MATTHAI 

                MATTHAI  THAWNGṬHA

                 1 Jesuh pupa hna

 1Abraham i fapa David i fapa Jesuh chuahkehnak cazual.

2Abraham nih Isak a hrin, Isak nih Jakob a hrin, Jakob nih Judah le a unau a hrin hna, 3 Judah nih Perez le Zerah a hrin hna, an nu cu Tamar a si. Perez nih Hezron a hrin, Hezron nih 4Ram a hrin, Ram nih Amminadab a hrin, Amminadab nih Nahshon a hrin, Nahshon nih Salmon a hrin, 5 Salmon nih Boaz a hrin, a nu cu Rahab a si. Boaz nih Obed a hrin, a nu cu Ruth a si. Obed nih Jesse a hrin i 6 Jesse nih David Siangpahrang a hrin.

David nih Solomon a hrin, a nu cu Uriah nupi kha a si. 7 Solomon nih Rehoboam a hrin, Rehoboam nih Abijah a hrin, Abijah nih Asa a hrin, 8 Asa nih Jehoshafat a hrin, Jehoshafat nih Joram a hrin, Joram nih Uzziah a hrin, 9 Uzziah nih Jotham a hrin, Jotham nih Ahaz a hrin, Ahaz nih Hezekiah a hrin, 10 Hezekiah nih Manasseh a hrin, Manasseh nih Amon a hrin, Amon nih Josiah a hrin; 11 cun Josiah nih Jechoniah le a unau pawl a hrin hna. Cu caan ah Babilon sal cannak a hung si.

12 Babilon saltaan hnu ah Jechoniah nih Shealtiel a hrin, Shealtiel nih Zerubbabel a hrin, 13 Zerubbabel nih Abiud a hrin, Abiud nih Eliakim a hrin, Eliakim nih Azor a hrin, 14 Azor nih Zadok a hrin, Zadok nih Achim a hrin, Achim nih Eliud a hrin,15 Eliud nih Eleazar a hrin, Eleazar nih Matthan a hrin, Matthan nih Jakob a hrin; 16 cun Jakob nih Mary pasal Josef a hrin; amah sin in Khrih ti mi Jesuh a chuak.

17 Cucaah a dihlak in Abraham in David tiang chan hleili, David in Babilon salcannak tiang chan hleili, cun Babilon salcannak in Khrih tiang chan hleili a si.

Josef nih Jesuh cu a fapa ah aa lak

18 Khrih a chuah ning cu hiti hin a si: A nu Mary cu Josef nih a rak ham, asinain an i umh hlan ah Thiang Thlarau thawng in fa a pawi kha an hmuh. 19 A hamtu Josef cu miding a si i amah kha ningzahter a duh lo caah a thli tein mak a timh. 20 Cuti mak awk i a ruah hnu ah khan Bawipa vancungmi cu ruah lopi in a mang ah a rak lang i amah kha, “David tefa Josef, Mary hi na nupi ca ah inn in cohlan awk ah ṭih hlah, zei ruang ah tiah cun fa a pawi mi hi Thiang Thlarau thawng in a si. 21 Fapa a hrin lai i a min ah Jesuh na sak lai – zei cah tiah a mi kha an sualnak in a khamh hna lai,” tiah a ti.  22 Hi vialte a cannak cu Bawipa nih profet in a rak chim mi a tlin lainak caah a si. A chimmi cu: -23 “Zoh hmanh, Ngaknu thiang cu fa a pawi lai i fapa a hrin lai; amah cu Emmanuel tiah auh a si lai, a min sullam cu Pathian-kamah he-a um-tinak a si. 24 Josef cu a hun i hlauh tik ah Bawipa vancungmi nih a chimh mi kha a tuah i Mary cu a inn ah aa ṭinpi. 25 Fapa a hrin hlan tiang amah cu a ihpi lo; cun amah cu Jesuh tiah a sak.

Nichuahlei Mifim pawl lennak

2. 1,Herod siangpahrang a bawi lio Judea ram Bethlehem i Jesuh a chuah hnu ah khan, ruah lopi in mifim zeimawzat cu nichuahlei in Jerusalem ah an ra, 2 cun “Jew hna siangpahrang bawhte cu khuazei ah dah a um? A arfi a chuah kan hmuh i amah upatnak pek awk ah kan ra,” tiah an hal.

3 Hi bia Herod Siangpahrang nih a theih tik ah a awlok a chong i cu bantuk cun Jerusalem khuapi zong a si ve. 4 Anih nih mipi tlangbawi luban le phungbia cawnpiaktu vialte kha a pumh hna i annih kha, “Khuazei ah dah Khrih cu a chuah lai?” tiah a hal hna. 5 Annih nih, “Judea ram Bethlehem ah, zei cah tiah hihi profet nih a rak ṭial mi cu a si: 6 Judah ram i a um mi, nang Bethlehem, Judah hruaitu hna lak ah hin a hme bik na si hrimhrim lo, zei cah tiah nangmah sin in ka mi Israel khaltu ding hruaitu pakhat a chuak lai,” ti a si. Cu tik ah Herod nih mifim hna cu a thli tein a kawh hna. 7 Cun annih kha arfi a chuah nithla kha fiang tein a hal hna. 8 Bethlehem ah a thlah hna i annih cu, “Va kal ulaw ngakchia kong cu ṭha tein va hlathlai uh; cun nan hmuh tik ah thawng ka pe u, cuti cun kei zong kal in ka va biak khawh ve lai,” tiah a ti hna.

9 Siangpahrang nih a chim duh mi kha an ngaih dih hnu ah an i thawh; cun hmakhatte ah an rak hmuh mi arfi cu a lang ṭhan, an hmai ah a kal i ngakchia umnak cung ah cun a dir. 10 Arfi an hmuh ṭhannak nih khan lawmhnak in a khahter hna.  11 Innchung ah an lut i ngakchia cu a nu Mary he an vung hmuh, cun an khuk an i bil i upatnak an pek. Cun an chawva kha an chuah i sui le frankinsen zihmui le mura zihmui cu laksawng ah an pek. 12 Sihmanhsehlaw an mang ah Herod sin kir ti lo ding in ralrin pek an si caah lam dang in an ram ah an kir.

Izipt Ram Zaamnak: Zei hngal lo hna thahnak

13 An kal hnu ah Bawipa vancungmi cu Josef sin ah a mang in a rak lang i amah kha, “Tho law, ngakchia le a nu kha i kalpi hna law Izipt ram ah va zaam u, cun thawng kan thanh hlan tiang cuka ah cun va um, zei cah tiah Herod nih ngakchia kha thah awk ah a kawl,” tiah a ti. 14 Cucaah Josef cu a tho, ngakchia le a nu kha a hruai hna i cu zan ah cun Izipt ram ah aa zam, 15 cuka ah cun Herod a thih hlan tiang an um. Hihi Bawipa nih profet kaa in, “Ka Fapa cu Izipt ram in ka auh cang,” a ti mi a tlinnak caah khan a si.

16 Herod cu mifim hna nih an ka hlen cang ti kha a hngalh tikah a thin a hung ngaingai. Arfi a chuahnak kong nichuahlei mifim hna nih an chim ning khan a caan cu a tuak i Bethlehem khua le a pawngkam i a um mi khua hna chung i pa ngakchia kumhnih ri in a tanglei poh kha thah dih awk ah nawl a chuah. 17 Cuti cun profet Jeremiah nih a rak chim mi cu a hung tling. A chim mi cu: 18 “Ramah ah thawng a thang, ṭahnak le ainak thawng a si. Rachel nih a fale kha a ṭah hna, hnemh zong a duh lo, zei cah tiah annih cu an um ti lo. An dihlak in an thi dih cang,” ti a si.

Izipt in Nazareth Ah

19 Herod a thih hnu ah Izipt ram i Josef sin ah Bawipa vancungmi pakhat cu ruah lo pi in a mang ah a rak lang i amah kha, 20 “Tho law, ngakchia le a nu cu, Israel ram ah kirpi ṭhan cang hna; zei cah tiah ngakchia thah a timtu cu an thi cang,” tiah a ti. 21 Cucaah Josef cu a tho i ngakchia le a nu kha Israel ram ah a kirpi hna.

22 Sihmanhsehlaw Arkelau nih a pa Herod cu Judea hruaitu ah a chan cang ti kha a theih tikah cuka ah va kal ding cu a ṭih, a mang in ralrinnak an pek bantuk in Galilee ramlei ah aa zuk. 23 Khika ah khan Nazareth ti mi khuapi ah umhmun a khuar. Hiti hin, “Amah cu Nazarethmi tiah auh a si lai,” tiah profet hna nih an rak chim mi bia cu a hung tling.

II: VANCUNG PENNAK CU THANH A SI

A: Chimhchinnak zawn Baptisma petu Johan Phungchimnak

3.1, A caan a tlin tikah, Baptisma petu Johan cu a hung lang: Hi bia hi Judea ram thetse rawn ah khan a thanh. 2 A thanh mi cu, “Vancung pennak a naih cang caah nan sualnak i ngaihchih u,” ti a si. 3 Hihi profet Isaiah nih, “Thetse ram i a au mi aw pakhat nih, ‘Bawipa ca ah lam sialpiak u, a lam hna cu dinter u” ti in a rak chim mi pa kha a si. 4 Hi pa, Johan cu kalauk hmul in tah mi hnipuan kha aa hruk i a tai ah saphaw taisawm aa sawmh, a rawl cu khaubok le khuaihliti a si. 5 Cun Jerusalem le Judea ram vialte le Jordan peng dihlak nih amah cu an fuh. 6 An sual an i phuang i Jordan tiva ah khan Baptisma a pek hna.

7 Sihmanhsehlaw Farasimi le Sadusimi tam nawn cu Baptisma hmuh awk i a sin an rat kha a hmuh hna tikah annih kha, “Nannih rulchia hna, a ra lai mi dantatnak in zaam awk ah aho nih dah ralrinnak an pek hna? 8 Sual ngaihchihnak in nan theipar langher u, 9 cun nanmah le nanmah kha, ‘Kan pa can ah Abraham kan ngei,’ ti sual lai u ci, zei ruang ah tiah Pathian nih cun hi lung hna hmanh hi Abraham fale ah a canter khawh ko hna. 10 Atu hmanh ah hreitlung cu thingkung hram ah chiah a si cang, cucu, theiṭha a tlai lo mi thingkung poh cu hau an si lai i mei ah paih an si lai. 11 Sual ngaihchihnak caah keimah nih ti in Baptisma kan pek hna, sihmanhsehlaw ka hnu in a ra mi pa cu keimah nakin a lianngan deuh, kei cu a kedan putpiak ding hmanh ah kaa tlak lo, amah nih cun Thiang Thlarau le mei in Baptismanak an pek hna lai. 12 Zahnak ding ṭalawn cu a kut ah a um ko; a phuhri cu a thianh lai i a fang cu buk ah a rawn hna lai; sihmanhsehlaw a hi cu a mit bal lo mi mei ah a khangh hna lai,” tiah a ti hna.

Jesuh cu Baptisma a hmu

13 Cu caan ah Jesuh cu a hung lang: Johan sin in Baptisma hmuh awk ah Galilee in Jordan tiva ah a ra. 14 Johan nih, “Nangmah sin in Baptisma hmuh a herh mi cu keimah hi ka si, nain nangmah tu ka sin ah na ra,” tiah khirh a timh. 15 Sihmanhsehlaw Jesuh nih, “Atu cu hiti hin si ko seh; hiti hin dinfelnak nih a hauh mi vialte kan tlinh cu aa herh ngai mi a si,” tiah a ti. Cun Johan nih si ko kun seh a ti ve.16 Cun Jesuh cu Baptisma a hmuh khawh in ti chung in a hung chuak colh, cun hmakhatte ah van cu an i hung i Pathian Thlarau cu ṭhuro bang a rung ṭum i a cung ah aa fut kha a hmuh. 17 Cun hmakhatte ah van in aw pakhat, ‘Hihi ka dawt khun mi ka fapa a si; ka mithmai ṭha cu a cung ah a um,’ tiah a rung thang.

                                Thetse ram ah hneksaknak

 4 1Cun khuachia nih rak tukforh awk ah Thlarau nih Jesuh cu thetse ram ah a kalpi. 2 Ni sawmli le zan sawmli chung rawl a ulh, cucaah a rawl a ṭam ngaingai, 3 cun hneksaktu cu a sin ah a ra i amah kha, “Pathian Fapa na si ahcun hi lung hi changreu i can awk ah nawl pe hna,” tiah a ti. 4 Sihmanhsehlaw amah nih, “Cathiang nih pei: Minung phun hi changreu lawng in a nung lo, Pathian hmurka in a chuak mi bia vialte cu a nunnak a si,’ tiah a ti kha,” ti in a leh.  5 Cu hnu ah khuachia nih khua thiang ah a kalpi i Biakinn parpahlek ah a toh. 6 Cun a thawh i, “Pathian Fapa na si ahcun, tang ah khin vung zuang tuah; zei cah tiah Cathiang nih:

‘Pathian nih nangmah kong ah a vancungmi kha nawl a pek cang hna,

lung ah naa khawn nakhnga lo an kut in an in cawi lai.’ a ti kha,” tiah a ti.7 Jesuh nih amah cu, “Cathiang nih:

‘Bawipa na Pathian cu va hneksak hlah,’ tiah a ti kha,” ti in a leh.

8 Cun, tlang sangpi pakhat ah a kalpi, khuachia nih vawleicung ram vialte le an sunparnak vialte kha a hmuhsak hna, 9 cun “Ka ke tang ah bawk in na ka biak ahcun hi vialte hi kan pek dih lai,” tiah a ti. 10 Cun Jesuh nih a leh i, “I kalpi dih hna, Satan!   Zei cah tiah Cathiang nih: ‘Bawipa na Pathian lawng kha na biak lai, amah lawng kha na rianh lai,’ tiah a ti khah,” ti in a leh. 11 Cu hnu ah khuachia nih a kaltak; cun vancungmi cu an rung lang colh i amah cu an zohkhenh.

Galilee ah a kir ṭhan

12 Johan an tlaih cang ti kha Jesuh nih a theih tikah Galileelei ah khan aa zuk. 13 Nazareth kha kaltak in Zebulun le Naftali hna ramri, tili pawng i a um mi Kapernaum, ah cun a va um.

14 Hihi cu profet Isaiah nih a chim mi a tlin lainak caah a si, a chimmi cu:

 15  “Zebulun Ram! Napfatali Ram! Jordan tiva ral Lam.

Miphun hna i Galilee —

16 Muihnak chung i a rak um mi hna nih khan ceunak nganpi

an hmuh cang. Thihnak thladem tang i a um mi hna cung ah ceunak a tlang cang,” ti  hi a si.

17 Cu caan thawk cun Jesuh nih, “Vancung Pennak a naih cang caah nan sual i ngaihchih u,” tiah phuan hram a thawk.

Zultu hmasa bik pali hna auhnak

18 Jesuh cu Galilee Rilikam i aa chawh lio ah khan unau pahnih, Peter ti auh mi Simon le a nau Andru kha a hmuh hna; annih cu ngatlai an si bang in rili ah cun an sur an rak chep len ko; 19 cun Jesuh nih annih kha, “Ka hnu ka zul ulaw minung tlaitu ah kan ser hna lai,” tiah a ti hna, 20 Hmakhatte ah  sur cu an kaltak i an zulh.

21 A hei kal deuh i a dang unau tuahkhat, Zebedi fapale hna a si mi Jeim le a naupa Johan kha a hmuh hna. An pa Zebedi he lawng chung ah khan an rak um i an sur cu an rak timhtuah len ko; cun a auh hna.  22 Cun, hmakhatte ah an lawng le an pa kha kaltak in amah cu an zulh.

Jesuh nih Thawngṭha cu a phuan i mizaw kha a damter hna

23 Jesuh cu Galilee ram cul in a kal, pumhnak inn ah khan a cawnpiak hna i pennak Thawngṭha cu a chimh hna, cun an lak i zawtnak le fahnak a phunphun a ing mi hna kha a damter hna.  24 Amah thawng cu Siria ram zong ah khan a thang, cun zawtnak a phunphun a ngei mi vialte hna le harnak a phunphun a tuar mi hna cu a sin ah an ratpi hna: khuachia nih a tuah mi hna le mitlu hna le a zeng mi hna kha a damter dih hna. 25 Galilee ram, Dekapoli, Jerusalem le Judea le Jordan tivaral ram in a ra mi mibu nganpi nih amah cu an zulh.

                         B:  TLANGCUNG CAWNPIAKNAK

                              Lunglawmhnak hna

5 1Mibupi kha a hmuh tikah tlang cung ah a kai. Cun a ṭhut hnu ah a zultu hna cu a sin ah an ra. 2 Cun cawnpiak hram a thawk. Hihi a chimh mi hna cu an si:

3 A lungchung in a si a fak mi hna cu zei tluk thluachuak dah an si!

 Vancung pennak cu anmah hna ta a si.

4 A nun a nem mi hna cu thluachuak mi  an si!

 Vawlei ro kha an co lai.

5 A hraam mi hna cu thluachuak mi an si!

Hnemh an si lai.

6 Dinnak kha tihal in a hal mi hna cu thluachuak mi an si!

Tling lak in an hmuh te lai.

7 Mi zaangfah a hmang mi hna cu thluachuak mi an si!

 Zaangfahnak kha pek an si te lai.

8 Lungthin a thiang mi hna cu

Thluachuak mi an si!

Pathian kha an hmuh te lai.

9 Rualremnak a ser mi hna cu thluachuak mi an si!

Pathian fale ti in hngalh an si te lai.

10 A hmaan mi ruang ah hremnak a ing mi hna cu thluachuak mi an si!

Vancung Pennak cu anmah hna ta a si.

11 “Keimah ruang ah mi nih nan cung ah ṭhat lonak an tuah, an in hrem hna i lih a phunphun an in puh hna tikah, thluachuak mi nan si! 12 Nan lung i lawm in nan tha nuam ko seh, zei cah tiah vancung ah nan laksawng cu a ngan lai; hiti hin pei nan hlan i profet hna cu an rak hrem ve hna cu.” tiah a ti.

Vawlei ca ah cite le ceunak

13 “Nannih cu vawlei ca ah cite nan si. Sihmanhsehlaw cite cu a alnak a loh ahcun, zei nih dah a alter ṭhan khawh lai? Santlaihnak a ngeih ti lo caah lamh awk men ah hlonh a si cang lai. 14 “Nannih cu vawlei ca ah ceunak nan si. Tlang cung i tlak mi khualipi cu zei hmanh nih a phen kho lo.15 Aho hmanh nih kho khuh awk ah mei an vang bal lo, mei-tung ah khan an chiah i inn chung i a um mi vialte kha a ceuh dih hna. 16 Cu bantuk in nannih nan ceunak zong cu mi hmai ah a ceu awk a si, cuti cun thil ṭha nan tuah mi kha mi nih an hmuh lai i vancung khua i a um mi nan Pa cu an thangṭhat lai.

Phungbia tlinnak

      17 “Phungbia le Profet hna cawnpiaknak hrawh awk ah a ra rua tiah ka ruat hlah u. Hrawh awk ah si lo in tlinter awk ah a si. 18 Biatak kan chimh hna! Van le vawlei an hmunh chung poh cu, Nawlbia hi a deh, a rin pakhatte hmanh an i tinhnak an tlinh hlan poh cu an rawk lai lo. 19 Cucaah nawlbia lak i a hme bik te hmanh kha a hnorsuan i mi dang zong cutin tuah awk ah a cawnpiak mi hna poh cu Vancung Pennak chung ah a hme bik mi ah hmuh an si lai; sihmanhsehlaw annih kha a zul i a cawnpiak mi hna cu Vancung Pennak ah milianngan in hmuh an si lai.

A thar cu a hlun nakin a sangdeuh.

        20 Cucaah kan chimh hna, nan dinfelnak cu phungbia cawnpiaktu hna le Farasimi hna nakin a san deuh lo ahcun Vancung pennak chung ah nan lut bal lai lo. 21 ‘Lai va nawng hlah u, cun lai a nawn ahcun biaceih zung ah chuahpi a si lai,” ti in hlan lio mi hna an rak chim tawn cu nan theih. 22 Asinain kei nih cun, ‘A unau cung i a thin a hung mi cu biaceih zung ah chuahpi nan si lai; a unau kha, ‘Mihrut,’ a ti mi poh cu biaceihtu bu ah chuahpi nan si lai; cun amah kha, ‘Rawitu’ a ti mi cu hell mei a in lai,” tiah kan ti hna. 23 Cucaah nan pekchanhnak cu biakṭheng cung nan phakpi hnu ah na unau pakhatkhat nih na cung ah thinhunnak a ngeih ti kha na lung in na hun hngalh ahcun, 24 na laksawng cu biakṭheng hmai ah chia ta, khulrang in va kir law na unau he khan remnak va ser hmasa, cu hnu ah ra law na laksawng cu pe chan ṭhan.

       25 “Mi pakhatkhat nih taza an cuai i zung ah an hruai ahcun a caan a um lio, zung nan phak hlan ah khan, amah he remnak va ser; khika na phak hnu ah cun biaceihtu sin ah chanh na si lai i biaceihtu nih palik ah an chanh chin lai i thong ah an i thlak lai. 26 Biatak kan chimh, na pek ding mi hmanung bik piasen na pek hlan lo thong in na chuak lai lo. 27 ‘Nu le pa sualnak va tuah hlah,’ti in an chim tawn cu nan theih. 28 Sihmanhsehlaw kei nih cun, mipa pakhat nih nu kha sual duhnak lungthin he a zoh ahcun, cu pa cu a lung chung in a sual cang,” tiah kan ti hna. 29 Cucaah na orhlei mit cu an tlaktertu a si sual ahcun khoih law hlonh ko. Na pum dihlak hell chung tlak nakcun na pum cung thil pakhatkhat na sungh cu a ṭha deuh tuk. 30 Na orhlei kut nih an tlakter ahcun tan law hlonh ko. Na pum a ningpi in hell chung tlak nakcun na kutke pakhatkhat sungh cu a ṭha deuh tuk. 31 ‘Mipa pakhatkhat nih a nupi kha a mak ahcun maknak ca pe seh,’ tiah an rak ti. 32 Sihmanhsehlaw kei nih cun, hiti hin ka ti: Phung ning lo in a um ti dah lo, a nupi a mak ahcun a nupi kha nu le va sualnak tuahnak ah a hruai; cun mak mi nu a ṭhi mi zong nih nu le va sualnak a tuah ve.

        33 Cun, ‘Bia nan i kam mi cu nan let lai lo, Bawipa sin ah nan i kam cang mi cu nan tuah hrimhrim lai,’ ti in hlan lio mi hna nih an rak ti cu nan theih. 34 Sihmanhsehlaw kan chimh hna: Biakamnak tuah hrimhrim hlah u; vancung chalh in tuah hlah u, zei cah tiah vancung cu Pathian ṭhutnak a si; 35 vawlei chalh zong in tuah hlah u, zei cah  tiah vawlei cu Pathian ke chiahnak a si; Jerusalem khua chalh zong in tuah hlah u, zei cah tiah Jerusalem cu Siangpahrang ngan khua a si. 36 Nanmah lu chalh zong in tuah hlah u, zei cah tiah nan samfa fakhat hmanh nan dumter kho lo i nan ranter kho lo. 37 Nan chim ding  a si mi cu ‘A si’ ti ulaw a si lo mi cu ‘A si lo’ ti ko u. Cu pin cu mi ṭha lo pa sin in a ra mi an si.

       38 Mit ca ah mit, ha ca ah ha, an rak ti tawn mi cu nan theih. 39 Sihmanhsehlaw kei nih cun, ‘Mi ṭha lo hna sin in vaa pheng hlah u,’ kan ti hna. Nan orhlei bel i an in bengh hna ahcun khatlei zong kha chit rih u. 40 Cun nan angki chungnawh lak awk ah taza an in cuai hna ahcun nan angki leng zong va pe rih u. 41 Cun mi pakhatkhat nih khankhat kalter an duh ahcun amah he khanhnih va kal u. 42 An hal mi poh cu va pe law cun mi pakhatkhat nih thil cawi an duh tik ah va cawih.

