LUKA 

LUKE THAWNGṬHA

                                           Biahmaiṭhi

1

1.Kan lak ah a rak tling mi thil si ning kong hna cu midang tampi nih khawmh an timh kha ka hmuh tikah, 2 hi hna cu a thawkka in mithmuh tette hna le a rianthiang ṭuantu hna nih an kan chanhchin mi an si. 3 Cucaah, Theofilas, kei zong nih a hramthawk in hi tuanbia cu a ningpi in ṭha tein ka zohfel dih hnu ah nangmah ca ah ningcang tein tial awk ah kaa tim; 4 cucu upattlak nangmah nih, na rak cohlan mi cawnpiaknak cu zei tluk in dah a hmaan ti kha na theihfian khawh nakhnga caah a si.

I: BAPTISMA PETU JOHAN LE JESUH  CHUAHNAK LE AN THLITHUP NUNNAK

Baptisma petu Johan chuahnak chimchung bia

5 Judea siangpahrang Herod chan ah khan Abijah tlangbawi phu chung a si i a min ah Zekhariah an ti mi tlangbawi pakhat a rak um, cun a min ah Elizabeth an ti mi nupi a ngei i amah cu Aaron tefa a si. 6 An pahnih in Pathian hmai ah a ding mi an si i Bawipa nawlbia le phunglam hna kha soi awk um lo in a zul mi an si. 7 Sihmanhsehlaw fa an ngei lo. Elizabeth cu a cing i an pahnih in an kum a cang cang. 

           8 Atu thil a cang mi cu a phu hna rianhcaan a si, cun tlangbawi rian Pathian hmai i a ṭuan lio ah khan, 9 tlangbawi hna phung a si bang in, Bawipa hmunthiang ah lut in rimhmui khangh awk ah camcawh fung cu a cung ah a tla.  10 Rimhmui khangh caan ah cun mi vialte cu leng ah an um i thla an cam. 11 Cun Bawipa vancungmi cu rimhmui biakṭheng orhlei kam ah a dir i a sin ah a rung lang. 12 A hmuh tikah Zekhariah cu a lung aa tuai i a ṭih tuk. 13 Asinain vancungmi nih, “Zekhariah, ṭih hlah! Zei cah tiah na thlacamnak cu theih a si cang. Na nupi Elizabeth nih fapa an hrinpiak lai i a min ah Johan tiah  na sak lai. 14 A chuah tik  ah amah cu na lunglawmhnak a si lai i mi tampi zong an i lawm ve lai, zei cah tiah amah cu Bawipa hmai ah a lianngan lai; 15 mitsur zu le a ṭhawng mi zu a ding lai lo, a nu paw chung hmanh in Thiang Thlarau in a khat lai, 16  cun Israelmi tampi kha Bawipa an Pathian sin ah a kirpi ṭhan hna lai. 17 An pale hna kha an fale hna he nawl a ngai lo mi hna kha, miding lungfim hna he remnak ser awk ah Elijah thlarau le ṭhawnnak he Bawipa hmai ah a kal lai i Bawipa kha amah he aa tlak mi miphun a timhpiak lai,” tiah a ti. 18 Zekhariah nih vancungmi cu, “Hihi zei tin dah ka hngalh khawh lai, kei cu ka tar cang i ka nupi cu a kum a cang cang,” tiah a ti. 19 Vancungmi nih, “Kei cu Pathian hmaika i a dir mi Gabriel ka si, cun nangmah kha chawnhbiak i hi thawngṭha thanh awk ah hin thlah mi ka si. 20 Zoh hmanh! A caan a phan tikah a tling ding mi ka bia na zum lo caah hi thil a can hlan cu biachim kho lo in na um lai,” tiah a leh. 21 Cu lio ah mipi cu Zekhariah kha an hngah len ko i hmunthiang ah cu tluk sau a rauh caah an khuaruah a har dih. 22 A hung chuah tikah a chawn kho ti hna lo, cu tikah hmunthiang ah langhnak a hmuh cang ti an hngalh. Sihmanhsehlaw a kut lawng in bia a chim i a holh kho ti lo.

23 A rian a ṭuan caan a dih tikah inn ah a ṭin. 24 Caan tlawmpal hnu ah khin a nupi Elizabeth cu nau a pawi i thlanga chung cu a lungchung lawng ah a chiah i 25 amah nih, “Bawipa nih hihi cu ka ca ah a tuah cang, atu cu mi hmai ah ka ton mi nautatnak lakpiak awk ah a lung a tling cang,” tiah a ti.

Thawngthanhnak

        26 Thlaruknak ah khan, Pathian nih vancungmi Gabriel cu, Galilee peng Nazareth an ti mi khua i 27 David chung, Josef an ti mipa he aa ham mi, ngaknu thiang sin ah a rak thlah; ngaknu thiang i a min cu Mary a si. 28 Inn chung ah a lut i amah kha, “Pathian mithmai ṭha a hmu mi nu, i lawm tuah! Bawipa cu nangmah he a um,” tiah a ti. 29 Hi bia hna nih a lung a tuaitam ngai i amah le amah kha hi biakchawnhnak hi zei sullam dah a ngeih hnga?’ tiah aa ti,  30 sihmanhsehlaw vancungmi nih, “Mary, ṭih hlah; Pathian hmai ah mithmai ṭha na hmuh cang. 31 Zoh hmanh, fa na pawi lai i fapa na hrin lai, cun a min cu Jesuh na sak lai. 32 Amah cu a lianngan lai i Cungnung bik Fapa tiah auh a si lai. Bawipa Pathian nih a pu David ṭhutdan kha a pek lai; 33 Jakob Chung kha zungzal in a uk hna lai i a pennak cu dongh ni a ngei lai lo,” tiah a ti. 34 Mary nih vancungmi cu, “Sihmanhsehlaw hi thil cu zei tin dah a can khawh lai, zei tin tiah pa ka hngalh rih ṭung lo,” tiah a ti. 35 Vancungmi nih, “Thiang Thlarau cu na cung ah a rung ṭum lai, cun Cungnung bik Bawipa i ṭhawnnak nih a thladem in an khuh lai. Cucaah ngakchiapa cu a thianghlim lai i Pathian Fapa tiah auh a si lai. 36 Cun hi zong hi kan chimh rih:  na rualchan Elizabeth zong a tarlei ah fapate a pawi, cun mi nih a cing an ti mi nu cu atu ah thlaruknak a si, 37 zei cah tiah Pathian ca ah a si kho lo mi thil zei hmanh a um lo,” tiah a leh. 38 Mary nih, “Kei cu Bawipa salnu ka si, na chim bang in ka cung ah tlung ko seh,” tiah a ti. Cun vancungmi nih a kaltak.

Lennak

      39 Cu caan ah cun  Mary cu aa thawh i khulrang in Judah tlangram i khuapi pakhat ah a kal, 40 Zekhariah inn ah a lut i Elizabeth cu a vun biakchawnh. 41 Atu thil a cang mi cu Elizabeth nih Mary chawnhbiaknak a theih cangka in a paw chung i nau cu aa hlawk len i Elizabeth cu Thiang Thlarau in a khat. 42 Aw thang ngai in a au i, “Nang cu nu vialte lak ah thluachuak bik nu na si, na chung i fa zong hi mithluachuak a si. 43 Zei cah tiah ka Bawipa i a nu nih a ka lennak in upat ka tong? 44 Zoh hmanh, na biakchawnhnak ka hnar chung a luh cangka in pei  ka chung i naute cu lawmhnak in aa hlawhlen cu. 45 A si, Bawipa nih a kamh mi bia cu a tling lai ti a zum mi nu cu thluachuak mi a si,” tiah a ti.

Thanhnak (thangṭhatnak)

46 Cun Mary nih:

Ka nunnak nih Bawipa lianhngannak cu a thanh i ka thlarau cu a ka khamhtu Pathian cung ah aa lawm;

47Zei cah tiah a sal nu i hmaichiat ningzahnak cu a rak zoh cang.

48 A si, atu thawk in, mi vialte nih thluachuak nu an ka ti lai.

49 Zei cah tiah Liannganbik nih ka ca ah thil lianngan a tuah cang.

A min cu a thiang.

50 Cun amah a ṭih mi hna ca ah a fek mi a dawtnak cu chankhat hnu chankhat a hmun.51 A baan huham kha a hman cang, miruamkai hna cu a ṭhek dih cang hna.52 Bawi cu an bawi ṭhutdan in a ṭhumh hna i minauta cu a cawisan hna.53 A ṭamhal mi kha thil ṭhaṭha in a khimter hna, mirum hna cu kut lawng in a kalter hna.54 A fek mi a dawtnak kha philh lo in a sal Israel bawmhchanh awk ah a ra cang.55 Cucu kan pupa Abraham le a tefa hna sin ah a rak kamh mi a zaangfahnak ning tein a si,” tiah a ti. 56 Mary cu amah he thlathum hrawng a um i inn ah a kir ṭhan.

Baptisma petu Johan chuahnak le a innpa hna lennak

57 Elizabeth cu a hrin caan a phan i fapa a hrin; 58 Cun Bawipa nih Elizabeth cu a fek mi a dawtnak kha tampi in a toih cang ti cu a innpa le a rualchan hna nih an hngalh tikah aa lawmhnak an i hrawm ve.

Baptisma petu Johan cuarpartannak

59  Niriatnak ah ngakchia cuarpar tan awk ah an rak chuahpi; annih nih a pa min Zekhariah in auh an timh, 60 sihmanhsehlaw a nu nih, “A si lo, amah cu Johan ti auh ding a si,” tiah a ti. 61 Annih nih, “Sihmanhsehlaw nan chungkhar ah cu bantuk min a keng mi an um ṭung lo,” tiah an ti.  62 Cucaah ngakchiapa min cu zei dah sak a duh ti in a pa cu kut cangh in an hal.  63 A pa nih lung-tlap a hal hna i amah nih, “A min cu Johan a si,” tiah a ṭial. An khuaruah a har dih. 64 Cu cangka cun Zekhariah cu a holh kho ṭhan i bia a chim i Pathian cu a thangṭhat. 65 An innpa vialte cu an ar dih i cu kong cu Judea tlangram vialte a cul dih. 66 A thei mi vialte nih sunglawi ngai in an lung chung ah an riahter hna. “Hi ngakchiapa hi zei bantuk dah a si te hnga?” ti khuaruahhar in an um. Cun Bawipa kut cu amah he a um taktak.

Benedictus (thangṭhatnak)

67A pa Zekhariah cu Thiang Thlarau in a khat i hi profet bia hi a chim:

68 Israel Pathian, Bawipa cu thangṭhat si ko seh,

Zei cah tiah a mi kha a rak len hna i a luatter cang hna,

69 cun kan ca ah a sal David Chung ah khamhnak huham kha a ser cang,

70 cucu hlan profet hna hmurka in:

71 kan ral hna le a kan huatu vialte hna kut in a kan khamh lai,

72 cun kan pupa hna sin ah a rak ngeih mi a fek mi a dawtnak kha a langhternak thawng in a thiang mi a thisen biakamnak cu a philh lai lo ti a rak thanh cang bantuk in a si.

73 Hihi kan pa Abraham sin ah chiatserh in bia a rak kamh mi a si,

74 cucu kannih kha ṭihphannak in luat in kan ral hna kut in a kan tlanhnak thawng in amah kha

75 kan chan chung, a hmaika ah thiannak le dinfelnak he kan rianh nakhnga caah a si.

76 Cun nang, naute, nangmah cu Cungnung bik Bawipa i Profet ti na si lai, zei cah tiah a lam sialpiak awk ah Bawipa hmai ah na kal lai, 

77 a mi kha an sual ngaihthiam an sinak thawng in khamh-fimnak kha a pek hna lai tiah hngalhnak pek awk ah a si, 78 kan Pathian i a fek mi dawtnak thawng in, kanmah len awk ah zing niceu cu cunglei in kan cung ah a tlaang cang, 79 cucu khuamui chung le thihnak thladem tang i a um mi hna kha ceunak pek awk ah le kan ke cu daihnak lamlei i hruai awk ah a si.

Baptisma petu i a thlithup nunnak

80 Cun ngakchia cu a ṭhang i a thinlung zong a hung ṭhawng.  Cun Israelmi hna sin ah langhngan in a langh hlan lo cu thetse ram ah khan khua a sa.

               2.Jesuh chuahnak le tuukhal hna lennak

              1. Cu caan ah Sisar Augustus nih vawlei cung pumpaluk ah milu relnak tuah ding in nawl a chuah. 2 Hi milu relnak – hmasa bik- cu Quirinius cu Siria uktu a si lio i a cang mi a si 3 cun mikip cu an min i khumh awk ah an khua cio ah an fuh hna. 4 Cucaah Josef cu Galilee peng Nazareth khuapi in Judea peng i Bethlehem an ti mi David khuapi ah aa thawh ve, zei tin tiah amah cu David Chung le hrinsor a si   5 cucu, a ham mi, nau a pawi lio mi Mary he min vaa khumh awk ah a si.  6 Cu lio thil a cangmi cu, cuka an um lio ah khan, Mary cu nau a ngeih caan a cu, 7 cun fapa, a faterte cu a hrin. Puan in a zual i caw rawleinak kuang chung ah a thlim, zei cah tiah an ca ah umnak a um lo. 8 Pawngkam ram lak ah khan zan i an tuurun a cawng mi tuukhal hna an um. 9 Bawipa vancungmi cu an cung ah a dir i Bawipa sunparnak nih an velchum cu a ceuh. An thin a phang, 10 sihmanhsehlaw vancungmi nih, “Phang hlah u. Zoh hmanh u, lawmhnak nganpi, mi vialte nih i hrawm ding mi, lawmhnak thawngṭha kan phorh hna. 11 Nihin David khua ah khamhtu cu nan ca ah a chuak cang; amah cu Khrih Bawipa a si. 12 Cun hihi nan ca i hmelchunhnak a si, puan in an zual i caw rawleinak kuang ah an thlim mi bawhte cu nan va hmuh lai,” tiah a ti hna. 13 Cun hmatkhatte ah vancungmi he van ralkap bu nganpi cu an rung lang i Pathian kha hi bia in an thangṭhat:

14 ‘Cungchin Pathian sin ah sunparnak um ko seh, cun vawlei ah a dawt mi ca ah daihnak um seh!’ ti a si.

          15 Cun vancungmi hna cu annih sin in van i an kai tikah, tuukhal hna cu pakhat le pakhat kha, “Bethlehem ah va kal usi law Bawipa nih a kan hngalhter mi hi thil cu va zoh tuah usih,”tiah an i ti. 16 Cucaah khulrang in an kal i Mary le Josef, cun caw rawleinak kuang i an thlim mi Bawhte, cu an va hmuh. 17 Ngachia kha an hmuh tikah amah kong ah vancungmi nih an chimh mi hna kha an chimh hna, 18 cun a thei mi vialte cu tuukhal hna nih an chimh mi hna ah khan an khuaruah a har dih. 19 Mary nih cun, hi thil vialte hi a sunsak ngai hna i a lung ah a riahter hna.  20 Cun tuukhal hna cu, vancungmi nih an chimh hna bantuk te khan an va hmuh caah Pathian kha sunparnak le thangṭhatnak pek bu in an kir ṭhan.

Jesuh cuarpar tannak

21 Niriatnak ni a phak i naute cu a cuarpar tan a zat tikah, a min ah Jesuh an sak, cucu vancungmi nih a sem hlan i a rak pek mi min a si.

Jesuh cu biakinn ah an pekchanh

22 Moses Phungbia ning in i thianh caan a phak tikah, amah kha Bawipa sin pekchanh awk ah Jerusalem ah an kaipi – 23 cucu Bawipa Phungbia ah: fater kip cu Bawipa sin ah pekchanh a si lai, ti aa ṭial bang khan a si, cun Bawipa Phungbia ah 24 ṭhuro tuahkhat asiloah laileeng no pahnih in raithawinak pekchanh a si lai ti aa ṭial bang in thawinak pekchanh awk ah a si. 25 Cu lio ah cun Jerusalem ah Simeon an timi pa a um. Amah cu miding le Pathian a ṭihzah mi a si i Israel ram dirh ṭhannak a hngakhlang mi a si i Thiang Thlarau nih a umpi. 26  Thiang Thlarau nih a sin ah a phuan mi cu a mit in Khrih Bawipa a hmuh hlan cu a thi lai lo ti hi a si. 27 Simeon cu Thlarau hruainak in Biakinn ah a ra; cun Phungbia nih tuah ding a ti mi kha tuahpiak awk ah a nu le a pa nih naute cu an run luhpi tikah, 28 Simeon nih amah kha a pom i Pathian cu hiti hin a thangṭhat:

Atu na kalter khawh cang

29 ‘Atu ah Bawipa, na biakam bang in na salpa cu hnangam tein na ka kalter khawh cang; 30 zei cah tiah ka mit nih khamhnak cu a hmuh cang; cucu miphun hna hmaika ah timhcia in na chiah mi a si;31 cucu Jentalmi hna ca ah ceunak biathlam le 32 na mi Isreal ca ah sunparnak a si.

Simeon i profet bia

          33 Naute kong an chim mi thil ah a nu le a pa cu khuaruahhar in an um lio ah 34 Simeon nih annih kha thluachuah a pek hna i a nu Mary cu, “Zoh hmanh, amah cu Israel ah mi tampi an tluknak le an thawhnak ca khaukhih mi, i ralnak hmelchunnnak ca khaukhih mi a si- 35 cun na lung ah vainam sawh na tong te lai – cuti cun mi tampi i biathli cu phuan an si te lai,” tiah a ti.

Anna profet bia

           36 Cuka ah cun Asher miphun, Fanuel i fanu, Anna an ti mi profetnu pakhat zong a um ve. A tar ngai cang. A nungak caan a dih cang, nuhmei a si hlan ah kumsarih chung va a rak ngei ve. 37 Atu cu kum sawmriat le kumli a si cang, ulhnak le thlacamnak tuah in chunzan biakinn kaltak lo in Bawipa kha a rianh. 38 Cu caante ahcun a rak chuak i Pathian cu a thangṭhat, cun Jerusalem luatnak a hngakhlang mi vialte hna cu naute kong kha a chimh hna.

Nazareth i Jesuh a thlithup in  nun

   39 Bawipa Phungbia nih tuah ding a ti mi vialte an tuah dih tikah Galilee peng i an khua a si mi Nazareth ah an kir ṭhan. 40 Cun ngakchia cu a pum a ṭhan bang in, fimnak he a khat i Pathian mithmai ṭha a hmu.

