin in a covo mitsur thei khawmh awk ah sal pakhat a hei thlah. 3 Sihmanhsehlaw kha pa cu an tlaih, fung in an tuk i kut lawng in an kalter. 4  Cun a dang pakhat kha a thlah ṭhan, amah cu a lu ah an rak tuk i ningzak ngai in an rak tuah. 5 Cun sal dang pakhat a thlah ṭhan i amah cu an rak thah. Cun tampi kha a hei thlah ṭhan hna tikah, a cheu cu fung in an rak tuk hna i a cheu cu an rak thah hna. 6 Pakhat lawng thlah ding a tang: amah cu a fapa ngeihchunte a si. Anih nih, ‘Ka fapa cu an upat ko lai,’ ti ruat in a hmanung bik ah a fapa cu a thlah. 7 Sihmanhsehlaw kha mi hna nih khan pakhat le pakhat cu, “Hihi roco a si. Ra ulaw that u sih, cun a ro cu kanmah ta a si lai,” tiah an i ti. 8 Cucaah amah cu an tlaih i an thah, cun a ruak cu dum leng ah an hlonh. 9 Atu dum ngeitu nih zei dah a tuah hnga? A ra lai i hlanh mi hna kha a hloh hna lai i dum kha midang a hlanh hna lai.10 Hi cathiang catlang hi nan rel bal lo maw:

“Innsatu nih an hlawt mi lung cu innkil lung ah a cang cang.

11 Hihi cu Bawipa tuah mi a si i kan khuaruah a har ko, “tiah a ti hna.

12 Cun amah kha thah an duh, zei ruang ah tiah kha bianabia cu anmah a chimhnawh mi hna a si ti kha an hngalh, sihmanhsehlaw mibupi kha an ṭih hna.  Cucaah amah lawng an kaltak i an chuak.

Sisar ngunkhuai peknak

13 A thaizing ah cun, a bia in foih awk ah Farasimi cheukhat le Herod minung cheukhat cu a sin ah an hei thlah hna. 14  Cu hna cu an ra i amah kha, “Bawipa, nang cu milung thiang na si, cun aho hmanh na ṭih lo, zei cah tiah nangmah ca ah cun minung lianhngannak hi zei hmanh a si lo, cun Pathian lam kha lungthiang tein na cawnpiak ti kan hngalh. Sisar hi ngunkhuai pek ding maw, pek lo ding? 15 Amah cu ngunkhuai kan pe lai maw?” tiah an hal. An depdetnak kha a hmuh tikah annih kha, “Zei cah dah nan ka hneksak? Denarius fangkhat in ka chan tuah uh zoh hnik ning,” tiah a ti hna. 16 Fangkhat an chanh i annih kha, “Hihi aho muicuang dah a si? Aho min?” a ti hna. Annih nih, “Sisar,” tiah an ti.17 Jesuh nih annih kha, “Sisar ta cu Sisar kha pe u- cun Pathian ta cu Pathian kha pe u,” tiah a ti hna. Cu tikah amah kha khuaruah har in an zoh.

Mithi hna thawh ṭhannak

18 Cun Sadusimi cheukhat- thawh ṭhan a um lo a ti mi hna - cu a sin ah an ra i amah kha hi biahalnak hi an tuah, 19 “Bawipa, Moses nih, “Mipa pakhat nih a nupi cu fa ngei lo in a thihtak a si ahcun fa a ngeihpiak nakhnga a unau nih a roh mi nuhmeinu cu a ṭhit lai,” ti in phung a kan serpiak. 20 Atu unau pasarih an um; upa bik nih nupi a ngeih i fa ngei lo in a thi. 21 Pahnihnak nih kha nuhmei cu a ṭhit i amah zong fa ngei lo in a thi ve. A pathumnak zong cuti ṭhiamṭhiam, 22  cun pasarih hna lak ah khan pakhat hmanh nih fa an roh lo. Hmanung bik ah minu zong cu a thi ve. 23 Thawhṭhanni i an thawh ṭhan tikah aho nupi dah a si lai? Zei tin tiah an pasarih ning in a rak vat hna,” tiah an ti.

24 Jesuh nih, “Zei cah dah nan palh ti a si ah cun cathiang siseh Pathian ṭhawnnak siseh nan i fiang lo. 25 Zei cah tiah thihnak in an thawh ṭhan tikah nu le pa cu an i ṭhi an i va ti lai lo; vancung i vanmi hna bantuk an si cang.  26 Mithi thawh ṭhannak kong ah Moses Cauk chung, burbuk kong ah khan, Pathian nih a sin ah zei tin dah bia a chim i amah kha, “Keimah cu Abraham Pathian, Isak Pathian le Jakob Pathian ka si, “tiah a ti mi kha nan rel bal lo maw? 27Amah cu a thi mi hna si lo in a nung mi hna Pathian a si. Nan palh tuk hringhran cang, “tiah a ti hna.