       43 ‘Na innpa na dawt lai i na ral cu na huat lai,’ an ti tawn kha nan theih. 44 Sihmanhsehlaw kei nih cun hiti hin kan ti hna: nan ral kha va daw ulaw an hremtu hna cu thla va campiak hna u. 45 Cuti cun vancung nan Pa i fale nan si lai, zei cah tiah anih nih cun a ṭha mi he a ṭha lo mi he an cung ah ni a tlanter i ṭhatnak a tuah mi he chiatnak a tuah mi he an cung ah a ruah cu a surter. 46 Zei cah tiah an dawtu hna lawng nan dawt hna ahcun zei laksawng dah nan hmuh lai? Ngunkhuai khawltu hna hmanh nih cu tluk cu an tuah a si lo maw? 47 Cun nan unau lawng kha nan chawnh hna ahcun zei tal a hlei in nan tuah mi a um maw? Jentailmi hna hmanh nih cu tluk cu an tuah ko ṭung. 48 Vancung nan Pa a tlin bantuk in nannih zong nan tling ve lai.

                                     A thli in tuah mi ṭhatnak

6.          1“Ṭhatnak nan tuah mi hi zapi nih kan hmu hna seh ti in zapi hmai ah nan tuah nakhnga lo i ralring u, cutin nan tuah ahcun vancung nan Pa sin in laksawng vialte nan sung dih lai. 2 Cucaah a hlu nan pek tikah nan hmai ah muko tumter hna hlah u, hihi mi depde pawl nih zapi i zohchonak hmuh an duh caah, pumhnak inn le zatlang lam ah an tuah mi a si. Biatak kan chimh hna: an laksawng cu an hmuh cang. 3 Sihmanhsehlaw nannih nih a hlu nan pek tik ah nan orhlei kut nih a tuah mi kha nan kehlei kut nih hngal hlah seh. 4 a hlu nan pek mi cu a thli tein siseh, cun a thli tein tuah mi vialte a hmutu nan Pa nih laksawng an pek hna lai.

A thli tein thlacamnak

        5 Cun thla nan cam tikah midepde hna kha i zohchun hna hlah u. Annih nih mi hmuh awk ah pumhnak inn le zatlang lam tonnak ah dir i cam an duh. Biatak kan chimh hna: an laksawng cu an hmuh diam cang. 6 Sihmanhsehlaw nannih cu thla nan cam tikah nan inn khaan te ah va lut ulaw innka kha vaa khar khumh u, cun khuakinnak i a um mi nan Pa sin ah thla va cam u, cun a thli tein tuah mi a hmu dihtu Pa nih laksawng an pek hna lai.

Bawipa thlacamnak

7 Thla nan cam tikah Jentailmi hna bantuk in tampi va chim hlah u, zei cah tiah annih nih cun bia tampi kan hman caah kan bia a kan theihpiak lai ti in an ruah. 8 Annih bantuk cun va tuah hlah u, zei cah tiah nan Pa nih cun nan hal hlan in nan herh mi cu a hngalh dih cang. 9 Cucaah hi bantuk in thla nan cam lai:

‘Vancung a um kan Pa,

Na min thiang ko seh;

10 Na pennak tlung ko seh,

Vancung bantuk in vawlei zong ah na duhnak

cu tuah si ko seh.

11 Nifa kan herh mi rawl cu nihin kan pe ko sawh.

12 Lei a kan ba mi kan ngaihthiam hna bang in kan leiba cu kan ngaithiam ve ko sawh.

13 Cun tukforhnak ah phakter lo in Mi ṭha lo pa sin in kan khamh tuah.

14 ‘A si, mi an tlamtlin lonak kha nan ngaihthiam hna ahcun vancung nan Pa zong nih an ngaihthiam ve hna lai. 15 Sihmanhsehlaw mi kha nan ngaihthiam hna lo ahcun vancung  nan Pa zong nih nan tlamtlin lonak kha an ngaithiam ve hna lai lo.

A Thli rawl ulhnak

16 “Rawl nan an ulh tikah midepde hna bang in hmaichia ngai in i umter hlah u; rawl kan ul ti kan hngal hna seh ti in hmaipanh lo in an i chawk. Biatak kan chimh hna, an laksawng cu an hmuh diam cang. 17 Rawl nan ulh tikah sathau i thuh ulaw nan hmai i phiah u, 18 cuti cun a thlithup in tuah mi vialte a hmutu Pathian dah ti lo nih cun aho hmanh nih an in hmu hna lai lo, cun a thli tein tuah mi vialte a hmutu nan Pa nih laksawng an pek hna lai.

Chawva taktak

19 Rungrul le cirik nih an hrawh khawh i mifir nih an baoh i an fir khawhnak vawlei ah hin nan chawva khong hlah u. 20 Rungrul le cirik nih an hrawh khawh lo i mifir nih an baoh i an fir khawh lonak vancung tu ah khin nan chaw cu khong u. 21 Zei cah tiah nan chaw a umnak ah nan lung a um ve.

Mit cu pum ca ah mei inn

22 Mit cu pum ca ah mei-inn a si. Cucaah nan mit a ṭhat ahcun nan pumpaluk cu ceunak in a khat lai; 23 sihmanhsehlaw nan mit a ṭhat lo ahcun nan pumpaluk cu a mui ve lai. Cucaah na chung i a ummi ceunak cu a muih ah cun, cucu zei bantuk muihnak dah a si hnga?

Pathian le Tangka

24 “Aho hmanh bawi pahnih sal a si kho lo; pakhat kha a huat ahcun a dang  pakhat kha a dawt lai; asiloah pakhat kha a komh lai i a dang pakhat kha a nautat lai.  Pathian le tangka cu nan kemh kho lai lo.

Zohkhenhnak kha zum u

       25 “Cu ruang ah cun nan nunnak kong le zei dah kan ei lai ti mi kong ah, asilole nan pum kong le zei dah kan i hruk lai ti mi kong ah nan lungre theih lo ding in kan chimh hna. Nunnak cu rawl nakin a biapi deuh i pum cu hnipuan nakin a biapi deuh tuk! 26 Van i vate hna khi zoh hmanh u: thlaici an thla lo, an zuun lo i buk zong ah an rawn bal lo; sihmanhsehlaw vancung nan Pa nih a cawm ko hna. Nannih cu annih hna nakin nan biapi deuh tuk a si lo maw? 27   Zei tluk nan lungre a theih zong ah nan nunnak tlawmte tal a sauter kho mi aho tal nan um maw?

     28 “Cun zei ruang ah dah hnipuan kong ah nan lungre a theih? Ramlak i a kho mi lili pangpar khi ruat hmanh u: rian an ṭuan lo i hnipuan zong zei hmanh an i tah lo; 29 nain hihi kan chimh hna: Siangpahrang Solomon hmanh nih kha tluk khan a rum ko nain hi pangpar hna lak i pakhat tluk hmanh hin aa dawh mi hnipuan a ngei lo. 30 Nihin ah a kho i thaizing meiphu ah paih ding mi ramkung hna kha Pathian nih hitin a thuamh hna ahcun nannih hi tluk zumhnak tlawm a ngei mi hna cu an zohkhenh chinchin hna hnga lo maw? 31 Cucaah, ‘Zei dah ka ei lai, zei dah ka din lai i zei in dah kaa thuamh lai,’ ti in lungrethei in um hlah ngat u. 32 Hi thil hna cung i a thinlung a chia mi hna cu Jentailmi an si.  Vancung nan Pa nih hi thil vialte nan herh cu a hngalh ko. 33 Cucaah a pennak le a dinnak ah nan lung chia ulaw hi hna vialte zong cu chapchih nan si lai. 34 Cucaah thaizing kong ah nan lungre thei hlah u: thaizing cu amah tein a lungre i theih ko seh. Ni kip nih za lak in hnahnawhnak aa ngeih cang.

                         Mi kha bia va ceih hna hlah u

       7. 1“Biaceih na si nakhnga lo mi kha an bia va ceih hna hlah — 2 zei cah tiah mi bia na ceih hna ning in bia ceih na si ve te lai, cun midang cung na hman mi tahfung kha na ca ah hman a si ve lai. 3 Na mit chung i thingtan kha hmuh lo in zei cah dah na unau mit chung i mithnawmte cu na hmuh khawh? 4 Na mit chung thingtan a um bu in zei tin dah na unau cu, ‘Na mit hnawm in coihpiak ning,’ ti in na chim ngam? 5 Midepde, na mit chung i thingtan kha chuah hmasa law pei na unau mithnawm cu fiang tein na hmuh khawh lai cu!

A thiang mi thil cu va thurhnawmter hlah

     6 “A thiang mi thil cu uico kha va pe hlah u; cun nan lungvar cu vok hmai ah va thla hlah, an lamh lai, cun nan sin ah an i mer lai i an in thlehbauh dih sual lai.

Hmual a ngei mi thlacamnak

      7 “Hal ulaw pek nan si lai, kawl ulaw nan hmuh lai, king ulaw innka hunh nan si lai. 8 A hal mi poh nih an co; a kawl mi poh nih an hmuh i a king mi poh cu innka hunpiak an si lai. 9 Nanmah lak ah hin nan fale nih changreu an in hal hna tikah lung a pe mi, 10 nga an in hal hna tikah rul a pe mi nan um hnga maw? 11 Nannih mi ṭha lo hna hmanh nih nan fale kha thil ṭha pek nan hngalh ahcun, vancung nan Pa chinchin nih cun a sin i thil ṭha a hal mi hna cu a pe chinchin hna hnga lo maw?!

Sui phung

     12 “Cucaah mi nih nan cung ah tuah hna seh ti nan duh ning in anmah cung zong ah va tuah ve u; cucu Nawlbia le profet hna cawnpiaknak a si.

Lam pahnih

        13 “Kutka bi in lut u, zei tin tiah rawhnak ah a phan mi lam cu a kau i a fawi, cun mi tampi nih an zulh. 14 Sihmanhsehlaw a bi i a har mi kutka cu nunnak ah a phan mi lam a si i tlawmpal lawng nih an co.

Profet deu hna

      15 “Nan sin ah a ra mi nal profet hna kha vaa ralring hna u; tuuhmul an i hruk nain cenghngia hrang an si. 16 Annih cu an theitlai in nan hngalh ko hna lai. Khohmung in mitsur thei, asilole saihmurhling in theipi an lo bal maw? 17 Cu bantuk in a ngan a dam mi thingkung nih thei ṭha a tlai i kungthu nih thei ṭha lo a tlai ve. 18 A dam mi kung nih theichia a tlai kho lo i kung ṭha lo nih thei ṭha a tlai kho ve lo. 19 Thei ṭha a tlai lo mi kung poh cu hau i mei ah paih an si tawn.  20 Ka nolh than lai, an theitlai in nan hngalh ko hna lai.

Hnu zultu taktak

        21 ‘Bawipa, Bawipa,’ ti in a ka au mi poh nih Vancung Pennak chung ah an lut lai tinak a si lo, sihmanhsehlaw vancung i ka Pa duhnak a tuah mi lawng an lut lai. 22 A ni a phak tik ah mi tampi nih, Bawipa, Bawipa! Na min in Profet bia kan chim; na min in khuachia tampi kan ṭhawl i khuaruahharnak tampi kan tuah a si lo maw?” tiah an ka ti te lai. 23 Khi tikah annih kha hmaitonh in: kan hngal bal hna lo, ‘Nannih ṭhat lonak atuahtu hna, ka sin in chuak u,’ ka ti hna lai.

       24 ‘Cucaah hi ka bia a ngai i a tuah mi poh cu lung cung ah inn a sa mi mifim bantuk a si lai. 25 Ruah a sur, ti a lian, thli nih fak pi in a den nain a pur lo; zei cah tiah lung cung ah sak mi a si. 26 “Sihmanhsehlaw hi ka bia a thei i a zul lo mi poh cu thetse cung ah a inn a sa mi mihrut bantuk a si. 27 Ruah a sur, ti a lian, thli nih fakpi in a den tikah a pur i ṭha lo in a rawk,” tiah a ti.

Mipi cu an khuaruah a har

       28 Atu cu Jesuh nih a chim duh mi kha a chimh dih cang hna, cun a cawnpiaknak nih mizapi kha an lung a ton ngaingai hna, 29 zei cah tiah phungbia cawnpiaktu hna bantuk in si lo in nawlngeihnak he a cawnpiak hna.

            III: VANCUNG PENNAK CU THANH A SI

                             KHUARUAHHARNAK PAHRA

                                 Thinghmui mipa a damter.

             8.1, Tlang cung in a rung ṭum hnu ah khan mibu nganpi nih an zulh. 2 Ruah lo pi in thinghmui mi pakhat cu a rak chuak, a hmai ah a kun i amah kha, “Bawipa, na duh ahcun na ka thianter khawh,” tiah a ti. 3 Jesuh nih a kut a samh i a tongh, cun, “Ka duh, thiang ko,” tiah a ti. Cun hmakhatte ah a zawtnak in a thiang. 4 Cun Jesuh nih amah cu, “Aho hmanh chim hna hlah, sihmanhsehlaw anmah ca i tehte si ding ah va kal law tlangbawi kha vaa hmuhsak, Moses nih tuah awk a ti mi pekchanhnak cu va pechan,” tiah a ti.

Zauk ralkap bawi sal a damter

        5 Kapernaum khua a va luh ah khan Zauk bawi pakhat cu a ra chuak i amah kha, 6 “Bawipa, ka sal cu a zen caah inn ah a ril ko i a zual ngaingai,” tiah a ti. 7 Jesuh nih, “Keimah pumpak ka ra lai i ka damter lai,” tiah a ti. 8 “Zauk bawi nih, “Ka inn chung lut ding ah kaa tlak lo, na bia kaakhat lawng chim law ka salpa cu a dam ko lai. 9 Zei cah tiah kei zong cunglei nawl tang i a um mi ka si i ka tang zong ah ralkap an um ve, pakhat cu, ‘Kal,’ ka ti i a kal, cun a dang  pakhat cu, ‘Ra,’ ka ti i a ra; cun ka sal cu, ‘Hihi tuah,’ ka ti i a tuah,” tiah a leh.10 Hi bia a theih tikah Jesuh cu a khuaruah a har i a hnu a zultu hna kha, “Biatak kan chimh hna, hi tluk ngan zumhnak hi Israel mi aho sin hmanh ah ka hmu rih lo. 11 Cun kan chimh hna, mi tampi cu nichuahlei le nitlaklei in an ra lai i Vancung Pennak chung rawldanghnak ah Abraham le Isak le Jakob hna he an ṭhuṭi lai, 12 sihmanhsehlaw Pennak fale hna cu khualeng muihnak ah hlonh an si lai, cuka ah cun ṭahnak le hacang rialnak a um lai,” tiah a ti hna. 13 Cun Jesuh nih zauk bawi cu, “Atu va ṭin, hihi cu na zumhnak nih a hauh bang in na ca ah tuah si ko seh” tiah a ti. Cun a salpa cu cu caante ah cun a dam.

Peter pi a damter

      14 Cun Peter inn ah khan a va kal tikah Peter nupi nu cu ihkhun ah a ril ko i a tak a linh ngai kha a hmuh. 15 A kut a vun tongh i a taklinh a dai, cun a tho i anih kha a bultawl hna.

Tam nawn a damter hna

       16 Cu zanlei ah cun khuavang ngei mi tampi kha a sin ah an ratpi hna. Bia kaakhat in thlarau ṭha lo a ṭhawl hna i a zaw mi vialte cu a damter hna. 17 Hihi cu profet Isaiah nih, “Amah hrimhrim nih kan zawtnak cu a kalpi i kan dam lonak cu a phorh,” ti in a rak chim mi a tlin nakhnga caah a si.

Lung cheubang lo in pum i peknak 

         18 Jesuh cu mibupi nih a zual in an zual cang ti kha a hmuh tikah rili khattelei ral va peh awk ah a chimh hna. 19 Phungbia cawnpiaktu pakhat cu a ra chuak i amah kha, “Bawipa, na kalnak poh ah kan zulh lai,” tiah a ti. 20 Jesuh nih, “Cenghngia nih kua an ngei i van vate hna nih bu an ngei, sihmanhsehlaw mi Fapa cu a lu chiahnak hmanh a ngei lo,” tiah a leh.

      21 Adang mipa pakhat, a hnuzul pakhat nih, “Bawipa, va kir in ka pa va vui ta ning,” tiah a ti. 22 Sihmanhsehlaw Jesuh nih, “Ka zul, mithi cu an mithi hna nih vui ding in kaltak ko,” tiah a ti.

Thlichia a daihter

         23 Cu hnu ah lawng chung ah a lut i a zultu hna nih khan an zulh. 24 Ruah lopi khin thlichia a tho, a fah tuk caah lawng cu tilet nih a khuh hnik. Sihmanhsehlaw amah cu aa hngilh ko. 25 Cucaah an va kalhnawh i amah kha, “Bawipa, kan khamh tuah, kan thi cang lai hih,” ti in an ṭhangh. 26 Anih nih, “Zumhnak tlawm hna, zei ruang ah dah cu tluk cun nan lau?” tiah a ti hna. Cun a tho i thli le tilet cu a hro; cun rili cu dai tein a um ṭhan. 27 An khuaruah a har tuk i, “Hi pa hi zei bantuk minung dah a si? Thli le rili hmanh nih pei a nawl an ngaih hi,” tiah an ti.

Gadara khuachia hna

        28 Khattelei ral Gadarin mi hna ram a va phanh tikah thlaan chung in khuachia pahnih cu an ra chuak - annih cu an hran tuk ah cu lam cu aho hmanh an zul kho lo. 29 Hmakhatte ah khin, “Pathian Fapa, zei dah na duhnak a um? A caan a phanh hlan ah hrem awk ah maw na rat cang?” ti in an au. 30 Mah lio ah cun lamhla nawn ah khin vok runpi cu an tlong, 31 cun khuachia hna nih Jesuh cu, “Na kan ṭhawl ahcun vok runpi ah khin kan thlah ko,” tiah an nawl. 32 Cun annih kha, “Va kal u,” tiah a ti hna. Cucaah an chuak i vok chung ah cun an lut; cu tik ah vok cu an run ning in lungpang in rili chung ah an zuan caah ti chung ah an tla i an thi dih. 33 Vok cawngtu hna cu khualipi ah an tli i khuachia cung a tlung mi thil kong telchih in, thil si ning vialte kha an va chimh hna. 34 Hmakhatte ah khualipi chung mi vialte cu Jesuh ton awk  ah an i thawh; cun an hmuh cangka in an pawngkam in chuah awk ah an nawl.

          9.  Mizengpa a damternak

        1.Lawng ah a rak kir ṭhan, ti cu a tan i a chuahnak khua cu a phan. 2 Cun ruah lopi in micheukhat nih mizeng pakhat cu a ihkhun in an rak zawnh i a sin ah an rak phan. An zumhnak a hmuh tikah Jesuh nih mizengpa cu, “Ka fapa, na hna ngam ko seh! na sualnak cu ngaihthiam a si cang,” tiah a ti. 3 Cun Phungbia cawnpiaktu cheukhat nih an lung chung in, “Hi pa hi Pathian a serhsat,” tiah an ti. 4 An lungchung i an ruah mi kha a hngalh caah Jesuh nih annih cu, “Zei ruang ah dah cu bantuk ruahnak ṭha lo cu nan ngeih? 5 Zei hi dah chim a fawi deuh: ‘Na sualnak cu ngaihthiam na si cang,’ ti maw, asiloah, ‘Tho law kal,’ ti dah? 6 Sihmanhsehlaw nanmah kha mi Fapa cu vawlei ah sual ngaihthiamnak nawl a ngei ti hngalhternak caah - cun mizengpa cu, “Tho law, na ihphah i lak law va ṭin,” tiah a ti. 7 Cun mipa cu a tho i inn ah a ṭin. 8 Hihi mi nih an hmuh tikah mibupi cung ah khuaruahharnak a tlung, cun cu bantuk nawlngeihnak cu minung phun kha a pek caah Pathian cu an thangṭhat.

Matthai auhnak

9 Jesuh cu cuka hmun in a va kal deuh tikah ngunkhuai zung i a ṭhu mi  Matthai cu a hmuh, cun amah kha, “Ka hnu ka zul,” tiah a ti. A tho i a zulh.

Misual hna he eiṭinak

          10 Inn chung rawl an dum lio ah khan ngunkhuai khawltu tam nawn le misual hna cu an ra i amah le a hnuzul hna he an rak ṭhu ve. 11 Khakha Farasi mi hna nih an hmuh tikah a hnuzul pawl cu, “Zei ruang ah dah nan Bawipa cu ngunkhuai khawltu hna le misual hna he rawl a ei?” tiah an ti. 12 Hihi a theih tikah anmah kha, “A dam mi si lo in a zaw mi nih siibawi an herh. 13 Va kal ulaw, ‘Ka lung a ka tong mi cu raithawinak a si lo, zaangfahnak a si,’ ti mi bia sullam hi va cawng u. Biatak kan chimh hna, miding si lo in, misual auh awk ah ka ra,” tiah a ti.

Rawl ulhnak kong ceihkhannak

      14 Cun Johan zultu hna cu an ra i amah kha, “Zei ruang ah dah kannih le Farasimi pawl cu rawl kan ulh i na zultu hna cu an ulh lo,” tiah an ti. 15 Jesuh nih, “A hmaan, nupi ṭhitu a tlangvalpa an sin a um chung poh cu a kawi hna cu ngaihchia in an um kho lo. Sihmanhsehlaw nupi a ṭhitu tlangvalpa an sin in an lak caan cu a phan te lai, cun ulhnak an tuah te ko lai. 16 Aho hmanh nih puanthan thar cu angki hlun ah an belh bal lo, zei cah tiah puanthan thar nih a hlun cu a thleh lai i a tleh a zual chin lai. 17 Cun mi nih saphawcua a hlun chung ah mitsur thar an rawn bal lo, cuti an tuah ahcun a saphaw cu a kek lai; a mitsurzu a zut lai, cun a saphaw cu a rawk lai. Cucaah mitsurzu thar cu saphawcua a thar ah an rawn i an pahnih in an him,” tiah a ti.

Thichuak zawtnak a ngei mi nu damternak le bawi pakhat fanu thawhternak

       18 Bia a chim lio ah khan, zungbawi pakhat cu ruah lo pi in a ra chuak, a hmai ah a kun i amah kha, “Tunaite ah khan ka fanu a thi, sihmanhsehlaw ra law a cung ah na kut rak chuang, cun a nunnak cu khamh a si lai,” tiah a ti. 19 Jesuh cu a tho i, a zultu hna he an zulh.

      20 Cun ruah lopi in a hnulei in minu pakhat, thichuah zawtnak in kum hleihnih chung a zaw cang mi cu a ra i a puan parte kha a tongh, 21 zei cah tiah a puan hmanh kha ka tongh khawh ahcun khamh ka si ko lai,” tiah a ruah.

      22 Jesuh cu a hun i mer i a hmuh, cun amah kha, “Ka fanu, na thinphang hlah, na zumhnak nih an damter cang,” tiah a ti. Cu caan thawk in minu cu damnak a hmu.

     23 Jesuh cu zungbawipa inn a phak tikah, mithi a topi mi mibupi he, tingtang a tum mi hna kha a hmuh hna i annih kha, 24 “Chuak u! Ngakchia nute cu a thi lo aa hngilh,” tiah a ti hna. Amah cu an nihsawh. 25 Sihmanhsehlaw mi an chuah dih tikah a chung ah a lut i a kut in a tlaih; minute cu a tho. 26 Cun hi thawng cu khuatelei vialte  a cul dih.

Mitcaw pahnih a damter hna

      27 A vung kal deuh tikah mitcaw pahnih nih Jesuh cu an zulh i,“David Fapa kan zaangfah ko,” ti in an au. 28 Cun Jesuh cu inn a phanh tikah mitcaw hna cu an ra chuak i annih kha, “Hihi ka tuah khawh ti  nan zum maw?” tiah a ti hna. Annih nih, “Bawipa, kan zumh ko,” tiah an leh. 29 Cun an mit kha a tongh hna i annih kha, “Nan zumh bang in nan cung ah si ko seh,” tiah a ti hna. 30 Cun khua an hmuh ṭhan. Annih kha Jesuh nih, “Aho hmanh nih an hngalh nakhnga lo i ralring u,” tiah fak pi in ralrinnak a pek hna. 31 Sihmanhsehlaw an chuah tikah a kong cu khuatelei cul in an chim.  