Phungbia cawnpiaktu hna lak i Jesuh

         41Kum fatin a nu le a pa cu lanhtak puai ca ah Jerusalem ah an kai tawn. 42 Kumhleihnih a si ah khan voidang bang Jerusalem ah an kal ṭhan. 43 Puai ni hna a dih i inn i an kir ṭhan tikah ngakchiapa cu a nu le a pa hngalh lo in Jerusalem ah a taang. 44 A hawile he hmun khatkhat ah a um rua ti ruat in nikhat lam an kal hnu lawng ah an chungkhar le a hawikom hna sin ah an va kawl. 45 An hmuh lo tikah Jerusalem ah an kir i a kenkip ah an kawl.

46 Thil a si ning cu, nithum a rauh hnu ah Biakinn chung ah an va hmuh; cawnpiaktu hna lak ah ṭhu in an bia a ngaih i bia zong a rak hal len hna, 47 a bia a thei mi vialte nih a thluak a ṭhat ning le a lehnak hna ah an khuaruah a har dih. 48 An hmuh tikah an ar ko, cun a nu nih, “Ka fa, zei cah dah hiti hin na kan tuah? Na pa le keimah cu nangmah kawl ah zeitluk in dah kan lungre a theih ti hi zoh hmanh,” tiah a ti. 49 Anih nih, “Zei ruang ah dah nan ka kawl? Ka pa inn ah ka um lai ti cu nan hngal lo maw?” ti in a leh hna. 50 Sihmanhsehlaw zei dah a chim duh ti kha an fiang lo.

Nazareth ah a thlithup nunnak aa thawk ṭhan

51Cun an sin ah a va ṭum ve i Nazareth cu an phan i a nu le a pa nawlngeihnak tang ah khua a sa. A nu nih hi thil vialte cu a lung ah a khumh dih hna. 52 Cun Jesuh cu fimnak le pumsa, Pathian le minung dawtnak he a ṭhang.

II: MIPI LAK  A RIANṬUANNAK AA THAWK HLAN THIL A CANG MI HNA

       3.         Baptisma petu thawngthanhnak

         1Tiberius Sisar a bawi kumhleinganak ah, Pontius Pilat cu Judah mangki bawi, Herod cu Galilee uktu bawi, a nau Filip cu Iturea le Trakhonitis ram hna uktu bawi, cun Lisanias cu Abilene uktu bawi an si lio,  2 Annas le Kaiafas cu tlaangbawi ngan rian an ṭuan lio ah, Pathian bia cu ramcar chung i Zekhariah fapa Johan sin ah a rak phan. 3 Jordan ram vialte a cul i sual ngaihthiamnak ca ah sual ngaihchihnak baptisma kha a phuan, 4 cucu Profet Isaiah a chim mi bia hna cauk ah aa ṭial bang khan a hung si: aa ṭial mi cu:

“Thetse ram chung i a um mi aw pakhat nih: Bawipa ca ah lam sialpiak u, a lam cu dinter u! 5 Horkuang vialte cu chilh ulaw tlang le mual vialte cu rawnhter hna u, aa  kuai mi lam cu dinh ulaw lambingbo cu thlamh dih hna u, 6 cun miphun vialte nih Pathian khamhnak cu an hmuh lai,” ti hi a si.

7 Cucaah amah sin in baptisma hmuh awk ah a ra mi mibupi cu, “Limcawm fale hna, Pathian dantatnak in zaam awk ah aho nih dah ralrinnak an pek hna? 8 Nan sualngaihchihnak i a theipar cu langhter u, cun nanmah le nanmah kha, “Pa caan ah Abraham kan ngei,” ti hlah u, zei cah tiah, kan chimh hna, Pathian nih  cun hi lung hna sin  in Abraham ca ah tefa a thawhter khawh ko. 9 A si, atu hmanh ah hin thingkung hram ah hreitlung cu chiah a si cang,  thei ṭha a tlai lo mi kung poh cu hau i mei chung ah paih an si cang lai,” tiah a ti.

10 Mi vialte nih amah cu, “A si ahcun zei dah kan tuah kun lai?” ti in an hal tikah 11 amah nih, “Angki leng zunhnih a ngei mi poh nih a ngei lo mi kha hrawm seh,  ei awk a ngei mi poh nih cutin tuah ve seh,” tiah a ti hna. 12 Cuka ah cun baptisma hmuh awk ah a ra mi ngunkhuai khawltu hna zong an um ve, cun annih nih, “Saya, zei dah kan tuah lai?” tiah an hal. 13 Annih kha, “Rikhiah mi leng in khawl hlah u,” tiah a ti hna. 14 An can a phak tikah ralkap cheukhat hna zong nih, “Kannih tah, zei dah kan tuah lai?” an ti ve. Annih kha, “Aho hmanh tlerhkhonh hna hlah u, chut- ramh hna hlah u! Nan thlahlawh ah nan lung tling ko seh,” tiah a ti hna.

15 Mipi hna lak ah khan an i ruahchannak cu a ṭhang thluahmah, annih nih Johan hi Khrih cu a si sual hnga maw ti ruahnak an ngei, 16 cucaah Johan nih an dihlak hmaika ah khan, “Kei nih ti in Baptisma kan pek hna, sihmanhsehlaw keimah nakin a ngan deuh mi pakhat cu a ra lio, kei cu a kedan hri phoih ding hmanh ah kaa tlak lo; amah nih cun Thiang Thlarau le mei in Baptisma an pek hna lai. 17 A phuhri kha thianh, a fang kha buk ah rawn i a hi cu a mit ti lo mi mei chung paih awk ah ṭalawn cu aa tlaih ko,’ ti in a thanh. 18 Cun a dang tha peknak tampi he thawngṭha cu a chimh hna. 

Baptisma petu Johan thong thlaknak

19 Sihmanhsehlaw uktu bawi Herod cu, a naupa nupi a ṭhit mi le adang khuasual tampi a tuah mi kong ah Johan nih a rak mawhchiat bal caah, 20 Johan thong ruang ah a dang a sualnak vialte cung ah  khan  sualnak pakhat a chapchih rih. 

Jesuh cu baptisma a hmu

21 Cun mizapi cu baptisma an hmu dih i Jesuh cu amah baptismanak a hmuh khawh in thla a cam lio ah khan, van cu aa hung, 22 cun Thiang Thlarau cu ṭhuro bang, pumsa muisam in a cung ah a rak i fu. Cun vancung in aw pakhat a ra i, “Nang cu ka fapa na si; nihin ah ka fa ah kan lak cang,” tiah a ti.

Jesuh pipu hna

23 A rian ṭuan a thawk ah, Jesuh cu kumsawmthum hrawng a si, mi nih an ruah bang in amah cu Heli fapa Josef i fapa a si. 24 Heli cu Matthat fapa, Matthat cu Levi fapa, Levi cu Melkhi fapa, Melkhi cu Jannai fapa, Jannai cu Josef fapa, 25 Josef cu Mattathias fapa, Mattathias cu Amos fapa, Amos cu Nahum fapa, Nahum cu Esli fapa, Esli cu Naggai fapa, 26 Naggai cu Maath fapa, Maath cu Mattathias fapa, Mattathias cu Semein fapa, Semein cu Josech fapa, Josech cu Joda fapa, 27 Joda cu Joanan fapa, Joanan cu Rhesa fapa,  Rhesa cu Zerubbabel fapa, Zerubbabel cu Shealtiel fapa, Shealtiel cu Neri fapa a si. 28 Neri cu Melkhi fapa, Melkhi cu Addi fapa, Addi cu Kosam fapa, Kosam cu Elmadam fapa, Elmadam cu Er fapa, 29 Er cu Jesus fapa, Jesus cu Eliezer fapa, Eliezer cu Jorim fapa, Jorim cu Matthat fapa, Matthat cu Levi fapa, 30 Levi cu Simeon fapa, Simeon cu Judah fapa, Judah cu Josef fapa, Josef cu Jonam fapa, Jonam cu Eliakim fapa, 31 Eliakim cu Melea fapa, Melea cu Menna fapa, Menna cu Mattatha fapa, Mattatha cu Nathan fapa, Nathan cu David fapa a si. 32 David cu Jesse fapa, Jesse cu Obed fapa, Obed cu Boaz fapa, Boaz cu Sala fapa, Sala cu Nahshon fapa, 33 Nashon cu Amminadab fapa, Amminadab cu Admin fapa, Admin cu Arni fapa, Arni cu Hezron fapa, Hezron cu Perez fapa a si i Perez cu Judah fapa a si.

34 Judah cu Jakob fapa, Jakob cu Isak fapa, Isak cu Abraham fapa, Abraham cu Terah fapa, Terah cu Nahor fapa, 35 Nahor cu Serug fapa, Serug cu Reu fapa, Reu cu Peleg fapa, Peleg cu Eber fapa, Eber cu Shelah fapa, 36 Shelah cu Kainan fapa, Kainan cu Arfasad fapa, Arfasad cu Shem fapa, Shem cu Noah fapa, Noah cu Lamech fapa, 37 Lamech cu Methuselah fapa, Methuselah cu Enoch fapa, Enoch cu Jared fapa, Jared cu Mahalaleel fapa, Mahalaleel cu Kainan fapa, 38 Kainan cu Enos fapa, Enos cu Seth fapa, Seth cu Adam fapa, Adam cu Pathian fapa a si.

Thetseram i tukforhnak

4 Thiang Thlarau he khat in, Jesuh cu Jordan tiva khan a chuak i Thlarau nih ramcar ah a hruai, 2 cuka ah cun ni sawmli chung khuachia nih a rak tukforh. Cu chung vialte cu zei hmanh a ei lo caah a donghnak ah a rawl a ṭam. 3 Cu tik ah khuachia nih, “Pathian fapa na si ahcun hi lung hi changreu i cang ding ah nawl pe tuah,” tiah a ti. 4 Sihmanhsehlaw Jesuh nih, “Cathiang nih: Minung phun hi rawl lawng in a nung lo,’ a ti kha,” ti in a leh. 5 Cun Khuachia nih tlangsang ah a hruai i amah kha mitṭhep kar ah vawleicung pennak vialte a hmuhsak, 6 cun amah kha, “Hi ṭhawnnak le an sunparnak vialte cu kan pek lai, zei cah tiah keimah nih ka thim mi hna ka pek khawh hna naklai hi vialte cu keimah kut ah an ka chanh cang. 7 Ka bia law an dihlak in nangmah ta an si lai,” tiah a ti. 8  Sihmanhsehlaw Jesuh nih, “Cathiang nih: ‘Bawipa na Pathian kha na biak lai i amah lawng na rianh lai,’ a ti kha,” ti a leh.

9 Cun Jerusalem ah a hruai i Biakinn parpahlek ah a chiah, cun amah kha, “Pathian fapa na si ahcun hika hin vung zuang tuah, 10 zei cah tiah Cathiang nih: “Nangmah zohkhenh awk ah a vancungmi kha a fial cang hna, 11 cun lung ah na ke naa khawn sual ahcun an kut in an in cawi lai,’ a ti kha,” tiah a ti. 12 Sihmanhsehlaw Jesuh nih, “Cathiang nih: ‘Bawipa na Pathian cu va hneksak hlah,’ a ti kha,” tiah a leh. 13 Tukforhnak lam a phun phun a dih tikah khuachia nihcun, caan ṭha a hmuh ṭhan hlan tiang a kaltak.

II: GALILEE I A RIANṬUANNAK

Jesuh cu phungchim hram a thawk

14 Jesuh cu a chung i Thlarau ṭhawnnak he, Galilee ah a kir ṭhan; cun a min cu khuateleikip ah a thang. 15 An i pumhnak inn ah a cawnpiak hna i mikip nih amah cu an thangṭhat.

Nazareth khua ah Jesuh

16 A rak ṭhannak Nazara ah a rak ra, cun a tuah tawn bantuk in Sabbath ni ah pumhnak inn ah a kal. 17 Ca rel awk ah a hung dir, cun profet Isaiah cazual kha an chanh. Cazual cu a vun samh i a tanglei bang in aa ṭialnak hmun kha a vun hmuh: 18 Bawipa thlarau cu ka cung ah a um, zei cah tiah a ngan a fak mi hna kha thawngṭha chimh awk ah chiti a ka thuh cang. Saltaang mi hna sin  ah luatnak thanh awk, mitcaw mi hna kha khua hmuhter ṭhan awk, hrem mi hna luatnak pek awk le 19 Bawipa i veel ngeihnak kum thanh awk ah a ka thlah cang,’ ti hi a si.

20 Cun cazual kha a zual ṭhan, a bawmtu kha a pek i a ṭhu. Pumhnak inn i mi vialte nih amah cu mit ṭhep lo in an zoh. 21 Cun annih cu a cawnpiak hna i hiti hin a chim, “Hi catlang hi atu nan ngaih lio hrimhrim ah hin a hung tling,” tiah a ti hna. 22 Mi cu an lung a tling tuk, cun mi vialte cu a hmurka in a chuak mi bia dawhdawh hna nih khan an khuaruah a harter hna.

Annih nih, “Hihi Josef fapa a si hrimhrim ko lo maw?” tiah an ti. 23 Sihmanhsehlaw anih nih chimtawn mi bia, “Sibawipa, nangmah le nangmah i damter,’ ti mi bia nan ka lak hnawh lai ti cu lungawṭawm awk a um lo,’ cun, ‘Kapernaum ah a cang mi thil vialte kan theih, hika na chuahkehnak khua zong ah hin tuah ve hna,’ tiah nan ka ti te lai,” tiah a ti.  24 Cun a peh rih mi cu, “Kan chimh rih hna, aho profet hmanh a chuahkehnak khua ah conglawmhnak a tong bal lo.

 25 Biakam in ka chim ngam mi cu, Elijah chan ah kumthum le thlaruk chung khua a khen i ram chung dihlak mangṭam fakpi in a tlun ah khan Israel ah nuhmei tampi an rak um ko. 26 Sihmanhsehlaw Elijah cu hi hna aho sin hmanh ah thlah a si lo; Sidonia peng Zarefath khua i nuhmeinu sin lawng ah thlah a si. 27 Cun profet Elisha chan zong ah Israel ṭihnung cuar-zawtnak a ngei mi tampi an rak um ko, Siriami Naaman dah ti lo aho hmanh damnak an hmu lo,” tiah a ti hna.

28 Hi bia an theih tikah pumhnak inn i a um mi vialte cu an thin a hung dih. 29 An tho i Jesuh cu khualeng ah an chuahpi, cun khua a tohnak tlangpar ah an kaipi i chengpalang in a bingtalet in hrilh an timh. 30 Sihmanhsehlaw an lak in aa zuk ziar i lo diam in a chuak.

Jesuh nih Kapernaum ah a cawnpiak hna i khuachia kha a ṭhawl

31Galilee peng i khuapi pakhat a si mi Kapernaum ah a va ṭum i Sabbath ni ah a cawnpiak hna. 32 Cun a bia ah huham aa tel caah a cawnpiaknak nih an lung a ton ngaingai hna.

33 Pumhnak inn ah khan thlarau ṭha lo a ngei mi pakhat a um, cupa nih cun a aw dih-um in, 34 “Um, Nazarethmi Jesuh, zei dah na rak tuah? Kanmah hrawh awk ah maw na rat cang? Aho na si kan hngalh ko: nang cu Pathian i a Thiang mi pa na si,” tiah a ti. 35 Sihmanhsehlaw Jesuh nih, “Dai, a sin in chuak,” tiah a hro. Khuachia nih mipa cu fahnak zei hmanh pe lo in an lai ah a thluk i a chuak. 36 Mi vialte cu an khuaruah a har tuk i pakhat le pakhat kha, “A bia ah hin zei dah a um? Thlarau thiang lo kha ṭhawnnak le nawlngeihnak in nawl a pek hna i an chuak,” tiah an i ti. 37A thawngpang cu, cu ka tlangram hrawng vialte a cul dih.

Simon Nupi i nu a damternak

38 Pumhnak inn khan a chuak i Simon inn ah a kal. Simon i a pi cu a zaw i a tak a linh ngai caah zeimaw tal tuahpiak ding in amah cu an nawl. 39 A pawng ah dir in a zawtnak cu a hro i a zawtnak nih a chuahtak. Cun hmakhate ah a tho i annih kha a bultawl hna.

Mi tam nawn a damter hna

40 Nitlak ah khan zawtnak a phunphun a ngei mi hna cu an hawile nih an ratpi hna, cun an cung cio ah a kut a chuan i a damh hna. 41Khuachia hna zong kha mi tampi hna sin in, ‘Nangmah cu Pathian fapa na si,’ ti bu in an rak chuak. Sihmanhsehlaw Khrih a si kha an hngalh caah fak pi in ralrinnak a pek hna i biachimnak nawl a pe hna lo.

Zingkate ah Kapernaumm in a chuak i Judea peng a tlawng

42Khua a dei tikah inn in a chuak i hmunking ah a va kal. Mibupi cu amah kawl ah an i thawh, cun an va hmuh tikah anmah kha kaltak ti lo ding in thlauh an duh, 43 sihmanhsehlaw anih nih, “Pathian pennak thawngṭha cu khua dang zong ah ka phuan ve a herh, zei cah tiah hihi a ka thlahhnawh chan mi a si,” tiah a ti hna. 44 Cuti cun Judea peng pumhnak inn i thawngṭha a phuannak cu a peh ṭhan.

Zultu hmasa pali hna auhnak

5 Cun Gensaret Tilikam ah a dir i mibupi nih Pathian bia ngaih awk ah an but hnawh lio ah khan, 2 tikam i an hren mi lawng pahnih kha a va hmuh hna. Ngatlai pawl cu lawng in an chuak i an sur kha an ṭawl cuahmah hna.  3 Lawng pakhat -Simon lawng - cung ah a kai i lawng cu tikam in tlawmte thawn deuh ding in a chimh. Cun a ṭhu i mibupi cu lawng cung cun a cawnpiak hna.

4 Cawnpiaknak a dih tikah Simon cu, “Ti thuhnaklei ah vung kal law na sur cu hei chep tuah,” tiah a ti. 5Simon nih, “Bawipa, zan khuadei har ngai in kan vorh i zei hmanh kan tlai lo, sihmanhsehlaw nangmah nih na ka fial ahcun sur cu ka cheh ko lai,” tiah a ti. 6 Cun an vun cheh taktak tikah nga cu tam tuk hringhran in an tlaih caah sur cu tleh hnik a zal, 7 cun lawng dang i an hawile hna kha annih cu rak bawm awk ah kut zauh in an auh hna; cun an rat tikah an tilawng cu a pahnih in pil hnik deng an sanh hna.

8 Cucu Simon Peter nih a hmuh tikah Jesuh hmai ah a khuk a bil i amah kha, “Bawipa, ka kaltak ko, kei cu misual ka si,” tiah a ti. 9 Zei cah tiah Simon le a hawile hna cu an tlaih mi nga ruang ah an khuaruah a har tuk; 10 cu bantuk in Simon ṭuanhawi a si mi Zebedi fapale hna a si mi Jeim le Johan zong an si ve.  Sihmanhsehlaw Jesuh nih Peter cu, “Phang hlah, atu thawk in na tlaih mi cu minung an si cang lai,” tiah a ti.11 Cun, an lawng cu tikam ah an hnuh hnu ah, zeizongte kaltak in a hnu an zulh.