Nawlbia lak i a nganbik

28 Bia an i al mi a rak ngai ve mi phungbia cawnpiaktu pakhat cu Jesuh nih ṭha ngai in a leh mi hna kha aa lungsi ngai i amah kha, “Nawlbia lak ah hin zei hi dah pakhatnak a si?” ti in a dang biahalnak a tuahchap. 29 Jesuh nih, “Hihi pakhatnak a si: “Maw Israel, ngai hmanh, Bawipa kan Pathian cu pakhatte lawng Bawipa a si, 30 cun Bawipa na Pathian cu na lungthin dihlak, na nunnak dihlak, na ruahnak dihlak le na thazaang dihlak in na dawt lai. 31 A pahnihnak cu hihi a si: na innpa cu nangmah bantuk tein na dawt ve lai. Hi hna nakin a ngan deuh mi nawlbia a um ti lo,” tiah a ti. 32 Phungbia cawnpiaktu nih cun, “Bawipa, na chim thiam tuk, na chim mi cu a hmaan, amah cu pakhatte lawng a si i a dang a um ti lo. 33 Amah kha na lungthin dihlak, na hngalhthiamnak le na thazaang dihlak in daw, cun na innpa cu nangmah bantuk in daw ve, hihi cu khangh thawinak le raithawinak vialte nakin a biapi deuh,” tiah a leh.  34 Zei tluk fim in dah a leh ti kha a hmuh tikah, Jesuh nih, “Pathian pennak he naa hlat lo,” tiah a ti.  Cun hi hnu ah cun aho hmanh nih bia an hal ngam ti lo.

Jesuh cu David fapa lawng si lo in a Bawi a si

35 Biakinn chung a cawnpiak hna lio ah khan Jesuh nih, “Phungbia cawnpiaktu hna nih zei tin dah Khrih cu David fapa a si ti in an i tlaih peng khawh?  36 David hrimhrim nih, ThiangThlarau ṭhanghnak in,

Bawipa nih ka Bawipa cu na ral hna cu na ke chiahnak ah ka ser hna hlan tiang ka orhlei kam ah hin ṭhu tuah tiah a thanh,’ kha tiah a ti.  37 “David hrimhrim nih amah cu, ‘Bawpa’ a ti; cu a si ahcun zei tin dah a fapa cu a si khawh lai?” tiah a ti hna. Cun mibu nganpi nih a bia cu lungsi ngai in an ngaih. 

Jesuh nih a mawhchiat mi phungbia cawnpiaktu hna

38 A cawnpiaknak ah khan amah nih, “Angki fualpi he i chawh, chawdawr hmun ah mi nih upat ngai in chawnh  biak, 39 pumhnak inn i hmai ṭhut le puai tuahnak ah a sang i ṭhut a duh mi phungbia cawnpiaktu hna kha i ralring hna u; 40 Hi hna cu nuhmei chawva kha an ei i mi hmuh duh ah thla cu saupi in  an cam. An co ding  mi dantatnak cu a fak chinchin lai,” tiah a ti.

Nuhmeinu thawhlawm

41Cun thawhlawm kuang hmai ah khan a ṭhu i mi nih thawhlawm kuang ah tangka an sanh kha a zoh hna, cun mirum tampi nih tampi an sanh. 42 Misifak nuhmeinu pakhat cu a ra i piasen pakhat he aa khat mi dar tangka nek pahnih cu a thlak. 43  Cu tikah a zultu hna cu a auh hna i annih kha, “Bia ngaite kan chimh hna, thawhlawm a thla mi vialte hna lak ah hi nuhmeinu nih hin tam bik a thlak; 44 zei cah tiah annih nih  cun an ngeih mi chung in a hleivuang kha an sanh, sihmanhsehlaw mah nu nih cun, a ngeih mi vialte, a pawcawmnak ca ah a chiah mi vialte kha a thlak cang,” tiah a ti.

13.Vancung pennak kong cawnpiaknak: hramdomhnak

         1Biakinn in a chuah ah khan a zultu pakhat nih, “Bawipa, hi lungtum pipi hna hi zoh hmanh! Hi inn hna liangliang hi zoh hna hmanh!” tiah a ti. 2 Cun Jesuh nih,” Hi inn ngan pipi hna hi na hmuh ko hna? Lung pakhat cung ah pakhat aa chuang te lai lo; phur dih cikcek an si te lai,” tiah a ti.

3 Biakinnlei hoih in, Oliv Tlang cung i a ṭhut lio, Peter, Jeim, Johan le Andru hna he anmah lawng tein an um lio ah khan, 4 “Hihi zei tik ah dah a can lai? Cun a can lai tikah zei hmelchunhnak dah a chuak te lai kan chim tuah?” tiah an ti. 