Khuachia nih a tuah i a holh a aa mi a damternak

32 An chuah tlawmpal ah khan ruah lopi in khuachia nih a tuah i a holh kho lo mi pakhat cu a sin ah an ratpi. 33 A khuachia a chuah cangka in mipa cu a holh kho i mi cu an khuaruah a har dih i annih nih, “Hi bantuk thil hi Israel ah kan hmu bal lo,”tiah an ti. 34 Sihmanhsehlaw Farasi mi hna nih, “Khuachia bawi hna thawng in khuachia a ṭhawl hna,” tiah an ti.

Mibupi an tha a dih, an zaang batnak

         35 Jesuh cu khuapi le khuate vialte kha a tlawng hna, an i pumhnak inn ah a cawnpiak hna, Pennak thawngṭha cu a thanh i zawtnak phunzakip le dam lonak phunzakip kha a damter hna.36 Cun mibupi kha a hmuh hna tikah a zaangfah hna, zei cah tiah annih cu khaltu ngei lo tuu hna bang, an tha a ba i awlokchong in an um. 37 Cucaah a zultu hna kha, “Rawlṭuan awk tampi a um nain a ṭuantu cu an tlawmte,  38 cucaah a lo ah a ṭuantu a thlah hna nakhnga lo ngeitu bawipa cu hal u,” tiah a ti hna.

           B: LAMKALTU HNA CA AH CAWNPIAKNAK

               10.   Hleihnih hna mission

        1.A zultu hleihnih kha a auh hna i annih nih khuachia kha nawlngeihnak he ṭhawl khawhnak le zawtnak phunkip le dam lonak phunkip damter khawhnak nawl a pek hna. 2 Hi lamkaltu hleihnih hna i an min cu: pakhatnak ah Peter ti in hngalh mi Simon, cun a nau Andru; Zebedi fapa Jeim, cun a nau Johan; 3 Filip le Bartholomew; Thomas, cun ngunkhuai khawltu Matthai; Alfeas fapa Jeim, cun Thaddaeus; 4 cun Phunṭanh Simon le Judas Iskariot; amah cu a rawitu zong a si. 5 A tanglei bang in a cawnpiak hna hnu ah, hi hleihnih hna cu Jesuh nih a thlah hna:

        “Jentail mi hna ram ah va kal hlah u, cun Samaria khuapi pakhat hmanh lut hlah u;  6 Israel Chung tuu tlau hna sin tu ah va kal u. 7  Cun nan kalpah in, ‘Vancung Pennak a nai tuk cang,’ ti in va thanh u. 8 Mizaw kha va damter hna u, mithi kha va thawhter u, thinghmui zawtnak a ing mi hna kha va thianter hna u, khuachia kha va ṭhawl hna u. Man lo in nan hmuh bang in man lo in va pe ve u. 9 Nan zal ah sui siseh, ngun siseh, dar tangka siseh, i sanh hlah u,10 nan khualtlawn nak ca ah zal siseh, angki khethuan siseh, kedan siseh, ṭhiangṭhunh siseh i phorh hlah u, zei cah tiah a ṭuantu nih a nunnak ca ah a herh mi cu a hmuh awk a si.

       11 “Zei bantuk khuapi, asilole khuate nan luh hmanh ah zumhtlak mi pakhat kha kawl ulaw cuka in nan chuah hlan tiang a sin ah va um u. 12 Inn chung nan luh tikah chawn bia hna u, 13 cun cu inn cu chawnhbiaknak he aa tlak ahcun nan daihnak cu a cung ah phan ko seh; aa tlak lo ahcun nan daihnak cu nan sin ah kir ṭhan ko seh. 14 Cun mi pakhatkhat nih an in cohlan lo i nan chim ding kha a ngaih duh lo ahcun, cu inn asilole cu khua in nan chuah tikah nan ke i leidip kha va thin hnawhtak hna u. 15 Biatak kan chimh hna, biaceih ni ahcun, cu khua nakin Sodom le Gomorrah cu a tuar a nem deuh lai. 16 Zoh hmanh u! Cenghngia lak i tuu hna bantuk in kan thlah hna, cucaah rul bang va zer ulaw ṭhuro bang va nem u.

Missionary pawl cu hrem an si lai

     17 Zung ah an in chuahpi hna lai i pumhnak inn ah an in tuk hna lai caah timhcia in um u. 18 Keimah ruang ah uktu bawi le siangpahrang hna hmai ah an in chuahpi hna lai; cucu annih le Jentail mi hna ca tehte si awk ah a si. 19 Sihmanhsehlaw an in chanh hna tikah zei tin dah ka chim lai, zei dah ka chim lai ti nan lungre thei hlah seh, chim ding cu a caan a phak tikah pek nan si lai, 20 zei cah  tiah a chimtu ding cu nanmah nan si lai lo; Pathian Thlarau nih nan chung in a chim lai.

      21  “Unau pakhat nih a unau lila kha thih tiang a rawi lai, a pa nih a fapa; cun fale cu an nu le pa ralchanh in an dir lai i anmah kha an thahter hna lai. 22 Mikip nih ka min ruang ah an in huat hna lai; sihmanhsehlaw fek tein a dir mi poh cu khamhnak a co lai. 23 Khua pakhat ah an in hrem hna ahcun a dang ah vaa dor u; cun cuka ah an in hrem hna ahcun a dang khua ah vaa dor u. Biatak kan chimh hna: Mi Fapa a rat hlan ah, Israel ram khua dihlak kha nan cul dih manh lai lo.

24 “Hnuzul cu a saya nak le, sal cu a bawi nakin a ngan deuh lo. 25 Hnuzul ca ah a saya tluk, cun sal ca ah a bawi tluk si cu a za ko. Innchungkhar i lu kha Beelzebul ti in an auh ahcun, a innchungkhar mi hna cu zei tluk dah an tuah chinchin hna lai,” tiah a ti.

Ṭih lo in phuang u

       26  “Cucaah annih kha ṭih hna hlah u. Atu i khuh mi poh cu hun an si lai, cun atu i a fiang lo mi cu an fiang te lai. 27 Khuamui lak i ka chim mi hi chun khuaceu ah va chim hna u; biathli in nan theih mi cu innpar in va thanh u.

       28 Pum a that kho ko nain thlarau a that kho lo mi cu va ṭih hna hlah u; hell chung ah pum kha thlarau he a hrawk khotu tu kha va ṭih u. 29 Piasen piakhat in pithlung pahnih nan cawk khawh a si lo maw? Asinain pithlung pakhat hmanh hi nan Pa hngalh lo in vawlei ah an tlawng lo. 30 Zei cah tiah, nan lu cung i samfa cu a rel dih hna. Cucaah phan awk zei hmanh a um lo; nannih cu pithlung tampi nakin nan sung deuh,” tiah a ti hna.

        32 “Cucaah mi pakhatkhat nih a mi ka si ti in mi hmai ah a ka phuan ahcun vancung i ka Pa hmai ah kei zong nih cutin amah cu ka phuan ve lai. 33 Sihmanhsehlaw minung hmai ah a ka hlaw mi poh cu vancung i ka Pa hmai ah ka hlawt hna ve lai.

Ṭhennak ruangpi Jesuh

          34 ‘Vawlei ah daihnak phorh ding in a ra tiah ka ruat hlah u; ka rak phorh mi cu daihnak si lo in hriamnam a si. 35 Zei cah tiah ka rathnawh chan cu fapa cu a pa dohter, fanu cu a nu dohter, fapa i nupi kha a nu dohter awk ah a si; 36 mi pakhat i ral hna cu a innchungkhar lila an si lai.

Jesuh zulh awk ah mah le mah i hlawt

         37 “Keimah nakin a pa asilole a nu a tlaihchan deuh mi poh cu keimah he aa tlak lo; keimah nakin a fapa, asilole a fanu a tlaihchan deuh mi poh cu keimah he aa tlak lo. 38 A vailamtah i put in ka hnu a ka zul lo mi poh cu keimah he aa tlak lo. 39 A nunnak a humhak mi poh cu a nunnak a sung lai i keimah ruang ah a nunnak a sung mi poh cu a nunnak a humhak lai.

A cawnpiak mi tlangkomh

       40 “Nannih an cohlang mi hna poh nih keimah an ka cohlan; cun keimah a ka cohlang mi poh nih a ka thlahtu an cohlan. 41 Profet kha profet a si ruang ah a cohlang mi poh nih profet laksawng a co lai; cun mi ding kha mi ding a si ruang ah a cohlang mi paoh nih mi ding laksawng a co lai. 42 Hi minauta hna lak i pakhatkhat cu a ka zultu a si ruang ah tikik hraikhat te a pe mi poh cu, biatak kan chimh hna, laksawng co lo in a um hrimhrim lai lo,” tiah a ti hna.

IV: VANCUNG PENNAK I BIATHUK

A: TUANBIA BANG CHIMNAK KHAAN

11. 

1 Jesuh cu a zultu pahleihnih hna kha a cawnpiak hna hnu ah an khuapi hna ah cawnpiak i phung chimh hna awk ah cuka hmun in a chuak.

Baptisma petu biahalnak. Jesuh nih amah kong a phuan

2 Baptisma petu Johan nih thong chung in Khrih nih zei dah a tuah ti kha a theih i amah kha, 3 “A ra ding mi cu nangmah maw na si, asiloah, mi dang maw kan hngah rih lai?” ti in hal awk ah a hnuzul hna cu a thlah hna. 4 Jesuh nih, “Va kir ulaw nan hmuh mi le nan theih mi hi va chimh u; 5 mitcaw nih khua an hmu, kebei nih lam an kal, thinghmui in a zaw mi hna cu an thiang, cun hnachet nih an theih, mithi cu nunnak ah an tho ṭhan i misifak hna sin ah thawngṭha phuan a si cang; 6 cun keimah kha tluknak hrampi i a ka hmu lo mi poh cu thluachuak mi an si,” tiah a leh hna.

        7 Kha mi hna cu an kal tik ah Jesuh nih Johan kong cu mizapi kha a chimh hna. Amah nih, “Zei hmuh duh ah dah thetse ram ah nan va kal? Thlizil nih a hranh i a laam mi ramhnah hmuh awk ah maw? Asilo? 8 a si ah zei hmuh duh ah dah nan va kal? Hnipuan dawhdawh in aa thuam mi hna hmuh awk ah maw? Zoh hmanh u, hnipuan dawhdawh in aa thuam mi hna cu bawi inn ah hmuh an si! 9 Asi ah, zei hmuh duh ah dah nan chuah? Profet hmuh duh ah maw? Asi, kan chimh hna, profet pakhat nakin a lianngan deuh tuk: 10 Amah hi pei Cathiang nih,

       ‘Zoh hmanh, na lam sial awk ah na hmai ah ka lamkaltu ka thlah lai,’ ti in a rak chim mi kha a si cu!

      11 Biatak kan chimh hna: nu chung in a chuak mi fale hna lak ah Johan nakin a ngan deuh mi aho hmanh an um rih lo; nain Vancung Pennak chung i a hme bik cu amah nakin a lianngan deuh. 12 Zei tin tiah Johan a rat ni in nihin ni tiang, Vancung Pennak cu dohdalnak in a khat i dohdal hmang pawl nih hramhram in luh an i tim.  13 Zei ruang ah dah profet hna le Phungbia cawnpiaknak vialte cu Johan sin ah an panh, 14 cun amah hi nan zumh ding a si ahcun a ra ding ti mi Elijah cu a si. 15 Hna a ngei mi nih an theih awk a si!

Jesuh nih a chan minung kha a mawhchiat hna.

       16 “Tuchan minung hi zei he dah ka tahchunh hna hnga? Chawdawr ah ṭhu in pakhat le pakhat kha, 17 ‘Tingtang kan in tumpiak hna i nan laam lo, mithi hla kan in sakpiak hna i nan ṭap lo,’ ti in aa au mi ngakchia hna ko an lo. 18 Zei cah tiah Johan cu ei lo ding lo in a ra i annih nih, ‘Khuavang a ngei,’ an ti. 19 Mi fapa cu eipah dinpah in a ra i annih nih,‘Zoh hmanh u, misaram le mizuram, ngunkhuai khawltu hna le misual hna he an i kom,’ an ti. Nain a tuahsernak nih a fimnak cu a langhter tawn,” tiah a ti.

Rilikam-khua hna ca aihramnak

           20 Cun khuaruahharnak tam bik a tuahnak khua hna cu an sual an i ngaihchih duh lo caah a mawhchiat hna.

        21 Amah nih, “Khorizon, na ca ah ngaihchia a va si dah! Bethsaida, na ca ah ngaihchia a va si dah! Zei cah tiah nan lak i tuah mi khuaruahharnak hna hi Tair le Sidon ah tuah rak si sehlaw,  puanchia aih le vutcam i phulh in an sual an i ngaihchih diam cang hnga! 22 Cun kan chimh hna, Biaceih Ni ah cun Tair le Sidon khuami hna cu nanmah nakin an tuar a nem deuh te lai. 23 Cun nang, Kapernaum! Van tluk sang in maw cawisan na duh?. Hell ah hlonh na si te lai. Zei cah tiah na khua chung ah tuah mi khuaruahharnak hna hi Sodom ah tuah rak si hna seh law nihin ni tiang a hmun rih ko hnga. 24 Cun, kan chimh rih, biaceih Ni ah cun Sodom khuami cu nangmah nakin an tuar a nem deuh lai,” tiah a ti.

Thawngṭha cu milung thiang hna sin ah phuan a si: Pa le Fapa

       25 Khi caan ah khan Jesuh nih, “Van le vawlei Bawipa, ka Pa, nangmah cu kan thangṭhat; zei cah tiah hi thil hna cu cathiam le a fim mi hna sin in na thuh i ngakchia men hna sin ah na phuan cang. 26 A si, ka Pa, cucu na duh ning in a si. 27 Ka Pa nih zeizong vialte cu ka kut ah a ka chanh dih cang; cun Pa dah ti lo cu aho hmanh nih Fapa an hngal lo i Fapa le Fapa nih an sin ah phuan awk a thim mi hna dah ti lo nih cun aho hmanh nih Pa kha an hngal lo.

Nun a nem mi Jesuh

          28 “Nannih rethei le thilrit vialte hna, ka sin ah ra tuah u, dinhnak kan pek hna lai. 29 Ka thil kha phor ulaw ka sin in cawng tuah u, zei cah tiah kei cu nunnem le toidor ka si, nan thlarau ca ah dinhnak nan hmuh lai. 30 A si, Ka thil cu a zaang i phorh a fawi te,” tiah a ti hna.

                               12.      Sabbath fang zunnak

         1.Cu caan, Sabbathni nikhat ah khan, Jesuh cu changvut lo pakhat kha a tanpah. A zultu hna cu an rawl a ṭam caah favui kha an sih i an ei hna. 2 Cucu Farasi mi hna nih an hmuh hna tikah amah kha, “Zoh hmanh, Sabbath ni ah tuah lo ding ti mi thil kha na hnuzul hna nih an tuah cang ” tiah an ti.

        3 Sihmanhsehlaw anih nih, “Amah le a mi hna cu an rawl a ṭam tikah David nih zei dah a rak tuah- 4 zei tin  dah Pathian innchung ah a lut i pekchanh mi changreu a ei, kha changreu cu tlangbawi dah ti lo, amah siseh a mi hna siseh, einak nawl an ngei lo - ti kha nan rel bal lo maw? 5 Cu pin ah Sabbath ni ah Biakinn tlangbawi hna nih Sabbath an buar nain palhnak zei hmanh an tuah lo ti kha Phungbia ah nan rel bal lo maw? 6 Biatak kan chimh hna, atu hika ah hin biakinn nakin a ngan deuh mi thil a um. 7 Cun Raithawinak si lo in zaangfahnak hi ka lung a ka tong mi a si, ti mi bia sullam hi nan i fian ahcun, sualnak a ngei lo mi kha nan rak mawhchiat hnga lo. 8 Zei cah tiah Mi Fapa cu Sabbath i bawi a si,” tiah a ti hna.

A kut a zeng mipa a damternak

            9 Cu hmun in aa thawn i an i pumhnak inn ah a lut; 10 cuka ah cun a kut a zeng mipa pakhat a rak um. Sualphawt khawh nakding caah amah kha, “Sabbath ni ah hin mi pakhatkhat damter khawhnak nawl a um maw?” tiah an hal. 11 Sihmanhsehlaw annih cu, “Nannih lak ah hin pakhatkhat nih a tuu pakhat te lawng a ngeih mi kha Sabbath ni ah khor chung ah tla seh law ṭem in a chuah lo mi nan um hnga maw? 12 Atu mi pakhat cu tuu pakhat nakin a let in a sunglawi deuh, cucaah Sabbath ni ah hin ṭhatnak tuahnak nawl a um ko ti hi a langhter mi a si,” tiah a ti hna. 13 Cun mipa kha, “Na kut samh,” tiah a ti. Anih nih a kut cu a samh i a kut cu a dang bantuk tein a dam ṭhan. 14 Khi tik ah Farasi pawl cu an chuak i, zei tin dah kan hrawh  lai ti ceihkhan in amah rawi nakding khua an khan.

Yahweh salpa, Jesuh

         15 Cucu Jesuh nih a theih tikah kha peng khan aa zuk. Mi tampi nih an zulh i a damter dih hna, 17 sihmanhsehlaw aho hmanh theihter lo ding in ralrinnak a pek hna. Hihi cu Profet Isaiah nih a rak chim mi a tlinnak lai caah a si. A chim mi cu:

18 “Ka thim mi ka salpa,

Ka lung a ka tong mi ka dawt khun cu zoh hmanh.

A cung ah ka thlarau ka toih lai i miphun hna sin ah

ka biaceihnak a thanh lai.

19 A au a khuang lai lo, zalamtlang ah a aw theih a si lai lo,

20 Ka biaceihnak kha teinak a phakter hlan cu, nenh mi phaikung a khiak lai lo i a mit deng mi mei zong a mihter lai lo;

21Miphun vialte nih amah cu an i bochan lai,’ ti a si.

Jesuh le Beelzebul

           22 Cun khuachia nih a tuah mi mitcaw le a holh a aa mi kha a sin ah an ratpi; cun amah kha a damter, cucaah amah cu a holh i khua a hmu kho. 23 Mi vialte cu an khuaruah a har i, “Hi pa hi David fapa a si kho lai maw?” tiah an ti. 24 Sihmanhsehlaw hihi Farasi pawl nih an theih tik ah, “Hi pa nih khuachia bawi Beelzebul thawng lawng nih pei a ṭhawl ko hna cu,” tiah an ti.

          25 An lung chung i a um mi ruahnak cu a hngalh caah annih kha, “Pakhat le pakhat aa do mi pennak kip cu rawhnaklei ah an panh; cun pakhat le pakhat aa do mi khua le chungkharkip zong a hmun kho lo. 26 Cun atu Satan nih Satan kha a ṭhawl a si ahcun a chung ah ṭhennak a um cang, cucaah zei tin dah a pennak cu a hmunh khawh lai? 27 Cun Beelzebul thawng in khuachia kha ka ṭhawl a si ahcun, nan mithiam hna tah aho thawng in dah an ṭhawl tawn? Cucaah annih cu nan biaceihtu an si. 28 Sihmanhsehlaw Pathian Thlarau thawng in khuachia ka ṭhawl a si ahcun nan theih lo kar ah Pathian Pennak nih an chawhkanh cang hna ti hi i fiang u.

         29 “Cu hlei ah mi pakhatkhat nih miṭhawngpa kha a ṭem hmasa lo ah cun zei tin dah a inn cu bauh in a thilri cu a ramh khawh lai? Cu hnu lawng ah pei a inn cu an ramh khawh lai cu.

        30 “Keimah he a um lo mi poh cu a ka dotu a si; cun keimah chung in a kho lo mi poh cu a sawksam mi a si. 31 Cucaah hihi kan chimh hna: minung sualnak le Pathian thangchiatnak poh cu ngaihthiam a si lai, sihmanhsehlaw Thlarau thangchiatnak cu ngaihthiam an si lai lo. 32 Mi Fapa ralchanh in bia a chim mi poh cu ngaihthiam an si lai; sihmanhsehlaw Thiang Thlarau ralchanh in bia a chim mi poh cu tu chan ah siseh, hmailei chan ah siseh, ngaihthiam an si lai lo.

Bia nih lungthin a rawi

      33 “Thing kha a kung na ṭhatter ahcun a thei zong a ṭha ve ko lai; a kung na thutter ahcun a thei zong a thu ve ko lai. Zei cah tiah thingkung cu a tlai in chim khawh a si. 34 Nannih rul chiahru hna, zei tin dah mi ṭha nan si lobu in bia ṭhaṭha cu nan chim khawh lai?  Zei cah tiah bia ti mi cu lungchung i a um mi chung in pei an hung chuah ko cu. 35 Mi ṭha nih cun thil ṭha an khon mi chung in thil ṭha kha an chuah, mi ṭha lo nih cun thil ṭha lo an khon mi chung in thil ṭha lo kha an chuah ve. 36 “Cucaah kan chimh hna: mi nih a hman lo mi an chim mi bia vialte ca ah Biaceihnak ni ah lehnak an tuah a herh te lai, 37 zei cah tiah, nan bia in thiam coter nan si lai i nan bia in sualphawt nan si lai,” tiah a ti hna.

Jonah hmelchunhnak

        38 Cu tik ah Phungbia cawnpiaktu le Farasi mi cheukhat nih khan an hun thawh i, “Bawipa, na sin in hmelchunhnak pakhat te hmuh kan duh ko,” tiah an ti. 39 Miphun ṭha lo le zumhtlak lo nih hmelchunhnak a hal. Pek ding mi hmelchunhnak cu profet Jonah i hmelchunhnak pakhat te lawng  a si. 40 Zei cah tiah Jonah cu ngapi chung ah nithum le zanthum chung a um bantuk in Mi Fapa zong vawlei tang ah nithum le zanthum chung a um ve lai. 41 Biaceih Ni ah cun Nineveh khuami hna cu hi mi hna sual phawt awk ah an rak chuak lai, zei cah tiah annih cu Jonah nih phung a chimh hna tik ah an sualnak an i ngaichih; cun zoh hmanh uh: hika ah hin Jonah nakin a ngan deuh mi pakhat a um! 42 Biaceih Ni ah cun Thlanglei Siangpahrangnu cu hi miphun hna sual phawt awk ah a ra chuak lai, zei cah tiah amah cu Solomon fimnak ngaih awk ah vanhram deng in a rak ra; cun zoh hmanh u, hika ah hin Solomon nakin a ngan deuh mi a um,” tiah a ti hna.

Thlarau thurhnawm a kir ṭhan

         43 “Thlarau thur cu mi pakhat chung in a chuah tikah ram rocar lak ah dinhnak kawl ah a vak lengmang i a hmu kho lo. 44 Cun amah nih, “Ka ratnak ka inn ah ka kir ṭhan lai,” tiah a ti. Cun a va phak tikah inn cu a lawng i thiang hirhiar in a um kha a va hmuh. 45 Cu tikah a chuak i amah nakin a chiahru deuh mi thlarau pasarih kha a va khomh hna i cuka ah cun umhmun an khuar; cu tik ah cu pa i nunnak cu tuan deuh nakin a zual deuh. Cu bantuk thil cu hi miphun hna cung ah a tlung ve te lai,” tiah a ti hna.

Jesuh i rualchan taktak hna

          46 Mibupi sin i bia a chim cuahmah lio ah khan a nu le a unau hna cu ruah lopi in an rak chuak i amah kha chawnh duh ah leng ah an dir ko. 48 Sihmanhsehlaw hi kong a chimtu kha Jesuh nih, “Aho dah ka nu a si? Aho dah ka unau hna cu an si?’ ti in a leh. 49 Cun a zultu hna sin ah a kut a samh i, “Ka nu le ka unau hna cu hika ah an um ko hih. 50 Vancung i ka Pa duhnak a tuah mi poh cu ka unau le ka far le ka nu an si,” tiah a ti.

        47 Cu tikah mi pakhat nih Jesuh cu, “Na nu le na unau hna nih ton an in duh i leng ah an dir ko,” tiah a ti.

       B: BIANABIA KONG CAWNPIAKNAK

      13 .Hramthawknak

         1,Cu ni ṭhiamṭhiam ah cun, Jesuh cu inn in a chuak i rili kam ah cun a ṭhu, 2 sihmanhsehlaw cu tluk tam mibu nganpi nih cun an kulh caah lawng cung ah a kai i a ṭhu. Mibu cu rili kam ah khan an dir, 3 cun thil tampi kha bianabia in a cawnpiak hna.