Ṭihnung cuar zawtnak a ngei mipa a damter

12 Cun khuapi pakhat i Jesuh a um lio ah khan ṭihnung cuar zawtnak a ngei mi pakhat cu ruah lopi in a hung chuak. Jesuh a hmuh tikah vawlei ah a bawk i, “Bawipa na duh ahcun na ka thianter khawh,” ti in a nawl.13 A kut kha a samh i a tawngh, cun, “Ka duh, thiang ko cang,” tiah a ti. Chikkhatte ah a  cuar zawtnak nih a kaltak. 14 Aho hmanh chimh lo ding in a cah i amah kha, “Va kal law tlaangbawi vaa hmuhsak, cun anmah ca tehte a si nakhnga, Moses nih phung a ser bang in na thiannak ca ah pekchanhnak va tuah,” tiah a ti.

15 Sihmanhsehlaw a thawngpang cu a thang chin lengmang i a bia theih duh ah le an zawtnak damh duh ah mibu nganpi cu an rak i pum, 16 sihmanhsehlaw amah tu cu hmunking ah a chuak i thla a va cam tawn.

A kut a zeng mi a damternak

17 Cun nikhat ah a cawnpiak hna lio ah, Galilee peng i khuate kip, Judea peng le Jerusalem in, a ra mi Farasimi le Phungbia cawnpiaktu hna cu khika ah khan an ṭhu ve. Cun mi kha damnak a pek khawh hna nakhnga Bawipa ṭhawnnak nih a umpi hna. 18 Mi cheukhat nih a chung ah luhpi in a hmai ah chiah an timh mi mizengpa pakhat kha a ihphah in an rak zawnh i  an rak chuak. 19Asinain mibu lak ah khan an luhpi khawh lo caah inn cung ah an kaipi, cungkhuh kha an hawh i a awng in mipa cu a ihnak he lawng Jesuh hmaika ah cun an rak ṭhumh. 20  An zumhnak a hmuh tikah amah nih, “Ka kawi, na sualnak cu ngaihthiam a si cang,” tiah a ti. 21 Cu tikah phungbia cawnpiaktu hna le Farasi mi hna nih, “Pathian a thangchiat mi pa hi aho dah a si? Pathian dah ti lo aho dah sual a ngaithiam kho?' ti in an ruah  len.  22 Sihmanhsehlaw Jesuh nih an ruahnak kha a hngalh caah annih kha, “Nan lung chung i hi ruahnak hna hi zei dah an si? 23 ‘Ngaihthiam na si cang,’ ti maw a fawi deuh, asilole, ‘Tho law kal tuah,’ ti dah? 24 Sihmanhsehlaw anmah kha mi Fapa cu vawlei ah hin ngaihthiamnak nawl a ngei ti langhternak caah -mizengpa cu- kan chimh: tho law na ihphah i lak law inn ah va ṭin,” tiah a ti. 25 Hmakkhatte ah zapi hmaika ahcun a tho, a ihphah aa lak i Pathian thangṭhat pah in inn ah a ṭin.

26 An khuaruah a har dih, ṭihphannak in an khat, “Nihin ah thil khuaruahhar kan hmuh cang,” ti in Pathian cu an thangṭhat.

Levi auhnak

27 Cu hnu cun a chuak i a min ah Levi an ti mi, ngunkhuai khawltu, cu a zung i a ṭhut ko kha a hmuh tikah amah cu, “Ka zul,” tiah a ti. 28 Cu tikah Levi nih zeizongte kaltak in a tho i amah kha a zulh.

Levi inn i misual hna he rawl einak

29 Amah upatnak ah Levi nih a inn ah rawldanghnak a tuah, cun anmah he cabuai ah cun ngunkhuai khawltu le a dang tampi hna he an um ve. 30 Farasimi hna le an phungbia cawnpiaktu hna nih a zultu hna sin ah an zai i an ti mi cu, “Zei ruang ah dah ngunkhuai khawltu hna le misual hna he nan eiṭi?” tiah an ti. 31  Jesuh nih annih kha, “A  dammi si lo in a zaw mi nih siibawi an herh. 32 Miding si lo in misual hna sual i ngaihchih ding in auh awk ah ka ra,” tiah a leh hna.

Ulhnak kong ceihkhannak

33 Cu tikah amah kha, “Johan zultu hna cu a zungzal rawl an ulh i thla an cam, cun Farasi zultu hna zong, sihmanhsehlaw na zultu hna cu an ei an ding ko,” tiah an ti. 34 Jesuh nih, “A si, nupi ṭhi tlangvalpa a um lio ah a hawile hna cu rawl nan ulhter kho hna lai lo? 35 Sihmanhsehlaw an sin in nupi ṭhi tlangvalpa an kalpi caan a phan te lai, cun cu ni hna ah cun an ulh ve te ko lai” tiah a leh hna.

36 Bianabia dang zong kha a chimh rih hna, “Aho hmanh nih thilhlun belhnak caah thilthar kha an thlek bal lo; cuti an tuah ahcun thilthar a tleh lawng si lo in thilthar cu thilhlun he zong aa tlak lai lo.

37 Cun aho hmanh nih mitsur thar kha saphaw thawlhlun ah an rawn bal lo; cuti an tuah ahcun mitsur thar nih thawl kha a khuai lai i a tle dih lai, cun thawl zong a rawk lai. 38 A si lo, mitsur thar cu saphawthawl thar ah rawn awk a si. 39 Cun mitsur zu hlun a ding cang mi aho hmanh nih a thar kha a ding duh lo. ‘A hlun cu a tha,” tiah a ti.

Sabbath ni ah fang zunnak

6 Nikhat cu Sabbath ni nikhat ah changvut lo tanpah in a kal, cun a zultu hna nih khan a vui cu an sih, an kut in an hnuai i a fang kha an ei hna. 2 Farasi cheukhat nih annih kha, “Zei cah dah Sabbath ni ah tuah lo ding ti mi cu nan tuah,” tiah an ti hna. 3 Jesuh nih, “David le a hawile hna kha an rawl a ṭam tikah David nih zei dah a tuah – 4 zei tin dah Pathian inn ah a luh, pekchanh mi changreu, kha changreu kha tlangbawi lawng nih einak nawl an ngei-  cun a lak i a ei i a hnuzul hna zong kha a pek ve hna,’ ti kha nan rel bal lo tih?’ ti in a leh hna.  5 Cun annih kha, “Mi Fapa cu Sabbath ni i Bawi a si,”tiah a ti hna.

Kutzengpa a damternak

6 A dang pakhat cu Sabbath ni ah khan pumhnak inn ah a lut i a cawnpiak hna, cuka ah cun a kut a zeng mipa a rak um. 7 Phungbia cawnpiaktu le Farasimi hna nih sualphawt khawhnak ding zeimaw tal hmuh ding ruahchan in, Sabbath ni ah mi pakhatkhat a damter hnga maw ti in an ngiat ko. 8 Sihmanhsehlaw an ruahnak cu a hngalh; cucaah a kut a zeng mi pa cu, “Tho law a lai ah dir tuah!” tiah a ti. Cu tik ah hmai ah a rak chuak i a dir.  9 Cun Jesuh nih annih kha, “Biahalnak kan tuah hna lai: Sabath ni ah hin thilṭha tuahnak nawl maw a um thilchia tuahnak nawl dah? Nunnak khamhnak nawl maw hrawhnak nawl dah?” tiah a ti hna. 10 Cun aa mer i a zoh dih hna hnu ah mipa cu, “Na kut samh tuah,” tiah a ti. A vun samh i a dam. 11 Sihmanhsehlaw annih cu an thin a hung i Jesuh cu zeiti tuah ah dah a ṭhat bik lai ti kha an i ceih.

Hleihnih thimnak

12 Kha lio ah khan thlacam awk ah tlang ah a kai; cun Pathian sin ah zan khuadei thla a cam. 13 Khua a dei tikah a hnuzul hna cu a auh hna i hleihnih a thim hna; annih kha lamkaltu tiah a auh hna. Annih cu:14 Peter ti min a pek mi Simon, cun a nau Andru; Jeim, Johan, Filip, Bartholomew, 15 Matthai, Thomas, Alfeas fapa Jeim,  phunṭanh Simon, 16 Jeim fapa Judas, cun a rawitu ah aa chuah mi Judas Iskariot hna an si.

Mibupi nih Jesuh cu an zulh

17 Anmah he a rung ṭum i a zultu tampi an i pumhnak hmunrawn ah khan a dir. Cuka ah cun Judea peng le Jerusalem le Tair le Sidon peng rilikam khua hmunzakip in a ra mi mibu nganpi zong an um ve. 18 Annih cu amah bia ngaih duh ah le an zawtnak damter duh ah a ra mi an si. Thlarau thiang lo nih a hrem mi hna zong an dam, 19 cun a chung in an dihlak a damter khawhnak ṭhawnnak a chuah caah mikip nih khan amah tongh an i zuam.

A voikhatnak a phungchim. Thluachuahnak hna

20 Cun a zultu hna kha dengteo in a zoh hna i a ti mi cu: “Nannih misifak hna thluachuak mi nan si: Pathian pennak cu nanmah ta a si. 21 Atu a ṭamhal mi hna cu mithluachuak nan si: nan paw a khim te lai. Atu a ṭap mi hna cu thluachuak mi nan si: nan ni te lai. 22 Mi Fapa ruang ah mi nih an in huat, an in hlawt: an in serhsat hna i nan min cu khuasual a tuah mi cazin ah an in thlak hna tikah thluachuak mi nan si. 23 Cu ni a phak tikah cun i nuam ulaw lawmhnak he laam u, zoh hmanh u, vancung i nan laksawng cu a ngan lai. Hiti hin pei an pupa hna nih profet hna cu an rak tuah ve hna cu.

Chiatserhnak

24 Sihmanhsehlaw nannih mirum hna nan ca ah ngaihchia a si: atu ah hnangamnak nan hmu cang. 25 Nannih atu eiding tampi a ngei mi hna, ngaihchia nan si: rawlṭam in nan um te lai. Nannih atu a ni mi hna ngaihchia nan si:  lungkuai in nan ṭap te lai.

26 Mikip nih an in chimthiam hna tikah ngaihchia nan si! Cuti cun pei an pupa hna nih nal profet hna cu an rak tuah hna cu.

Ral dawtnak

27 Sihmanhsehlaw ka bia a ngai mi nannih cu kan chimh hna: nan ral daw hna u, an hua mi hna cung ah va ṭha u. 28 An sersat mi hna kha thluachuah pe hna u 29 Na bel khattelei an bengtu kha khatlei va chit rih u; na angki a la mi kha na angki leng zong va pe rih u. 30 thil an hal mi kha va pe, cun mizeimaw nih na thil a laksual ahcun va hal ṭhan hlah. 31 Mi nih na cung ah tuah seh ti na duh bang in midang cung zong ah va tuah ve. 32 An dawtu lawng kha na dawt ahcun zei minṭhatnak dah na hmuh lai? Misual hna hmanh nih anmah a daw mi cu an dawt ve ko ṭung hna. 33 Na cung ah ṭhatnak a tuah mi cung lawng ah ṭhatnak na tuah ahcun zei minṭhatnak dah na hmuh khawh lai? Misual hna hmanh nih cu tluk cu an tuah ve ko ṭung. 34 Cun tangka kan hmu ṭhan lai ti naa ruahchan mi lawng kha nan cawih ahcun zei minthatnak dah naa ruahchan? Misual hmanh nih tling tein an hmuh ṭhan ding  ah cun misual kha an cawih ve ko hna. 35 Cutin a si lo, nan ral kha daw ulaw an cung ah ṭhatnak tuah u, cun hmuh ṭhan ding zei hmanh ruahchannak ngei lo in cawih hna u. Laksawng tampi nan hmuh lai, cun Cungnung bik Pathian fale nan si lai, zei cah tiah amah cu dawtnak a hngal lo mi le mi ṭha lo hna cung ah a ṭha.

Zawnruahnak le siannak

36 Nan pa nih zawnruahnak a ngeih bang in ngei ve u. 37 Midang bia va ceih hna hlah ulaw nannih zong ceih nan si ve lai lo; midang kha sual va phaw hna hlah ulaw sualphawt na si ve lai lo. Mi kha ngaithiam hna ulaw ngaihthiam nan si ve lai. 38  Pe ulaw nan ca ah laksawng a um lai: nan liang cung ah, tling tein, benhchih, hninhchih, liam thluahmah in burh nan si lai; zei cah tiah nan hman mi tahnak cu nanmah ca zong ah hman a si ve lai,” tiah a ti hna.

Upa lungfim nun

39 Tahchunhnak pakhat a chimh rih hna, “Mitcaw nih adang mitcaw a hruai khawh lai maw? An pahnih in khor chung ah an tla hrimhrim lai. 40 Hnuzul cu saya nakin a sang deuh lo, cawnnak tling a ngei mi cu a saya bantuk a si ko lai. 41 Zei cah dah na mit chung i thingtan kha tuak lo in na unau mit chung i hnawm cu na hmuh khawh? 42 Na mit chung i thingtlang hmanh hmu lo in zei tin dah na unau cu, ‘Na mit hnawm in coihpiak ning,’ na ti khawh? Midepde hna! Na mit chung i thingtlang kha chuah hmasa, cun na unau mit chung i hnawm kha coihpiak awk ah fiang tein na hmuh khawh lai.

43 Thei ṭha lo a tlai mi thingkung ṭha a um bal lo, cun thei ṭha a tlai mi thing kung chia a um bal lo. 44 Thingkungkip cu a thei in hngalh khawh a si, hlingkung in theipi an lo bal lo, cun theihmung in mitsur an lo bal lo. 45 Miṭha nih an lung chung i an khon mi thil ṭha in a ṭha mi kha an chuahpi, mi ṭha lo nih an khon mi thil ṭha lo in ṭhat lonak kha an chuahpi. Zei cah tiah hmurka chung i bia cu lung i a khat mi in a rak pawt mi a si,” tiah a ti.

A dik mi zultu

46 Zei ruang ah dah, ‘Bawipa, Bawipa, tiah nan ka auh i ka chim mi cu nan tuah lo?  47 Ka sin ah a ra i ka bia a ngai i a zul mi poh cu- cu bantuk cu zei he dah an i lawh ti kan chimh hna lai. 48 Cu bantuk mipa cu inn a sak tikah, thukpi a co i lung cung ah a hram a bunh. Ti a a lian i ti nih a den hmanh ah fek tein a hram bunh mi a si caah a hnin kho lo.  49 Sihmanhsehlaw ka bia a thei ko nain a zul lo mi cu a hramdawmh a fek lo mi vawlei ah a inn a sa mi he an i lo; ti nih a den cangka in inn cu a tlu, lak awk um lo in a rawk ko!” tiah a ti.

Zauk bawi salpa a damternak

7 Theihter a duh mi hna kha a chim dih tikah, Kapernaum ah a kal. 2 Cuka i zauk bawi nih thi deng  in a zawmi a sal, a dawt khunte, pakhat a ngei. 3 Jesuh kong a theih tikah ra in a sal a damter nakhnga va nawl awk ah Jew upa cheuhkhat cu a sin ah a thlah hna. 4 Jesuh sin an phak tikah amah kha biatak tein an nawl i an chimh mi cu, 5 “Amah cu na bawmh awk ah aa tlak hrim mi a si, zei cah tiah kan miphun a kan daw i pumhnak inn tiang a kan sakpiak,” tiah an ti. 6 Cucaah Jesuh cu anmah he a kal i inn a vun naih tikah Zauk bawi nih a hawile cheukhat kha a thlah hna i hiti hin a chimhter hna, “Bawipa, ka inn chung i na luh awk ah kaa tlak lo, cucaah na re i theih duh hlah, 7 cucaah keimah zong nangmah sin ka rat lonak cu a si ve; bia kaa khatte chim law ka ngakchiapa cu a dam ko lai. 8 Zei cah tiah keimah zong nawlngeihnak tang i a um mi ka si, cun keimah tang ah ralkap an um ve; cun pakhat kha, ‘Kal’ ka ti i a kal; adang cu, ‘Hika ah ra’ ka ti i a ra; 9 ka sal cu, “Hihi tuah” ka ti i a tuah,” tiah a ti. Hi bia a theih tikah Jesuh cu a khuaruah a har, aa mer i a hnu a zul mi mibupi kha, “Kan chimh hna, hi tluk ngan zumhnak hi Israel hmanh ah ka hmu rih lo,” tiah a ti hna. 10 Cun a thlah mi pawl cu inn i kir ṭhan tikah a salpa cu a dam hirhiar cang kha an va hmuh.

Nain khua i nuhmeinu fapa a damter

11 Cu hnu tlawmpal ah, a zultu hna le mi tampi nih an zulh i Nain ti mi khua ah a kal. 12 Khuapi hauka an hun naih ah khin mithi pakhat an rak zawnh ko, amah cu a nu i fapa ngeihchunte a si i a nu cu nuhmei a si. Khuami tam nawn nih an rak thlah. 13 Bawipa nih a hmuh tikah a zaang a fak tuk i nuhmeinu cu, “Ṭap ti hlah” tiah a ti. 14 Cun a va kal, ruak kuang kha a tongh tikah a zawntu pawl cu an dir, cun Jesuh nih, “Tlangvalpa, tho kan ti,” tiah a ti. 15 Cun mithi cu a tho i bia a chim, cun Jesuh nih a nu kut ah a chanh. 16 Mi cu khuaruahharnak in an khat i, “Kan lak ah profet ngan a tho cang; Pathian nih a mi cu a len cang,”ti in Pathian cu an thangṭhat. 17 Cun hiti an hmuhnak cu Judea peng pumpaluk le tlangram vialte a cul dih.

Baptisma petu biahalnak.  Jesuh bialehnak

18 Johan zultu hna nih amah cu thawng an thanh, cu tikah Johan nih a zultu pahnih kha a kawh hna i annih kha 19 Bawipa cu, “Nangmah cu kan hngahhlang mi na si maw, asiloah, adang maw kan hngah rih lai?” ti va hal awk ah a thlah hna. 20 Hi hna Jesuh sin an phak tikah amah kha, “Nangmah cu a ra lai ti mi na si maw? asiloah, midang maw kan hngah rih lai?” ti hal awk ah Johan nih a kan thlah,” tiah an va ti. Cu caan thengte ah cun mi tampi kha an zawtnak le an faknak, thlarau ṭha lo hna in a damter hna lio le mitcaw zong khua hmuh ṭhannak a pek hna liote a si.  21 Cu tikah amah nih a thlah mi hna cu, “Va kir ulaw nan hmuh mi le nan theih mi cu Johan kha va chim u: mitcaw nih khua an hmu, kebei nih lam an kal i thinghmui nih thiannak an hmuh, cun hnachet nih an theih i mithi an tho ṭhan, mifak hna sin ah thawngṭha cu phuan a si cang, 23 cun keimah kha tluknak hrampi ah a ka hmu lo mi poh cu thluachuak mi a si,” ti in a leh hna.