Ngaihchiatnak aa thawknak

5 Cu tikah Jesuh nih annih kha, “Aho hmanh nih an in hlen hna nakhnga lo i ralring u. 6 Mi tampi cu keimah min in an ra lai i, “Keimah hi amah ka si” ti in mi tampi kha an hlen hna lai. 7 Ral le raltuknak thawngpang nan theih tikah lau hlah u; hihi cu a cang ding hrimhrim a si, asinain a donghnak cu a si rih lo. 8 Zei cah tiah miphun pakhat nih a dang miphun a doh lai, pennak pakhat nih a dang pennak a doh lai. Hmun tampi ah lihninhnak a um lai; mangṭam a tlung lai. Hihi nganfah aa thawknak a si.

9 I veng u; biaceih zung ah an in chanh hna lai; pumhnak inn ah an in tuk hna lai; cun keimah ruang i ka tehte si ding ah uktu le siangpahrang hna hmai ah an in chuahpi hna lai, 10 zei tin tiah thawngṭha bia cu miphun vialte sin ah thanh hmasa a herh.

11Cun chanh awk ah an in hruai hna tikah, zei dah ka chim lai tiah a hlankan in nan lungre thei hlah seh, a caan a phak tikah chim ding an in pek mi hna kha chim ko u, zei cah tiah a chimtu cu nanmah si lo in Thiang Thlarau a si lai. 12 Unau pakhat nih a unau kha a thih tiang a rawi lai, cun a pa nih a fapa a rawi lai; fale hna cu an nu le an pa ralchanh in an tho lai i an thah hna lai. 13 Keimah ruang ah mikip nih an in huat hna lai, sihmanhsehlaw a dongh tiang fek tein a dir mi poh cu khamh an si lai.

Jerusalem i harsatnak nganpi

14 ‘Fihnung Tung’ cu a dir lonak ah an bunh kha nan hmuh tikah, (careltu nih hngal ko seh) Judea ram i a um mi cu tlanglei ah zaam hna seh; 15 mi pakhat cu thlungkhuh cung ah a um a si ahcun rak ṭum hlah seh asilole, a thil lak awk ah innchung ah lut hlah seh; 16  mi pakhat cu lo ah a um a si ahcun thilpuan lak ah inn ah tlung hlah seh. 17  Cu ni a phak tikah cun fapawi le fano ngei hna ca ah ngaihchia a va si dah! 18 Hihi khuasik caan ah a si nakhnga lo thlacam u. 19 Zei cah tiah cu ni ah cun Pathian nih vawlei a ser ri in a cang bal lo mi le hi hnu zong ah a cang ti lai lo mi, tahchunh khawh lo ngaihchiat harnak nganpi a tlung lai. 20 Cun Bawipa nih hi caan cu a tawiter lo a si ahcun mi zei hmanh an luat lai lo; sihmanhsehlaw, a thim mi hna zawn ruah ah a caan cu a tawiter cang.

21 Cun mi pakhat nih nannih kha, ‘Zoh hmanh, Khrih cu hika ah hin, ‘Zoh hmanh, amah cu khika ah  khin,’ an in ti hna ahcun va zum hna hlah u; 22 zei cah tiah Khrih deu le nal profet cu an tho lai, a si khawh ahcun, thim mi hna hlen awk ah khuaruahharnak le hmelchunhnak an tuah hna lai. 23 Cucaah nan i veng lai. Ralrinnak tling tein kan pek cang hna.

Mi Fapa ratnak

24 Cun cu ni hna ah cun, kha ngaihchiat harnak caan hnu ah khan, Nika cu a mui lai, thlapa nih a ceunak a pe ti lai lo, 25 arfi hna cu van in an tla hna lai i van ṭhawnnak hna cu an i hnin lai. 26 Cun mi Fapa cu a lianhngan sunparnak nganpi he minmei chung in a rung ṭum kha an hmuh lai. 27 Cun vawlei killi le vawlei deng in vanhram deng tiang, a thimcia mi hna pumh awk ah a vancungmi cu a thlah hna lai.

A ratnak caan

28 Tahchunhnak caah theipi kung i lak u; a ṭengnge hna an hung no i an hnah no hna an hung corh tikah ṭhal a nai cang ti kha nan hngalh. 29 Cu bantuk in hi thil hna an can nan hmuh tikah a caan a nai, innka hram a phan cang ti kha hngal u. 30 Biatak kan chimh hna hi chan a dong hlan ah hi thil vialte cu an cang lai. 31 Van le vawlei cu an rawk lai, sihmanhsehlaw ka bia cu an rawk lai lo.

32 Sihmanhsehlaw cu ni le cu caan ca ah cun ngaihchia a va si dah! Pa dah ti lo nih cun, aho hmanh nih, vancung i vanmi hna, cun Fapa hmanh nih, a hngal lo.

I hliphlau u

33 I veng u, i hngilh hlah u, zei cah tiah cu caan cu zei tik ah dah a phanh lai ti nan hngalh lo. 34 Cucu ramdang ah khual a tlawng mi pa he aa lo; inn in a chuak, a salle hna kha an tuah ding ṭuanvo kha a pektak cio hna, cun innka cawngtupa cu hngilh lo in  hngah ding  in a cahtak. 35 Cucaah inn ngeitupa cu zanlei maw, zanṭim maw, arkhuang maw, cun deilai ah maw, zei tik ah dah a rat lai kha nan hngalh lo caah hngilh lo in hngak u; 36 ruah lo pi in a  rat ahcun  nan i hngilh lio ah an poh sual hna lai. 37 Cun nan sin i ka chim mi hi mizapi sin ah ka chim ve: Hngilh lo in hngak u,” tiah a ti hna.