Thlaici vorhtu bianabia

        4 Amah nih, “Ngai hmanh u, thlaici vorhtu cu thlaici vorh ah aa thawh. A vorh tikah a cheu thlaici cu lamkam ah an tla, cun vate hna cu an ra i an ei dih. 5 A cheu cu vawlei a um tuk lonak, lung lak ah, an tla i an kho colh. Vawlei a chah lo caah a keuh zau, nain ni a hung chuak i a emh hna tikah a hram a thuh lo caah an car zau. 7 A dang cu hling lak ah an tla, cun hling cu an tho i a khuh dih hna. 8 Thlaici a cheu cu vawlei ṭhatnak ah an tla i an theitlai cu a cheu let zakhat, a cheu let sawmruk, a cheu let sawmthum, in an chuahpi. 9 Hna a ngei mi poh nih an theih awk a si,” tiah a ti.

Zei ruang ah dah Jesuh nih bianabia in a chim

          10 Cu tikah a zultu hna cu a sin ah an va kal i amah kha, “Zei ruang ah dah annih sin ah bianabia in na chim?” tiah an hal. 11 Anih nih, “Cucu nannih cu Vancung Pennak biathuk hngalhthiamnak vel pek nan si, annih cu pek an si lo. 12 A ngei mi cu pekchin an si lai i a hleivuang tiang in a ngei lai,; sihmanhsehlaw a ngei lo mi cu a ngeihcia hmanh kha lakpiak a si lai. 13 Annih sin ah bianabia in ka chimnak a ruang cu annih nih an zoh len nain an hmu lo i an ngaih len nain an thei lo i an fian nakhnga lo caah  a si. 14 Cu caah annih kong ah profet Isaiah nih a rak chim mi cu a hung tling. Anih nih:

‘An ngaih len nain an fiang bal lai lo!

An zoh len nain an hmu thiam bal lai lo!

15 Hi mi hna  cu an lung a khong cang,

An hna a pit, an mit kha fak pi in an i chinh cang.

Cucu an mit cu hmuhnak, an hna cu theihnak le an lung cu hngalhnak ca an hman caah an nun an i thlen i damnak an hmuh nakhnga lo caah a si.

16 “Sihmanhsehlaw nan mit cu a hmuh caah le nan hna cu a theih caah thluachuah an si. 17 Biatak kan chimh hna: profet le miding tampi nih nan hmuh mi hi hmuh an duh nain an rak hmu bal lo i nan theih mi hi theih an duh nain an rak thei bal lo,” tiah a ti hna.

Thlaici vorhtu bianabia fianternak

            18 “Cu caah hi thlaici vorhtu bianabia hi ṭha tein ngai tuah u. 19 Mi pakhat nih pennak bia kha fiangset in a theih lo tikah Mi ṭha lopa cu a ra i a lungchung i thlaici cu a lak i a kalpi, hihi cu lamkam ah a tla mi thlaici a si. 20 Lung lak ah a tla mi thlaici cu bia kha a theih tikah lunglawmhnak in a cohlang colh mi a si. 21 Sihmanhsehlaw cu bantuk pa cu a hram a feh lo caah sau a nguh lo; bia ruang ah hneksaknak, asilole, hremnak pakhatkhat a tlun tikah a tlu zau. 22 Hling lak i a tla mi thlaici cu Vancung Pennak kong kha theih cu a theih, sihmanhsehlaw vawleicung lung retheihnak le chawva lemsoinak nih bia cu a khuh i zei thei hmanh a tlai lo. 23 Cun vawlei ṭhatnak i a tla mi thlaici cu Vancung Pennak kong kha a thei i a sullam a hngal mi a si; hipa hi a thei a tlai i a let zakhat, a let sawmruk, a let sawmthum in a tlai,” tiah a ti.

Belh bianabia

            24 Bianabia a dang pakhat a chimh ṭhan hna, “Vancung Pennak cu a lo chung ah thlaici ṭha a tuh mipa he kan tahchunh khawh. 25 Mikip an i hngilh kar ah khan a ral cu a ra, changvut lak ah khan belhci a vorhtak i lodiam a kal. 26 Changvut vui cu an hung chuak i an hmin tikah belh zong an lang ve. 27 Lo ngeitupa i rianṭuantu hna cu an kal i amah kha, “Bawipa, na lo i na tuh mi cu thlaici ṭha an si lo maw? A si ahcun khua zei tin dah belh hi an chuah kun?” tiah an ti. 28 Amah nih, “Hihi cu ka ral cheukhat nih an tuah mi a si,” ti in a leh hna. Cun rianṭuantu hna nih, “Va kal in kan va bawh dih lai, na duh maw?” tiah an hal. 29 Anih nih, “A si lo, belh nan bawhpah in changvut zong nan bawhchih sual lai. 30 Rawlṭuan caan tiang hmunkhat ah ṭhang ko hna seh; cun thlaizun caan a phak tikah fangzun pawl cu, ‘Belh kha khawm hmasa ulaw mei khangh awk ah tom u, cun changvut cu ka buk ah rawn u,’ ka ti te hna lai,” tiah a ti.

Anṭam ci Bianabia

            31 Cun bianabia a dang kha a chimh ṭhan hna. “Vancung Pennak cu mipa nih a lo ah a vorh mi anṭamci bantuk a si. 32 Thlaici vialte lak ah a hme bik a si, sihmanhsehlaw a ṭhan tikah ram vialte lak ah a ngan bik a si i thingkung ah aa cang, cuti cun van vate hna cu an ra i a nge ah an i dor.

Thilnu Bianabia

           33 A dang bianabia kha a chimh ṭhan hna. “Vancung Pennak cu nu pakhat nih aa lak i changvut relkhat chung  ah a phulh mi thilnu he aa lo; cu nih cun changvut cu a ningpi in a thawhter.

Mipi cu bianabia lawng in a cawnpiak hna

        34 Hi vialte ah hin Jesuh nih mibupi sin ah bianabia lawng in a chim; a taktak ah bianabia hmang lo in an sin ah bia a chim bal lo. 35 Hihi cu profet nih a rak chim mi a tlinnak caah a si. A chimmi cu:

‘Nan sin ah bianabia in ka chim lai,

Vawlei hramthawk in rak thuh mi cu ka phuan hna lai, ti hi a si.

Belh bianabia a fianter hna

           36 Cun, mibupi kha kaltak in inn chung ah a lut, cun a zultu hna cu a sin ah an ra i amah kha, “Lo chung belh bianabia kong cu kan fianter tuah,” tiah an ti. 37 Amah nih, “Thlaici ṭha a tuhtu cu Mi Fapa a si, 38 lo cu vawlei cung a si; thlaici ṭha cu Pennak fale hna an si; belh cu Mi ṭha lopa fale hna an si; 39 a vorhtu ral cu Khuachia a si; rawlṭuan caan cu vawlei caan dongh a si; fang zuntu hna cu vancungmi an si. 40 Cun belh cu an pumh i mei in an khangh hna bantuk in caan dongh caan cu a si ve te lai. 41 Mi Fapa nih vancungmi kha a thlah hna lai i a pennak chung i midang tluknak a tuahtu le ṭhat lonak a tuahtu vialte hna cu an pumh hna lai,  42 cun annih kha meiphu chung ah an paih hna lai, cuka ah cun ṭahnak le hacang rialnak a um lai. 43 Cu tikah miding hna cu an Pa Pennak chung ah ni bang in an ceu lai. Hna a ngei mi poh  nih an theih awk a si.

Chawva le lungvar bianabia hna

         44 “Vancung pennak cu mi pakhat nih a hmuh mi lo chung i thuh mi chawva he aa lo, cu pa nih a thuh ṭhan, lawmhnak he a chuak, a ngeih mi vialte kha a zuar i a lo cu a cawk.

         45 Cun vancung Pennak cu lungvar phun ṭha a kawl mi chawlettu pakhat bantuk a si; 46 a man a fak ngai mi kha a hmuh tikah a kal i a ngeih mi vialte a zuar i cu lungvar cu a cawk.

Sur Bianabia

          47 Cun, “Vancung Pennak cu rili chung i an cheh i nga phun zakip a tlai mi sur bantuk a si. 48 A khah tikah ngatlaitu hna nih tikam ah an hnuh; cun an ṭhu, a ṭha mi kha bawm chung ah an sanh i hman awk ṭha lo pawl cu an hlonh hna. 49 Caan dongh tik ah cun hiti hin a si ve te lai: vancungmi cu an rak lang lai i mi ṭha lo hna cu miding hna sin in an ṭhen te hna lai, 50 annih cu meiphu chung ah an paih hna lai, cuka ah cun ṭahnak le hacang rialnak a um lai.

Biatlang komhnak

          51 “Hi vialte cu nan lung a fiang dih cang maw?” Annih nih, ‘A si,’ tiah an ti. 52 Cun annih kha, “Cun a ṭha tuk, Vancung Pennak hnuzul a si mi phungbia cawnpiaktu hna cu a chaw kuang chung in thil thar he thil hlun he a chuah mi inn ngeitu he an i lo,” tiah a ti.      

V: VANCUNG PENNAK I PAKHATNAK THEITLAI BUPI

                   A.   TUANBIA BANG CHIMNAK DAL

Nazareth a va lennnak

          53 Hi bianabia hna a dih tikah Jesuh cu cuka peng in a chuak; 54 cun a rak chuahnak khua a phak tikah, an i pumhnak inn i a cawnpiak mi hna cu a ṭhat tuk caah an khuaruah a har ngaingai i annih nih, “Hipa nih hin hi fimnak le hi khuaruahhar ṭhawnnak hna hi khuazei ah dah a lak? 55 Hihi lehtama fapa a si hrimhrim ko lo maw? A nu cu Mary an ti mi nu le a naule hna cu Jeim le Josef le Simon le Jude kha an si ko lo maw? 56 A farle hna zong, hika ah hin kanmah he an um ve ko lo maw? Cucaah hi thil vialte hi khua zei ah dah a lak hnga?” tiah an ti. 57 Cun amah kha an cohlang lo. Sihmanhsehlaw Jesuh nih annih kha, “Profet cu a khua le a chungkhat lawng ah upat a tong lo,” tiah a ti hna. 58 Cun zumhnak an ngeih lo ruang ah khika ah khan khuaruahharnak tampi a tuah lo.

                           14.      Herod le Jesuh

1.Cu caan ah cun Herod a palinak nih Jesuh a min a thannak kong kha a rak theih, 2 cun a bawi pawl hna cu, “Amah hi Baptisma petu Johan hrimhrim a si i thihnak in a tho ṭhan, cu ruang ah khuaruahhar ṭhawnnak a ngeih mi hi a si lai,” tiah a ti hna.

Baptisma petu Johan lu tannak

          3 Johan a tlai i thong i a rak thlatu cu Herod hi a si, cucu a nau Filip nupi Herodias ruang ah a si. 4 Zei cah tiah Johan nih amah cu, “Amah na ṭhit cu Phungbia he aa ralchan a rak ti caah a si. 5 Amah kha thah a rak duh, sihmanhsehlaw amah cu profet a si ti in a hmu mi mipi kha a ṭih hna. 6 Cun, Herod chuah ni ah khan, Herodias fanute cu zapi hmai ah khan a laam i Herod cu a lung a tlin ngaingai caah, 7 amah kha a hal mi poh pek ding ah chiatserh in bia a kamh. 8  A nu nih ruahnak a pek bang in, “Hika hrimhrim ah hin Baptisma petu Johan lu cu kheng in ka pe,” tiah a ti. 9 Siangpahrang cu a ngaih a chia ko, sihmanhsehlaw chiatserh in bia aa kam mi le a sawm mi hna hmaizah in pek awk ah nawl a pek hna, 10  cun mi kha a thlah hna i thong chung i Johan lu cu a va tanter hna. 11 A lu cu kheng in an rak put i ngakchia nute cu an pek, amah nih a nu sin ah a kalpi. 12 Johan hnuzul hna cu an ra; a ruak kha an lak i an vui; Jesuh chimh awk ah an i thawh.

Changreu khuaruahharnak pakhatnak

          13 Cu thawng cu Jesuh nih a theih tikah anmahte lawng an um khawh naklai hmunking ah lawng in an i zuk. Sihmanhsehlaw hi kong cu mibupi nih an theih tikah, khuapi kha kaltak in, amah kha an ke in an fuh. 14 Tikam a vung lamh cangka in mibupi cu a hmuh hna; annih kha a zaangfah hna i an mizaw kha a damter hna.

            15 Zanlei a hung si tikah, a zultu hna cu a sin ah an kal i amah kha, “Hihi hmunking a si i khua zong a hnu cang; cucaah mi cu thlah ko hna, cuti cun khua chung ah kal in anmah tein rawl an i cawk khawh lai,” tiah an ti. 16 Jesuh nih, “An kal a herh lo; nanmah nih ei awk zei maw pe hna u,” tiah a leh hna. 17 Sihmanhsehlaw annih nih, “Kan ngeih mi dihlak cu changreu hlum nga le nga pahnih lawng a si,” tiah an leh. 18 Cucaah anih nih, “mah kha rak pu uh,” tiah a ti hna. 19 Mi kha ram cung i ṭhutter awk ah a chimh hna, cun changreu hlum nga le nga pahnih kha a lak, van a cau i lawmhnak bia a chim, cun a cheu hnu ah changreu kha a zultu cu a pek hna, annih nih mibupi cu an phawt hna. 20 An dihlak in an duh zat in an ei, cun a ṭiltlawt kha an khawmh i rel hleihnih a khat. 21 Atu a ei mi cu nu le ngakchia chim lo, pa lawngte thongnga hrawng an si.

Jesuh cu ti cung ah a kal, cun Peter zong amah he a kal ve

        22  Cun hmakhatte ah a zultu hna cu lawng chung ah lut in khattelei ral ah a kalter chung hna, cu lio ah amah cu mibupi kha a thlah hna. 23 Mibupi kha a thlah hna hnu ah amah tu cu thlacam awk ah amahte lawng tlang ah a kai. Zanlei a hung si tikah, cuka ah cun amahte lawng a um ko, 24 cu lio ah ti kam in furlong tlawmpal hrawng aa hlat mi lawng cu hmaitonh in thlichia a hran caah tilet lak ah har ngai in a kal cuahmah ko.

             25 Cun zan caan suimilam pali ah khin a ke in rili cung in a kal i an sin ah a ra,  26 rili cung i a ke in a kal kha a zultu hna nih an hmuh tikah an lau ngaingai.  Annih nih, “Mithla, a si,” tiah fak pi in an au. 27 Sihmanhsehlaw hmakhatte ah Jesuh nih a hei auh hna i annih kha, “Nan thinphang hlah u. Keimah ka si, ṭih hlah u,” tiah a ti hna. 28 “Bawipa, nangmah na si ahcun, na sin ah ti cung in rat awk ah ka fial tuah,” tiah Peter nih a ti. 29 Jesuh nih, “Ra ngat,” tiah a ti. Cu tikah, Peter cu lawng cun a chuak i ti cung in Jesuh sin ah a kal, 30 sihmanhsehlaw thlihran kha a vun hmuh tikah a thin a phang i ti chung ah pil hnik a zal. “Bawipa, ka khamh tuah!” ti in a au. 31 Hmakhatte ah Jesuh nih a hei banh i a tlaih, cun anih kha, “Na zumhnak a tlawm tuk, zei cah dah lungawṭawm in na um?” tiah a ti. 32 Cun lawng chung ah an lut i thli cu a dai. 33 Lawng chung i a um mi hna cu a hmai ah an kun i amah kha, “Nangmah cu Pathian Fapa na si hrimhrim,” tiah an ti.

Gensaret i mizaw a damter hnanak

            34 Rili an tan i Gensaret ram kha an phan. 35 Cuka i mi hna nih amah kha an i chinhchiah caah cuka pawng hrawng vialte cu thawng an thanh hna i mizaw vialte cu an ratpi hna, 36 cun a puan tlang tal tonghter hna awk  ah amah cu an nawl.  Cun a tawng mi vialte cu khamhnak an hmu.

                      15.      Farasi mi hna pupa phunglam

          1. Cu tik ah Jerusalem in Farasimi hna le Phungbia Cawnpiaktu hna cu Jesuh sin ah an ra i amah kha, 2 “Zei  ruang ah dah na zultu hna nih pupa hna phunglam an hrawh?  An kut ṭawl lo in an ei,” tiah an ti. 3  Anih nih, “Nannih zong zei ruang ah dah nan phunglam ca ah Pathian nawlbia cu nan hrawh ve? 4 Zei cah tiah Pathian nih, ‘Na nu le na pa va upat hna, a nu asiloah a pa kha chiat a serh mi cu thah a si lai,” tiah a ti. 5 Sihmanhsehlaw nannih nih, ‘Mi pakhatkhat nih a nu asiloah a pa kha: Nangmah bawmhnak ca ka hman ding mi vialte cu Pathian ca a si a ti ahcun, 6 amah cu a nu asiloah a pa cung i a ngeih mi ṭuanvo in a luat cang,’ nan ti. Hiti hin nan phunglam ruang ah Pathian bia cu hmual ngei lo ah nan canter cang. 7 Midepde hna! Isaiah nih a tanglei bang in nan kong a chim mi hi a rak hmaan hringhran ko:

8 Hi miphun nih hin an kaa lawng in a ka upat,

an lungthin cu keimah he aa hlat ko.

9 Annih i upatnak cu san a tlai lo;

An cawnpiaknak cu zei hmanh a si lo, minung nawlbia a si.

A thiang mi le a thiang lo mi kong ah

           10 Cun mi cu a sin ah a kawh hna i annih kha, “Ngai ulaw i fiang tuah u. 11 Kaa in a lut mi nih mi kha a thurter lo, mi a thurtertu cu kaa in a chuak mi tu a si,” tiah a ti hna.

           12 Cun a zultu hna cu a sin ah an ra i amah kha, “Na chim mi kha Farasi pawl nih an theih tikah an lau tuk ti na hngal maw?” tiah an ti. 13 Anih nih, “Vancung i ka Pa nih a phun lo mi kung poh cu a hram in phawi an si  lai. 14 Khati khan chia ko hna u. Annih cu hruaitu mitcaw an si; cun mitcaw nih mitcaw a hruai ahcun an pahnih in khor ah an tla ko lai,” tiah a leh hna.

             15 Cu tikah Peter nih anih, “Bianabia cu kan fianh tuah,” tiah a ti. 16 Jesuh nih, “Nanmah hmanh nih nan lung a fiang rih lo maw? 17 Kaa in a lut mi poh cu paw ah a lan i taw in a chuak ṭhan ti cu nan fiang rih lo maw? 18 Sihmanhsehlaw kaa in a chuak mi poh cu lungchung in a chuak mi an si, cun mi a thurtertu cu hihi a si. 19 Zei cah tiah lung chung in ruahnak ṭha lo hna cu lainawnnak, ṭangdang pomnak, nu le pa sualnak le firnak, hrokhrolnak le mithangchiatnak hna hi an si. 20 Hi hna hi mi a thurtertu cu an si. Sihmanhsehlaw kut ṭawl lo in einak nih aho hmanh a thurter lo,” tiah a ti hna.

Kanaan minu fanu kha a damter         

               21 Jesuh cu cuka hmun in a chuak i Tair le Sidon ramṭhenlei ah khan aa zuk. 22 Cun ruah lopi in cuka peng i Kanaan minu pakhat cu a hung chuak i amah kha, “David Fapa, ka zaangfah tuah, ka fanu cu khuachia nih a hrem,” tiah fakpi in a au. 23 Sihmanhsehlaw amah kha bia kaakhat hmanh a let lo. A zultu pawl cu an ra i amah kha, “Kan hnu zulh in a au peng caah a duh mi cu pe ko,” ti in an nawlpiak. 24 Cu tikah amah nih, “Israel chung i tuu tlau hna sin lawng ah thlah mi ka si,” tiah a ti hna. 25 Sihmanhsehlaw minu cu a ra chuak i a hmai ah toidornak he a kun i amah kha, “Ka bawm ko, Bawipa,” tiah a ti. 26 Anih nih, “Ngakchia rawl cu i lak zau in uifa tete pek cu a dik lo,” ti in a leh. 27 Minu nih a bia kha tan in, “Aw, a si ko, bawipa; sihmanhsehlaw uifa tete zong nih an bawile hna cabuai in a tla mi a ṭiltlawt cu an ei ve ko cu,” ti in a leh. 28 Cu tikah Jesuh nih amah cu, “Minu, na zumhnak cu a ngan ko, na duh mi cu co ko,” tiah a leh. Cu caan thawk cun a fanu cu a dam.

Tibual pawng damternak

              29 Jesuh cu cuka in a va kal deuh i Galilee Tibual kam a va phan, cun tlang cung ah a kai. Cun hmunhma kha a lak, 30 cun mibu nganpi cu kebei, kutzeng, mitcaw, holh-aa le a dang  tampi kha i hruai in a sin ah an ra. 31 Mibupi nih holh-aa nih bia an chim, mizeng an dam, kebei nih lam an kal i mitcaw nih khua an hmuh kha an hmuh tik ah an khuaruah a har ngaingai, cun Israel Pathian cu an thangṭhat.

Changreu Khuaruahharnak pahnihnak      

               32 Sihmanhsehlaw Jesuh nih a zultu pawl cu a sin ah a auh hna i annih kha, “Hi mi vialte hna hi ka zaangfah hna: keimah he an um hi atu nithum a si cang i ei awk zei hmanh an ngei lo. Annih kha rawlṭam in thlah cu ka duh lo, lam ah buhri in an thi sual lai,” tiah a ti hna. 33 A zultu hna nih, “Hi ramking ah hin hi tluk mibu nganpi a za ding mi changreu cu khuazei ah dah kan hmuh khawh lai?” tiah an ti. 34 Jesuh nih annih kha, “Changreu hlum zei zat dah nan ngeih?” tiah a hal hna. Annih nih, “Hlum sarih le nga fatete tlawmpal,” ti in an leh. 35 Cu tikah mibupi kha vawlei ah a ṭhutter hna, 36 cun changreu hlumsarih le nga kha a lak, lawmhnak bia a chim hnu ah a cheu i a hnuzul kha a chanh hna, annih nih mibupi cu an pek hna. 37 An dihlak nih an duh zat in an ei hnu ah a ṭiltlawt kha seisarih khat in an khawmh. 38 A ei mi cu, nu le ngakchia chim lo, pa lawngte thongli an si. 39 Cun mibupi kha a thlah hna hnu ah lawng cung ah a kai i Magadan ramlei ah khan a kal.

              16.  Farasi pawl nih van in hmelchunhnak an hal

       1.Farasi mi le Sadusi mi cu an ra i hneksak duh ah annih kha vancung in hmelchunhnak a hmuhsak hna nakhnga bawmhnak an hal. 2 Anih nih, “Zanlei ah, ‘Vankam a sen ah nikhua a ṭha lai,’ nan ti,  3 cun zinglei ahcun, ‘Van kam a sen i khua a dawm, nihin cu nikhua a chia lai,’ nan ti. Vankam cu zei tin dah zoh awk ti nan hngalh, sihmanhsehlaw a caan cu nan zoh thiam lo. 4 Zumhtlak lo le chan ṭha lo nih hmelchunhnak a hal, a pek ding mi cu Jonah hmelchunhnak pakhatte lawng a si,” ti in a leh hna. Cun a chuak i a kaltak hna. 

Farasi mi le Sadusimi hna thilnu

             5 A zultu pawl cu, khattelei ral an pet cang i rawl phorh an philh diam. 6 Jesuh nih, “Nan mit au ulaw, Farasi mi hna le Sadusimi hna i thilnu cu i ralring u,” tiah a ti hna. 7 Cu tikah anmah le anmah kha, “Hihi changreu zei hmanh kan i phorh lo ruang ah a si,” an ti. 8 Jesuh nih a hngalh i annih kha, “Nan zumhnak a tlawm tuk, zei ruang ah dah changreu nan ngeih lonak kong cu nan chim? 9 Nan theithiam rih lo tih?  Minung thongnga ca changreu hlumnga le a ṭilṭawt sei zei zat dah nan char ti kha nan philh cang maw? 10 Asiloah minung thongli ca changreu hlumsarih le a ṭilṭawt sei zeizat dah nan char ti tah? 11 Changreu kong ka chim mi a si lo ti cu zei tin dah nan hngalh khawh lo? Ka chim mi cu: Farasi le Sadusi hna thilnu kha i ralring u,” ti hi a si. 12 Khi tikah annih kha changreu sernak thilnu si lo in, Farasi le Sadusi hna cawnpiaknak in i ven awk ah a chimh hna ti kha an lung a pem.