24 Johan thlah mi hna an kal tikah mipi kha Johan kong cu a chimh hna, 25 “Zei hmuh duh ah dah thetse ram ah nan va chuah? Thlizil lak ah aa thui mi phaikung zoh ah maw? Asi lo! Asi ahcun, zei zoh duh ah dah nan chuah?  Hnipuan ṭhaṭha aa hruk mi hna hmuh duh ah maw? Zoh hmanh uh, hnipuan mansung hruk in duh tling in a nung mi hna cu bawi inn lawng ah an um tawn. 26 Cu tikah zei hmuh duh ah dah nan chuah? Profet hmuh duh ah maw? A si, kan chimh hna, Profet nakin a ngan deuh tuk mi a si: amah cu Cathiang nih, 27 “Zoh hmanh, na hmai  ah ka lamkal, na hmai ah na lam sialtu ding ka thlah lai,’ a ti mipa cu a si.

28 Kan chimh hna; nu nih a hrin  mi fa lak ah Johan nakin a ngan deuh mi aho hmanh an um lo, asinain Pathian pennak chung i a hme bik hmanh Johan nakin a ngan deuh,” tiah a ti hna. 29 A bia a thei mi vialte, cun ngun khuai khawltu hna zong, Johan sin in Baptisma an hmuhnak thawng in Pathian khamh-dinnak cu an cohlan. 30 Farasimi hna le phungbia cawnpiaktu hna cu Johan i Baptismanak an hmuh lo caah Pathian khuakhan lairelnak cu an hlawt.

Jesuh nih a chan minung hna kha a mawhchiat hna

31  Hi chan minung hna ca ah zei tahchunhnak dah ka lak khawh lai? Zei he dah an i lawh? 32 Annih cu chawdawr hmun ah ṭhu in pakhat le pakhat kha, thanglawi kan in tumpiak hna i nan laam lo; ṭahhla kan in lawhpiak hna i nan ṭap hlei lo,” tiah au hnawh mi ngakchia hna he an i lo.

33 Zei cah tiah Baptisma petu Johan cu ei lo le din lo in a rak ra, cun nannih nih, ‘Khuavang a ngei,’ nan ti. 34 Mi Fapa cu eipah dinpah in a ra, cun nannih nih, ‘Zoh hmanh orkhu le zurampa, ngun khuai khawltu le misual hna hawikawm,’ nan ka ti.  35 Nain fimnak cu a fale hna nih a fimnak kha an langhter ko,” tiah a ti hna.

A sual mi nu

36 Farasimi pakhat nih rawl ei a sawm. Cun Farasimi inn a va phak tikah rawl ei awk ah khan a ṭhu, 37 ruah lo pi in khua ah minchiatnak a ngei  mi minu pakhat cu a rung lut. Farasi inn ah rawl a hrawn ti kha a theih tikah lungrang zihmui thawl khat kha a rak i put. 38 A kehram ah a bawk, a ṭap, a mitthli cu a ke ah a tla, cun a mitthli cu a sam in a hnawh; cun a ke cu atu le atu a hnamh i zihmui a thuh.

39 Rawlei a sawm mi Farasipa nih a hmuh tikah, amah le amah kha, “Hipa hi profet rak si seh law hi minu hi aho a si ti le amah a tawng mi hi zei bantuk minung dah a si i zei bantuk thangchiatnak dah a ngeih ti a hngalh ko hnga,” tiah a ti. 40 Cu tikah Jesuh nih a thawh i, “Simon, zeimalo chimh ding kan ngeih,” tiah a ti i anih nih “Chim ko, Bawipa,” tiah a leh. 41 Voikhat ah tangka cawihtu pa sin ah lei a ba mi pahnih an um, pakhat nih denari zanga a bat i adang nih sawmnga a bat. 42 An pahnih in an cham khawh lo caah a ngaihthiam hna. Aho nih dah a dawt deuh hnga?” tiah a ti.  43 Simon nih “Tam deuh a ngaihthiam mipa a si lai tiah  ka ruah,” tiah a leh.  44 Jesuh nih, “Na hmaan,” tiah a ti.

Cun minulei ah aa mer i Simon cu, “Hi nu hi na hmuh ko tih? Na inn ah ka ra i ka ke ah zei hmanh na toih lo, sihmanhsehlaw anih nih cun ka ke cung ah a mithli a burh i a sam in a hnawh. 45 Na ka hnam lo, asinain hi nu nih cun inn chung ka luh ri in ka ke cu ngol lo in a hnamh cang. 46 Ka lu cu chiti na ka thuh lo, asinain hi nu nih cun ka ke kha zihmui a thuh cang. 47 Cucaah kan chimh, a sualnak cu, zeitluk an tam hmanh ah, ngaihthiam an si cang, zei cah tiah hi tluk a ngan mi dawtnak hi a langhter cang. Dawtnak tlawmte lawng a langhter mi cu tlawmte lawng ngaihthiam a si,” tiah a ti.  48 Cun minu cu, “Na sualnak cu ngaihthiam a si cang,” tiah a ti. 49 Cuka ah amah he cabuai a kulh ve mi hna nih anmah le anmah kha, “Sualnak tiang a ngaithiam mi hipa hi aho dah a si?" tiah an ti.  50 Sihmanhsehlaw minu cu, “Na zumhnak nih an khamh cang; daihnak he va kal cang,” tiah a ti.

Jesuh hnu a zulmi nu hna

8 Cu hnu ah Jesuh cu khuapi he khuate he a tlawng hna i Pathian pennak thawngṭha cu a chimh thluahmah hna. Amah he hleihnih hna, 2 cun an zawtnak le khuachia nih a tuah hnanak  in a rak damh mi nu cheukhat zong an kal ve; hi hna cu a mindin in Magdalin an ti mi, a chung in khuachia pasarih a chuakpiak mi, Mary, 3 Herod chawva kengtu Chuza nupi Joana, Susanna le an chawva in a rak bawm mi nu dang tampi hna kha an si.

Thlaici vorhtu bianabia

4 A rak i pum mi mibu nganpi le a khuakip in mi hna nih khan amah cu an fuh, cun hi bianabia hi a chimh hna.

5 “Thlaici vorhtu pakhat cu thlaici vorh ah aa thawh. A kut khat in thlaici a vorh ah khan a cheu cu lamkam ah an tla i mi nih an lamhchih; cun van vate hna nih an ei dih.  6 A cheu cu lung lak ah an tla, an hung keuh nain nawn a um lo caah an uai zau. 7 A cheu cu hling lak ah an tla; hling he an khoṭi i hling nih a khuh dih. 8 A cheu cu vawlei ṭhatnak ah an tla i an ṭhang, rawl cu a let zakhat in an vui. Hi bia a chimpah in amah nih, “Theihnak hna a ngei mi poh nih an ngaih awk a si,” ti in a au.

Zei ruang ah dah Jesuh nih tahchunhnak in bia a chim

9 A zultu hna nih hi tahchunhnak bia i a sullam cu an hal.10 Jesuh nih, “Nannih cu Pathian Pennak biathli theihnak vel laksawng nan hmu; midang ca tu ah cun banabia in a ṭang peng, cucu an zoh ko nain an hmuh nakhnga lo le an ngaih len ko nain an fian nakhnga lo caah a si,” tiah a ti hna.

Thlaici vorhtu bianabia sullam fianternak

11 Cu tikah tahchunnak bia i sullam cu hihi a si: thlaici cu Pathian bia a si. 12 Lamkam ah a tla mi hna cu, Pathian bia cu an theih ko, an zumh i khamh an si nakhnga lo khuachia cu a ra i an lung chung in bia cu a kalpi hna.13 Lunglak ah a tla mi hna cu, Pathian bia kha an theih tikah lawmhnak he a cohlang mi hna an si. Asinain hram an ngei lo; caan tlawmte cu an zumh ko, cun tukforhnak an ton tikah an tlu ṭhan. 14 Cun hlinglak i a tla mi hna ca tu ah cun hi mi hna nih hin an theih ko, sihmanhsehlaw an lamthluan ah lungretheihnak, rumnak le nunnuamhnak nih a nenh hna caah zei thei hmanh an tlai kho bal lo. 15 Vawlei ṭhatnak ah a tla mi hna ca tu ahcun Pathian bia kha lungthin ṭhatnak le siannak in a thei i a cohlang mi hna an si i an teirialnak thawng in theipar an tlai,” tiah a ti.

Mei-inn bianabia

16 Cun aho hmanh nih khengkuar in khuh ding, asiloah ihkhun tang chiah ding in mei an vang bal lo. A si lo, a rung lut mi nih meiceu an hmuh nakhnga mei-tung ah chiah a si tawn. 17 Zei cah tiah thuh-lanmi zei hmanh um lo in phozar dih an si lai, biathli zei hmanh um lo in theihter dih le khuaceu ah chuahpi dih a si te lai. 18 Cucaah zei tin dah nan ngaih kha i ralring u; a ngei mi poh cu chapchih an si lai; a ngei lo mi cu ka ngeih ti aa ruah mi  hmanh kha lakpiak an si lai,” tiah a ti.

Jesuh chungkhar taktak

19 A nu le a unau hna cu amah kawl ah an rak chuak nain mibupi ruang ah amah kha an naih kho lo. 20  Cu tikah amah cu, “Na nu le na unau hna nih ton an in duh i leng ah an dir ko,” tiah an chimh. 21 Sihmanhsehlaw anih nih, “Ka nu le ka unaule hna cu Pathian bia kha a thei i aa nunpi mi hna an si,” tiah a ti hna.

Thlichia a daihter

22 Cun a zultu hna he lawng chung ah a lut i annih kha, “Tili khattelei ah pet usih,” tiah a ti hna. Cuti cun an i thawh, 23 cuti an kal lio ah khan amah cu aa hngilh.  Thlichia a hrang i lawng chung ah ti luh hnik aa zal i ṭih a nun cang kha an theih. 24 Cucaah a sin ah an va kal i amah kha, “Bawipa! Bawipa! kan thi dih cang lai hih,” tiah an ti i an va ṭhangh. Cu tikah a tho, thlichia le tilet cu a hro hna, cun an dai ṭhan. 25 Anih nih annih kha, “Nan zumhnak cu khuazei ah dah a um?” tiah a ti hna. Annih cu an khuaruah a har tuk ah an ar ko i pakhat le pakhat kha, “Hihi aho dah a si hnga? Thlichia le tilet hmanh a hro hna i a nawl an ngaih ko,” tiah an i ti.

Gerasene i khuachia

26 Annih cu Galilee ral Gerasene ram ah khan an phan. 27 Tikam i a vun kai ah khan mah khualipi i khuachia nih a tuah mi mipa pakhat cu a sin ah a ra; amah cu caan saupi hnipuan lo, inn ah si lo in thlanhmun ah khua a sa.

28 Jesuh a hmuh tikah a au, a kehram ah a bawk i a aw dih-um in, ‘Cungnung bik Pathian fapa Jesuh, keimah he zei pehtlaihnak dah na ngeih? Kan nawl hram ko, ka hrem sawh hlah,” tiah a ti. 29 Zei cah tiah Jesuh nih khan thlarau thiang lo cu, “Kha mipa sin in chuak,” ti in nawl a rak pek caah a si. Thlarau ṭha lo nih khan a tlaih lengmang caah hri le thir cikcin in an ṭem nain an ṭemnak kha a chah dih i khuachia nih amah cu thetse ram ah a hruai tawn. 30 Jesuh nih mipa cu, “Na min a ho a si?” tiah a hal.  Amah nih, ‘Legion’ tiah a ti – zei cah tiah a chung ah khuachia tampi an rak lut caag. 31 Cun hi hna nih hin Jesuh cu annih kha hellkua thukpi ah a thlak hna nakhnga lo an nawl.

32 Cu lio ah vok ruunpi cu tlang cung ah khin an tlong lulhmalh ko, cu tikah khuachia nih hi hna chung luhnak nawl an hal. Cucaah chuahnak nawl a pek hna. 33 Khuachia cu mipa chung in an chuak i vok chung ah an lut, cun vok ruunpi cu chengpalang in tili ah an zuang i an thi dih.

34 Thil sining an hmuh tikah vok cawng hna cu an tli i khuapi chung le a pawngkam khua hna ah khan an tuanbia cu an va thanh; 35 cun thil umtu ning zoh ah mi cu an hung chuak. Jesuh sin an rak phanh tikah khuachia a thawlpiak mi mipa cu Jesuh kehram ah a rak ṭhut le hnipuan aa hruk i lungfim in a um kha an hmuh tikah an ṭih tuk. 36 Cun thil si ning a rak hmu mi hna nih khan khuachia nih a tuah mi mipa cu zei tin dah khamh a si ti kha an chimh hna. 37 Gerasene pawngkam mi vialte cu an ṭih tuk caah anmah kha a kaltak hna nakhnga Jesuh cu an nawl. Cucaah tilawng cung ah a kai i a kir ṭhan.

38 Khuachia nih a chuahtak mi nih khan amah he umnak nawl a pek nakhnga a nawl, sihmanhsehlaw amah cu, “Inn ah va kir law Pathian nih na ca i a tuah mi vialte cu va chim hna,” tiah a ti i a thlah. Cucaah mipa cu a chuak i khualipi cul in Jesuh nih a ca i a tuah mi vialte cu a chimh hna.

Thichuaknu a damternak le Jairu fanu a thawhternak

40 A rak kir tikah Jesuh cu mibu nih ṭha tein an cohlan, zei cah tiah khika an um cu amah an hngah caah a si. 41 Cun ruah lo pi in Jairu an ti mi mipa pakhat, pumhnak inn uktu cu a rak chuak. Jesuh kehram ah a bawk i a inn rat ding in a nawl, 42 zei cah tiah kumhleihnih hrawng a si mi fanu fangkhat te a ngei i amah cu a thi dengmang. Cun Jesuh cu a kal tikah mibu nih a zual in an zual.

43 Khika ah khan kumhleihnih chung a thi a chuak i aho hmanh nih an damh khawh lo mi nu pakhat a um. 44 A hnulei in a hung chuak i a puan kite cu a tongh, cun a thi cu mah caan hrimhrim ah khan a pit. 45 Jesuh nih, “Aho dah a ka tawng?” tiah a ti. An zapi in an i pheh tikah Peter nih, “Bawipa, an kulh mi mibupi nih an i nam le a si,” tiah a ti. 46 Sihmanhsehlaw Jesuh nih, “Mi pakhat nih a ka tongh, ka sin in huham a chuah ka hngalh,” tiah a ti. 47 A ka hngalh ti kha minu cu a hngalh tikah therbu in a hung chuak, cun a hmai ah a bawk i zapi hmai ah cun a tonghnak a ruang le zei tin dah cu caan hrimhrim ah a damcolh ning ti kha a chimh. 48  Amah nih, “Ka fanu, na zumhnak nih an khamh cang, daihnak he va kal cang,” tiah a ti.

49 Cuti bia a chim lio ah khan mi pakhat cu pumhnak hruaitu inn in a rak ra i amah kha, “Na fanu cu a thi cang, Bawipa cu retheih pe duh ti hlah,” tiah a ti. 50 Sihmanhsehlaw Jesuh nih a theih tikah mipa cu, “Phang hlah, a zumh bel zum ko, a dam ko lai,” tiah a ti. 51 A inn an phanh tikah Peter le Johan le Jeim, cun ngakchianu i a nu le a pa, dah ti lo aho hmanh a luhpi hna lo. 52 Khika i a um mi vialte hna cu an ṭap len; asinain Jesuh nih, “Ṭap hlah u, a thi lo, aa hngilh,” tiah a ti hna. 53 Sihmanhsehlaw a thih kha an hngalh caah amah tu kha an nihsawh. 54 Sihmanhsehlaw Jesuh nih a kut in a vun tlaih i amah kha, “Tho tuah, ka fanu,” tiah a ti. 55 Cun a thlarau a hung kir ṭhan i hmatkhatte ah a tho colh. Cun rawl pek awk ah a chimh hna. 56 A nu le a pa cu an khuaruah a har tuk, asinain thil si ning kha aho hmanh an chimh hna nakhnga lo a cah hna.

Hleihnih hna mission

9 Hleihnih hna cu a auhṭi hna i annih kha khuachia ṭhawl khawhnak le zawtnak damter khawhnak huham le nawlngeihnak a pek hna, 2 cun Pathian pennak thanh awk le zawtnak damter awk ah a thlah hna. 3 Annih kha, “Nan khuatlawnnak ah zei hmanh i ken hlah u; ṭhiangthunh, zaal, changreu, tangka, cun angki leeng zunhnih i phorh hlah u. 4 Nan luhnak inn poh ah caam ko u; cun nan chuah tikah kha nan camnak inn in si ko seh. 5 Tluninn an pe lotu hna ca ah cun, cu khuapi in na chuah tikah, anmah ca ah tehte a si ding in, nan kebeh leidip kha va khawn hnawhtak hna u,” tiah a ti hna. 6 Cucaah an i thawh i khuakhat hnu khuakhat kal in thawngṭha kha an thanh i khuakip ah mizaw kha an damter hna. 

Herod le Jesuh

7 Cu lio ah mangki bawi Herod nih hi thil si ning vialte cu a theih, cun a khuaruah a har ngai, zei cah tiah micheu nih Johan kha thihnak in a tho ṭhan an ti, 8 cun a cheu nih Elijah a lang ṭhan an ti, cun adang nih hlan i profet pakhatkhat a tho ṭhan an ti rih. 9 Sihmanhsehlaw Herod nih, “Johan maw? Amah cu a lu ka rak tan cang. Cu asi ahcun hi bantuk in a thawngpang ka theih mipa hi aho dah a si hnga?” tiah a ti. Cucaah amah kha hmuh a duh ngaingai.

Lamkaltu an rak kir ṭhannak. Changreu khuaruahharnak

10 An rak kir ṭhan tikah Lamkaltu hna nih an hmuhton mi vialte cu an chimh. Cun anmah te lawng an um khawh nakhnga Bethsaida ti mi khuapi pawng ah aa zuhpi hna. 11 Asinain mibupi nih an hngalh i an zulh hna. A cohlanter hna i Pathian Pennak kong a chimh hna, cun damnak a herh mi hna kha a damter hna.