       V: TEMHINNAK LE THAWHṬHANNAK

14.Jesuh an rawinak

1Lanhtak puai le thilnu tel lo changreu puai nihnih aa duh ah khan a si, cun tlangbawi ngan hna le phungbia cawnpiaktu hna nih Jesuh kha a thli tein tlaih in thahnak ding ah  lam an kawl len.  2 Zei cah tiah annih nih, “Puai chung ah si hlah seh, mipi lak ah buaibainak a chuak sual lai,” an ti.

Bethani ah zihmui thuhnak

3 Amah cu Bethani i thinghmui hma in a rak zaw mi Simon inn ah a um; rawl einak  i a ṭhut lio ah khan minu pakhat cu lungrang thawlkhat he, a man a fak ngaingai mi zihmui i put in a rak lut. Thawl cu a khuai i zihmui cu Jesuh lu ah a toih. 4 Cuka i a um ve mi micheu cu lungtling lo ngai in pakhat le pakhat kha, “Zei cah dah mah zihmui cu a sawksam hnga? 5 Hi bantuk zihmui cu denari zathum in zuar in tangka cu misifak hna kha pek awk a si,” an ti. 6 Sihmanhsehlaw Jesuh nih, “Khati khan chia ko u. Zei cah dah a ngaih nan chiatter? Ka cung ah thil a tuah mi cu thil ṭha ngai a si. 7 Misifak cu nanmah he an um peng, cun nan duh tik poh ah an cung ah ṭhatnak nan tuah kho, sihmanhsehlaw kei cu nanmah he ka um zungzal lai lo. 8 A tuah khawh mi cu a tuah cang: ka pum cu vui hlan ah zihmui a thuhcia dih cang. 9 Biatak kan chimh hna, “Vawleicung thawngṭha an phuannak kip ah, hi a tuah mi cu, amah philh lonak ah, chimchih an si lai,” tiah a ti hna.

Judas nih Jesuh a rawi 

10 Cun hleihnih lak i pakhat Judas Iskariat nih, an kut i Jesuh chanh awk ah, tlang bawi ngan pawl cu a fuh hna. 11 A bia an theih tikah an i lawm i amah kha tangka phalh awk ah bia an kamh; cu tikah caan a rem tik i Jesuh rawinak ding lam kha a kawl cang.

Lanhtak zanriah ca timhtuahnak

12 Thilnu tel lo changreu puai a nikhatnak ni, Lanhtak tuufa thawinak an pekchanh tik ah khan, a hnuzul hna nih amah cu, “Lanhtak zanriah na ei nakding ah khuazei ah dah kan in timhpiak lai,” tiah an ti. 13  Cucaah a zultu pahnih kha a thlah hna i annih kha, “Khualipi chung ah va lut ulaw ti-um aa put mi mipa nan ton lai. A hnu va zul u, 14 cun a luhnak inn i inn ngeitupa kha, “Bawipa nih: ka zultu hna he Lanhtak zanriah kan ei nakding a khaan cu khuazei ah dah a si a ti,” tiah va ti u. 15 Amah nih, ṭhutdan hna he timhcia in a um mi, cungdot khaan nganpi, kha an sawhpiak hna lai. Cuka ah cun kan ca ah va tim u,” tiah a ti hna. 16 Zultu hna cu an i thawh, khualipi chung an luh tikah zeizongte cu a rak chimh hna ning in a si kha an va hmuh i Lanhtak puai cu an timh.

Judas rawiphiarnak ding chimchungnak

17 Zanlei a hung si tikah hleihnih hna he a rak phan. 18 Cun an ṭhu i an ei lio ah khan Jesuh nih, “Biatak kan chimh hna, “Nanmah lak i pakhat, ka sin i rawl a ei ve mi, nih rawi nan ka timh,” tiah a ti hna. 19  An ngaih a chia i pakhat le pakhat kha, “Keimah cu ka si hrim lo, tih?” tiah an ti cio. 20 Annih kha, “hleihnih lak i pakhat, keimah he kheng aa hrawm mi a si.  21 A si, Mi Fapa cu cathiang nih a si te lai ti a chim bang in, amah cu rak khaukhih cang ning in a si ko lai, sihmanhsehlaw mi Fapa a rawitu ca ah cun ngaihchia a va si dah! Cu pa cu rak chuak hlah seh law a ca ah a ṭha deuh hnga,” tiah a ti hna.