Peter nih a zumhnak a phuannak: amah a biapit deuhnak

               13 Jesuh cu Sisaria Filipi ram a rak phan tikah a zultu hna kha hi biahalnak cu a tuah hna, “Mi nih Mi Fapa kong ah zei dah an chim?”. 14 Annih nih, “A cheu nih ‘Baptisma petu Johan’ a cheu nih, ‘Elijah’ cun a dang  nih ‘Jeremiah asilole profet pakhatkhat a si’ an in ti,” ti in an leh. 15 “A si ah, nannih nih tah  ‘aho a si nan ka ti dah?’” tiah a ti hna. 16 Cu tikah Simon Peter nih a thawh i, “Nangmah cu a nung mi Pathian Fapa, Khrih na si,” tiah a ti. 17 Jesuh nih, “Johan fapa Simon, nang cu mithluachuak na si! Zei ruang ah tiah hihi cu aho minung sin hmanh in si lo in vancung ka Pa sin  in na hngalh mi a si. 18 Cucaah atu kan chimh: nang cu Peter na si i hi lungpi cung ah ka Bupi ka sak lai. Cucu hell kutka nih a tei kho bal lai lo. 19 Vancung Pennak tawh cu kan pek lai: vawlei ah na ṭem mi poh cu vancung zong ah ṭem a si ve lai, vawlei ah na phoihpiak mi poh cu vancung zong ah phoihpiak an si ve lai,” tiah a ti. 20 Cun a zultu hna kha Khrih a si cu aho hmanh hngalhter lo ding in a chimh hna.

A temh-innak kong voikhatnak a chimchungnak

           21 Cu caan thawk cun Jesuh nih a zultu hna kha amah cu Jerusalem ah kal ding in khaukhih mi a sinak, cuka ah cun upa hna le tlangbawi luban hna le phungbia cawnpiaktu hna kut in fahnak tampi a in lainak, cun an thah lai i nithumnak ah a thawh ṭhan lainak kong kha fiang tein a chimh hna. 22  Cu tikah Peter nih, kamkhat ah i kalpi in, amah kha, “Bawipa, Vancungmi nih in humhim hram ko seh, hi thil cu na cung ah a tlung hrimhrim lai lo,” ti in a mawhchiat.  23  Sihmanhsehlaw a hun i mer i Peter cu, “Satan, ka hnulei ah i tawn!  Nang cu ka lam ah donkhamtu na si, zei cah tiah nang cu Pathian bantuk in si lo in minung bantuk in khua na ruat” tiah a ti.

Khrih hnu zulh tik i a herh mi hna

            24 Cu tik ah Jesuh nih a hnuzultu hna cu, “Mi pakhatkhat nih ka hnu zultu si a duh ahcun, amah le amah i hlaw seh law a vailamtung i put in rak ka zul seh. 25 A nunnak khamh a duh mi poh cu a nunnak a sung lai, sihmanhsehlaw keimah ca ah a nunnak a sung mi poh cu a nunnak a him lai. 26 Mi pakhat cu vawlei pumpi a co nain a nunnak a sungh ahcun a ca ah zei dah a ṭhahnem? Asiloah a nunnak cu zei in dah a cawk ṭhan khawh lai? 27 Zei cah tiah Mi Fapa cu a Pa sunparnak in a vancungmi hna he a ra lai i mi vialte kha an ziaza ning cio in laksawng a pek hna lai. 28 Biatak kan chimh hna, hika i a dir mi hna lak ah hin Mi Fapa cu a pennak he a rat a hmuh hlan ah thihnak a tep rih lo ding nan um,” tiah a ti hna.

                        17.   Muisam thlennak

           1.Niruk hnu ah khin, Jesuh nih Peter le Jeim le a nau Johan kha hruai in tlang sangpi ah a kaipi hna. 2 Cuka ah an hmaika ah cun a muisam aa thleng: a hmai cu ni bang in a ceu i a hnipuan cu niceu bang in aa lek. 3  Cun ruah lopi in Moses le Elijah cu an rung lang i amah he bia an i ruah. 4 Cun Peter nih Jesuh cu a thawh i, “Bawipa, hika um hi khuaruah har ngai a si, na duh ahcun, nangmah ca pakhat, Moses ca pakhat, Elijah ca pakhat ti  in deuthlam pakhat cio kan sakpiak hna lai,” tiah a ti. 5 Cutin bia a chim lio ah khan ruah lopi in minmei ceu nih a thladem in a run khuh hna, cun ruah lopi in minmei chung cun aw pakhat nih, “Hihi ka dawtkhun mi ka Fapa a si, ka mihmai ṭha a hmu. A bia ngai u,” ti in a chim mi kha an theih.  6 An theih tikah a zultu pawl cu an ṭih tuk i vawlei ah an bawk. 7 Sihmanhsehlaw Jesuh cu a ra i annih kha, “Tho u, ṭih hlah u” a ti hna i a tongh hna. 8 Cun cunglei an hun zoh tikah Jesuh dah ti lo aho hmanh an hmu ti hna lo.

Elijah kong biahalnak

            9 Tlang cung in an rung ṭum pah ah khan Jesuh nih, “Mi Fapa hi thihnak in a thawh ṭhan hlan cu hi langhnak hi aho hmanh chim hna hlah u,” ti in nawl a pek hna. 10 Cun a zultu hna nih amah cu, “Cu a si ahcun, zei ruang ah  dah phungbia cawnpiaktu pawl nih Elijah a ra hmasa lai’ an ti?” ti in biahalnak an tuah. 11 Amah nih, “Elijah cu a ra taktak lai, cun zeizongte kha an si ning tein a chiah ṭhan hna lai; 12 nain, kan chimh hna Elijah cu a ra diam cang i an hngal lo, cucaah an duhduh in an tuahto; cun Mi Fapa zong anmah kut ah cu bang in a tuar ve lai.” tiah a leh hna. 13 Khi tikah Baptisma petu Johan kong a chim ti kha a zultu hna cu an lung a pem.

Khuachia nih a tuah mi pa

          14 Mibupi he an i fonh ṭhan tikah mipa pakhat cu a hung chuak, a hmai ah a khuk aa bil.  15 Cun amah nih, “Bawipa, ka fapa cu zaangfah hram ko; amah cu mitlu a si i zaangfak tuk a si; atu le atu mei le ti chung ah aa paih. 16 Na zultu hna sin ah ka ratpi nain an damter kho lo,” tiah a ti. 17 Jesuh nih amah kha, “Zumhnak ngei lo chanchia minung hna! Zei tik tiang dah nanmah he ka um rih lai?  Zei tik tiang dah nan lak ah khua ka sak rih lai? Hika ah rak chuahpi u,”tiah a ti. 18 Cun Jesuh nih a hro i khuachia cu pate chung in a rak chuak, cun amah cu a dam colh.

             19 Cun a zultu pawl cu a thli tein Jesuh sin ah an ra i amah kha, “Zei ruang ah dah kan ṭhawl khawh lo?” tiah an hal. 20 Anih nih, “Nan zumhnak a tlawm tuk caah a si. Biatak kan chimh hna, nan zumhnak hi anṭam ci tia tal a si ahcun hi tlang hi, “Khika ah vaa thawn,” nan ti lai i aa thawn ko lai; nan ca ah a si kho lo mi zei hmanh a um lai lo,” ti in a leh hna.

21. Hi bantuk khuavang cu thlacamnak le rawl ulhnak lawng in ṭhawl a si.

A temh-innak kong a voihnihnak chimchung bia

             22 Galilee i an um lio ah khan, Jesuh nih annih cu,“Mi Fapa cu minung kut ah chanh a si lai; 23 an thah lai, cun ni thumnak ah a tho ṭhan lai,” tiah a ti hna. Cu tikah ngaihchiatnak in an khat.

Jesuh le Peter nih an pek mi biakinn ngunkhuai

             24 Kapernaum an phak tikah shekel-cheu khawltu pawl cu Peter sin ah an ra i amah kha, “Nan bawipa hi shekel-cheu a pe ve ko lo maw?” tiah an hal. 25 “A pek ko,” tiah a leh hna i innchung ah a lut. Sihmanhsehlaw bia a chim manh hlan ah Jesuh nih, “Simon, zei tin dah na ruah? Leicung siangpahrang hna hi aho sin in dah ngunkhuai asilole, thilman an khawlh? an fale hna sin in maw ramdangmi hna sin in dah?” tiah a hal. 26 “Ramdangmi hna sin in,” tiah a leh tikah Jesuh nih, “A si ahcun an fale cu an luat,” tiah a ti. 27 Nain, midang ca ah tluknak kan si nakhnga lo, tili ah va kal law sio va thla; na sio hmasa mi nga kha la, a kaa keu law shekel pakhat na hmuh lai, la law annih kha nangmah ca he keimah ca he va pe hna,” tiah a ti.

                              B: BUPI KONG CAWNPIAKNAK

                              A ho dah a nganbik

18

      1.Hi lio ah hin a zultu hna cu Jesuh sin ah an ra i amah kha, “Vancung Pennak ah aho dah a ngan bik?” tiah an ti. 2 Cu tikah ngakchiate pakhat kha a auh i an lak ah a dirter. 3 Cun anih nih, “Biatak kan chimh hna, nan lung nan i thlen i ngakchia bantuk nan si lo ahcun Vancung Pennak ah nan lut bal lai lo. 4 Cucaah hi hngakchia bantuk in aa hmetter mi cu Vancung Pennak ah a ngan bik a si.

Midang lampialpinak

          5 Hi bantuk ngakchia pakhatkhat ka min in a cohlang mi poh cu keimah an ka cohlan a si. 6 Sihmanhsehlaw, “Keimah a ka zum mi, hi bantuk ngakchia an tluknak a si mi poh cu an hngawng ah facang rialnak lungtum nganpi awih in rili chung ah paih si seh law a ca ah a ṭha deuh. 7 Cu bantuk tluknak a ruangpi a um lai caah vawlei ca ah ngaihchia a va si dah! Tluknak a ruangpi cu an um hrimhrim ko lai, sihmanhsehlaw cu bantuk tluknak a chuahpitu ca ah cun ngaihchia a va si dah!

         8 “Nan kut asiloah nan ke cu nan tluknak a si ahcun, tan ulaw hlonh u;  kuthnih asiloah kehnih he zungzal mei chung i tlak nak in cun kutbul le kebul in nunnak chung i luh cu nan ca ah a ṭha deuh. 9 Cun nan mit cu nan tluknak a si ahcun khoih ulaw hlonh ko u; hell chung ah mit pahnih he tlaknak cun mit pakhat he lawng nunnak chung i luh cu nan ca ah a ṭha deuh.”

            10 “Hi ngakchia hna hi pakhat hmanh nan zawmhtaih bal hna nakhnga lo i ralring u, zei cah tiah kan chimh hna, an vancungmi hna cu vancung khua i ka Pa hmaika ah an um zungzal ko.11 Zei cah tiah Mi Fapa cu a tlau mi khamh awk ah a ra.

A tlau mi tuu

             12 Ka chim tuah u, “Mi pakhat nih tuu zakhat ngei seh law pakhat a tlau ahcun a dang  sawmkua le pakua kha tlangcung ah kaltak in a tlau mi kha a va kawl hnga lo maw? 13 Biatak kan chimh hna, a hmuh ahcun, sawmkua le pakua nakin kha tuu pakhat nih khan lawmhnak a pek deuh lai. 14 Cu bantuk in hi ngakchia tete hna an tlau cu vancung nan Pa i a duhnak a si bal lo.

Unau i chimhhrinnak

           15 “Na unau nih na cung ah ṭhat lonak a tuah ahcun va kal law nanmah pahnih te lawng in remnak va ser u. Na bia a ngaih ahcun na unau na hmuh ṭhan cang. 16 Sihmanhsehlaw na bia a ngaih lo ahcun, ‘I hmuhthiam lonak a um poh ah a hmaan maw hmaan lo ti hngalhnak ah tehte pahnih maw pathum a herh,’ ti a si bang khan, midang pakhat maw pahnih dik i sawm. 17 Sihmanhsehlaw an bia ngaih a duh lo ahcun bupi ah chuahpi, cun Bupi bia a ngaih lo ahcun ramdang mi, asiloah ngunkhuai khawlhtu pakhat bang in va zoh ko.

             18 “Biatak kan chimh hna, vawlei ah nan ṭem mi cu vancung zong ah ṭem a si ve lai i vawlei ah nan phoihpiak mi poh cu vancung zong ah phoih a si ve lai.

Hmunkhat in thlacamnak

           19 Biatak kan chimh ṭhan hna, vawlei ah pahnih nih lungkhat tein nan hal  mi poh cu vancung i ka Pa nih an pek hna lai. 20 Zei cah tiah ka min in mi pahnih pathum an i ton tik  ah an lak ah ka um ve,” tiah a ti hna.

Fahnak petu ngaihthiamnak

             21 Cu tik ah Peter cu hmai ah a ra chuak i amah kha, “Bawipa, ka unau nih ka cung ah thilsual a tuah ahcun voi zeizat dah ka ngaihthiam lai; voisarih tiang maw?” tiah a ti.  22 Jesuh nih kan chimh, “Voisarih a si lo, voisawmsarih le voisarih,” ti in a leh

Ngaihthiamnak a ngei lo mi lei a batupa bianabia

            23 “Cucaah vancung Pennak cu a salle hna he cazin zoh a duh mi siangpahrang pakhat he tahchunh khawh a si. 24 Cazin zoh an thawk tikah  talen thonghra a ba mi pakhat an ratpi;  25 leiba cham nakding zei lam hmanh a ngei lo, cucaah a leiba chamnak ca ah amah cu, a nupi, a fale le a ngeih mi thil vialte he, zuar awk  ah nawl a chuah. 26 Cu tik ah kha salpa kha a bawipa hmai ah a bawk i amah kha, ‘Ka ngang rih ko, kan cham dih ko lai,’ ti in a nawl. 27 A bawipa nih a zaangfah caah a leiba vialte a ngaihthiam i a kalter. 28 Atu a salpa cu a va chuah ah khan, denarii zakhat a ba mi a sal-hawi pakhat he an i tong ngelcel;  cun a hrom in a tlaih i a dih hnu ah, ‘Na ka bat mi cu ka cham,’ tiah a ti. 29 A sal-hawi cu a bawk i amah kha, ‘Ka ngang rih ko, kan cham ko lai,’ tiah a nawl. 30 Sihmanhsehlaw cu pa nih cun a duh lo, a lettalam in a leiba a cham hlan thong ah a thlak. 31  Hi thil si ning cu a sal-hawi nih an hmuh tikah an ngaih a chia ngaingai, cu caah an bawipa sin ah  an kal i thil si ning vialte an va chimh. 32 Cu tikah kha salpa kha a auhter hna i amah kha, ‘Nang sal ṭha lo, na ka nawl i na leiba vialte kan ngaihthiam dih. 33 Na cung i zaangfahnak ka ngeih bantuk in na sal-hawi cung ah zaangfahnak na ngeih ve ding a si lo maw?’ tiah a ti. 34 A thin a hung i a bawipa nih a salpa cu a leiba a cham dih hlan hremtu hna kut ah a chanh. 35 Cucaah nannih zong pakhat le pakhat kha nan lung chung in nan i ngaihthiam lo ahcun cu bantuk cun vancung ka Pa nih an tuah ve hna lai,” tiah a ti hna.

        VI: VANCUNG PENNAK A TLUN HLAN THIL A CANG   DING   MI HNA     A: TUANBIA DAL HNA

                     19.          Nu le va i ṭhennak kong biahalnak

          1.Jesuh cu atu ah a chim duh mi kha a chim dih cang, cun Galilee khan a chuak i Jordan khattelei ralpi i a um mi Judea ramri ah khan a va phan. 2 Mibu nganpi nih an zulh i cuka ah cun a damter dih hna.

3 Farasimi cheukhat nih an fuh, cun hneksak duh ah amah kha, “Zei bantuk thil a si zong ah pa nih a nupi a mak cu Phungbia a buar maw?” tiah an ti.  4 Amah nih, “A hramthawk ah Sertu nih cun minu le mipa kha a ser hna ti kha nan rel bal lo maw?  5 Cun amah nih:  Pa nih a nu le a pa kha a kaltak hna lai i a nupi he aa fonh lai, cun pahnih cu thisa khat an cang lai. 6 Cucaah pahnih an si ti lo, thisa khat an si cang. Cucaah Pathian nih a kawmh cang mi cu minung phun nih a ṭhen lai lo.” tiah a ti hna.

      7 Annih nih amah kha, “Cu a si ahcun, zei ruang ah dah Moses nih, ‘A mak tikah maknak ca ṭialpiak seh,’ ti in nawl a pek kun?” tiah an ti. 8 Amah nih, “Nan lung a hah tuk caah Moses nih nan nupile maknak nawl an pek hna,  sihmanhsehlaw a hramthawk ah cun hiti hin a rak si lo. 9 Atu kan chimh hna: a nupi a mak i phung ning lo i ummi ka chim lo – cun a dang a ṭhi mi poh cu ṭangdangpom sualnak a tuah cang.” tiah kan ti hna. 

I sumnak

           10 A zultu hna nih amah cu, “Nu le va karlak ah hiti hin thil a si ahcun i ṭhitum lo a ṭha deuh,” tiah an ti. 11 Sihmanhsehlaw amah nih, “Ka chim mi hi cu thluachuah vel a hmu mi dah ti lo nih cun mikip nih an cohlang kho lo. 12 An nu paw chung in mitling lo ah a rak chuak mi an um: mi nih an serchom mi hna an um, cun Vancung pennak ca ah anmah tein nupi pasal ngei lo in a ummi an um. Hihi a cohlang kho mi poh nih cohlang ko hna seh,” ti in a leh hna.

Jesuh le ngakchia hna

            13 An cung ah a kut a chuan i thla a campiak hna naklai mi nih ngakchia cu a sin ah an ratpi, A zultu nih an sik hna, 14  sihmanhsehlaw Jesuh nih, “Khati khan um ko hna seh, kham hna hlah u; zei cah tiah Vancung Pennak cu hi bantuk mi hna i ta a si,” tiah a ti hna. 15 Cun an cung  ah a kut a chuan i a kal.

Mirum tlangvalpa

            16 Cun mi pakhat cu a sin ah a ra i amah kha, “Bawipa, zungzal nunnak co awk ah zei ṭhatnak dah ka tuah lai?” tiah a hal. 17 Jesuh nih amah cu, “Zei ruang ah dah a ṭha mi kong cu na ka hal? A ṭha  mi cu pakhatte lawng a um. Sihmanhsehlaw nunnak chung luh na duh ahcun nawlbia kha zul ko hna,” tiah a ti. 18 Anih nih, “Zei hna hi dah?” tiah a ti. Jesuh nih, “Lai va nawng hlah; ṭangdangpom sualnak tuah hlah; fir hlah; a hmaan lo mi tehte khang hlah; 19 na nu le na pa upat hna; na innpa cu nangmah bantuk in va daw ti mi hna hi,” tiah a leh. 20 Tlangvalpa nih cun, “Hi vialte hna cu ka zulh dih cang hna. Zei dah tuah ka herh rih?” tiah a ti. 21 Jesuh nih, “Mitling si na duh ahcun, va kal law na ngeih mi vialte va zuar dih hna; cun na hmuh mi tangka cu misifak kha va pe hna; cun vancung khua ah chawva na ngei lai, cun ra law rak ka zul,” tiah a ti. 22  Sihmanhsehlaw tlangvalpa nih a theih tikah ngaihchia in a chuak, zei cah tiah amah cu mirum ngaingai a si.

Rumnak i ṭihnung

          23 Cun Jesuh nih a zultu hna cu, “Biatak kan chimh hna, mirum nih Vancung Pennak chung luh ding cu a har ngai ko, 24 Asi, kan chimh ṭhan hna lai, mirum pakhat Vancung pennak chung luhnak in kalauk  ṭhim awng chung luh a fawi deuh,” tiah a ti hna. 25 A zultu hna nih an theih tikah an khuaruah a har ngaingai i amah kha, “Asi ahcun aho dah khamhnak a co khawh lai?” tiah an ti. 26 Jesuh nih annih kha a zoh hna i, “Minung thazaang in cun hihi a si kho lo, sihmanhsehlaw Pathian ca ah cun zeizongte a si kho dih,” tiah a leh hna.

Pumpeknak i laksawng

             27 Cu tikah Peter nih a leh i a ti mi cu, “Zoh hmanh, zeizong te kaltak in kan in zulh cang? Zei dah kan hmuh lai?” tiah a ti. 28 Jesuh nih annih kha, “Biatak kan chimh hna, zeizong te hi ser ṭhan an si i Mi Fapa cu a bawi ṭhutdan cung a ṭhut tikah nannih cu Israel phun hleihnih bia ceih awk ah bawi ṭhutdan hleihnih cung ah nan ṭhu ve lai. 29 Cun ka min ca ah a inn, a unau, a farle, a pa, a nu, a fale asiloah, a lo a kaltak mi vialte cu a let zakhat in a hmuh ṭhan lai, cun zungzal nunnak zong a co lai.

30 A hmasa mi tampi cu hmanung an si lai i hmanung cu hmasa an si lai,” tiah a ti.

           20.  Mitsur dum chung i rianṭuantu hna bianabia

         1 “Atu Vancung pennak cu a dum rianṭuantu kawl awk ah zingka tein aa thawh mi dum ngeitu he aa lo. 2 Nikhat ah denarius fangkhat ti hnatlaknak he a dum ah a thlah hna. 3 Cun suimilam pathumnak ah khin a chuak i chawdawr ah zei hmanh tuah lo in a dir mi a dang  kha a va hmuh hna, 4 cun annih kha, ‘Ka dum ah va kal ve ulaw a dik mi nihlawh kan pek ve hna lai,’tiah a ti hna. 5 Cucaah an kal. Cun suimilam paruk hrawng le pakua hrawng ah a chuak i cutin a tuah ṭhan. 6 Cun suimilam hleikhatnak hrawng ah khin a chuak ṭhan i mitampi an dir ko kha a va hmuh hna, cun annih kha, ‘Zei cah dah hika ah  hin chun nitlak zei tuah lo in nan dir ko?” tiah a ti hna. 7” Aho hmanh nih rian an kan pek lo caah a si,” ti in an leh. Annih kha, ‘Nannih zong ka dum ah va kal u,’ tiah a ti hna. 8 Zanlei ah dum ngeitu nih a dum zohkhenhtu cu, ‘Rianṭuantu hna kha au hna law an nihlawh cu pe hna, hmanung bik i a phan mi in thawk law hmasa bik a ra mi ah dongter,’ tiah a ti. 9 Cucaah suimilam hleikhat hrawng i fial mi pawl cu an hung chuak i denarius pharkhat cio in an hmuh. 10 A ṭuan hmasa hna nih an rat tikah tam deuh hmuh ding an i ruahchan, sihmanhsehlaw annih zong denary pharkhat cio an hmuh ve. 11 Phaisa cu an i lak, sihmanhsehlaw dum ngeitupa sin ah khan, 12 “Hmanung bik i a ra mi hna tham cu suimilam pakhat lawng pei an ṭuan ko cu, kannih cu chunnitlak rian har kan ṭuan, asinain kanmah bantuk in na pek ve ko hna,” ti in an zaihnawh. 13 Annih lak i pakhat kha a leh i a ti mi cu, “Ka kawi, na cung ah thil dik lo ka tuah lo, denarius pharkhat na hmuh ding in kan hna a rak tla a si lo maw? 14 Na hlawh mi cu la law kal ko. Hmanung bik i a ra mi zong kha nangmah zat pek awk ah ka thim.15 Ka chawva cu ka duh bantuk in hmannak nawl ka ngei lo maw? Ka sian caah zei ruang ah dah na nahchuah?” tiah a ti. 16 Cucaah hmanung cu hmasa an si lai i hmasa cu hmanung an si lai,” tiah a ti hna.