12 Zanlei tlainawn ah khin hleihnih hna cu a sin ah an rak ra i amah kha, “Kan umnak hi hmunking a si caah kan pawngkam khua hna le lo ah riahnak le eidin an i kawl nakhnga mi hi thlah hna,” tiah an ti. 13 Sihmanhsehlaw amah nih, “Ei awk pakhatkhat pe hna u,” tiah a ti hna. Annih nih, “Va kal i hi vialte minung ca ah kan va cawk dah ti lo, changreu panga le nga pahnih leng ah zei hmanh kan ngei lo,” tiah an ti. 14 Zei cah tiah pa thongnga hrawng an si. Sihmanhsehlaw a zultu hna kha; “Sawmnga sawmnga ti in a phuphu in ṭhutter hna u,” tiah a ti hna. 15 A chim ning in a phuphu in an ṭhutter hna. 16 Cun changreu panga le nga pahnih cu a lak, van a cau, cun thluachuah a pek, cu hnu ah a cheu i mibupi kha phawt awk ah a zultu hna cu a pek hna. 17 An zapi tein an duhzat an ei, cun a ṭilṭawt kha an char i seihleihnih khat a si.

Peter nih a zumhnak a phuan

18 Cun amah te lawng thla a cam lio ah khan a zultu hna cu a sin ah an ra, annih kha, “Mibu nih aho a si an ka ti dah?” tiah a hal hna. 19 Annih nih, “A cheu nih Baptisma petu Johan, adang nih Elijah, adang nih hlan profet pakhatkhat a nung ṭhan an ti,” tiah an leh. 20 Cu a si ahcun, “Nannih nih tah, aho a si nan ka ti dah?” tiah a ti hna. A tho i bia a chimtu cu Peter a si. Anih nih, ‘Pathian i Khrih na si,” tiah a ti. 21 Asinain annih kha hihi aho hmanh chimh lo ding ah fek tein bia a cah hna.

A temh-innak kong a chimchung a voikhatnak

22 Amah nih, “Mi Fapa cu temh-innak fakpi in awk ah khaukhih mi a si, upa hna, tlangbawi luban hna le phungbia cawnpiaktu hna nih an hlawt lai i an thah lai, cun nithumnak ah a tho ṭhan lai,” tiah a ti hna.

Khrih hnuzul hna ngeih ding mi nunzia

23 Cun, an dihlak sin ah a chim tikah amah nih, “Mi pakhat nih ka hnuzul si a duh ah cun amah le amah kha i hlaw seh law nifatin a vailamtung put in ka zul seh. 24 A nunnak khamh a duh mi paoh nih a nunnak a sung lai; sihmanhsehlaw keimah ca ah a nunnak a sung mi nih a nunnak a khamh lai. 25 Mi pakhat cu vawlei pumpi kha a co nain a mipum hrimhrim a buar, asilole a hrawh ahcun a ca ah zei dah a ṭhahnem? 26 Cucaah mi pakhat nih keimah le ka bia kha a zahpi a si ahcun mi Fapa hi a sunparnak le a Pa le vanmi thiang hna sunparnak he a rat tikah amah kha a zahpi ve lai.

Vancung pennak cu a ra zau lai

 27 Biatak kan chimh hna, hika a dir mi hna lak ah hin Pathian Pennak a hmuh hlan lo thihnak a tep lo ding cheukhat an um,” tiah a ti hna.

Muisam thlennak

28 Atu hi bia a chim hnu niriat tluk hrawng ah khin, Peter, Johan le Jeim hna kha a auh hna i thlacam awk ah tlang ah a kaipi hna. 29 Cuti thla a cam lio ah cun, a muisam a thleng i a hnipuan cu a tleu in a tleu. 30 Cun hmakhatte ah mi pahnih nih amah cu bia an ruah len; annih cu Moses le Elijah an si, 31 sunparnak he an rung lang, cun Jerusalem ah a tlinter ding mi a temh-innak kong kha an ruah. 32 Peter le a hawile hna cu thu hluahmah in an i hngilh ko, sihmanhsehlaw an hun i hlauh tikah a sunparnak le a pawng i a dir mi pahnih kha an hmuh hna. 33 Kha hna, a sin in an langh tikah Peter nih Jesuh cu, “Bawipa, hika um hi khuaruahhar ngai a si; cucaah deuthlam pathum in sa usih, nangmah ca pakhat, Moses ca pakhat le Elijah ca pakhat,” tiah a ti. Zei ka chim ti a hngal lo. 34 Cuti bia a chim lio ah cun, minmei a rung zam i a thladem in a  khuh hna; minmei chung an luh tikah a zultu hna cu an thin a phang. 35 Cun minmei chung in, “Hihi, ka thim mi, ka fapa a si. A bia ngai u,”ti in aw pakhat a rung thang. 36 Cu aw a vun daih tikah Jesuh cu amah lawng in a um cang. Cun a zultu hna cu dai tein an um, cun cu lio i an hmuh mi cu aho hmanh an chim hna lo.

Khuachia nih a tuah mi damternak

37 A thaizing tlang in an rung ṭum tikah mibu nganpi cu amah ton awk ah an ra. 38 Cun ruah lo pi in mibupi lak in mi pakhat cu a au i amah nih, “Bawipa, ka fapa na ka zohpiak naklai kan nawl ko, amah cu ka ngeihchunte a si. 39 Khuachia nih hmakhatte ah a luhhnawh tawn, a tlaih i voikhatpi ah a ai tawn, cun a tengh i a kaa in a buanbara a tawh; fawibai ah a kaltak duh lo, cun a kaltak tikah ngakchiapate cu a thahhnik tawn. 40 Ṭhawlpiak awk ah na zultu hna cu ka nawl hna nain an ṭhawl kho lo,” tiah a ti. 41 Jesuh nih, “Zumhnak tlawm le milungkhawng hna, zei caan tiang dah nan sin ah ka um lai i nan sin ah kaa ṭhumh rih lai? Na fapa cu hika ah ratpi,” tiah a ti. 42 Cun a rat lio hmanh ah khuachia nih a thluk i a hnuhdawh colh. Sihmanhsehlaw Jesuh nih thlarau ṭha lo cu a hro i ngakchiapa cu a dam, cun a pa kha a pek ṭhan, 43 cun mi vialte nih Pathian lianhngannak kha an hmuh tikah an ar dih.

A temh-innak kong a chimchung a voihnihnak

Mikip cu a tuah mi thil kong i khuaruahhar in an um lio ah khan, a zultu hna kha, 44 “Nannih tu cu hi bia hna hi nan lung ah nan riahter peng lai: Mi Fapa cu minung ṭhawnnak ah chanh a si lai,” tiah a ti hna. 45 Sihmanhsehlaw a chim mi cu an lung a tliang kho lo, a sullam an hngalh nakhnga lo an sin in thuhkanh a si, cun cu kong hal ding cu an ṭih.

Aho dah a ngan bik ?

46 An lak ah khan aho dah a ngan bik ti mi kong  ah bia-alnak a chuak. 47 Sihmnanhsehlaw Jesuh nih an ruah mi cu a hngalh, cun ngakchia pakhat cu a pawng ah a dirter i 48 annih kha, “Ka min in hi ngakchiate a cohlang mi poh cu keimah a ka cohlan a si; cun keimah a ka cohlang mi poh nih a ka thlahtu kha a cohlan ve. Nan lak i nauta bik kha a ngan bik a si” tiah a ti hna.

Jesuh min hmannak kong

49 Cu tikah Johan nih a thawh i, “Bawipa, mizeimaw nih na min in khuachia a ṭhawl kan hmuh, cun amah cu kanmah he a um mi a si lo caah kan thlauh,” tiah a ti. 50 Sihmanhsehlaw Jesuh nih, “Nan thlauh lai lo: nanmah an ralchan hna lo mi poh cu nanmah ca an si,” tiah a ti hna. 

IV: JERUSALEM LEI A TLAWNNAK

Samaria khua nih a cohlang lo

51 Atu cu vancung i an cawi lai caan a naih caah ciammam tein Jerusalemlei ah aa mer, 52 cun lamkaltu cu a hmai ah a thlah hna. Hi hna cu an chuak i amah ca timhtuahnak tuah awk ah Samaria khua pakhat ah an lut, 53 asinain Jerusalem kal ding a si caah amah cu an cohlang lo. 54 Hi thil an hmuh tikah, a zultu a si mi Jeim le Johan nih, “Bawipa, hi hna hi an kangh dih naklai van in mei thlak ding na kan duhpiak maw?” tiah an ti. 55 Sihmanhsehlaw aa mer i annih kha a hro hna, 56 cun khua dang ah an lan.

Lamkaltu si a harnak

57 Cuti an kal cuahmah lio ah khan mi pakhat an ton i amah nih, “Na kalnak poh ah kan zul lai,” tiah a ti. 58 Jesuh nih, “Cenghngia nih kua an ngei i van vate nih bu an ngei, sihmanhsehlaw Mi Fapa cu a lu chiahnak hmun a ngei lo,” tiah a leh.

59 Cun “Ka zul” tiah a ti mi adang  pakhat nih khan, “Kal in ka pa va vui ta ning,” tiah a leh. 60 Sihmanhsehlaw Jesuh nih, “Mithi nih an mithi cu vui ko hna seh, nang na rian cu va kal i Pathian Pennak kong thawngṭha va thanh kha a si,” tiah a ti.

61 Cun adang pakhat nih, “Bawipa, kan zulh ko lai, sihmanhsehlaw va kal in inn i ka chungkhat hna kha va chawnta hna ning,” tiah a ti. 62 Jesuh nih, “Voikhat leithuannak thuantum aa tlaih hnu i hnulei a her ṭhan mi cu Pathian Pennak he aa tlak lo,” tiah a ti.

Zultu sawmsarih le pahnih a thlah hna

10 Cu hnu ah Bawipa nih adang sawmsarih le pahnih kha a thim hna i pahnih pahnih in a kal nakding khua le hmun kip ah a thlah chung hna. 2 Cun annih kha, “Fang ṭuan awk tampi a um i a ṭuantu an tlawm, cucaah a ṭuantu a thlah hna naklai lo ngeitu cu hal u. 3 Atu thawk uh, sihmanhsehlaw, zoh u, cenghngia lak i tuufa bang kan thlah hna. 4 Tangka bawm siseh, zal siseh, kedan siseh i ken hlah u, lam ah aho hmanh chawn hna hlah u. 5 Zei inn i nan luh zong ah na bia hmasa bik cu, “Hi inn ah daihnak um ko seh,” ti hi si seh. 6  Cuka ah daihnak a duh mi a um ahcun nan daihnak cu amah he a um lai, asilole nan sin ah a rak kir ṭhan lai. 7 Khaka inn ah khan um uh, an in hunh mi hna ti le rawl  kha ei uh, zei cah tiah a ṭuantu cu a ṭuanman a hmuh awk a si. Innkhat hnu innkhat i ṭhial hlah u. 8 An cohlang mi  khuapi pakhatkhat nan luh poh ah, an in hunh mi hna poh cu ei uh. 9 An mizaw kha damnak pe hna ulaw annih kha, ‘Pathian Pennak cu nan pawngte ah a phan cang,’ tiah va chim hna u. 10 Sihmanhsehlaw khuapi pakhat ah nan luh i an in cohlan hna lo ahcun, lam ah va chuak ulaw annih kha, ’11 Kan ke ah aa benh mi nan khua leidip hrimhrim kha kan thintak dih hna, asinain hihi cu i fiang uh, Pathian Pennak cu a nai tuk cang,’ tiah va chim u. 12 Kan chimh hna; biaceih Ni ahcun cu khuapi cu Sodom nakin a in a fak deuh lai," tiah a ti hna.

13 “Khorizon, na ca ah ngaihchia a va si dah! Bethsaida, na ca ah ngaihchia a va si dah!  Zei cah tiah na khua chung ah tuah mi khuaruahharnak hna hi Tair le Sidon ah rak tuah si seh law buri i khuh in le vutcam i phulh in, an sual an i ngaihchihnak a sau tuk cang  hnga, 14 Biaceih Ni ah cun nangmah nakin Tair le Sidon khuami hna cu an in a din deuh te lai. 15 Nangtah, Kapernaum! van tiang maw cawi na duh? hell ah thlak na si lai. 

16 “Nan bia a ngai mi poh nih ka bia an ngaih; nanmah an hlaw mi hna poh nih keimah an ka hlawt ve, cun keimah a ka hlaw mi nih a ka thlahtu kha an hlawt ve,” tiah a ti hna.

Lamkaltu hna ca i lawmhnak taktak

17 Sawmsarih le pahnih hna cu thanuam ngai in an rak kir i amah kha, “Bawipa, na min kan hman tikah khuachia hmanh nih kan nawl an kan ngaih,” tiah an ti. 18 Anih nih, “Satan cu mimtlau bang van in a rak tlak kha ka hmuh ko. 19 Zoh hmanh u, rul le tlangngaikuang hna lamhchih khawhnak le nan ral vialte cung nawlngeihnak kan pek cang hna, zei hmanh nih harnak an pe kho hna lai lo. 20 Asinain khuachia nih nan nawl an in ngaih hna caah si lo in nan min cu vancung ah ṭial a si ca tu ah i lawm uh” tiah a ti hna.

Thawngṭha cu mi sawhawh hna sin ah phuan a si.  A pa le a Fapa

21 Hi caante ah hin, Thiang Thlarau lawmhnak he a khat i, amah nih, “Van le vawlei Bawipa, Ka Pa, hi vialte hi cathiam le mithiam hna sin in na thuh i ngakchia men hna sin ah na phuan caah kan lawm. 22 A si, ka Pa, zei cah tiah hihi nangmah nih na duh mi a si.  Zeizong vialte cu ka pa nih ka kut ah a ka chanh cang, cun ka Pa dah ti lo fapa cu aho a si ti le Fapa le Fapa nih an sin phuan ding a thim mi hna dah ti lo ka Pa cu aho a si ti kha an hngal lo,” tiah a ti hna.

Zultu sinak i a miak

23 Cun lamkaltu hnalei ah aa mer i anmahte lawng kha, “Nan hmuh mi a hmu mi nan mit cu thluachuak a si, 24 zei cah tiah nan hmuh mi hi profet le siangpahrang tampi nih hmuh an rak duh nain an hmu kho lo; theih an rak duh nain an thei kho lo,” tiah a ti hna.

Nawlbia ngan

25 Phungbia cawnpiaktu pakhat cu a dir i hneksak duh ah amah kha, “Bawipa zungzal nunnak co awk ah zei dah ka tuah lai,” tiah a hal. 26 Amah nih, “Phungbia ah zei dah aa ṭial? Zei tin dah na rel ning a si,” tiah a hal. 27 Anih nih, “Bawipa na Pathian cu na lungthin dihlak, na nunnak dihlak, na thazaang dihlak le na ruahnak dihlak in na dawt lai, cun na innpa cu nangmah bantuk in na dawt lai,’ ti in aa ṭial tiah a leh. 28 Jesuh nih, “A dik ning in na leh, hihi tuah law nunnak cu nangmah ta a si,” tiah a ti.

Samaria miṭhapa bianabia

29 Sihmanhsehlaw mipa nih cun miding a sinak kha langhter a duh i Jesuh cu, “Cun aho cu dah ka innpa a si?" tiah a hal. 30 Jesuh nih a lehnak cu, “Voikhat ah mipa pakhat cu Jerusalem in Jerikolei i a vung ṭum ah mifir nih an tlaih; a hnipuan an chuh, an velh i thi deng in an kaltak. 31 Tlangbawi pakhat cu cuka lam cun a vung ṭum ve, sihmanhsehlaw mipa cu a hmuh tikah khattelei kam in a hrial i a lan. 32 Cu bantuk cun kha lam in a ra mi Levimi pakhat nih a hmuh, cun khattelei kam in a hrial i a lan ve. 33 Sihmanhsehlaw khual a tlawng mi Samaria mipa pakhat cu amah kha a vun hmuh tikah a cung ah zaangfahnak lungthin a ngei. 

34 A fuh i a hma kha a tuampiak, chiti le mitsur a toih. Cun a cawi I s`il cungah a chuan, cun khualriahnak ah a kalpi i a zohkhenh. 35 A thaizing ahcun denari fanghnih a chuah i inn ngeitu kha a pek, cun amah kha, “Amah hi rak zohkhenh, cun ka rak kirlei ah na dih mi adang vialte cu tling tein kan pekchap lai,” tiah a ti. 36 “Hi hna pathum ah hin, na ruahnak ah aho hi dah mifir nih an tlaih mipa i a innpa a sinak kha a langhter?” tiah a hal. 37 Anih nih, “Amah a zaangfahtu kha,” tiah a leh.  Jesuh nih, “Va kal law cuti cun va tuah ve,” tiah a ti.

Martha le Mary

38 An khualtlawn lamthluan ah khan khuate pakhat an va phan, cun Martha an ti mi minu pakhat nih a inn ah a tlunter hna. 39 Mary an ti mi nau pakhat a ngei i amah cu Bawipa kehram ah ṭhu in a bia kha a ngai. 40 Cu lio ah chuankhin ah a lungsi a vang mi Martha cu a sin ah a ra i amah kha, “Bawipa ka nau nih riantuan ding vialte keimah lawng a ka rinh hi na zei a poi lo maw? A ka bawmh nakhnga, zangfahnak in, ka chimhpiak tuah,” tiah a ti. 41 Sihmanhsehlaw Bawipa nih, “Martha, Martha, thil tampi kong ah na lungre a thei i na ing a puang, 42 nain a herh mi cu tlawmte lawng a si, a taktak tiah pakhat lawng a um. A ṭha deuh mi aa thim mi cu Mary a si, cun amah kha chuh awk a si lo,” ti a leh.

Bawipa thlacamnak

11 Cu hnu ah amah cu hmunkhat ah thla a cam, cun thla a cam a dih tikah a zultu pakhat nih,"Bawipa, Johan nih a zultu hna kha thlacam a cawnpiak hna bang in kan cawnpiak ve,” tiah a ti. 2 Annih kha, “Thla nan cam tikah nan chim ding cu hihi a si:

Kan pa, na min cu thianter si ko seh, na pennak tlung ko seh. 3 Nitin kan rawl cu nifatin  kan pe ko sawh, 4 cun kanmah zong nih lei a kan bami kan ngaihthiam hna bang in kan sualnak cu kan ngaithiam ve ko tuah. Cun hneksaknak chung ah kan luhter hlah.

A herh lio hawikom

5 Cun annih kha, “Nanmah lak i pakhatkhat nih hawikom a ngei i zanṭim ah a hawipa sin ah a va kal i amah kha, ‘Ka kawi, changreu pathum in ka cawih chung, 6 zei cah tiah khual pakhat cu atu te kha a rak phan i hunh awk zei hmanh ka ngei lo,” a va ti tikah 7 a hawipa nih inn chung in, “Hna ka hnawh hlah, innka kan hrenh cang, cun ka fale hna zong keimah he ihkhun ah an si cang; tho in kan pe kho ti lo,” ti in a leh ti usih. 8 Kan chimh hna; a hawi a si caah a tho i a pe lo nain a halchihnak nih a hawi cu a thawhter lai i a duh mi vialte cu a pek ko lai,” tiah a ti hna.