Bawipa zanriah sernak

22 Cutin an ei lio ah cun changreu kha aa lak, cun thluachuahnak bia a chim hnu ah a cheu i a pek hna. Cun, “I lak u, hihi ka pum a si,” tiah a ti hna. 23 Cun hrai kha aa lak, lawmhnak bia a chim hnu ah a chanh hna, cun an zapi tein an din, 24 cun amah nih, “Hihi mi tampi ca ah thlet mi, thisen biakamnak i ka thi a si. 25 Biatak kan chimh hna, Pathian Pennak chung mitsurzu thar ka din hlan lo mitsur zu ka ding ti lai lo,” tiah a ti hna.

Peter nih a hlawtnak a chimchung

26 Salm hla an sak dih in Oliv tlanglei ah an i thawh. 27 Cun Jesuh nih, “Cathiang nih ‘Tuukhal cu ka tuk lai i tuu cu an i ṭhenṭhek dih lai,’ a ti bang in nannih cu nan tlu dih lai; 28 nain ka thawh ṭhan hnu ah nan hmai in Galilee ah ka rak kal chung lai,” tiah a ti hna. 29 Peter nih, “Mi vialte an tluk hmanh ah kei cu ka tlu lai lo,” tiah a ti. 30 Cu tikah Jesuh nih, “Biatak kan chimh, nihin, tuzaan hrimhrim, ar voihnih a khuan hlan ah, voithum tiang na ka hlawt lai,” tiah a ti. 31 Sihmanhsehlaw amah nih biatak ngai in, “Thih a herh hmanh ah kan hlaw bal lai lo,” tiah a ti ve. A dang  vialte zong cuti cun an ti cio.

Gethsemane dum ah thla a cam

32 Gethsemane ti mi dum ah khan an rak phan, cun Jesuh nih a zultu hna cu, “Thla ka cam chung hika ah hin rak um u,” a ti hna. 33 Peter le Jeim le Johan kha aa kalpi hna. Lungrethei vansang in a um. 34 Cun annih kha, “Ka ngaih a chia tuk hringhran. Hika ah ka hngak ko u, i hngilh hlah u,” tiah a ti hna. 35 Cun, tlawmpal a va kal deuh ah khin vawlei ah a bawk i a si khawh ahcun,  hi suimilam caan nih a lanhtak nakhnga, thla a cam. 36 Amah nih, Abba, ka pa, ‘Nangmah ca ah cun zeizongte a si kho. Hi hrai hi ka lakpiak ko. Sihmanhsehlaw keimah duh bang si lo in nangmah duh bang si ko seh,” tiah a ti. 37 A rak kir i an rak i hngilh ko kha a hmuh hna, cun Peter kha, “Simon, naa hngilh ko maw? Suimilam pakhat hmanh hngilh lo in na um kho lo tih?  38 Tho law tukforhnak na in nakhnga lo thla cam tuah. Lungthin nih a duh tuk ko nain minung si ning cu a derthawm ko,” tiah a ti.  39 A va kal i a chim kel kha chim ṭhan in thla a va cam ṭhan. 40 Cun a rak kir ṭhan i an i hngilh ko kha a hmuh hna, an mit a rit tuk; zei chim awk an hngal lo. 41 A voithumnak a rat ṭhan tik ah annih kha, “Atu cu nan i hngilh i nan i din kho rih! Atu cu zeizongte a dih cang. A can a phan cang. Atu mi Fapa cu rawi in misual hna kut ah chanh a si cang lai. 42 Tho u, kal usih! A ka rawitu nih a kan naih cang,” tiah a ti hna.

An tlaihnak

43 Cuti bia a chim lio ah cun hleihnih hna lak i pakhat a si ve mi Judas cu, hmakhatte ah a hung chuak; amah he tlangbawi luban hna, phungbia cawnpiaktu hna le upa hna nih an thlah mi cheukhat hna cu naam le thingtan he an rak chuak ve. 44 A rawitu nih khan annih cu, “Amah cu ka hnamh mi pa a si lai. Tlai u, cun him tein kalpi u,” tiah hmelchunhnak a rak pek hna. 45 Cucaah rawitupa cu a rak chuak, Jesuh sin ah a va kal colh i amah kha,“Rabbi, a ti i a hnamh. 46 Midang nih an tlaih i an khih. 47 Cun an pawng i a dir mi pakhat nih a vainam kha aa zuh i tlangbawi ngan salpa hnakhaw cu pet ko in a tuk.

48 Cu tikah Jesuh nih, “Keimah tlaih awk ah vainam le thingtan he nan rat hi keimah cu damiah maw ka si?   49 Nan lak ah um in biakinn ah nikhat hnu nikhat kan cawnpiak hna ah khan nan ka tlaih bal ṭung lo? Sihmanhsehlaw hihi cu cathiang tlinnak caah a si,” tiah a ti hna. 50 Cun amah kha kaltak in an zaam dih. 51 Tlangvalpa pakhat nih puanrang lawng i aih in a zulh. Amah kha an tlaih, 52 sihmanhsehlaw a puan cu an kut ah a kaltak i a taklawng a tli.