A temh-innak kong a voithumnak a chim chung

             17 Jesuh cu Jerusalem ah a kai, cun lam ah cun a zultu pahleihnih lawng kha kaa dang ah aa kalpi hna i annih kha,18 “Zoh hmanh u, Jerusalem ah kan kai lai, cun Mi Fapa cu tlangbawi luban hna le phungbia cawnpiaktu hna kut ah an ka chanh lai. Thihnak ding bia an ceih lai, 19 cun serhsat ding, tukvelh ding le vailam ah tah ding in Jentail mi hna kut ah an ka chanh lai; cun nithumnak ni ah ka tho ṭhan lai,” tiah a ti hna.

Zebedi fapa hna i an nu nih bawmhnak a hal

           20 Cu tik ah Zebedi fapa hna i an nu cu bawmhnak hal ah a fapa hna he khan a ra i a hmai ah an kun, 21 cu tikah amah nih, “Zei dah na duh?” tiah a hal. Minu nih, “Na pennak chung ah hi ka fapa pahnih hna hi na orhlei ah pakhat, na kehlei ah pakhat an ṭhut nakhnga bia ka kamh tuah,” tiah a ti. 22 Jesuh nih, “Nan hal mi hi zei a si ti nan hngal lo. Ka din ding hrai cu nan din khawh lai maw?” tiah a leh hna. Annih nih, “Ding kho,” tiah an leh. 23 Amah nih, “Ka hrai cu nan din lai, a ṭha tuk, sihmanhsehlaw ka orhlei kam le ka kehlei kam i ṭhutnak nawl cu keimah nih pek ding an si lo; cu hmun cu ka Pa nih a rak timhpiak mi hna ca ah a si,” tiah a ti hna.

Rianhnak he ṭhithruainak

            24 Hi kong cu a dang  pahra hna nih an theih tikah unau pahnih hna cung ah an lung a tling lo. 25 Sihmanhsehlaw Jesuh nih a auh hna i annih kha, “Lawki mi hna lak ah cun hruaitu hna nih an lalhnawh hna, cun milianngan hna nih an nawlngeihnak cu an hngalhter hna ti cu nan hngalh.  26 Nannih lak ah cun hihi a si awk a si lo. Nan lak ah milianngan si a duh mi poh cu nanmah sal a si awk a si, 28 cun nan lak ah pakhatnak si a duh mi cu nan sal a si awk a si, 28 Mi Fapa zong hi mi nih rianh awk ah si lo in, midang tu kha rianh awk  ah le mi tampi tlanh awk i a nunnak pek awk ah a ra,” tiah a ti hna.

Jeriko i mitcaw pahnih

         29 Jeriko in an chuah ah khan mibu nganpi nih an zulh. 30 Cun lamkam  ah a ṭhu mi mitcaw pahnih an um. An kam in a tan mi cu Jesuh a si ti kha an hngalh tikah, “David Fapa, Bawipa, kan zaangfah ko,” ti in an au. 31 Cun mibupi nih cun an sik hna i dai tein um awk ah an chimh hna, sihmanhsehlaw thang chinchin tu in an au i, “David Fapa, Bawipa, kan zaangfah ko,”tiah an ti. 32 Jesuh cu a dir, a auh hna i annih kha, “Zei dah in tuahpiak hna ning ti nan duh?” tiah a hal hna. 33 Annih nih, “Bawipa, khua hmuh ṭhan kan duh,” tiah an ti. 34 Jesuh nih a zaangfah hna i an mit kha a tongh hna, cun hmakhatte ah khua an hmu kho i a hnu an zulh.

                                 Messiah cu Jerusalem ah a lut

21

       1.Jerusalem an hei naih i Oliv Tlang cung i Bethphage kha an va phanh, cun Jesuh nih a zultu pahnih hna cu, 2 “Nan hmai khua ah vung kal u, cun a fate he an hren mi laapi pakhat nan va hmuh lai. Phoih ulaw ka sin ah ratpi hna u. 3 Mi nih zeimaw nih an in ti hna ahcun, ‘Bawipa nih a herh i kan rak kirpi ṭhan zau lai,’ va ti u,” tiah a ti hna hnu ah a thlah hna.

4 Hihi cu profet nih:

5 “Zion fanu cu va chim u,

‘Zoh hmanh, na siangpahrang nih a rak in naih lio,

Toidornak he phurhrit a phor mi saṭil phun laapi le fate i cit in,’a ti mi a tlin nakhnga caah a si.

     6 Cucaah a zultu hna cu an kal i Jesuh nih a chimh hna bang khan an tuah. 7 Laapi le a fate cu an ratpi hna, cun an puan kha a keng ah an danh i a cung ah an ṭhutter. 8 Mibu nganpi nih an puan cu lam ah khan an phah, cu lio ah, midang  nih thingnge kha an sam i a kalnak ah cun an phah ve. 9 A hmai i a kal mi hna le a hnu in a zul mi mibupi hna cu an ningpi in:

“David Fapa cung ah Hosana!

Bawipa min in a ra mi cung ah thluachuahnak um  ko seh!

A sang  bik van ah khin, Hosana!  ti in an au.

             10 Cun Jerusalem a luh tikah, mi nih, “Hi pa hi aho dah a si?”tiah an i hal i khualipi cu a ningpi in aa tuai,  11 cun mibupi nih, “Hihi Galilee peng Nazareth khua i profet Jesuh a si,” tiah an leh hna.

Biakinn in chawlet pawl a ṭhawl hna

        12 Cun Jesuh cu Biakinn chung ah a lut i khika i thilzuar le thilcaw hna kha a ṭhawl dih hna; cun tangka thlengtu pawl cabuai le laileng zuartu hna ṭhutdan cu a leh dih hna. 13 Annih kha, “Cathiang ning ah, ‘Ka inn cu thlacamnak inn ti in auh ding mi a si,’ sihmanhsehlaw nannih nih cun mifir hna kua ah nan ser cang,” tiah a ti hna.  14  Biakinn ah khan a sin ah a ra mi mitcaw le kebei zong an um ve i annih kha a damter hna. 15 Biakinn chung khuaruahharnak a tuah mi le, ‘David Fapa cung ah Hosana!’ tiah a au mi ngakchia hna hmaika ah khan, tlangbawi luban hna le phungbia cawnpiaktu hna cu an ai a puang i amah kha, 16 “An chim mi cu na thei maw?” tiah an ti. Jesuh nih,“Thei ko! ‘Hnuktlai le ngakchia hna hmurka in thangṭhatnak na hmuh cang’ ti mi Cathiang bia kha nan rel bal lo maw?” ti in a leh hna.17 Cun annih kha a kaltak hna i khualipi chung khan Bethani khualei ah aa thawh,  cun cuka ah cun a va riak.

A tlai lo mi theipi kung a uai. Zumhnak le thlacamnak

            18 Zingka tuante in khualipilei in a rak kir ṭhan ah khan, a rawl a ṭam kha a theih. 19 Lamkam ah khan theipi kung a hmuh, a kaihnawh tikah a hnah lawng a si kha a hmuh. Cun thingkung kha, “Zei tik hmanh ah tlai ti hlah” tiah a ti, cun hmakhatte ah theipi kung cu a uai. 20 Hihi a zultu nih an hmuh tikah an khuaruah a har i annih nih, “Zei tin dah theipi kung cu a uai colh ning?” tiah an ti. 21 Jesuh nih, “Biatak  kan chimh hna, zumhnak nan ngeih i lungawṭawmnak nan ngeih hrimhrim lo ahcun hi theipi kung cung i ka tuah mi hi nan tuah khawh lawng si lo in hi tlang hmanh hi, ‘I phawi law rili ah vaa phum,’ nan ti ahcun nan ti ning in a si ko lai. 22 Cun zumhnak nan ngeih ahcun, thlacam in nan hal mi poh cu pek nan si ko lai,”tiah a ti hna.

Jesuh nawlngeihnak kha an hal

        23 Biakinn ah a kal i a cawnpiak hna lio ah khan, tlangbawi luban pawl le mipi upa hna cu an ra i amah kha, “Hiti hin na cawlcangh hi zei nawlngeihnak dah na ngeih? Cun aho nih dah hi nawlngeihnak hi an pek?” tiah an hal. 24 Jesuh nih annih kha, “Bia pakhat, pakhatte lawng, kan hal hna lai i nan ka leh ahcun hiti ka cawlcangh khawhnak nawlneihnak cu kan chimh ve hna lai. 25 Johan Baptisma peknak kha khua zei in dah aa thawk: van in maw, asiloah minung in dah?” tiah a hal hna. Cu tikah anmah lak ah khan hiti hin an i al len, “Van in kan ti ahcun kan bia a kan tan lai i, “Zei cah dah nan zumh duh lo?” a kan ti lai; 26 sihmanhhsehlaw minung sin in kan ti ah le ṭih ding mi mipi kan ngei, zei cah tiah annih nih an zapi tein Johan cu profet a si ti in an pom,’ tiah an ti. 27 Cu caah “Kan hngal lo,” tiah an leh. Cun anih nih, “Hiti ka cawlcangh khawhnak ding ka nawlngeihnak zong kan chim ve hna lai lo,” tiah awhrang ngai in a ti hna.

Fapa pahnih hna i bianabia

          28 “Zei tin dah nan ruah? Mipa pakhat nih fapa pahnih a ngeih hna. A pakhatnak pa sin ah a va kal i amah kha, ‘Ka fa, nihin cu va kal law ka mitsur dum ah rian va ṭuan tuah,’ tiah a ti. 29 Anih nih, ‘Ka kal lai lo,’tiah a leh, sihmanhsehlaw hnu ah ṭha tein a ruah ṭhan i a kal. 30 Cu hnu ah mipa cu a kal i a pahnihnak pa kha cu bantuk in a va ti i cupa nih, ‘Ka kal hrimhrim lai,’ tiah a ti, nain a kal lo. 31 Pahnih hna lak ah hin aho dah a pa duhnak cu a tuah?”tiah a hal hna. Annih nih, “A pakhatnak,” tiah an leh. Jesuh nih annih cu, “Biatak kan chimh hna: Ngunkhuai khawltu hna le hlawhhlangnu hna nih nan hmai in Pathian Pennak chung ah in luhkanh cang hna. 32 Zei cah tiah Johan cu, dinfelnak lam hmuhsak awk ah a ra, sihmanhsehlaw nan zum duh lo; nain ngunkhuai khawltu hna le hlawhhlangnu hna nih cun an zumh. Nannih cu nan hmuh hnu hmanh ah nan zum duh lo,” tiah a ti hna.

Rianṭuantu ṭha lo hna bianabia

       33 “Adang  bianabia ngai rih u: mitsur dum a tuah mi, ram ngei, mipa pakhat a rak um; hau a kulh, mitsur nennak ca ah khor a cawh i parthlam a sak; cun mi kha a hlanh i ram dang ah a kal. 34 Mitsur lawh caan a naih tikah a theitlai hmuh awk ah a hlanh mi hna sin ah a salle cu a thlah hna. 35 Sihmanhsehlaw hlanh mi hna nih khan a salle hna cu an tlaih, pakhat cu a hngawng in an dih, pakhat cu an thah i pathumnak cu lung in an cheh. 36 Cun sal tam deuh, milu tam deuh in a thlah ṭhan hna, sihmanhsehlaw hmasa bantuk in an rak tuah hna. 37 A donghnak ah, “Ka fapa cu an upat lai,” tiah a ruah i a fapa kha a thlah. 38 Sihmanhsehlaw hlanh mi hna nih a fapa cu an hmuh tikah pakhat le pakhat kha, “Hihi roco a si. Ra tuah u, amah hi that usi law a ro co hna  usih,”tiah an ti. 39 Cucaah an tlaih, dum leng ah an chuah i an thah. 40 “ Dum ngeitu a rat tikah hi hlanh mi hna hi zei tin dah a tuah hna lai?” tiah a ti hna. 41 Annih nih, “Kha michiahru hna cu zaangfah lo in an nunnak cu a donghter hna lai i a mitsur dum cu a caan ah a theitlai a chuahpi ding mi, mi dang kha a hlanh hna lai,” tiah an leh. 42 Jesuh nih annih kha, “Cathiang chung i:

‘Innsatu nih an hlawt mi lung cu

Innkil lung ah a cang cang;

Cucu Bawipa tuah mi a si i

kan khuaruah a har ko,’

ti mi hi nan rel bal lo maw?

      43 Cucaah hihi kan chimh hna: Pathian Pennak cu nanmah sin in lak a si lai i theipar a chuahpi ding mi, midang kha a pek hna lai. 45 A bianabia an theih hna tikah tlangbawi luban pawl le phungbia cawnpiaktu hna nih khan anmah kha a chimhnawh hna ti an hngalh, 46 amah kha tlaih ding a si nain Jesuh cu profet a si ti a zum mi, mibupi kha an ṭih hna. 44 Hi lung cung i a tla mi cu a kuai cikcek lai, hi lung nih a rial mi cu leidip ah a cang lai tiah a ti.

22. Nupi ṭhit puai bianabia

        1.Jesuh nih annih kha bianabia in a cawnpiak ṭhan hna. 2 “Vancung Pennak cu a fapa ca ah nupi ṭhit puai a tuah mi siangpahrang he tahchunh khawh a si. 3 Sawm mi hna kha auh awk ah a salle cu a thlah hna, sihmanhsehlaw an ra lo. 4 Cun sal kha tam deuh in a thlah hna i hiti hin bia a cah hna: ‘Sawm mi hna cu va chim hna u: Zoh hmanh u, rawl danghnak cu timhcia a si cang, ka cawtum hna le ka saṭil thauthau hna cu an thah cang hna, zeizongte cu timhcia a si dih cang, nupi ṭhit puai ah ra cang u. 5 Sihmanhsehlaw an zei a poi lo, pakhat cu a lo ah, a dang  pakhat cu a rian ah a kal, 6 a tang mi nih a salle hna cu an tlaih hna, fahnak an pek hna i an thah hna. 7 Siangpahrang cu a thin a hung tuk. A ralkapbu kha a thlahhnawh hna, cu lainawng hna cu a thah hna i an khua cu a khangh dih. 8 Cun a salle kha, ‘Nupi ṭhit puai cu timhcia a si cang; nain sawm mi hna cu an i tlak lo kha an langhter cang, 9 cucaah lamtonnak ah va kal ulaw nan hmuh mi poh kha nupi ṭhit puai ah va sawm hna u,” tiah a ti hna. 10 Cu  caah a salle hna cu lam ah an chuak i an hmuh khawh mi poh kha, michia he miṭha he, an khawmh hna; cun rawl danghnak khaan cu sawm mi hna he an khat. 11 “Sawm mi hna zoh awk ah siangpahrang cu a vung luh tikah nupi ṭhit puan aa hruk lo mi pakhat kha a hmuh, 12 cun amah kha, ‘Ka kawi, nupi ṭhit hnipuan lo in zei tin dah hika i na luh ning hi a si?” tiah a ti, Mipa cu a holh lo. 13 Cu tikah siangpahrang nih a rianṭuantu hna cu, ‘A kut le a ke kha ṭem ulaw ṭahnak le hacang rialnak a umnak khualeng mui lak ah hei hlonh u,’ tiah a ti. 14 Zei cah tiah sawm mi cu an tampi nain an dihlak in thim mi an si lo,” tiah a ti hna.

Caesar ngunkhuai peknak kong

      15 Cun Farasi pawl cu an chuak i zei tin dah amah cu a bia in kan foih khawh lai ti in khua an khaan. 16 Cun anmah hnuzul cu, Herod minung cheukhat hna he a sin ah an thlah hna i amah kha, “Bawipa, nang cu miding na si i Pathian lam kha dingfel tein na cawnpiak ti cu kan hngalh, cun aho hmanh na ṭih lo, zei cah tiah nangmah ca ah minung rank cu zei hmanh a si lo. 17 Cucaah Sisar sin ah ngunkhuai pek ding a si maw si lo, na ruahnak kan cheuh tuah,” tiah an titer hna. 18 Sihmanhsehlaw Jesuh nih an ruahnak ṭha lo kha a rak hngalhziar i annih kha, “Nannih midepde hna!  Zei ruang ah dah nan ka hneksak? 19 Ngunkhuai nan pek mi tangka cu ka hmuhsak tuah u,” tiah a ti hna. Denarius fangkhat kha an chanh, cun amah nih, 20 “Hihi aho dah a si? aho min dah aa ṭial?” tiah a ti hna. Annih nih “Sisar,” ti in an leh. 21 Cu tik ah annih kha, “A ṭha tuk, Sisar ta cu Sisar kha pe ko u -  Pathian ta cu Pathian kha pe ko u,” tiah a ti hna. 22 Cucu an theih tik ah an khuaruah a har ngaingai; an chuak i amah lawng khan an kaltak.

Mithi hna thawh ṭhannak

      23 Kha ni ah khan – thawh ṭhannak a um lo a ti mi - Sadusi micheukhat nih amah kha an fuh i hi biahalnak hi an chuahpi, 24 “Bawipa, Moses nih: ‘Mipa pakhat cu fa ngei lo in a thih ahcun a unau nih a upa ca i fale ngeihpiak awk ah a upa nupi nuhmeinu cu a ṭhit lai,’ tiah a ti. 25 Atu unau pasarih a um mi he pehtlai in bia pakhat kan ngei; pakhatnak pa cu nupi a ṭhi nain  fa ngei lo in a thi, a nupi cu a naupa kha a rohtak; 26 cu bantuk in a pahnihnak le a pathumnak le a donghnak ah a pasarihnak pa tiang nih an thihtak; 27 cun hmanung bik ah kha nu zong a thi ve. 28 Atu thawh ṭhannak ah, an pasarih ah hin, aho nupi dah a si lai?, zei cah tiah an dihlak in a rak vat cang hna,” tiah an ti. 29 Jesuh nih annih kha, “Nan palh tuk cang, zei cah dah cathiang zong nan hngal lo i Pathian ṭhawnnak zong nan hngal lo. 30 Zei cah tiah thawhṭhannak  ahcun i ṭhit le i vat a um ti lo; annih cu van i vancungmi hna bantuk an si cang. 31 Cun mithi thawh ṭhannak kong ahcun, Pathian hrimhrim nih nannih kha, 32 ‘Keimah cu Abraham Pathian, Isak Pathian, Jakob Pathian ka si,’a ti mi kha nan rel bal lo maw? Amah cu a thi mi hna si lo in a nung mi hna i Pathian a si, “ tiah a ti hna. 33 Cun a cawnpiaknak nih a thei mi hna kha an lung a suk ngaingai hna.

Nawlbia vialte lak ah a ngan bik mi

       34 Sihmanhsehlaw Sadusimi a daihter hna ti kha Farasi mi hna nih an theih tikah hmunkhat ah an i pum i,  35 amah kha hneksak duh ah, anmah lak i pakhat nih biahalnak pakhat kha hiti hin a tuah, 36 “Bawipa, Nawlbia ah hin zei nawlbia dah a ngan bik?” tiah a ti. 37 Jesuh nih amah kha, “Bawipa na Pathian cu na lungthin dihlak, na nunnak dihlak, cun na ruahnak dihlak in na dawt lai’ 38 Hihi a ngan bik mi le a pakhatnak nawlbia a si. 39 A pahnihnak cu a pakhatnak he aa lo: Na innpa kha nangmah bantuk in na dawt lai,’ ti hi a si. 40 ‘Phungbia a ningpi, cun Profet hna cawnpiaknak vialte hna cu hi nawlbia pahnih ah hin an hram an bunh dih,” tiah a ti hna.

Khrih cu David i fapa lawng si lo in a Bawipa zong a si ve

       41 Farasi hna cu a velchum i an um lio ah khan, Jesuh nih, 42  “Khrih kong ah nan ruahnak cu chim tuah u? Aho fapa dah a si?”tiah a hal hna. Annih nih ‘David fapa,’ tiah an ti. 43 Anih nih, “Cu a si ahcun zei tin dah David nih a tanglei cathiang chung ah hin, Thlarau hruainak in, ‘Bawipa,’ ti in a auh khawh?’ A cathiang cu:

      44 Bawipa nih ka Bawipa sin ah na ral cu na ke chiahnak ah ka ser hna hlan tiang ka orhlei kam ah ṭhu tuah tiah a thanh.

    45 David nih Bawipa ti in a kawh ahcun zei tin dah amah cu a fapa a si khawh ning?” tiah a ti hna. 46 Aho hmanh nih lehnak ding zei hmanh an hngal kho lo, cun cu ni thawk cun aho hmanh nih zei bia hmanh an hal ngam ti lo.

            23.     Phungbia cawnpiaktu saya le Farasimi hna: 

                        an depdetnak le zei an si lonak

     1.Cun mibupi le a zultu hna kha phung a chimh hna ah khan Jesuh nih, 2 “Phungbia cawnpiaktu hna le Farasimi hna cu Moses ṭhutdan ah an ṭhu. 3 Cucaah an in chimh mi hna cu nan zulh lai i nan tuah hna lai; asinain an nunzia nih lam in hruai hna hlah seh, zei tin tiah an chim mi kha an tuah lo. 4 Thil kha ritpi in an tom i midang liang cung ah an chuan, sihmanhsehlaw annih vial nih cun an kutdong te hmanh an cangh duh maw? Cangh duh hlah. 5 An tuah mi vialte, bianabia ah, a kau deuh mi cal benh i benh le a fual deuh mi angki i hruk hna hi mi hmuh ding i an tuah mi lawngte a si.  6 Rawldumnak i upa ṭhutnak le pumhnak inn i hmai ṭhutnak cung ṭhut duhnak, 7 chawdawr hna ah upatnak he chawnhbiak le mi nih Rabi ti in auh kha an duh.

        8 Sihmanhsehlaw nannih cu aho hmanh “Rabi” tiah i auhter hna hlah u, zei tin tiah Bawipa cu pakhat lawng nan ngei, nannih cu unau nan si dih. 9 Vawlei ah hin aho hmanh, “Ka Pa,” ti in nan au hna lai lo, zei tin tiah Pa cu pakhat lawng nan ngei, amah cu vancung ah a um. 10 “Cawnpiaktu” ti zong in nan i auhter hna lai lo, zei tin tiah Cawnpiaktu cu pakhat lawng nan ngei i amah cu Khrih a si. 11 Nan lak i a ngan bik cu nan sal a si lai. 12 Amah le amah aa hlorh mi poh cu ṭhumh an si lai, cun amah le mah aa niamter mi poh cu hlorh an si lai.

Phungbia cawnpiaktu le Farasi a mawhchiat hnanak phunriat

      13 Nannih phungbia cawnpiaktu le Farasimi hna, midepde hna, nan ca ah ngaihchia a va si dah! Mi hmaika ah khan, Vancung Pennak cu nan khar, nanmah zong nan lut lo i a lut duh mi hna zong kha luh nan sianh hna lo. (14)15 Nannih phungbia cawnpiaktu le Farasimi hna, midepde hna, nan ca ah ngaihchia a va si dah! Mithar hmuh awk ah rili ral le khuazakip nan cul, sihmanhsehlaw pakhat nan hmuh mi cu nanmah tluk in hell he aa tlak mi ah nan ser.

       16 “Mtcaw lamhruai hna, nan ca ah ngaihchia a va si dah! Nannih nih, ‘Mi pakhat nih Biakinn chalh in chiat aa serh ahcun hmual a ngei lo; sihmanhsehlaw Biakinn i sui chalh in chiat aa serh ahcun a chiatsernak cu a hmun,’ nan ti. 17 Mihrut le mitcaw hna! Zei hi dah a man a sunglawi deuh, sui maw sui a thiantertu Biakinn dah?  18 Cun, ‘Mi pakhat nih biakṭheng in chiat aa serh ahcun hmual a ngei lo; sihmanhsehlaw biakṭheng cung pekchanhnak in chiat aa serh ahcun a chiatserhnak cu a hmun,’ nan ti. 19 Nannih mitcaw hna! Zei hi dah a man a sunglawi deuh, pekchanhnak maw pekchanhnak a thiantertu biakṭheng dah?  20 Cucaah biakṭheng in chiat aa serh mi poh cu biakṭheng hrimhrim le a cung i a um mi vialte in chiat aa serh a si; 21 cun Biakinn in chiat aa serh mi poh cu Biakinn hrimhrim le a chung i a um mi Pathian in chiat aa serh a si. 22 Cun vancung in chiat aa serh mi cu Pathian bawi ṭhutdan le a cung i a ṭhu mi Pathian in chiat aa serh a si.