Hmual a ngei mi thlacamnak

9 Cucaah kan chimh hna; hal u, pek nan si lai; kawl u, nan hmuh lai, king u, innka hunh nan si lai. 10 Zeicahtiah a hal mi poh nih an co; a kawl mi poh nih an hmu; a king mi poh cu innka hunpiak an si. 11 Nan lak ah hin a fapa nih nga a hal tikah rul a pe mi nan um hnga maw?’ 12 asilole, arti a hal tikah tlangngaikuang a pe mi nan um hnga maw? 13 Nanmah hmanh nih hi tluk nan chiakha nain, nan fale kha thil ṭha pek nan hngalh ahcun, vancung i nan Pa nih cun Thiang Thlarau a hal mi kha zei tluk in dah a pek chinchin hna lai!

Jesuh le Beelzebul

14 Khuachia kha a ṭhawl i amah cu a holh kho lo mi a si; cun khuachia cu a chuak tikah mipa cu a holh kho,  cun mi cu an khuaruah a har dih. 15 Asinain micheu nih, “Khuachia bawi Beelzebul thawng in khuachia a ṭhawl hna,” tiah an ti. 16 Adang nih, hneksak duh ah, vancung in hmelchunhnak an hal; 17 sihmanhsehlaw an khuaruahnak kha a hngalh caah annih kha, “Pakhat le pakhat aa do mi pennak poh cu rawhralnaklei ah a panh, aa do mi chungkhar cu an i tlukhnawh. 18 Satan zong cutin a si ve: amah le amah aa do ahcun zei tin dah a pennak cu a hmunh khawh lai? -zei tin tiah Beelzebul thawng in khuachia a ṭhawl hna nan ka ti cang. Atu Beelzebul thawng in khuachia ka ṭhawl a si ahcun nan fale hna tah aho thawng in dah khuachia an ṭhawl hna? Annih cu nan biaceihtu an si lai.

20 Sihmanhsehlaw Pathian kutdong in khuachia ka ṭhawl a si ahcun Pathian Pennak cu nan theih lo kar ah an phak cang hna. 21 Mithawngpa nih hriamnam tling he a inn a ven chung poh cu a chawva cu a him, 22 sihmanhsehlaw amah nakin a ṭhawng deuh mi nih a tuk i a tei tikah cun a rak i bochan mi a hriamnam vialte a lak i a hranchaw cu a phawtzamh dih hna.

Lam dang a um lo

23 Keimah he a um lo mi poh cu a ka ralchanh mi an si; cun keimah he a khawn lo mi poh cu a hlonh a si.

Thlarau thiang lo a kir ṭhannak

24 Thlarau thiang lo cu mipakhat chung in a chuah tikah umnak kawl in ramcar lak ah a vak, cun pakhat hmanh a hmuh lo tikah, ‘Ka chuahnak inn ah ka kir ṭhan lai,’tiah a ti. 25 A phak i, thiang hirhiar le rem tein a um kha a hmuh tikah, 26 a chuak i amah nakin a chiakha deuh mi thlarau pasarih kha aa ratpi hna, cun an lut i a chung ah umhmun an khuar, cucaah kha pa cu hmasa a si ning nak zual deuh in a nunnak a dong,” tiah a ti.

Thluachuah a hmu taktak mi

27 Cuti bia a chim lio ah khan, mibupi lak i minu pakhat cu a aw thangpi in,”Nangmah an pawi mi paw le an cawm mi hnuk cu mi thluachuak a si!” tiah a au. 28 Sihmanhsehlaw amah nih, “Cu nakin thluachuah a hmu deuh mi cu Pathian bia kha a thei i aa nunpi mi hna an si,” tiah a leh.

Jonah hmelchunhnak

29 Mibupi cu a ṭhang chin lengmang i annih kha, “Hihi chanchia minung si; Hmelchunhnak kha a hal; pek ding mi pakhat te lawng hmelchunhnak cu Jonah hmelchunhnak a si. 30 Zei cah tiah Jonah cu Nineveh khuami hna ca ah hmelchunhnak a si bang in Mi Fapa zong, hi chanmi hna ca ah hmelchunhnak a si ve lai. 31 Biaceih Ni ah cun thlanglei siangpahrangnu cu hi chan minung ralchanh in a tho lai i sual a phawt te lai, zei cah tiah amah cu Solomon siangpahrang fimnak theih duh ah vawlei deng in a rak ra; cun zoh hmanh u, hika ah hin Solomon nakin a ngan deuh mi pakhat a um. 32 Biaceih Ni ah cun Nineveh khuami hna cu hi chan minung ralchanh in an tho lai i sual an phawt te hna lai, zei cah tiah Jonah nih phung a chimh hna tikah an sual an i ngaihchih; cun, zoh hmanh u, hika ah hin Jonah nakin a ngan deuh mi pakhat a um." tiah a ti hna.

Mei-inn bianabia a nolh ṭhan

33Aho hmanh nih meiinn van in a kiannak hmun zeimaw, asilole rel tang ah an chia bal lo.  An rung luh tikah mi nih khua an hmuh nakhnga mei-tung cung ah an toh tawn hna. 34 Pumsa i meiinn cu nan mit a si. Na mit a ṭhat tikah na pumpaluk zong ceunak in a khat ve, sihmanhsehlaw a zawt tikah na pum zong a mui ve. 35 Cucaah nan chung i ceunak cu a muih  nakhnga lo i ralring uh. 36 Zei cah tiah na pum pumpaluk cu ceunak in a khah, cun muihter a si hrimhrim lo ahcun, meiinn nih an ceuh bantuk in ceunak in a khat dih lai.

Farasimi hna le phungbia cawnpiaktu hna cu doh an tong

37 Bia a chim dih tlawmpal ah Farasipa nih a inn ah zanriah ei a sawm. Inn ah a lut i rawl ei awk ah a ṭhu. 38 Rawl ei hlan ah a kut aa ṭawl hmasa lo kha Farasipa nih a hmuh tikah a khuaruah a har. 39 Sihmanhsehlaw Bawipa nih amah cu, “Nannih Farasimi hna! Hrai le kheng a lenglei cu nan thianh, cu lio ah nan chung ah cun hakkauhnak le ṭhat lonak in nan khat. 40 Mihrut hna! Lenglei a ser mi nih a chunglei zong a serchih a si lo maw? 41 Cu nakcha cun nan ngeih mi  chung in mi kha va pe hna u, cun zoh hmanh uh, nan ca ah zeizongte cu a thiang lai. 42 Sihmanhsehlaw nannih Farasimi hna, mi vanchia nan si! Zei cah tiah khamhhmuai, puṭinan le adang dumchuak hanghnah tiang cheuhra cheukhat nan pek i Pathian dinnak le dawtnak tu cu nan thlahdorh! Adang hna kha thlahdorh lo in hi hna hi nan tuah awk a si. 43 Nannih Farasimi hna, mi vanchia nan si! Zei cah tiah nannih cu pumhnak inn i upa ṭhutnak le chawdawr hmun i biakchawnh mi si kha nan tlaihchan. 44 Mi vanchia nan si! Zei cah tiah nannih cu chinchiahnak an tuah lo caah mi nih zei hngal lo in an lamhchih mi thlaan he nan i lo," tiah a ti hna.

45 Cu tikah phungbia cawnpiaktu pakhat cu a tho i, “Bawipa, hiti bia na chim tikah hin kanmah zong na kan serhsat ve,” tiah a ti. 46 Cun anih nih, “Nannih phungbia cawnpiaktu hna zong mi vanchia nan si ve, zei cah tiah phorh khawh lo ding thilrit kha mi cung ah nan khinh i nanmah vial nih cun nan kutdong hmanh in nan tawng duh lo. 47  Nan ca ah vanchiat a si, zei cah tiah nan pupa hna nih an rak thah mi profet hna thlaan cu nan serpiak hna. 48 Hiti hin nan pupa hna an rak tuah mi cu tehte ah nan dir i hna nan tlakpi hna, annih nih an thah hna i nannih nih an thlaan nan ser.

49 Cu caah Pathian fimnak nih, ‘Profet le lamkaltu hna kha ka thlahpiak hna lai, a cheu cu an hrem hna lai i an thah hna lai, 50 cuti cun tuchanmi hna nih vawlei hramthawk in rak thlet mi profet kip i thisen, 51 Abel thisen in, biakṭheng le hmunthiang kar, a rak paam mi Zekhariah tiang, thisen man cu nan cham te lai,’ tiah a rak ti. A si, kan chimh hna, tuchanmi nih hin kha vialte ca ah a cham a herh te lai.

52 Hngalhnak tawh aa lak mi nannih Phungbia cawnpiaktu hna, nan ca ah ngaihchia a si! Nannih zong nan lut lo i luh a duh mi hna zong kha nan kham hna,” tiah a ti hna. 53 Khi hmun in a chuah tikah Phungbia cawnpiaktu hna le Farasimi hna nih thinhung ngai in an doh cang, 54 relcawk lo biahalnak kha an tuah i a chim mi bia zeimaw in foih an i zuam.

Ṭih lo in langhhngan i a cawnpiaknak

12 Cu lio ah mi cu a thongthong in an rak i pumh i an cung an I kai cang Cun hmasa bik ah a zultu hna kha a cawnpiak hna i a ti mi hna cu, “Farasimi hna thilnu - depdetnak- kha i ralring u. 2 Atu i huh mi vialte cu hun an si lai, cun atu i a fiang lo mi vialte cu fianter an si dih lai. 3 Hi ruang ah hin khuamui i nan chim mi vialte cu khuaceu ah theih an si lai i hmunking i nan chim mi biathli vialte cu innthlung in thanh an si te lai.

4 Ka duale hna, kan chimh hna. Pum kha a that i cu hnu ah zei hmanh a tuah kho ti lo mi kha va ṭih hlah u. 5 Aho dah ṭih awk ti mi cu kan chimh hna lai: pumsa kha a thah hnu ah hell ah a thla khotu kha va ṭih u. A si, kan chimh hna, amah cu nan ṭih awk a si. 6 Pithlung panga kha piahnih in nan cawk khawh a si ko lo maw? Asinain pakhatte hmanh kha Pathian hmai ah philh a si lo. 7 Zei cah tiah, nan lu cung i nan samfa kip cu a rel dih cang hna. Na ṭih awk zei hmanh a um lo: nannih cu pithlung tampi nakin nan sunglawi deuh suaumau.

8 Kan chimh hna; mi hmaika ah ka mi a sinak kha langhngan in a phuang mi poh cu Mi Fapa zong nih ka mi a sinak kha Pathian vancungmi hna hmaika ah ka phuan ve lai. 9 Sihmanhsehlaw mi hmaika ah a ka hlaw mi poh cu Pathian vancungmi hna hmaika zong ah ka hlawt ve lai.

10 Mi fapa dohnak bia a chim mi poh cu ngaihthiam an si lai, sihmanhsehlaw Thiang Thlarau a thangchiat mi poh cu ngaihthiam an si lai lo.

11Pumhnak inn le uktu hna le nawlngeitu hna hmai ah an in chuahpi hna tikah zei tin i dirkamh ding, asilole, zei bia dah ka chim lai ti kha phang hlah u, 12 zei cah tiah a caan a phak tikah nan chim ding cu Thiang Thlarau nih an chimh te hna lai,” tiah a ti hna.

Chawva khonnak kong

13 Mibupi lak in mi pakhat nih, “Bawipa, ro a ka cheuh ve nakhnga ka unau cu ka chimhpiak tuah,” tiah a ti. 14 Amah nih, “Ka kawi, aho nih dah nan biaceihtu, asilole nan chawva ṭhentu ah a ka thiah,” tiah a leh. 15 Cun annih kha, “I ralring u, Hakkauhnak phunzakip in i veng uh, zei cah tiah mi pakhat cu a herh mi hlei a ngeih hmanh ah nunnak hi chawva ah aa hngat lo,” tiah a ti hna.

16 Cun hi bianabia hi a chimh hna. “Voikhat ah a lo in rawl tampi a la mi mirumpa pakhat a rak um, 17 amah nih, ‘Ka rawl chiahnak a um ti ṭung lo, zei dah ka tuah hnga,’ ti in a ruat len. 18 Cun amah nih, ‘Hihi ka tuah lai: ka rawlbuk ka ṭheh lai i a ngan deuh mi ka sak lai, cun a chung ah ka rawl le ka thilri vialte ka khon hna lai, 19 cun ka thlarau cu: Ka thlarau, a ra lai mi kum tampi ca ah thilri tampi na ngei cang; hnangam tein um cang, ei law ding law i nuam ko,’ ka ti lai,” tiah a ti. 20 Sihmanhsehlaw Pathian nih amah cu, “Mi hrut! Tuzan hrimhrim ah hin na thlarau cu ka lak cang lai; cun hi thilri liangluang hi aho ca dah an si lai?” tiah a ti. 21 Cu bantuk in Pathian hmai ah rum i tim lo in chawva lawng a khong mi cu a si ve,” tiah a ti hna.

Thluachuahnak 

22 Cun a zultu hna kha, “Hi caah nan nunnak ca ah le zei dah nan ei lai, asilole, nan pum ca ah le zei dah nan i thuam lai ti mi kong ah nan lungre thei hlah seh,” kan ti hna. 23 Zei cah tiah nunnak cu rawl nakin le pum cu hniphun nakin a biapi deuh. 24 Langak hna khi ruat hmanh uh; an tuh lo i an zun lo; thilchiahnak le rawlbuk zong an ngei lo; nain Pathian nih a cawm ko hna. Nannih cu vate hna nakin zei nan sunglawi deuh tuk!  25 Zei tluk i nan lungre a theih zong ah aho tal nih nan nunnak cu dongkhat tal nan chap kho maw?  26 Thil hmete hmanh nan thil tikhawhnak pinlei ah a um a si ahcun zei cah dah thil dang ca ah nan lungre a theih? 27 Pangpar hna  zei tin dah an ṭhan ti khi ruat hman uh: la kher in thiam an tak bal lo, asinain hihi kan chimh hna, Solomon hmanh nih a bawi thuam vialte he hi pangpar pakhat tluk in aa thuam bal lo. 28 Atu nihin a kho i thaizing meiphu chung paih ding mi ram hna hmanh Pathian nih hi tluk in a thuamh hna ahcun, hi tluk in a zumhnak a tlawm mi nannih cu, zei tluk in dah an zohkhenh chinchin hna lai.  29 Sihmanhsehlaw nan lungthin cu ei le din cung ah nan chia lai lo, asilole, nan lungre a thei lai lo. 30 Hi thil hna cung ah a lung a chia mi hna cu hi vawlei i Jentailmi hna an si. Nan Pa nih nan herh mi hna cu a hngalh tuk. 31 A si lo, Pathian pennak cung ah nan lung chia u, cun adang vialte cu chapchih nan si lai.

32 Turun hmetete hna, ṭih awk a um lo, zei cah tiah nanmah kha a pennak pek cu nan Pa i a lung lawmhnak a si. 

Pek ṭhenhnak

33 Nan chawva kha zuar ulaw a herhbau mi kha va pe hna u. A ṭet kho lo mi phaisa bawm, a dong kho lo mi chawva, cun zei mifir hmanh nih an phak khawh lonak le zei rungrul hmanh nih an hrawh khawh lonak, vancung ah khin i chiah u. 34 Zei cah tiah nan chawva umnak poh ah nan lungthin zong  a um ve.

Bawipa kirnak can ca timhcia in um u

35 Nan taisawm sawmhcia le nan meiinn vancia in um u. 36 Nupi ṭhitnak puai in a rak ṭinmi an bawipa kha a hngak mi, a phak i innka a kingh cangka hunpiak awk ah timhcia in a um mi hna bang in um u. 37A rak ṭin tikah hngilh lo a um a hmuh mi sal hna cu mi thluachuak an si. Biatak kan chimh hna, a taisawm aa sawmh lai, cun cabuai a kulhter hna lai i a bultawl hna lai. 38 A rak ṭin cu suimilam pahnihnak caan, asilole pathumnak caan a si kho men, sihmanhsehlaw timhcia in a um a hmuh mi sal hna cu mi  thluachuak an si. 39 Hihi cu nan i fian tuk ding a si, inn ngeitu nih mifir a rat caan kha a theih a si ahcun aho hmanh a inn vanpang in a luhter hna hnga lo. 40 Nannih zong timhcia in  um u, zei cah tiah Mi Fapa cu nan i ruah lo caan ah a ra lai,” tiah a ti hna.

41Peter nih, “Bawipa hi bianabia hi kanmah ca ah maw, asilole mikip ca ah dah?” tiah a ti. 42  Bawipa nih, “A chungkhar hna kha an caante ah an covo cio pek awk ah a bawipa nih rian a pek ding mi, a fim le zumh awktlak inn zohkhenhtu ding,  cu aho dah a si? 43 A bawipa a rak phak tikah a chimh ning tein a tuah a hmuh mi sal cu thluachuak mi a si. 44 Biatak kan chimh hna; amah cu a ngeih mi chawva vialte zohkhentu ah a ser lai.  45 Sihmanhsehlaw cu sal nih cun amah le amah kha, 'Ka bawipa cu a rau rih ko lai,’a ti, cun sal hna kha nu he pa he a tuk a velh hna, cun a ei a ding i a rit ahcun, 46 a bawipa cu aa ruah lo ni le a hngalh lo caan ah a rak kir te lai. A bawipa nih amah cu a sam cikcek lai i nawl ngai lo hna umnak ah a kuat te lai.

47 A bawipa duh mi a hngal ko nain zei hmanh timhcia in a chia lo mi le a duh ning in zei hmanh a tuah lo mi sal cu fakpi le voi tampi tuk aa huah lai; 48 A hngal lo nain tuk phu in a cawlcang mi cu tlawm deuh tuk a huah lai. Tam deuh a co mi hna sin in tam deuh hal ṭhan an si lai; thil tampi cung ṭuanvo a ngei mi pa sin in tam deuh ruahchan a si ve lai,” tiah a ti.

Jesuh le a temhinnak

49 “Vawlei ah hin meici thlak awk ah ka ra, cun alh hluahmah cang seh law ti ka hei duh dah! 50 Hmuh ding mi Baptismanak pakhat ka ngei, cucu a tlin hlan cu ka si a vang!

Jesuh lung a ṭhennak hrampi

51 Vawlei ah hin remdaihnak lenter awk ah maw hika ah a um tiah nan ka ruah? A si lo, ṭhennak tu ah a si. 52 Zei cah tiah atu thawk in panga a um mi chungkhar cu an i ṭhen lai: pathum nih pahnih an doh lai i pahnih nih pathum an doh lai; 53 Apa nih a fapa, a fapa nih a pa, a nu nih a fanu, a fanu nih a nu, a pi nih a monu, a monu nih a pi a doh lai.