Sanhedrin hmai i Jesuh

53 Jesuh cu tlangbawi ngan sin ah an kalpi; cun tlangbawi luban hna le upa hna le phungbia cawnpiaktu hna cu cuka ahcun an i pum.  54 Peter nih lamhlat nawn in tlangbawi ngan innpi tiang a zulh, cun ralvengtu hna he mei a to ve. 55 Tlangbawi luban hna le biaceih bawi dihlak hna nih Jesuh thah khawh nakding tehte kha an kawl len. Sihmanhsehlaw pakhat hmanh an hmu kho lo. 56 Mitam nawn nih a dik lo mi tehte an rak chuahpi, sihmanhsehlaw pakhat le pakhat an i kalh dih. 57 Micheu nih an tho i, 58 “Amah nih hin minung kut in sak mi  Biakinnpi cu ka hrawh lai, cun nithum ah minung kut in sak lo mi a dang pakhat ka sak ṭhan lai,” a ti ti in a dik lo mi tehte an chuahpi.  59 Sihmanhsehlaw hika zawn hmanh ah hin an tehte cu an i kulhkalh rih.  60 Cu tikah tlangbawi ngan cu zungbawi hna hmaika ah khan a tho i Jesuh cu, “Leh awk zei hmanh na ngei lo maw?” Hi mi hna nih an chuahpi mi tehte hna hi zei dah an si?” tiah biahalnak a hun tuah. 61 Sihmanhsehlaw dai tein a um i zei hmanh a let lo. Tlangbawi ngan nih amah cu, “Nangmah cu a Thiang mi Pa i fapa, Khrih na si maw?” tiah a voihnihnak a hal ṭhan. 62 Jesuh nih, “Ka si, cun Mi Fapa hi Cungnung bik i orhleikam a ṭhut i van minmei hna he a rung ṭum kha nan hmuh te lai,” tiah a ti. 63 Tlangbawi ngan cu a angkifual kha a thleh i, “Atu zei tehte dah kan herh ti? 64 Pathian thangchiatnak bia a chim cu nan theih cang. Zei tin dah nan ruah?” tiah a ti hna. An ruahnak cu aa khat dih: “thih a tlak,” ti a si ko.

65 Micheu nih a hmai ah cil an chak, cun an thongh i amah kha, “Profet i cang tuah,” tiah an ti. Ralvengtu hna nih an tuk ve.

Petern nih a hlawtnak

66 Peter cu inntual i a um lio ah khan tlangbawi ngan i salnu pakhat cu a rak chuak.  67  Cuka i mei a to mi Peter cu a hmuh, naih tein a vun zoh i amah kha, “Nangmah zong hi Nazarethh khua mi Jesuh he na rak um ve ko kha,” tiah a ti. 68 Sihmanhsehlaw aa pheh i, “Ka hngal lo, zei kong na chim ti hi ka lung a fiang lo,” tiah a ti. Cu hnu ah tualhmai ah a va chuak, cun ar a khuang. 69 Salnu nih a hmuh ṭhan i cuka a dir mi hna kha, “Hipa hi anmah lak i pakhat a si ve ko,” tiah a ti hna. 70 Sihmanhsehlaw aa pheh ṭhan. Tlawmpal ah a pawng i a dir mi hna nih khan, “Nangmah cu anmah lak i pakhat na si hrimhrim ko, zei cah tiah, Galileemi na si,” tiah an ti ṭhan. 71 Sihmanhsehlaw chiatserh in, “Nan chim mi pa hi ka hngal hrimhrim lo,” tiah bia aa kam. 72 Cu luklak ah a voihnihnak ar a khuang, cun Peter cu Jesuh nih, “Ar voihnih a khuan hlan ah voithum tiang na ka hlawt te lai,” a rak ti mi kha a lung ah a hung chuak. Cun mit thli he aa ciah.

        15.Pilat hmai i Jesuh

1. Zinglei deika ah  khin, tlangbawi luban hna cu, upa hna, phungbia cawnpiaktu hna le biaceih bawi dihlak hna he, an khuakhannak cu timhcia in an chiah cang. Jesuh cu an tlaih, an kalpi i Pilat kut ah an chanh.

2 Pilat nih amah cu, “Jew hna siangpahrang cu na si maw?” tiah a hal. Jesuh nih, “Cuti a chimmi cu nangmah na si,” tiah a leh. 3 Cun tlangbawi luban hna nih khan sualphawtnak tampi an rak chuahpi. 4 Pilat nih amah cu, “Leh awk zei hmanh na ngei lo maw? Zei tluk tam in dah sual an i puh ti cu na theih ko,” tiah a ti. 5 Sihmanhsehlaw Jesuh nih zei hmanh a leh ṭhiamṭhiam lo caah Pilat cu a khuaruah a har.