        23 “Nannih Phungbia cawnpiaktu le Farasimi hna, midepde hna, nan ca ah ngaihchia a va si dah! Puṭinan, khamhhmuai le aithing tiang in cheuhra cheukhat nan pek, sihmanhsehlaw Phungbia nih biapi deuh in a chiah mi – dinnak, zaangfahnak le zumhnak ṭha hna cu zei ah nan rel hna lo; hi hna hi hrelh lo in pei nan rak tuah hna ding a si cu. 24 Nannih mitcaw lamhruai hna. Fikfa cu nan zeet i kalauk cu nan dolh!

          25 “Nannih phungbia cawnpiaktu le Farasimi, midepde hna, nan ca ah ngaihchia a va si dah! Hrai le kheng cu lenglei in nan ṭawl hna nain a chung cu chuh-ramhnak le aipuannak in nan khahter. 26 Mitcaw Farasi hna! hrai le kheng cu a chung kha ṭawl hmasa ulaw pei hrai cu a chung he a leng he a thian  lai cu.

          27 “Nannih phungbia cawnpiaktu le Farasi, midepde hna, nan ca ah ngaihchia a va si dah! Nannih cu lenglei in nan i dawh tuk nain a chung ah mithi ruh le thilrawp phunkip in a khat i siirang thuh mi thlaan bantuk nan si. 28 Cu bantuk in lenglei cu miding nan lo nain nan chung cu depdetnak le ningcang lo nunnak in nan khat.

          29 “Nannih phungbia cawnpiaktu le Farasi hna, midepde hna, nan ca ah ngaihchia a va si dah! Profet cu lungdonh nan tuahpiak hna i miding hna an thlaan cu dawh tein nan ṭamh hna, cun nannih nih, 30 ‘Kan pupa hna chan ah hin rak um ve usi law, profet hna thisen chuahnak ah hin cun kan rak i tel hnga lo,’ nan ti. 31 Cucaah nan tuahsernak nih nan si ning cu a langhter! Nannih cu profet a rak thattu hna i fale hna nan si! 32 A ṭha tuk, nan pupa hna nih an rak thawk mi rian cu lim lawlaw ko u.

An sualnak hna le a ra lai mi dantatnak

        33 ‘Nannih rulchia hna, limcawm fale hna, zei tin dah hell tlaknak in nan luat khawh lai? 34 Hi ruang ah hin – zoh hmanh uh –nan sin ah profet le mifim le phungbia cawnpiaktu hna kha ka rak thlah hna lai; a cheu cu nan thah hna lai i vailam nan tah hna lai, a cheu cu nan pumhnak inn ah nan tuk hna lai i khuakhat hnu khuakhat sa bang nan dawi hna lai; 35 cuti cun a thiang mi Abel thi in hmunthiang le biakṭheng karlak ah nan thah mi Berekhiah fapa Zekhariah thi tiang, vawlei cung i rak thlet mi miding thi vialte, cu nan lu ah nan i toih hna lai. 36 Biatak kan chimh hna: hi vialte cu tuchan mi hna cung ah a tlung lai.

Jerusalem chimhhrinnak

         37 “Jerusalem, profet hna kha that in, na sin ah thlah mi vialte lung in a rak cheptu, nang Jerusalem!  Arpi nih a fale cu a thlazung tang ah a humzual hna bang in voi zeizat dik na fale hna cu hmunkhat ah humzual ka rak duh, sihmanhsehlaw na duh lo. 38 Zoh hmanh, na inn cu hnon an si cang lai, 39 zei cah tiah, ‘Bawipa min in a ra mi cung ah thluachuahnak um ko seh,’ ti in na chim hlan poh cu, kan kamh, na ka hmu ti lai lo,” tiah a ti.

          14 Nannih phungbia cawnpiaktu le Farasi mi hna, midepde hna, nan ca ah ngaihchia a va si dah! Nannih thla saupi aa camter i nuhmei chawva a ei dihtu hna. Nan dantatnak cu a fak chinchin lai.

B: A DONGHNAK LE A VOIHNIH RAT ṬHANNAK

Biahmaiṭhi

24

               1.Jesuh cu Biakinn khan a chuak, cun a chuahpah ah khan a zultu hna cu a sin ah an ra i Biakinn le a velchum inn hna an i dawhnak kha an chim len. 2 Annih kha, “Hi vialte hi nan hmuh a si ko lo maw? Biatak kan chimh hna: lung pakhat hmanh a dang lung cung ah aa chonh te lai lo, zeizongte cu an pur dih te lai,” tiah a leh hna. 3 Cun Oliv Tlang i a ṭhut lio ah khan a zultu hna cu an ra i anmahte lawng an um lio ah khan amah cu, “Hihi zei tik ah dah a si te lai, cun na rat tik le atu chan a dih lai tikah zei hmelchunhnak dah a um te lai?’ kan chim tuah,” tiah an hal.     

Ngaihchiatnak aa thawknak

     4 Cun Jesuh nih annih cu, “Aho hmanh nih an in hlen hna nakhnga lo i ralring u, 5 zei cah tiah mi tampi cu ka min hmang in an ra lai i annih nih, ‘Keimah hi Khrih ka si,’ an ti lai i mi tampi kha an hlen hna lai. 6 Raltuknak le ral thawngpang nan theih hna lai, nan lau nakhnga lo i ralring u, zei cah tiah hihi cu a cang ding thil hrimhrim an si, asinain a donghnak cu a si rih lai lo. 7 Zei cah tiah ram pakhat nih a dang ram a doh lai i pennak pakhat nih a dang pennak a doh lai. Hmun tampi ah mangṭam le lihninhnk a um lai. 8 Hi thil vialte cu nganfah aa thawknak te lawng a si rih lai.

     9 “Cun nannih cu hrem awk le thah awk ah an in chanh hna lai; cun keimah min ruang ah miphun vialte nih an in huat hna lai. 10 Cu tikah mi tampi cu an tlu lai; mi cu pakhat le pakhat an i rawi lai i an i hua lai. 11 Nal profet tampi an tho lai i mi tampi kha an hlen hna lai. 12 Cun ning cang lo nunnak a karh caah, mi tam u lungthin chung i dawtnak cu a zor lai; 13 sihmanhsehlaw a dongh tiang fek tein a dir mi poh cu khamh an si lai.

     14 Miphun hna ca tehte si awk ah Vancung Pennak Thawngṭha cu vawleicung pumpaluk ah thanh a si lai. Cun a donghnak cu a phan lai.

Jerusalem ca ah harnak nganpi

      15 “Cun profet Daniel nih thil fihnung a ti mi, hmunthiang chung i an dir kha nan hmuh tikah, (A reltu nih hngal seh), 16 Judea ram i a um mi cu tlang ah zam hna seh, 17 mi pakhat cu a  inn cungkhuh i a um ahcun a innchung a um mi thilri lak awk ah ṭum hlah seh, 18 mi pakhat cu a lo ah a um ahcun a hnipuan lak awk ah i mer hlah seh. 19 Cu ni hna an phak tikah fapawi nu le nau no ngei mi nu hna ca ah ngaihchia a va si dah! 20 Nan zaam hi khuasik caan le Sabbath ni hna ah an si sual nakhnga lo thlacam u. 21 Zei cah tiah, khi tikah cun, vawlei thawkka in tahchunh awk a um lo mi ngaihchiatnak nganpi a tlung lai, cun cu bantuk cu a si zong a si bal ti lai lo. 22 Cun cu caan cu tawiter a si lo ahcun aho minung hmanh an nung lai lo; sihmanhsehlaw thim mi hna ca ah cu caan cu tawiter a si cang.

       23 Cun mi pakhatkhat nih, ‘Zoh hmanh, Khrih cu hika ah hin, khika ah khin,’ an in ti ahcun, zum hlah u; 24 zei cah tiah Khrih deu le nal profet cu an chuak lai, thim mi hna tiang hlen khawhnak ding (a si khawh ahcun) a si mi hmelchunhnak nganpi le khuaruahharnak an tuah hna lai. 25 Zoh hmanh u, ralrinnak kan pek cang hna.

Mi fapa ratnak

            26 Cu tik ah mi nih, ‘Zoh hmanh u, amah cu thetse ram ah a um ko,’ an in ti hna ahcun va kal hlah u; ‘Zoh hmanh u, hmunking zeimaw ah a um ko,’ an in ti hna ahcun va zum hlah u; 27 Zei cah tiah Mi Fapa a ratnak cu nichuahlei in aa lek mi mimtlau nih nitlaklei tiang a ceuh bantuk a si ve lai. 28 Mithi ruak a umnak poh ah langta an i pum ve ton,”

Vawleipi theih ding in a ratnak

          29 “Cu ni ngaihchiatnak ni hna an dih cangka in, khua cu a mui lai i thlapa nih a ceunak a pe ti lai lo, arfi cu van in an tla lai i van ṭhawnnak hna cu an i hnin lai. 30 Cun Mi Fapa hmelchunhnak cu vancung khin a rung lang lai; vawlei cung miphun vialte an ṭang an i cum lai; cun Mi Fapa cu lianhngannak le sunparnak nganpi he vancung minmei cung in a rat kha an hmuh lai. 31 Cun muko tum thawng he vancungmi hna cu, a thim mi hna pumh awk ah, vawlei kil li le vancung khattelei deng in a dang  khattelei tiang a thlah hna lai.

A ratnak caan

            32 “Theipi kung hi hmelchunhnak ah i lak u: A ṭe an hung no a hnah an hung corh tikah ṭhal can a nai cang ti nan hngalh. 33 Cu bantuk in nanmah zong hi thil vialte nan hmuh hna tikah a caan cu a nai cang, kutka hram ah a dir ti kha hngal u. 34 Biatak kan chimh hna: hi chan a liam hlan ah hi thil vialte cu an cang lai. 35 Van le vawlei cu an rawk lai; sihmanhsehlaw ka bia cu an rawk bal lai lo. 36 Sihmanhsehlaw cu ni le cu caan cu aho hmanh nih an hngal lo; Pa dah ti lo vancung i vanmi hna le Fapa zong nih an hngal lo.

I hliphlau u

         37 Noah chan lio bantuk khan Mi Fapa a rat tikah cun a si ve te lai. 38 Zei cah tiah kha lio ah khan Buanchukcho a tlun hlan, Noah lawng chung a luh hlan tiang, mi cu an ei an ding, an i ṭhi i an i um, 39 Buanchucho a tlun hlan tiang cu lunghrinnak zei hmanh an ngei lo i a fenh dih ko hna. Mi Fapa a rat tikah hi bantuk a si ve lai. 40 Cu tikah cun lo ah a um mi pahnih lak ah pakhat cu lak a si lai i pakhat cu nganh a si lai. 41 Sum a su mi nu pahnih lak ah, pakhat cu lak a si lai i pakhat cu nganh a si lai.

           42 Nan Bawipa rat lainak ni nan hngalh lo caah hngilh lo in um u. 43 Hihi ṭha tein nan i fian awk a si, inn ngeitu nih mifir cu zan, zei tik caan ah a rat lai ti kha hngal seh law hngilh lo tein a um hnga i mifir kha a inn a bauhter hnga lo. 44 Nannih zong Mi Fapa cu nan i rin lo caan ah a rat lai caah timhcia in hngak ko u.

Aa ralring mi sal tahchunhnak

         45 “Cu tikah, a Bawipa nih a chungkhar kha a caan te i rawl pek awk ah a chiah ding mi zumhtlak le a fim mi sal cu aho dah a si? 46 A bawipa a ṭin tik ah a chimh ning in a ṭuan lio i a hmuh mi sal cu mi thluachuak a si. 47 Biatak kan chimh hna, amah cu a ngeih mi vialte zohkhenhtu ah a chiah lai. 48 Sihmanhsehlaw cu sal cu a zer i amah le amah kha, ‘Ka bawipa cu a rau rih lai,’ a ti i, 49 a sal-hawi hna kha a ṭhuat hna, zuri hna he a ei a din ahcun, 50 a Bawipa cu aa ruah lo ni le a hngalh lo caan ah a rak ṭin lai.  51 A Bawipa nih amah kha a saam lai i midepde pawl umnak hmun ah a kuat lai, cuka ah cun ṭahnak le hacang rialnak a um lai.

25.Nupi ṭhitnak monu pahra hna bianabia

         1.“Cun Vancung Pennak cu hi bang in a si lai: nupi ṭhi tlangvapa a dong ding mi ngaknu pahra hna cu an mei-inn an i lak i an chuak. 2 Panga cu mihrut an si i panga cu mifim  an si; 3 a hrut mi hna cu an mei-inn an i put nain zinan an i ken lo, 4 cu lio ah mifim hna cu  an mei-inn he zinan thawl zong an i put chih. 5 Nupi ṭhi tlangvalpa cu a tlai caah an mit a ku i an i hngilh. 6 Sihmanhsehlaw zanṭim ah khin, ‘Zoh hmanh u, nupi ṭhi tlangvalpa cu! Chuak u law va dong u,’ ti au thawng a thang.7 Cu tikah ngaknu pahra hna cu an i hlau i an meiinn an hun timhtuah hna, 8  cun a hrut mi hna nih a fim mi hna kha, “Kan mei-inn a thi deng cang, cucaah nan zinan tlawmpal kan pe ve tuah u,” tiah an ti hna. 9 Sihmanhsehlaw annih nih, “Nanmah ca he kanmah ca he a zat lo sual ah a zuartu hna sin nan va kal i nan vaa cawk ah a ṭha deuh” tiah an leh hna. 10 Cawk awk i an i thawh kar ah nupi ṭhi tlangvalpa cu a rak phan. Timhcia in a um mi hna cu nupi ṭhitnak khaan ah amah he an lut i innka cu an khar. 11 “A hnu ah a dang panga hna cu an rak phan. Annih nih, ‘Bawipa, bawipa, innka kan hunh,’ tiah an ti. 12 Sihmanhsehlaw anih nih, ‘Biatak kan chimh hna, kan hngal hna lo,’ ti in a leh hna lai. 13 Cucaah a ni siseh a caan siseh nan hngalh lo caah hngilh lo in hngak u,” tiah a ti hna.

Ngun tangkaa bianabia

      14 Ramdang khualtlawn aa thawh lai ah a salle hna kha a kawh hna i a thilri zohkhenhnak ding ah a chimhtak mi hna bantuk a si. 15 Anmah le an thil ti khawh ning cio in, pakhat cu ṭalent panga, a dang cu ṭalent pahnih, a pathumnak cu ṭalent pakhat ti in a pek hna. Cun khualtlawn ah aa thawh. 16 ṭalent panga a hmu mipa cu a chuak zau i kha tangka khan chaw a let i a dang  ṭalent panga a hmuh chap. 17 Cu bantuk in ṭalent pahnih a hmu mipa zong nih a dang ṭalent pahnih a hmuh chap ve. 18 Sihmanhsehlaw ṭalent pakhat a hmutupa cu a chuak, vawlei ah khor a cawh i a bawipa tangka cu a phum. 19 Caan saupi hnu ah khin kha salle hna i an bawipa cu a rak tlung i an cazin cu a zoh. 20 ṭalent panga a hmu mipa cu a dang ṭalent panga he a rak chuak. Amah nih, ‘Bawipa, ṭalent panga na ka zohkhenhter; hika ah hin a dang panga ka rak hmuhchap,’ tiah a ti. 21 A bawipa nih, ‘A ṭha tuk, zumh awktlak sal ṭha, thil hmete ah zumhtlak na sinak kha na langhter caah thil lianngan deuh ah kan bochan lai; ra law na bawipa lawmhnak rak i hrawm ve,’ tiah a ti. 22 Cun ṭalent pahnih a co mi cu a rak chuak i, ‘Bawipa, ṭalent pahnih na ka zohkhenhter; hika ah hin a dang ka hmuhchap mi ṭalent pahnih,’ tiah a ti. 23 A bawipa nih amah cu, ‘A ṭha tuk, zumhtlak sal ṭha, thil hmete ah zumh tlak na sinak na langhter cang; thil ngan deuh ah kan bochan lai; ra law na bawipa lawmhnak rak i hrawm ve,’ tiah a ti. 24 Hmanung bik ah ṭalent pakhat a co mi cu a ra chuak i amah kha, ‘Bawipa, nang cu mikhepkha na si: na tuh lo nak ah na zun i na ṭhek lonak ah na pumh tawn ti ka rak theih cang; 25 cucaah kan ṭih, cun ka kal i na tangka cu vawlei chung ah ka thuh. Hihi na tangka a si, na hmuh ṭhan cang hih,’ tiah a ti. 26 Cu tik ah a bawipa nih anih kha, ‘Nang mi ṭha lo le sal thathu, ka tuh lonak ah ka zun i ka ṭhek lonak ah ka pumh tawn ti cu na theih ti? 27 Cu a si ahcun ka tangka cu tangka chiahnak inn ah pei na rak chiah awk a si cu, cun ka rak kir tikah ka tangka cu a miak he ka hmu lai lo maw? 28 Cucaah atu ṭalent cu a sin in la ulaw ṭalent pahra a ngei mi kha pe u. 29 Zei  cah tiah a ngei mi poh cu tam deuh pek an si lai, cun a hleivuang tiang an ngei lai; sihmanhsehlaw a ngei lo mi  cu a ngeihcia mi hmanh kha chuh ṭhan an si lai. 30 Cun hi santlai lo sal tu hi cu, leng khuamui lak ah va hlonh u, cuka ah cun ṭahnak le hacang rialnak a um lai,” tiah a ti hna.

Hmanung bik biaceihnak

          31 “Mi Fapa cu a sunparnak he, a vancungmi vialte nih kulh in, a rat tikah a sunparnak bawi ṭhutdan cung ah a ṭhu lai. 32 Miphun vialte cu a hmai ah an i pum lai i tuukhal nih tuu cu meheh sin in a ṭhen hna bang in mi cu pakhat hnu  pakhat in a ṭhen hna lai; 33 tuu cu a orhleikam ah le meheh cu a kehlei kam ah a chiah hna lai. 34  Cu hnu ah Siangpahrang nih a orhlei kam i a um mi hna cu, ‘Nannih ka Pa nih thluachuah a pek mi hna, ra ulaw vawlei hramthawk in nanmah ca ah remh mi pennak cu rak co tuah u. 35 Zei cah tiah ka rawl a ṭam i rawl nan ka pek, ka ti a hal i ti nan ka pek; khual ka si i tluninn nan ka onh. 36 Hninpuan ka ngei lo i nan ka pek, ka zaw i nan ka veh, thong ka tla i nan ka veh,’ tiah a ti hna lai. 37 Khi tikah miding hna nih an leh mi cu, ‘Bawipa, zei tik ah dah na rawl a ṭam kan in hmuh i rawl kan in pek, na ti a hal i din awk kan in pek, 38 Zei tik ah dah khual na si kan in hmuh i kan in tlunter, hnipuan na ngei lo i kan in pek, 39 zei tik ah dah na zawt asilole thong na tlak cu kan in hmuh i kan in veh?’ tiah an ti. 40 Cun Siangpahrang nih annih cu, ‘Biatak kan chimh hna, nauta bik ka unau pakhatkhat cung nan tuah mi poh cu keimah cung nan tuah a si,” ti in a leh hna lai. 41 Cun a kehlei kam i a um mi hna cu, ‘Nan nih cu chiatserhnak he keimah sin in chuak ulaw khuachia le a vanmi hna ca remh mi zungzal meikang ram ah va kal u. 42 Zei cah tiah ka rawl a ṭam i rawl nan ka pe bal lo, ka ti a hal i ti nan ka pe bal lo, 43 khual ka si i tluninn nan ka onh bal lo, hnipuan lo in ka um i nan ka thuam bal lo, ka zaw, thong ka tla i nan ka veh bal lo,” tiah a ti hna lai. 44 Khi tik ah annih zong nih, ‘Bawipa, zei tikah dah na rawl a ṭam, na ti a hal, khual na si, hnipuan lo in na um, na zawt, thong na tlak kan in hmu nain kan in bawmh lo?’ tiah an leh ve te lai. 45 Cu tik ah amah nih, ‘Biatak kan chimh hna: hi hna lak i nauta bik cung i tuah nan tlolh mi poh cu keimah cung i tuah nan tlolh a si,” tiah a leh hna lai. 46 Cun annih cu zungzal dantatnak ah, cun miding hna cu zungzal nunnak ah an kal lai,” tiah a ti hna.

VII: A TEMH-INNAK LE A THAWHṬHANNAK

26.Jesuh an rawiphiarnak

         1.Jesuh nih a chim duh mi vialte a chim dih, cun a zultu hna kha, 2 “Nan hngalh bantuk in, hi hnu nihnih ah Lanhtak Puai a si lai, cun Mi Fapa cu vailam i tah awk ah chanh a si lai,” tiah a ti hna.

           3 Tlangbawi luban hna le mipi upa hna cu Tlangbawi Ngan, a min ah  Kaiafas, an ti mi innpi ah an i pum,  4 cun a thli tein Jesuh kha tlaih i thahter awk ah  khua an khang. 5 Sihmanhsehlaw annih nih, ‘Puai chung cu si hlah seh; mipi lak ah hnahnawhnak um hlah seh,” tiah an ti.

Bethani ah zihmui thuhnak

            6  Jesuh cu Bethani i Simon, thinghmui zawtnak in a rak zaw mi inn i a um lio ah khan, 7 minu pakhat cu a man a fak ngai mi lungrang zihmui thawlkhat he a ra, cun rawl einak i a ṭhut lio ah khan a lu ah a toih. 8 Cucu an hmuh tikah, a zultu hna nih lung si lo ngai in, “Zei cah dah hiti hin a sawksam men hnga? 9 Hihi man fak ngai in zuar i tangka cu misifak pek awk a si ṭung,” tiah an ti. 10 Sihmanhsehlaw Jesuh nih a theih i annih kha, “Zei ruang ah dah minu cu a ngaih nan chiatter?  Ka cung i a tuah mi cu thil ṭha ngai a si! 11 Misifak cu nanmah he an um peng, sihmanhsehlaw kei cu nan sin  ah ka um peng lai lo. 12 Hi zihmui hi ka pum cung a toih tikah vuinak ca a ka timhpiak mi a si. 13 Biatak kan chimh hna, hi thawngṭha an phuannak vawleicung hmun poh ah, ka cung i a tuah mi thil cu, amah philh lonak ah chimchih a si lai,” tiah a ti.

Judah nih Jesuh a lei

14 Cun hleihnih lak i pakhat, Judas Iskariot an ti mi mipa cu tlangbawi luban hna sin ah a va kal i annih kha, 15 “Amah kha nan kut ah kan chanh hna ahcun zei dah pek nan ka timh?” tiah a ti hna. Ngun tangka sawmthum kha an pek, 16 cu thawk cun amah rawinak ding caan rem kha a kawl.

Lanhtak puai ca timhtuahnak hna

17 Thilnu tel lo Changreu Puai a ni khatnak ni ah khan a zultu hna cu Jesuh sin ah an ra i amah kha, “Lanhtak puai rawl na einak ding cu khuazei i timhpiak dah na kan duh?” tiah an ti. 18 Amah nih, “Khualipi chung i kha mipa sin ah va kal ulaw amah kha, “Kan Bawipa nih: Ka caan a nai cang, a ka zultu hna he na inn ah Lanhtak puai hmanṭi ka timh,’ a ti,’ tiah nan va ti lai a ti hna. 19 A zultu pawl cu Jesuh nih a chimh hna bang  an tuah i Lanhtak puai cu an timh.

Judah rawiphiarnak ding a chimchungnak

20 Zanlei ah cun hleihnih hna he rawl einak ah khan an ṭhu. 21 Cun an ei lio ah khan anih nih, “Biatak kan chimh hna, pakhat nih nan ka rawi lai,” tiah a ti hna. 22 Annih cu an ngaih a chia tuk i amah kha a changchang in, “Keimah cu ka si hrim lo tih, Bawipa?” tiah an ti. 23 Amah nih, “Keimah he ka kheng ah a hnim ve mi nih a ka rawi lai. 24 Mi Fapa cu, Cathiang nih a si lai a ti ning in, a nunnak cu a liam ko lai, sihmanhsehlaw Mi Fapa a rawitu ca ah cun ngaihchia a va si dah! Cu pa cu chuak lo in rak um seh law a ca ah a ṭha deuh hnga!” tiah a ti. 25 Amah a leitu ding Judas nih khan, “Rabbi, keimah ka si hrim lo, tih?” tiah a ti. Jesuh nih, “Cuti a chimtu nangmah cu  na si,” ti in a leh.