Khuacaan zohthiamnak

54 Cun mibupi kha, “Nitlaklei in khuadawm a hung kai tikah hmakhatte ah ruah a sur lai nan ti, cun a sur taktak. 55 Cun thlanglei in thli a hung hran tikah a linsa lai nan ti, cun a linsa taktak. 56 Mi depde hna! van le vawlei si ning zei tin rel ding ti cu nan hngalh. Zei tin dah hi thil si ning hna rel ding cu nan hngal lo? 

57 Zei ruang ah dah thildik cu zei hi a si ti cu nanmah tein nan ceih ko lo? 58 Abiana ah: an dohdaltu he zung ah nan i thawh tikah,  lam ah amah he remnak ser i zuam, cutin na tuah lo ahcun, biaceihtu hmai ah an hnuh len kho, biaceihtu nih ṭuanvo ngeitu kut ah an chanh lai i amah nih thong ah an thlak lai. 59 Kan chimh hna; hmanung bik piasen na pek hlan na chuak lai lo.

Sual i ngaihchih ding sawmnak bianabia hna

13 Kha caan hrawngte ah khan mi cheukhat an rak phan i Pilat nih an raithawinak he an thi a cawh mi Galilee mi hna kong kha an chimh. 2 Cu tikah Jesuh nih annih kha, “Hi thil an cung i a tlun caah hi Galileemi hna cu midang vialte nakin a sual deuh mi hna ah maw nan ruah? 3  Naisai, kan chimh hna, an si lo; sihmansehlaw nannih zong nan sual nan i ngaihchih lo ahcun anmah bantuk in nan rawk ve ko lai. 4 Asiloah, Siloam i innsaang nih a tlukhnawh i a thi mi pahleiriat hna kha teh? Annih cu Jerusalem i a um mi vialte hna nakin a sual deuh mi ah maw nan ruah hna? 5 Naisai, kan chimh hna, an si lo; sihmanhsehlaw nannih zong nan sual nan i ngaihchih lo ahcun anmah bantuk in nan rawk ve ko lai,” tiah a ti hna.

A tlai lo mi theipi kung bianabia

6 Hi bianabia cu a chimh hna, “Mi pakhat nih a dum ah theipi kung pakhat a cin, cun a thei lawh awk ah a rak chuah tikah a hmu lo. 7Cu tikah dum hngaktu cu “Kumthum chung hi theipi kung i thei lawh awk ah ka ra cang i zei hmanh ka hmu lo. Hau ko: zei  ruang ah dah non a ei rih hnga?” tiah a ti. 8 Cu tikah mipa nih, “Bawipa, kumkhat cu chia rih ko law a hram velchum ka cawh lai i non ka toih lai. 9 Cun kumvoi ah a tlai kho men, a tlai lo ahcun na hau kho lai,” ti in a leh.

Sabbath ni ah a zeng minu a damternak

10 Sabbath ni nikhat ah khan pumhnak inn pakhat ah a cawnpiak hna, 11 cun a hmaika ah khan khuachia nih kumhleiriat chung a tlaih i a zeng mi minu pakhat a um; a keng cu lethnih in a kun i dingte hmanh in a dir kho lo. 12 Jesuh nih mah minu kha a hmuh tikah a hei auh i amah kha, “Minu, na zawtnak in luatter na si cang,” tiah a ti, 13 cun a cung ah a kut a chuan. Cun hmakhatte ah ding tein a hung dir i Pathian cu a thangṭhat.

14 Sihmanhsehlaw Jesuh nih Sabbath ni i mi a damter caah pumhnak inn hotu cu a thin a hung, cucaah cuka a um mi vialte hna cu, “Rianṭuan ni niruk a um i cu ni hna nikhatkhat ah ra ulaw rak i damter ngat u, Sabbath ni ah si hlah seh,” tiah a ti hna. 15 Sihmanhsehlaw Bawipa nih a leh i a ti mi cu, “Midepde hna! Sabbath ni ah a caw siseh a laa siseh a kawm in a hri phoihpiak in ti a dinter lo mi a ho tal nan um maw? 16 Cun hi minu, Satan nih kumhleiriat chung a rak hren cang mi  Abraham fanu hi-  Sabbath ni ah a hri phoihpiak cu a dik ko lo maw?,” tiah a ti hna.  17 Hi a chim tikah a ral vialte hna cu an lung hmanh a fim ti lo, cun mi zapi cu a tuah mi khuaruahharnak ruang ah lawmhnak in an khat.

An `ṭmci bianabia

18 Cun a peh rih mi cu, “Pathian Pennak cu zei dah a lawh?  Zei he dah ka tahchunh hnga? 19 Cucu mipa nih aa lak i a dum ah a vorh mi anṭam ci he aa lo: a ṭhang i thingkung ah aa cang, cun van vate hna nih a ṭengnge hna ah an i dor, "tiah a ti.

Thilnu bianabia

20 Cun amah nih, "Pathian Pennak cu zei he dah ka tahchunh hnga? 21 Nu pakhat nih aa lak i changvut relkhat chung ah a phulh i a ningpi in a thawhter mi thilnu he aa lo," tiah a ti.

Kutka bi; Judahmi hna hlawtnak, Gentilemi hna auhnak

22 Khuapi le khuate hna kha cul in a cawnpiak thluahmah hna, cun Jerusalem kha a hei naih thluahmah. 23 Mi pakhat nih amah cu, “Bawipa, tlawmte lawng maw khamh an si lai?” tiah a ti. 24 Amah nih,“Kutka bi in luh i zuam uh, zei cah tiah, kan chimh hna, mi tampi cu luh an i zuam lai nain an lut kho lai lo.

25 Voikhat inn ngeitu a tho i innka a khaar cang cun nannih cu innka hram ah dir i innka kinghpah in, 'Bawipa, kan hunpiak tuah,' nan ti len te lai, sihmanhsehlaw amah nih, ‘Khuazei in nan rat kan hngal hna lo,' ti an leh te hna lai. 26 Cu tikah nannih nih,'Voikhat ah pei na sin ah kan ei i kan din ve kha; kan lam ah pei na kan cawpiak kha,’ nan ti len te lai, 27 sihmanhsehlaw amah nih , 'Khuazei in nan rat kan hngal hna lo, ṭhat lonak tuahtu vialte hna, ka sin in chuak dih u,' tiah an ti te hna lai.

28 Abraham, Isak, Jakob le profet hna vialte cu Pathian Pennak chung ah, cun nannih vial cu leng ah hlonh nan si kha nan hmuh tikah ṭahnak le hacang rialnak a um lai. 29 Cun mi cu nichuah, nitlak, chaklei le thlanglei ti in an ra lai i Pathian pennak chung rawldanghnak puai ah cun an ṭhu hna lai.

30 "Zohhmanh u, atu i hmanung bik cu hmasa bik a si te lai i atu i hmasa bik cu hmanung bik a si te lai,"tiah a ti hna.

Cenghngia Herod

31 Cu caante ah cun Farasimi cheukhat cu an hung chuak. Annih nih amah cu, “Kal, hika in chuak, zei ruang ah tiah Herod nih thah an timh,” tiah an ti.  32 Amah nih, ‘Kal ulaw kha cenghngia kha hiti hin nan va chimh khawh! nihin le thaizing ah khuachia ka ṭhawl lai i mi ka damter hna lai, cun nithumnak ni ah kaa tinh mi cu ka tlinh lai. 33 Sihmanhsehlaw Profet pakhat Jerusalem khualeng i thih cu a phung a si lo caah nihin, thaizing le kiptuh cu ka rian ka peh rih ko lai a ti,’ ti in a leh hna.

Jerusalem ralrin peknak

34 Jerusalem, profet hna kha a that hna i a sin ah thlah mi kha lung in a rak cheptu, Maw Jerusalem! Arpi nih a fale hna kha a thla in a humzual hna bang in voi zeizat dah na fale cu hmunkhat ah humzual ka rak duh nain na duh lo! 35 Zoh hmanh! Na inn hna cu kaltak an si cang lai. A si, kan kamh, nangmah nih, “Bawipa min in a ra mi cung ah thluachuahnak um ko seh,” na ti hlan cu na ka hmu ti lai lo,” tiah a ti.

Sabbath ni ah a phingmi a damter

14 Cuu Sabbath ni nikhat ah Farasi hna lak i haotu pakhat inn ah zanriah hrawn ah a val kal, cun naihniam tein an ngiat. 2 A hmaika ah khan a takpum a phing  mi pakhat a um, 3 cun Jesuh nih phungbia thiam hna le Farasimi hna kha, “Sabbath ni ah mi pakhat damnak pek hi phungbuar a si maw si lo?" tiah a hal hna. 4 Sihmanhsehlaw annih cu an dai khipkhap ko; cucaah mipa cu a damter i a kalter. 5 Cun annih kha, “Hika a um mi nannih lak ah hin a fapa, asiloah, a caw cu tikhor ah tla sehlaw khulrang in Sabbath ni ah a chuah lo mi nan um hnga maw?" tiah a ti hna. 6 A leh awk an hngal lo.

Cabuai ah ṭhutnak i hamnak kong

7 Ṭhutnak ṭhaṭha an i thim kha a hmuh hna tikah sawm mi hna cu hi tahchunhnak hi a chimh hna. 8 “Mi pakhat nih ṭhitumhnak puai ah an in sawm tikah upa ṭhutnak ah va ṭhu hlah. Nangmah nakin upa deuh an sawm khawh men, 9 cu tikah an sawmtu cu a ra lai i nangmah kha, 'Hipa hi ṭhutnak kian tuah,’ an ti khawh men. Cu tikah, hmaichia in tho in tang bik hmun ah na va i thawn lai i a niam bik hmun ah na va ṭhu lai. 10 A si lo, rawlhrawn an in sawm tikah a niambik hmun ah va kal law va ṭhu, cuti cun, inntekpa a rat tikah nangmah kha, ‘Ka kawi, cung ah hin hung kai,’ tiah an ti lai. Cu tikah nangmah he cabuai a kulh mi hna nih khan upat mi na si kha an in hmuh lai. 11 Zei cah tiah amah le amah aa cawisang mi cu ṭ humh an si lai i amah le amah aa niamter mi  cu cawisan an si lai.

Sawm ding mi thim ningcang

12 Cu tikah inntekpa kha, “Chuncaw asilole zanriah dumṭinak na tuah tikah na hawile, na unau, na chungkhat, asilole na innpa mirum hna kha va sawm hna hlah, an in sawm ve i an in cham sual lai, 13 a si lo; rawldanghnak na tuah tikah misifak, pumtling lo, mizeng le mitcaw hna kha va sawm hna; 14 cu tikah thluachuahnak na co lai, zei cah tiah annih nih cun cham ding zei hmanh an ngeih lo caah miding hna an thawh ṭhan tikah nangmah cu cham na si lai,” tiah a ti.

A ra duh lo mi sawm mi hna

15 Hi bia a theih tikah rawl a ei ve mi pakhat nih, “Pathian Pennak chung i rawl aa hrawm ve ding mi hna cu mi thluachuak an va si dah!” tiah a ti. 16 Sihmanhsehlaw amah kha, “Rawldanghnak puai nganpi a tuah mi mipa pakhat a rak um i mi tampi kha a sawm hna. 17 Ei a cut tikah a sawm mi hna kha, “Ra cang u; zeizongte timhcia a si cang,” ti awk ah a sal cu a thlah. 18 Sihmanhsehlaw an zapi tein an rat khawh lonak ruang cu an chim cio. Pakhatnak nih,‘Vawlei ka cawk i ka va zoh ta lai; ka ngaithiam hram ko,' tiah a ti. 19 Adang nih, ‘Cawtum tuahnga ka cawk i va hmang hnik ning ka ti; ka ngaithiam hram ko,' tiah a ti. 20 Cun adang pa nih, 'Nupi ka ngeihka a si i ka ra thiam lai lo,’ tiah a ti.

21 A sal cu a rak kir i a bawipa cu a chimh. Cun inntekpa cu, thinhung ngai in, a salpa cu, 'Khulrang in zatlanglam le inn karlak tiang va kal law misifak, pumtlam tling lo, mitcaw le mizeng pawl kha rak chuahpi hna,' tiah a ti. 22 Cun a salpa nih, ‘Bawipa na chim ning in tuah a si cang nain ṭhutnak cu a lawng ko rih,” tiah a ti. 23 Cu tikah a Bawipa nih a sal cu, “Ka inn a khah nakhnga lamthlurpi le lamṭe kip ah va kal law mi cu va sawm chih hna; 24 zei cah tiah, kan chimh hna, “Sawm mi aho hmanh nih ka rawl cu an tep lai lo,” tiah a ti hna.

Tlaihchan mi vialte hlawtnak

25 Mibu nganpi nih amah cu an zulh lulhmalh; a hnulei aa mer i annih kha, “26 A pa, a nu, a nupi, a fale, a unau, a farle, a si, amah hrimhrim huat hmasa lo in ka sin a ra mi aho hmanh  a ka zultu an si kho lo. 27 A vailam tung put lo in a ka zul mi poh cu a ka zultu an si kho lo.

Ngeihchiah hlawtnak

28 Biatak in, hika a um mi nanmah lak ah hin, mi pakhat nih innsang sak aa timh tikah, ṭhut in limnak ding ah ka chawva hi a za lai maw za lo ti a tuaktan hmasa lo mi nan um hnga maw? 29 Cutin a si lo ahcun, a hram a domh i a dih khawh lo tikah, a hmu mi kip nih capo ah an saih lai i amah cu, 30 ‘Hika ah hin mizeimaw nih innsak aa thawk i a lim kho lo,’tiah an ti lai. 31 Asilole, siangpahrang pakhat nih adang siangpahrang doh aa thawh tikah ṭhu  hmasa in ka mi thonghra nih khattelei in a rak ra mi thongkul an dirh kho lai maw ti a tuak hmasa lo mi aho tal an um hnga maw? 32 Tei khawh lo ding a si ahcun, kha siangpahrang dang kha lamhlat pi i a um lio ah khan remnak ser awk ah lamkal a thlah hna lai. 33 Cu bantuk in nannih zong a ngeih mi vialte a kaltak lo mi aho hmanh ka zultu nan si kho lo.”tiah a ti hna.

Zultu pakhat a lung a zor tikah

34 “Cite cu a ṭha mi thil a si. Sihmanhsehlaw a alnak a dih ahcun, zei nih dah a alter ṭhan khawh lai? Vawlei ca  ah siseh, non pon ca ah siseh a ṭhatnak a um ti lo. An hlonh ko cang. Ngaihnak hna a ngei mi poh nih an ngaih awk a si,” tiah a ti hna.

Pathian zaangfahnak kong tahchunhnak pathum hna

15 Ngunkhuai khawltu hna le misual hna nih a bia ngaih ah an butlulh ko. 2 Cu tikah Farasimi hna le Phungbia cawnpiaktu saya hna nih, “Hipa hi misual a cohlan hna i a eipi hna,” tiah an zai. 3 Cu tikah hi bianabia hi a chimh hna.

Tuu tlau kong 

4 “Nanmah lak ah hin mi pakhat nih tuu zakhat hei ngei ulaw, pakhat a tlau ahcun, sawmkua le pakua kha ram lak ah kaltak in a tlau mi a hmuh hlan lo a kawl lo mi nan um hnga maw?  5 Cun a hmuh tikah, lawmhnak in a liang ah aa khinh hnga lo maw, 6 cun, inn a tlun tikah a hawile le a innpa hna kha sawm in, ‘A tlau mi ka tuu ka hmuh ṭhan cang caah ka lawmhpi ve u,’ a ti hna hnga lo maw? 7 Cu bantuk  in, kan chimh hna, vancung zong ah sual ngaihchih a herh lo mi miding sawmkua le pakua nakin a sual aa ngaihchih mi pakhat ruang ah lawmhnak a tam deuh lai,” tiah a ti hna.

Tangka tlau kong

8 Cun, ngun tangka piahra a ngei  mi nu pakhat, pia khat a thlau ahcun, mei-in i van, a inn kha phiak in a tlau mi kha a hmuh hlan lo ṭha tein a kawl lo mi aho nu a um hnga? 9 Cun, a hmuh tikah, a hawile le a innpa hna cu sawm in, annih nih, “A tlau mi tangka ka hmuh caah ka lawmpi tuah u,” a ti hna lai. 10 Cu bantuk in, kan chimh hna, a sual a ngaihchih mi pakhat ca  ah Pathian vancungmi hna lak ah lawmhnak tampi a um,” tiah a ti hna.

Fapa tlau le a fel mi fapa 

11Cun amah nih, “Fapa pahnih a ngei mi pakhat a rak um.12 Fapa hniang nih a pa cu, ‘Ka pa, ka co ding mi ro cu ka pe tuah,” tiah a ti. Cucaah a pa nih a chawva cu a cheuh hna.13 Ni tlawmpal a rauh hnu ah a fahniang nih cun a chawva vialte a khawmh i lamhlapi ah a chuak, khika ah a duhduh in a nung i a phaisa cu a va sawksam hna.

14 A ngeih mi vialte a hloh dih tikah, khika ram ah mang`am fakpi in a tlung, cun atu cu a paw ṭam in a bu a hri cang; 15 cucaah khua mi pakhat sin ah aa hlawhfa i cu pa nih  cun vok rawl pek awkah dum ah a kalpi. 16 Cun vok nih an ei mi bekawng hmanh kha ṭamlen ning ti a duh nain aho hmanh nih an pe lo. 17 Cu tikah a lung a hung fim i a ti mi cu, “Ka pa sin i aa hlawhfa mi pa zeizat nih dah ei cawk lo rawl an ngeih, cu lio ah kei cu hika ah rawlṭam in ka thi cang lai. 18 Hi hmun in ka chuak lai i ka pa sin ah ka kal lai i ka pa kha, 'Ka pa, vancung le nangmah cung ah ka sual cang; na fa ti auh awk ah kaa tlak ti lo; na sin i aa hlawtfa  mi pakhat bangin ka cohlang ve ko,’ tiah ka ti lai a ti. Cucaah a chuak i a pa sin ah a kir.

20 Lam hlapi i a um lio ah khan a pa nih a hei hmuh i a zaang a fak ngaingai, ngakchiapa sin ah a tli, a kuh i a hnamh. 21 Cun a fapa nih, “Ka pa, vancung le nangmah cung ah ka sual cang, na fapa ti auh awk ah kaa tlak ti lo,” tiah a ti. 22 Sihmanhsehlaw a pa nih a salle hna cu, “I hnawh u! Hnipuan ṭha bik kha va la ulaw rak hruk uh; a kut ah kutdonghrolh rak hrolh ulaw a ke ah kedan rak danh u. 23 Kan cenh  mi cawfa kha va la ulaw that u; puai tuah hna usih, 24zei cah tiah hi ka fapa cu a rak thi i atu a nung ṭhan; a rak tlau i atu kan hmuh ṭhan.” tiah a ti. Cun puai an tuah.