6 Puai caan ah thongtla pakhat, mipi nih an duh mi poh kha a chuahpiak tawn hna. 7 Cu caan ah cun buainak a um lio, tapung hna he mi a rak thah caah thong a tla mi pakhat, Barrabbas an ti mi thongtla pakhat a um. 8 Mibupi cu an va kal i a phung bang in bawmhnak an hal. 9  Pilat nih, “Jew hna siangpahrang in thlahpiak hna ning law nan duh maw?” tiah a hal hna. 10 Zei cah tiah nahchuah ruang ah tlangbawi luban hna nih Jesuh cu a kut ah an chanh ti kha fiang tein a hngalh. 11 Nain tlangbawi luban pawl nih Barabbas tu thlahpiak awk ah hal ding in an rak chimh cang hna. 12 Cu tikah Pilat nih, “Cutin a si ahcun Jew hna siangpahrang nan ti mi pa hi zei tin dah ka tuah kun lai,” tiah a ti hna. 13 “Amah cu vailam ah khenhchih ko,” tiah an au hnawh. 14 Pilat nih annih kha, “Zei hnahnawhnak dah a tuah?” tiah a hal hna. Sihmanhsehlaw thangchin in an au i, “Vailam ah khenhchih ko,” tiah an ti. 15 Cu tikah, Pilat cu mibupi lungton a duh caah, Barabbas kha a thlahpiak hna, Jesuh cu fung in a tukter hna hnu ah, vailam i tah awk ah an kut ah a chanh hna.

Hling luchin aa chinhmi Jesuh

16 Ralkap hna nih amah cu Pretorium ti mi innpi chung ah an hruai i ralkap kha a ning pi in an auh hna. 17 Puansen an aih, hling kha luchin ah an phiar i an chinh. 18 Cun, ‘Jew hna siangpahrang cu a nunkhua sau ko seh,’ ti in salaam an pek. 19 A lu cu phaikung in an tuk i cil an chak, cun upat pek bantuk in a hmai ah an khuk an i bil.  20 Amah kha an cawhdeh hnu ah puansen cu an hawh i a hnipuan kha an hrukter ṭhan.

Vailamtah lam

21 Vailam tah awk ah an chuahpi. Alexander le Rufus hna i pa, khuatelei in a rak tlung mi, Sairin khuami Simon, cu hramhram in vailamtung cu an putter. 22 Jesuh cu Luruh hmun ti sullam a ngei mi Golgotha ah an kalpi.

Vailam an tah

23 Mura he cawh mi mitsurthor cu an dinter, sihmanhsehlaw a ding duh lo. 24 Cun vailam ah an tah, a puan cu camcawh fung in an zuh i an i phaw. 25 Vailam i an khenhchih lio cu zanlei suimilam pathum ah a si. 26 Sual an puhnak ca an ṭialmi cu, ‘Jew hna Siangpahrang,’ ti a si. 27 Cun amah he damiah pahnih zong kha a orhlei ah pakhat a kehlei ah pakhat an tarchih ve hna.

28 Cucu Cathiang nih, “Amah cu misual hna lak ah relchih a si,” ti mi a tlinnak caah a si.

Vailamtah mi Jesuh cu an nihsawh

29 Lam i aa chawk mi hna cu an lu an thin i, “Um! Biakinn cu na hrawh lai i nithum ah na sak ṭhan lai tih!  30 Cu a si ahcun nangmah le nangmah i khamh ngat, cun vailam in rak ṭum!” ti in zomhtaihnak bia an chim. 31Tlangbawi luban hna le phungbia cawnpiaktu hna zong nih khan anmah lak ah cun,“Mi dang cu a khamh hna, amah le amah cu aa khamh kho lo. 32 Kan hmuh i kan zumh nakhnga, Israel Siangpahrang, Khrih cu atu vailam in rung ṭum seh,” ti in nihsawh in bia an chim. Amah he an tah ve mi hmanh nih amah serhsatnak bia a chim.

Jesuh thihnak

33 Zanlei suimilam pathum in paruk tiang vawlei dihlak ah khuamui a tlung. 34 Suimilam pakua ah Jesuh nih aw thang pi in, “Eloi, Eloi, lema sabakthani?” “tiah a au, a sullam cu ‘Ka Pathian, ka Pathian, zei cah dah na ka hlawt?’ tinak a si. 35 A pawng i a dir mi cheukhat nih an theih tikah, “Ngai hmanh u, Elijah a auh cuh,” an ti. 36 Cun pakhatpa cu a va tli, puanchia kha mitsurzu thor chung ah a hnim, cun fungpar ah a ṭemhchih hnu ah Jesuh kha a hei tuh. Cun, “Ngang rih u! Amah kha ṭhumh awk ah Elijah a ra hnga dek maw zoh hnik usih,” tiah a ti. 37 Cun Jesuh cu fakpi in a au i a thaw hmanung bik a chuah. 38 Cun Hmunthiang puanzaar cu a lu in a taw tiang cheuhnih ah aa cheu. 39 A hmaika i a dir mi ralbawipa cu a thih ningcang kha a hmuh tikah, “Biatak tein hipa cu Pathian Fapa a si ko,” tiah a ti.