Bawipa zanriah

26 Cuti an ei lio ah cun, Jesuh nih changreu kha a lak i lawmhnak bia a chim hnu ah a cheu i a zultu kha a pek hna. Cun,“Hihi i lak ulaw ei u, hihi cu ka pum a si,” tiah a ti. 27 Cun hrai kha a lak i lawmhnak bia a chim hnu ah  a chanh hna i hiti hin a chim, “Nan dihlak in hihi ding u, 28 zei cah tiah hihi cu mi tampi sual ngaihthiamnak ca thlet hnga mi biakamnak thi, keimah ka thi, a si. 29 Kan chimh hna, a tu thawk in Ka Pa Pennak chung ah nanmah he mitsur thar ka din hlan tiang, mitsur hang ka ding ṭhan ti lai lo,” tiah a ti hna.

Peter nih a hlawt lainak chim chungnak

30 Cun saam hla an sak hnu ah Oliv tlanglei ah an i thawh. 31 Cun Jesuh nih annih kha, “Tuzan ah nan ka zaamtak dih lai, zei cah tiah Cathiang nih, ‘Tuukhal kha ka tuk lai i tuurun chung i tuu hna cu an i ṭhenṭhek dih lai,’tiah a ti, 32 sihmanhsehlaw ka thawhṭhan hnu ah nan hmai in Galilee ah ka kal lai,” tiah a ti hna. 33  Cu tikah Peter nih, “Midang nih an in zaamtak dih hmanh ah kei cu kan zaamtak bal lai lo,” tiah a ti. 34 J esuh nih, “Biatak kan chimh: Tuzan hrimhrim, ar a khuan hlan ah, voithum tiang na ka hlawt diam lai,” tiah a leh. 35 Peter nih, “Nangmah he thih ve a herh hmanh ah kan hlaw bal lai lo,” ti in a leh. Zultu hna nih an dihlak in cuti cun  an chim cio.

Gethsemane

36 Cun Jesuh cu a zultu hna he Gethsemane dum an ti mi hmun ah khan a rak ra; cun a zultu hna kha, “Thlacam awk i khika ka va kal kar ah hika ah hin rak um u,” tiah a ti hna. 37 Peter le Zebedi fapa pahnih hna kha aa kalpi hna. Cun ngaihchia le lungkuai in a um.

       38 Cun annih kha,“Ka ngaih a chiat tuk ah ka thi cang lai.  Hika ah hin ka hngak ulaw keimah he hngilh lo in um u,” tiah a ti hna. 39 Cun tlawmpal a va kal deuh hnu ah vawlei ah a bawk i, “Ka Pa, a si khawh ahcun, hi hrai nih hin ka lanhtak ko seh. Nain keimah duh bang si lo in nangmah duh bang si ko seh,” tiah thla a cam. 40 A zultu hna sin ah a rak kir i an rak i hngilh ko kha a hmuh hna; cun Peter kha, “Keimah he suimilam pakhat hmanh hngilh lo in um awk ah thazaang na ngei lo tih? 41 I hlau, hneksaknak na in nakhnga lo thla cam tuah. Lungthin nih cun a duh ko, nain minung thisa cu a der,” tiah a ti. 42 Cun a voihnihnak ah a va kal ṭhan i, “Ka Pa, hi hrai nih a ka lanhtak khawh lo i ka din ding a si ahcun, na duh bang si ko seh,” ti in thla a cam ṭhan. 43 Cun a rak kir i an i hngilh ko kha a hmuh hna; an mittlang a rit tuk. 44 Annih kha cuka ah cun a kaltak hna hnu ah a va kal ṭhan i a voithumnak thla a va cam ṭhan, a biakel kha a nolh ṭhan. 45 Cun a zultu hna sin ah a rak kir i annih kha, “Atu cu i hngilh ulaw nan i din kho.  Zoh hmanh uh, Mi Fapa hi misual hna kut ah an chanh  caan a phan cang. 46 Tho u! Kal usih! Zoh hmanh, a ka rawitu nih an kan naih cang,” tiah a ti hna.

An tlaihnak

      47 Cun bia a chim lio ah khan ruah lopi in hleihnih lak i pakhat, Judas, cu a rak chuak, cun amah he tlangbawi luban pawl le mipi upa hna nih an thlah mi ralkap tam nawn cu nam le thingtan he an rak chuak ve. 48 A rawitu nih khan annih kha hmelchunhnak a rak pek hna i a ti mi hna cu, ‘Amah cu ka hnamh mipa kha a si lai. Tlai u,’ a rak ti hna. 49 Cucaah Jesuh sin ah a va kal colh i amah kha, “Rabbi, na dam maw?” a ti i a hnamh. 50 Jesuh nih, “Ka kawi, na rat hnawhchan cu tuah ko,” tiah a ti. Cun an rak chuak, Jesuh cu an tlaih i an khih. 51 Cun ruah lopi in, Jesuh hnuzul hna lak i pakhat nih a vainam kha aa zuh i Tlangbawi Ngan sal i hnakhaw cu a pheh. 52 Cu tik ah Jesuh nih, “Na vainam cu khumh ṭhan, zei cah tiah hriamnam aa lak mi cu hriamnam in a thi lai. 53 Asiloah, ka Pa sin ah bawmhnak a hal kho lo mi ah maw na ka ruah? Cuti ka tuah ahcun, khulrang in a ka dirkamhtu ding vanmi (legion) ralkapbu hleihnih ring lo a run thlah hna lai. 54 Cuti asi ahcun, zei tin dah hitin a si lai tiah Cathiang nih a ti mi cu a tlin khawh hnga?” tiah a ti. 55 Hi caan lio ah hin Jesuh nih mibupi cu, “Keimah tlaih awk ah nam le thingtan he nan rak chuah cu keimah cu damiah maw ka si? Nifate Biakinn ah ka ṭhu i kan cawnpiak hna i nan ka tlai bal lo. 56 Atu hi thil vialte a can cu chim chungnak bia vialte an tlin nakhnga caah a si,” tiah a ti hna. Cun a zultu vialte nih an kaltak i an zaam dih.

Khawngsil hmai i Jesuh

      57 Jesuh a rak tlaitu hna nih khan amah cu Tlangbawi Ngan Kaiafas inn ah an kalpi, cuka ah cun phungbia cawnpiaktu hna le upa hna cu tonhpumhnak an rak ngei. 58 Peter cu lamhlat nawn khin Tlangbawi Ngan innpi tiang cu a zulh, a donghnak ah zei a cang te lai ti hngalh duh ah a va lut i ralveng hna lak ah khan a va ṭhu ve.

59 Tlangbawi luban pawl hna le khawngsil chungtel hna nih cun an thah khawh naklai a sualnak, a hmaan lo mi tehte tiang an kawl hna. 60 Sihmanhsehlaw pakhat hmanh an hmu kho lo, tehte deu cu tampi an um ko. A donghnak ah mi pahnih an hung chuak, 61 cun annih nih, “Hi pa nih hin, ‘Pathian Biakinn hrawh khawhnak nawl ka ngei i nithum chung ah ka sak ṭhan lai,’ a ti,” tiah an ti. 62 Cu tikah tlangbawi Ngan cu a hung dir i amah cu, “Cu kong ah leh awk na ngei lo maw? Hi mi hna nih an chuahpi mi tehte hna hi zei dah an si?” tiah a ti. 63 Sihmanhsehlaw Jesuh cu zei hmanh a chim lo. Cun Tlangbawi Ngan nih amah cu, “Pathian Fapa, Khrih, na si maw si lo na kan chimh nakhnga a nung mi Pathian min chalh in nawl kan pek:,” tiah a ti. 64 Jesuh nih anih kha, “Cuti a chim mi cu nangmah na si. Sihmanhsehlaw kan chimh hna, atu thawk in Mi Fapa hi Lianngan bik orhlei i a ṭhut le vancung khuadawm cung in a rat kha nan hmuh te lai,” tiah a leh. 65 Cu tikah Tlangbawi Ngan cu a hnipuan a thleh i, “Pathian a thangchiat cang; zei tehte dah kan herh ti? Pathian a thangchiat cu atu bak ah khan nan theih cang. 66  Zei tin dah nan ruah?” tiah a ti hna. Annih nih, “A thih a herh,” ti in an leh. 67 Cu tik ah a hmai ah an cil an chak i an thongh;  a dang nih cun an tuk pah in, 68  “Aho nih dah an bengh,  kan chim tuah, Khrih?” tiah an ti.

Peter nih a hlawtnak

       69 Cu lio ah Peter cu tual leng ah khan a ṭhu ko, cun salnu pakhat cu a sin ah a ra i amah kha, “Nangmah zong hi Galilee mi Jesuh he na rak um ko,” tiah a ti. 70 Sihmanhsehlaw an dih lak hmaika ah aa pheh i, “Zei kong dah na chim ti ka hngal lo,” tiah a leh. 71 Kutka leng  a va chuah tikah  a dang sal nute pakhat nih a rak hmuh i cuka i a um mi hna kha, “Hi pa hi Nazarethmi Jesuh he a rak um ve,” tiah a ti. 72 Cun, chiat i serh in aa pheh i, “Cu pa cu ka hngal lo” tiah a ti. 73 Cu hnu tlawmpal ah cuka i a dir mi hna cu an rak chuak i Peter cu, “Nang cu anmah lak i pakhat na si hrimhrim ko. Zei cah tiah na awcawi nih a langhter ko,” tiah an ti. 74 Cu tikah chiatserh biakam in, “Cu pa cu ka hngal lo,” tiah a ti. Cun ar a khuang colh, 75 Peter cu Jesuh nih, “Ar a khuan hlan ah voithum na ka hlawt diam lai,” a rak ti mi kha a hun i theih. Cun leng ah a chuak i ngaihchia ngai in a ṭap.

27.Jesuh cu Pilat hmai ah an chuahpi

1.Khua a hung dei, tlangbawi luban pawl le mipi upa pawl vialte cu Jesuh thah nakding khua khaan in khawngsil ah tonnak an ngei. 2 Cikcin in an khih i Mangki bawi Pilat sin chanh awk ah an kalpi.

Judas thihnak

     3 Jesuh cu sual  an phawt cang ti kha a rawitu Judas nih a hngalh tikah, aa ngaihchih tuk, cucaah ngun tangka sawmthum cu tlangbawi luban pawl le Judah upa hna sin ah a kirpi ṭhan i annih kha, 4 “Miding kha ka rawi cang. Ka sual cang,” tiah a pek ṭhan hna. Annih nih, “Cucu kanmah he zei pehtlaihnak dah a ngeih? Nangmah tuah mi a si,” ti in an leh. 5 Ngun tangka cu hmunthiang ah khan a hlonhtak i a chuak, cun a kal i a vaa awk. 6 Tlangbawi luban pawl nih ngun tangka cu an char i, “Hihi cu thisen tangka a si. Biakinn chawkuang i chiah ve cu Phungbia he aa ralchanh,” tiah an ti. 7 Ceihkhannak an ngeih hnu ah mah tangka cun ramdang mi hna thlanhmun ca ah Um Sertu Lo kha an cawk,  8 cucaah cu lo cu Thisen Lo tiah auh a si lan. 9 Profet Jeremiah nih a rak chim mi bia cu a hung tling. A chim mi cu: “Cun, Israel fale nih mi sunglawi Pa man an khiah mi  tangka, ngun tangka sawmthum cu an lak, 10 cun, Bawipa nih a ka fial bang in um sertu lo cawknak ah an hman,” ti a si.

Pilat hmai ah Jesuh

      11 Cu hnu ah Jesuh cu mangki bawi hmai ah an chuahpi, mangki bawi nih amah cu, “Jew hna siangpahrang cu na si maw?” tiah a hal. Jesuh nih, “Cu bia a chim mi cu nangmah na si,” tiah a leh. 12 Sihmanhsehlaw Tlangbawi luban hna le mipi upa hna nih sual an puh tikah a let duh hrimhrim hna lo. 13 Cu tikah Pilat nih amah cu, “Zei tluk tam in dah sual an in puh ti hi na thei lo maw?” tiah a ti. 14 Sihmanhsehlaw sual an puh mi kha kaa khat hmanh a leh hna lo tikah Mangki bawi cu a khuaruah a har ngai.

      15 Puaicaan ah hin Mangki bawi nih mipi kha thongtla pakhatkhat, an thim mi poh a chuahpiak tawn hna. 16 Chiatnaklei ah a min a thang mi thongtla pakhat, a min ah Barabbas an ti mi a um. 17 Cucaah mibupi cu an rak i pum tikah Pilat nih annih cu, “Aho deuh dah kan thlahpiak hna lai Barabbas maw Khrih ti mi Jesuh dah?” tiah a ti hna. 18 Zei cah tiah Pilat nih cun a kut ah an rak chanh cu an nahchuah ruang ah a si ti kha a hngalh ko.

        19 Atu biaceihnak cabuai cung a ṭhut lio ah khan a nupi nih bia a hun cah i a ti mi cu, “Kha midingpa kong he khan zei hmanh i thlak hlah; zei cah tiah khapa kong ka manh mi ka mang nih nihin cu um thiam lo in a ka tuah cang,” tiah a ti.

      20 Nain tlangbawi luban pawl le upa hna nih khan mibupi cu Barabbas cu chuah in Jesuh kha thihdan pek ding i halchih awk ah an rak lemsawi cang hna. 21 Cucaah mangki bawi nih, “Pahnih lak ah hin aho dah in thlahpiak hna ning law nan duh?” ti in a hal hna tikah annih nih, “Barabbas” tiah an ti. 22 Pilat nih, “Cuti a si ahcun Khrih ti mi Jesuh hi zei tin dah ka tuah kun lai?” tiah a ti hna. An dihlak in,“Vailam ah khenhchih siseh,” tiah an ti. 23 “Asi ahcun zei sualnak dah a tuah?” tiah a hal hna. Annih nih thang deuh in an au i, “Vailam ah khenhchih si ko seh,” tiah an ti. 24 Cu tikah Pilat nih zei hmanh a tuah kho ti lo, cu hlei ah buaibainak a chuak deng cang ti kha a hmuh. Cucaah ti tlawmpal kha a lak, mibupi hmaika ah cun a kut aa ṭawl i annih kha, “Hi pa thi in ka thiang. Hihi cu nanmah tuah mi a si,” tiah a ti. 25 Mipi, mikip nih , “A thi cu kanmah le kan fale hna cung ah tlung ko seh,”ti in an leh. 26 Cu tikah Barabbas cu a thlahpiak hna. Jesuh cu fung in a tukter hna hnu ah vailam ah khenhchih ding in a chanh hna.

Jesuh cu hling luchin an chinh

        27 Cu tikah Mangki bawi a ralkap hna nih Jesuh cu innpi tual ah an kalpi i an dihlak in an kulh. 28 Cun a hnipuan kha an phoih i puansen kha an aihter.  29 Cun hling cheukhat kha luchin ah an ser i a lu ah an chinh i a orhlei kut ah phaikung an putter. Cun serhsat duh ah a hmai ah an kun i amah cu, “Jew hna Siangpahrang cu a nunkhua sau ko seh,” tiah an ti. 30 Cun cil chak in phaikung cu an i lak i a lu ah an tuk. 31 Cun capo ah an saih hnu ah a puan kha an phoih i amah hnipuan kha an aihter ṭhan i vailamtahnaklei ah an kalpi.

Vailamtahnak

32 Cun an chuahpah ah khan, Sairin khua in a ra mi mipa pakhat, Simon an ti mi kha, an ton i vailam tung kha hramhram in an putter. 33 Golgotha, luruh hmun an ti mi hmun kha an phanh tikah,  34 hnitkha he cawh mi mitsurzu kha an pek; a teh nain a ding duh lo. 35 Vailam an tah dih tikah a hnipuan cu camcawhfung an zuh in an i ṭhen, 36 cun khika ah khan an ṭhu i an cawngh.

      37 A lu cung ah cun sual an puhnak bia an tar; aa ṭial mi cu: “Hihi cu Jew hna Siangpahrang, Jesuh, a si,” ti a si. 38 Cun amah he mifir pahnih hna kha an tarchih hna, pakhat a orhlei kam ah pakhat a kehlei kam ah.

Vailamtah mi Jesuh cu an serhsat

      39 A palpah mi nih an nihsawh;  an lu an thin hnawh 40 cun annih nih, Biakinn cu na ṭheh lai i nithum ah na sak ṭhan lai tih! Pathian Fapa na si ahcun nangmah le nangmah i khamh law vailam in rung ṭum ngat!” tiah an ti. 41 Tlangbawi luban hna cu phungbia cawnpiaktu hna le upa hna nih cu bantuk cun an nihsawh ve. 42 Annih nih, “Midang cu a khamh hna; amah le amah cu aa khamh kho lo. Amah cu Israel Siangpahrang a si; vailam in atu rak ṭum seh, cun kan zumh lai. 43 Pathian aa bochan; atu a duh ahcun Pathian nih khamh ko seh. Zei cah tiah amah nih, “Kei cu Pathian fapa ka si,’ a ti,” tiah an ti. 44 Cun amah he an tah ve mi mifir hna hmanh nih cu bantuk cun an ti ve.

Jesuh thihnak

       45 Suimilam paruk in pakua tiang chunmui a tlung. 46 Cun suimilam pakua hrawng ah khin, Jesuh cu thang pi in, “Eli, Eli, lama sabachthani,” cucu, “Ka Pathian, ka Pathian, zei cah dah na ka hlawt cang,” tiah fak pi in a au. 47 Cuka i a dir mi cheukhat nih an theih tikah, “Mipa nih Elijah a auh,” tiah an ti. 48 An lak i pakhat cu khulrang in a va tli i puanchia kha a va lak, mitsurthor ah a hnim, cun phaikung par ah ah a tenh i a pek. 49 Sihmanhsehlaw a dang nih khan amah cu, “Hngak rih! Elijah cu amah khamh awk ah a ra hnga maw zoh ta usih,” tiah an ti. 50 Sihmansehlaw Jesuh cu fak pi in a au ṭhan hnu ah  a thlarau cu a thlah.

     51 Cun hmakhatte ah Hmunthiang puanzar cu a lu in a taw tiang cheuhnih ah aa cheu, lii aa hnin, lung an kak, 52 thlaan kha an i hung i mithiang hna tampi cu thihnak in an tho ṭhan. 53 Cun hi hna cu, an thawh ṭhan hnu ah, thlaan khan an chuak, a thiang khualipi ah an lut i mi tampi hna sin ah an lang. 54 Za-uk bawi le a dang Jesuh a cawngtu hna nih lii aa hninh le thil dang a cang mi vialte kha an hmuh, cun an lau ngaingai i anih nih, “Biatak tein hipa hi Pathian Fapa a si hrimhrim ko,” tiah a ti.

      55 Cun cuka ah cun nu tampi an um i a lang in an cuanh, annih cu Jesuh a rak zul i a rak zohkhenh tawntu nu an si. 56 Anmah lak ah khan Magdalami Mary, Jeim le Josef hna nu Mary, cun Zebedi fapale hna i an nu kha an i tel.

An vuinak

     57 Zanlei a hung si tikah, Josef an ti mi,  amah hrimhrim Jesuh zultu a rak si mi Arimathaea khuami mirumpa pa a rak phan. 58 Hi pa nih Pilat sin ah a kal i Jesuh ruak cu a va hal. Pilat nih a kut ah chanh ding in nawl a chuah. 59 Cucaah Josef nih ruak cu a lak, khiangrang puanthiang in a tuam, 60 cun amah nih a rak cawh mi a lungkua thlaan thar ah a vui. Cu hnu ah lung nganpi cu a hrilh i a kaa cu a khar i a chuak. Atu Mary Magdalin le a dang Mary cu cuka ah an um ko, thlaanlei hoih in an ṭhu.

Thlaan cawngtu

      62 A thaizing Timhlamhnak Ni a dih tikah, tlangbawi luban hna le Farasi hna cu hmunkhat tein Pilat sin ah an va kal i 63 amah kha, “Bawipa, hi mi  hlenthiampa nih hin a nun lio ah, ‘Nithum hnu ah ka tho ṭhan lai,’ a rak ti kha kan theih. 64 Cucaah thlaan cu nithum tiang him tein cawngh ding in nawl pe hna, cuti a si lo ahcun, a zultu hna cu an ra lai i an fir lai i mi kha, “Thihnak in a tho cang,” tiah an chimh hna lai. Hi hmanung bik lih ṭawnnak hi a hlan i a si mi thil nakin a zual deuh lai,” tiah an va ti. 65 Pilat nih, “Ralvengtu nan chiah khawh ko, va kal ulaw a him khawh chung him in va tuah ko ngat u,” tiah a ti hna. 66 Cucaah an kal i thlaan cu him tein an cawnghter hna; lung kha ṭacik an khenh i ralvengtu tampi an chiah hna.

28 .A lawng mi thlan, Vanmi bia

          1.Sabbath a dih, cun cawnnikhat ni khuadeilei ah khin, Magdalami Mary le a dang  Mary cu thlaan ah an va kal. 2 Cun ruah lo pi in li fakpi in aa hnin, zei cah tiah, van in a rung ṭum mi, Bawipa vancungmi nih khan lung kha a thawn i a cung ah cun a ṭhu. 3 A hmai cu mimtlau a si ko, a hnipuan cu hawhra bang a rang. 4 Ralveng hna cu an thin a phan tuk ah a therh hna i mithi bantuk in an um. 5 Sihmanhsehlaw vancungmi nih bia a chim i nu pawl kha,“Ṭih ding zei hmanh a um lo. Vailam an tah mi Jesuh nan kawl ti cu ka hngalh. 6 Amah cu hika ah a um ti lo, ka tho ṭhan lai ti a chim bantuk khan a tho cang. Ra ulaw a ihnak hi rak zoh hmanh u, 7 cucaah khulrang in va kal ulaw a zultu hna kha, “Amah cu thihnak in a tho cang i atu nan hmai in Galilee ah a kal lai; khika ah amah cu nan va hmuh lai. Zoh hmanh u! ka rak in chimh cang hna kha,” tiah a ti hna. 8 Khuaruahharnak le lawmhnak nganpi he khat in nu hna cu khulrang ngai in thlaan khan an kir i a zultu pawl va chimh hna awk ah an tli.

Nu hna sin a langhnak

       9 Cun ruah lopi in anmah ton awk ah a rak lang mi cu Jesuh a si. Amah nih, “Nan dam maw?” tiah a ti hna. Cun nu pawl nih an hun zuanhnawh, a ke i awk in an biak. 10 Cun Jesuh nih, “Ṭih hlah u; va kal ulaw ka unau pawl cu Galilee ah an kal naklai va chim hna uh; khika ah an ka hmuh lai,” tiah a ti hna.

Mipi hruaitu hna ralrin an i laknak

      11 Cuti an kir lio ah cun ralveng cheukhat cu khualipi khan an chuak i tlangbawi luban hna cu thil a cang mi vialte kha an va chimh hna. 12 Hi hna cu upa pawl hna he tonnak an ngei i sau nawn an ceih hnu ah annih kha: 13 “Nan chim ding mi cu, ‘A zultu hna nih zan ah an ra i kan i hngilh kar ah an fir i an kalpi,’ ti a si lai. 14 Cun hi kong hi mangki bawi nih a theih sual ahcun harnak nan ton sual nakhnga lo kanmah nih a ṭhat khawhnak chung in kan ṭuan lai,” tiah an ti hna. 15 Cucaah tangka cu an lak i an chimh hna ning in an tuah, cun nihin ni tiang ah hi ning tein tuanbia cu Jew hna lak ah a leng.

Galilee ah a langhnak:  Mission thlahnak

        16 Cu lio ah zultu pahleikhat hna cu, Jesuh nih amah he ton awk ah a rak timh mi tlang, Galilee ram, ah cun an i thawh. 17 An hmuh tik ah a hmai ah an bawk, a cheu tu cu an lung a awṭom rih. 18 Jesuh nih a hun naih hna i a chawnh hna. Cun anih nih, “Vancung le vawlei cung i nawlngeihnak vialte cu pek ka si cang. 19 Cucaah va kal ulaw miphun vialte kha ka zultu va siter hna u; Pa le Fapa le Thiang Thlarau min in Baptisma va pe hna u, 20 kan pek mi hna nawlbia vialte zulh ding in va cawnpiak hna u. Cun zoh hmanh u, nanmah he a zungzal, a si, caan dongh tiang ka um lai,” tiah a ti hna.