Calvary cung i nu hna

40 Lamhlat nawn in a zoh mi nu cheukhat an um. Anmah lak ah khan Magdalami Mary, Ngakchia deuh Jeim le Josef hna i an nu Mary, cun Salome hna an i tel. 41 Hi nu hna nih hin a hnu an zulh i Galilee peng i a um lio ah khan an rak zohkhenh tawn. Cun Jerusalem ah amah he a rak kai mi adang nu tampi zong cuka ah cun an um ve.

An vuinak

42 Atu cu zanlei a si cang, cun Timhlamh Ni a si– cucu, Sabbath hlan ni –a si caah 43 khawngsil i upat ngai mi pakhat, Arimathea khuami Josef cu a ra, amah hrimhrim kha Pathian Pennak hmuh ruahchan in a nung mi a si, cun Pilat sin ah ralṭha ngai in a va kal i Jesuh ruak cu a va hal. 44 Pilat nih cu tluk tuan in a thih kha a khuaruah a har caah zauk bawi kha a kawh i a thih taktak le thil taktak lo cu a hal. 45 A thi taktak ko cang ti cu zauk bawi sin in a theih tik ah Josef kha a ruak laknak nawl a pek. 46 Amah nih khiangrang puan kha a cawk, Jesuh kha vailam in a ṭhumh, khiangrang puan in a tuam i a ruak cu lung an vihmi thlaan ah a vui. Cu hnu ah lung nganpi pakhat kha thlaanka ah a hrilh i a khar. 47 Magdalami Mary le Josef i nu Mary nih an vuinak hmun cu an i chinchiah.

                       16.A lawng mi thlaan. Vanmi hna bia

1.Sabbath ni a dih tikah Magdalami Mary, Jeim i nu Mary le Salome hna cu va kal i Jesuh thuh awk ah zihmui an cawk. 2 Cawn nikhat ni zing ni a chuah hnu ah khin thlaan ahcun an va kal.

3 “Thlaan khar lungpi cu aho nih  dah a kan thawnpiak hnga?” tiah pakhat le pakhat an i ti. 4 Sihmanhsehlaw an zoh tikah lung cu - a ngan taktak mi – a rak i thawn cang kha an hmuh. 5 Thlaan chung i an luh tikah puanrang aa aih mi tlangval pakhat orhlei kam i a ṭhut ko kha an hmuh, cun an khuaruah a har ngaingai.  6 Sihmanhsehlaw amah nih, “Cu tluk in khuaruah har awk a um lo. Vailam ah an tah mi Nazareth khuami Jesuh kha nan kawl: a tho cang, hika ah a um ti lo. Zoh hmanh u, hihi an chiahnak hmun cu a si. 7 Va kal ulaw a zultu hna le Peter kha, “Nan hmai in Galilee ah kal aa tim; a rak i chimh cang hna bang in, khika ah amah cu nan va hmuh lai,” tiah a ti hna.  8 Cun nu pawl cu an chuak i thinphang le thlalau in thlaan khan an le; an ṭih tuk caah aho hmanh zei hmanh an chim hna lo.

A tho mi Khrih a langhnak

9 Cawn nikhatni zingka a thawh ṭhan hnu ah khan hmasa bik ah a sin in khuachia pasarih a rak chuah mi Magdalami Mary sin ah a lang.10 Cu tik ah anih cu a hawikom a rak si mi hna, cun mitthli he aa ciah mi hna sin ah a va kal i a va chimh hna. 11 Sihmanhsehlaw anih nih amah cu a nung ko, ka hmuh ti a chim mi an theih tikah amah cu an zum lo. 

12 Hi hnu ah muisam phun dang in khuatelei a kal mi pahnih hna sin ah a lang. 13 Hi hna cu an kir i a dang hna kha an va chimh hna nain an zum hlei lo.

14 Hmanung bik ah cabuai i rawl a ei lio mi hleikhat hna kha aa hmuhsak hna. Zumhnak an ngei lo i an lung a khawn tuk caah a mawhchiat hna, zei cah tiah a thawh ṭhan a hmu mi hna nih an chim mi kha an zum lo. 15 Cun annih kha, ‘Vawlei pumpaluk ah va kal ulaw ser mi vialte kha thawngṭha va chim hna u.16 A zum i Baptisma a hmu mi poh cu khamh an si lai; a zum lo mi poh cu sualphawt an si lai. 17 A zum mi hna sin in hi hmelchunhnak hna cu an lang lai: ka min in khuachia an ṭhawl lai, holh phunphun holh khawhnak veel laksawng an ngei lai; 18 rul kha an tlaih lai i sivai an din hmanh ah an zei a poi lai lo; mizaw cung ah an kut an chuan lai i an dam lai,” tiah a ti hna.

19 Cun Bawipa Jesuh nih cuti a chim dih hnu ah vancung ah an kaipi; cuka ah cun  Pathian orhlei kam ah a ṭhu, 20 cu lio ah annih cu an chuak i khuazakip ah thawngṭha kha an chim; Bawipa cu an sin in rian a ṭuan i  hmelchunhnak hna in an bia cu a fehter.