25 Atu a fapa upa deuh cu lo ah a um i lo cun a rak tlung,  inn a hun naih tikah,  hlasak le laam thawng a theih. 26 A sal pakhat kha thil si  ning vialte cu a hal. 27 Cu sal  nih cun, “Na naupa a phan, him tein a rak phak caah na pa nih cenh mi caw kha a thahpiak,” tiah a leh. 28 Cu tikah a thin a hung i a lut duh lo, cu tikah a pa cu a rak chuak i luh awk ah a nawl,  29 sihmahsehlaw a pa bia kha tan in amah nih, “Hi kum liangluang hi na sal ka ṭuan i na bia kaakhat hmanh kan al bal lo nain ka hawile he puai tuahnak ah meheh pakhatte hmanh na ka pe bal lo.30 Sihmanhsehlaw hi na fapa, na chawva vialte, amah le nu vaivuan hna he a ei dih mi cu a rak kir ṭhan tikah cenh mi caw fate cu na thahpiak,” tiah a ti.

31 Apa nih, “Ka fapa, nang cu keimah he na um peng i ka ngeih  mi vialte cu nangmah ta an si dih. 32S ihmanhsehlaw puai tuah i kan i lawmh ding cu a hman mi hrimhrim a si, zei cah tiah hika i na naupa cu a rak thi i atu a nung ṭhan; a rak tlau i kan hmuh ṭhan,” tiah a ti.

A zermi thil zohkhenhtu

16 Hi zong hi a zultu hna cu a chimh hna, “Mirumpa pakhat a rak um i cu pa nih cun a thilri a vaivuanhter ti in thawng an pek mi a thil zohkhenhtu pakhat a ngei. 2 Cu pa cu a kawhter hna i amah kha, “Na kong ka theih mi hi zei tin dah a si? Ka thil cazin kha tuak law ka pe tuah, zei cah tiah ka thil zohkhenhtu na si ti lai lo,” tiah a ti.  3  Cu tik ah thil zohkhenhtu nih khan amah le amah cu, ‘Atu cu ka bawipa nih a thil zohkhenhnak rian a ka chuh ṭhan cang lai. Zei dah ka tuah hnga? Vawlei cawh?  Cu tluk in ka ṭhawng lo, halchawm vah? Ka ning a zak tuk lai. 4 Um, ka rian in a ka chuah tikah micheu nih an inn ah an ka cohlan nakhnga zei dah ka tuah lai ti ka hngalh cang,” tiah a ti.

5 Cu tikah  a bawipa lei a ba mi hna kha pakhat hnu pakhat a auh hna. Pakhatnak pa kha, “Ka Bawipa cu zeizat dah na bat,” tiah a ti, 6 amah nih, “Chiti pung zakhat,” tiah a ti. Thil zohkhenhtu nih, “Ṭhu law khulrang in na cazin cu sawm nga ti in ṭial” tiah a ti. 7Adang pakhat kha, “Nang tah, ka saya cu zei zat dah na bat?” tiah a ti. Anih nih, “Changvut rel zakhat,” tiah a ti. Thilri zohkhenhtu nih, “Na cazin i lak law sawmriat in ṭial,” tiah a ti.

8 A bawipa nih a hrokhrol mi a thil zohkhenhtu cu a zernak caah a thangṭhat. Zei cah tiah hi leicung fale hna cu an vawlei thil tuahtonak kong ah ceunak fale hna nakin an fim deuh” tiah a ti.

A dik ning in tangka hmannak

9 Cucaah hihi kan chimh hna: tangka cu, cu tluk in a thurhnawm nain, hawikom sernak ah hmang u, cun nan tangka a dih tikah annih nih zungzal umnak hmun ah an in cohlan hna nakhnga i zuam. 10  Thil hmete i zumhtlak a simi poh cu thil lianngan zong ah zumhtlak a si ve. Thil hmete i a ding lo mi poh cu thil lianngan zong ah a ding ve lo. 11 Nannih cu tangka, cu tluk a thurhnawm mi hmanh ah zumhtlak nan si lo ahcun aho nih dah rumnak taktak he an zum hna lai? 12 Nanmah thil a si lo mi hmanh ah zumhtlak nan si lo ahcun aho nih dah nanmah ta taktak cu an pe hna lai?

13 Aho hmanh nih Bawi pahnih sal a si kho lo. Pakhat kha a dawt lai i pakhat kha a huat lai, asilole, pakhatnak pa kha a komh lai i pahnihnak cu a zomhtaih lai. Pathian le tangka sal na ṭuanṭi kho lo,” tiah a ti hna.

Farasimi hna le tangka an duhnak ralchanh in

14 Farasimi, tangka a duh ngai mi hna nih hi vialte an theih tikah  amah kha an nihsawh.15 Annih kha, “Mi hmai ah miding bantuk aa umter mi cu nanmah hrimhrim hi nan si, sihmanhsehlaw Pathian nih cun nan lungthin kha a hngalh ko. Zei cah  tiah minung mit ah sang ngai  in hmuhmi cu Pathian hmai ah fihnung an si.

Pennak luh an i cuh cang

16 Johan chan tiang ah cun Phungbia le profet hna hi an si; cu hnuvah cun, Pathian pennak kong cu phuan a si cang, cun mikip nih luh an i cuh cang.

Phungbia cu a hmun ko

17 Phungbia chung i a deh pakhat a lohnak cun van le vawlei a dih hi a fawi deuh.

Hrawh khawh lo mi a thiang ṭhitumhnak

18 A nupi a ma i nupi dang a ṭhi mi poh nih ṭangdangpom sualnak a tuah cang, cun mak mi nu a ṭhi mi pa nih ṭangdangpom sualnak a tuah ve cang.

Mirumpa le Lazaruh

19 Hnipuan ṭhaṭha aa hruk i nifate puai lawng a tuah mi mirum pakhat a rak um. 20 Cun a kutka hram ah khan hma in a khat mi Lazaruh an ti mi misifak pakhat a it tawn, 21 mirumpa cabuai in a tla mi rawl ṭiltlawt in a ṭam i hnemh a duh. Uico tiang nih an ra i a hma kha an liahpiak. 22 Cun Lazaruh cu a thi i vancung i Abraham ṭang cung ah an zuanpi. Mirumpa zong cu a thi ve i an vui.

23 Hremhmun Mithi khua in cunglei a hun zoh i lamhlatpi ah khin Abraham le a ṭaang i Lazaruh kha a hun hmuh. 24 Cu tikah amah nih, “Ka pa Abraham, ka zaangfah law a kutdong kha ti ah hnim in ka dang car a daihter nakhnga Lazaruh cu run thlah hram ko, zei cah tiah hi meizik hna lak ah hin ka tem tuk cang,” ti in a au. 25 Abraham nih, “Ka fapa, na nun lio ah thil ṭha vialte in na khat i Lazaruh tu cu vanchiatnak vialte in a khah kha philh hlah. Atu, anih cu hika ah hin hnemhnak a hmuh i nang cu nganfahnak na in. 26 Cu pin ah; kan karlak ah hin horkua thukpi pakhat a um, cucu hika in nanmah lei ah, asilole nanmah lei in kanmah lei ah a tan duh mi khamnak caah a si,” tiah a ti.

27 Cu tikah amah nih, “Cu a si ahcun, ka pa, Lazaruh kha ka pa inn ah na thlah nakhnga kan nawl ko, 28 zei tin tiah unau panga ka ngei hna i annih zong hi hremhmun ah an rat ve nakhnga lo ralrinnak va pek awk ah a si,” tiah a ti. 29 Abraham nih, “Moses le profet an ngei ko hna, anmah bia kha ngai ko hna seh,” tiah a ti. 30 Mirumpa nih, “Aa, a za lo, mithi khua in mizeimaw an kal ahcun an sual an i ngaihchih ko lai,” tiah a leh. 31 Cu tikah Abraham nih, “Moses le profet hna bia an ngaih lo ahcun mithi khua in mi pakhatkhat a thawh zong ah an zum i an cohlang hlei lai lo,” tiah a ti.

Midang lam pialpinak

17 Jesuh nih a zultu hna kha, “Tluknak a chuahpitu ding an rat lai cu a fiang ko, asinain tluknak a chuahpitu ca ah cun vanchiat a va si dah! 2 Hi ngakchiate lak i pakhatte a tlukter nak cha cun amah cu a hngawng ah lungsum thlaih in rili ah thlak hmanh a ca ah a ṭha deuh lai. I ralring u.

Unau i chimhhrinnak

3 Na unau nih na cung ah thil ṭha lo a tuah ahcun amah kha va chimhhring, cun aa ngaihchih ahcun va ngaithiam. 4 Cun nikhat ah voisarih na cung ah ṭhat lonak a tuah i voisarih tiang na sin ah ra in, ‘Ka ngaithiam,’ an ti ahcun, na ngaihthiam hrimhrim lai,” tiah a ti.

Zumhnak thazaang

5 Lamkaltu hna nih Bawipa cu, “Kan zumnak ṭhanter tuah,” tiah an ti. 6 Bawipa nih, “Anṭam ci ngaw zumhnak nan ngeih ahcun hi theihmung kung hi, ‘Na hram in i phoi law rili ah vaa phun,’ nan ti lai i nan nawl an ngaih hna lai,” ti a leh hna.

Toidor nun

7 Nanmah lak ah hin, lei a thuang mi, asilole tuu a zohkhenh mi, nan sal pakhat cu, inn a rak tlun tikah, ‘Ra law rawl rak ei colh,’a ti mi nan um hnga maw? 8 Ka zanriah ka serpiak, na taisawm i sawmh law ka ei lio cu ka hngak ko; nang tu cu hnu ah na ei te lai, nan ti deuh hnga lo maw? 9 A fial mi rian a ṭuan caah a sal cu a lawmh hnga maw? 10 Cu bantuk in nannih cung zong ah a si ve. Tuah ding rian vialte nan dih tikah, nanmah le nanmah kha,‘Kannih cu santlai lo sal kan si; kan rian hlei in kan tuah mi zei hmanh a um lo ti uh,” tiah a ti hna.

Thinghmui zawtnak a ngei mi pahra hna

11 Cun Jerusalemlei an kal ah Samaria le Galilee ramri lam kha a zawh. 12 Khuate pakhat a vung luh ah khin ṭihnung thinghmui hma a ngei mi pahra hna cu amah ton awk ah an rak chuak. Lamhlat nawn in an dir i 13 amah kha, “Jesuh! Bawipa! Kan zaangfah ko,” ti in an au. 14 A hmuh hna tikah anih nih, “Kal ulaw tlangbawi vaa hmuhsak uh,” tiah a ti hna. Cuti cun an kal lio ah khan an thiang dih. 15 Anmah lak i pakhat cu a dam kha a hmuh tikah a rak kir i Pathian cu a aw dih- um in a thangṭhat.  16 A kehram ah a bawk i Jesuh cu a lawmh. Cu pa cu Samariami a si. 17 Hi nih hin Jesuh cu, “An pahra ning in an dam ko lo maw? Adang pakua hna tah khua zei ah dah an um? 18 Hi ramdangmi dah ti lo Pathian thangṭhat awk ah aho hmanh an rak kir lo,” tiah a ti. 19 Cun mipa kha, “Tho law kal cang. Na zumhnak nih an khamh cang,” tiah a ti.

Pathian pennak a ratnak kong

20 “Pathian Pennak cu zei tik ah dah a phanh te lai,” tiah Farasimi nih an hal tikah hiti hin a leh hna, “Pathian Pennak a rat cu aa theihter lai lo, 21 cun, “Zoh hmanh uh, hika ah a um hih! Zoh hmanh uh, khika ah a um khih! a titu aho hmanh an um lai lo. Zei cah tiah, zoh hmanh u, Pathian Pennak cu nan lak ah a um ko,” tiah a ti hna.

Mi Fapa Ni

22 A zultu hna kha, “Mi Fapa ni hna kha hmuh nan duh ngai nain nan hmuh khawh lo caan a phan te lai. 23 Mi nih nannih cu, “Zoh hmanh uh, khika ah a um khih! Zoh hmanh uh, hika ah a um hih,” an in ti te hna lai. I thawn hlah uh, va dawi hlah u; 24 zei cah tiah khattelei vankam in a lek mi nimtlau nih khattelei kam kha a ceuh bantuk in a Ni a phanh tikah Mi Fapa cu a si ve te lai. 25 Sihmanhsehlaw amah cu fakpi in a tuar lai i hi chan minung hna nih an hlawt hmasa lai. 

26 Noah chan lio bang in Mi Fapa chan zong ah a si ve lai. 27 Noah lawng chung a luh tiang mi cu an ei an ding, an i ṭhi i an i um; cun buanchukcho a tlung i a hrawh dih hna. 28 Lot chan lio bantuk in a si ve lai: mi cu an ei an ding, an zuar i an cawk, an phun i an sa, 29 sihmanhsehlaw Sodom in Lot a chuah ni ah khan, van in mei le kat a sur i a hrawh dih hna. 30 Mi Fapa aa langh lainak ni a phak tikah cu bantuk in a si ve te lai.

31Cu ni a phak tikah cun, innthlung i a um mi aho hmanh nih inn chung i a thilril khawmh awk ah ṭum hlah seh, asilole lo i a um mi aho hmanh nih kir hlah seh. Lot nupi kha philh hlah uh. 32-33 A nunnak humhim aa zuam mi poh nih a sung lai; cun a nunnak a sung mi poh nih a humhim lai. 34 Cun kan chimh hna, cu zan ah cun, ihkhun pakhat ah mi pahnih an it lai i pakhat cu lak a si lai i pakhat cu nganhtak a si lai; 35 nu pahnih sum an suk lai i pakhat cu lak a si lai i pakhat cu nganhtak a si lai,” tiah a ti hna. 37 A zultu hna nih an i thawh i, “Bawipa, khua  zei ah dah,” tiah an hal. Amah nih, “Saruak a umnak ah laangta zong an i um ve,” tiah a leh hna.

 36 Lo ah pahnih an um  lai, pakhat cu lak a si lai i pakhat cu nganhtak a si lai.

A van a chia  mi Nuhmeinu le a dik lo mi biaceih bawi

18 Cu tikah pehzulh le lungdong lo in thlacam a herhnak kong bianabia cu a chimh hna. 2 Amah nih, “Khuapi pakhat ah Pathian zong a ṭih lo i aho hmai hmanh a zah lo mi biaceihtu pakhat a rak um. 3 Cu khua ah cun, “Ka ral ralchanh in nangmah thawng in dinnak ka duh!” ti in atu le atu a rak ra mi nuhmeinu pakhat a um ve. 4 Caan saupi a tuahpiak lo, sihmanhsehlaw hmanung bik ah amah le amah kha, ‘Pathian zong ka ṭ ih lo i aho minung hmai hmanh ka zah lo, 5 nain hi Nuhmeinu cu ngol lo in a rat caah a ding mi a covo cu ka pek lai, asilole  a ra lai i ka hmai a ka bengh sual lai,” tiah a ti.

       6 Cun Bawipa nih, “A dik lo mi biaceihtu nih zei a chim ti cu nan thei ko lo maw? 7 Pathian nih tah, zokzok in an thlacamnak  a leh hna lo hmanhah a sin ah chunchun zanzan a au mi hna cu dinnak a tuahpiak hna hnga lo maw? 8 Kan kamh hna, dinnak a tuahpiak ko hna lai, khulrang in. Sihmanhsehlaw Mi Fapa a rat tik ah vawlei ah hin zumhnak tlawmte tal a hmu hnga maw?" tiah a ti.

Farasipa le ngunkhuai khawltu

9 An dinfelnak aa porhlaw i midang kha a nautat mi cheukhat hna sin ah hi bianabia hi a chimh hna. 10 Mi pahnih cu thlacam awk ah Biakinn ah an kai, pakhat cu Farasi mi a si i adang pakhat cu ngunkhuai khawltu a si. 11Farasipa cu a dir i hiti hin thla a cam, “Pathian, keimah cu midang bang  in, a bik in, hika i ngunkhuai khawltu bang hin, mithil a chutmi, thil dik lo a tuah mi le ṭ angdangpom sualnak a tuahmi ka si lo caah kan lawmh. 12 Zarhkhat ah voihnih rawl ka ulh; ka ngeih mi vialte chung in cheuhra cheukhat ka pek,” tiah a ti. 13 Ngunkhuai khawltu cu, vanlei hmanh zoh ngam lo in lamhlat nawn khin a dir, cun a ṭaang aa cum i, “Pathian, misual keimah hi ka zaangfah hram ko,” tiah a ti. 14 Hi pa cu, kan chimh hna, ngaihthiamnak hmuh in a ṭin, adang cu a hmu lo. Zei cah tiah amah le amah a cawisang mi poh cu ṭhumh an si lai, sihmanhsehlaw amah le amah a niamter mi poh cu cawisan an si lai,” tiah a ti hna.

Jesuh le ngakchia hna

15 A tongh hna nakhnga bawhte tiang kha an rak chuahpi hna; sihmanhsehlaw a zultu hna nih an hmuh hna tikah an sik hna. 16 Asi nain Jesuh nih ngakchia cu a sin ah a auh hna i annih kha, “Ngakchia hna cu ra ko hna seh, kham hna hlah u, zei cah tiah Pathian Pennak cu hi bantuk hna i ta a si. 17 Biatak kan chimh hna, Pathian pennak kha ngakchia hna nih an cohlan bang in a cohlang lo mi poh cu pennak chung ah an lut bal lai lo,” tiah a ti hna.

Mirum pa

18 Uktu bawi pakhat nih, “Saya ṭha, zungzal nunnak co awkah zei dah ka tuah lai?” tiah a hal. 19 Jesuh nih amah kha, “Zei cah dah a ṭha mi na ka ti? Pathian dah ti lo aho hmanh an ṭha lo. 20 Ṭangdangpom sualnak tuah hlah; Lai va nawng hlah; Va fir hlah; A hmaan lo mi bia va dirpi hlah; Na nu le na pa va upat hna;” ti mi nawlbia cu na hngalh ko ṭung," tiah a ti. 21 Anih nih, “Hi vialte hi ka ngakchiat lio tein ka tuah dih cang hna,’ ti in a leh. 22 Hi bia a theih tikah Jesuh nih, “Na bau mi  pakhat a um. Na ngeih mi vialte zuar dih hna law tangka cu misifak va hrawmh hna, cu tikah vancung ah chawva na ngei lai; cun ra law ka zul,” tiah a ti.  23 Sihmanhsehlaw hi bia a theih tikah a ngaih a chia ngaingai, zei cah tiah amah cu a rum ngaingai mi a si.

Rumnak `ihnung

24 Jesuh nih amah kha a zoh i a ti mi cu, “Chawva tampi a ngei mi hna ca ah vancung Pennak lamthluan zawh cu a va har hringhran dah!  25 A si, a rum mi pakhat vancung pennak chung i luh nakin kalauk pakhat ṭhimkaa chung i luh a fawi deuh,” tiah a ti. 26 A bia a ngai mi pawl nih, “Cuti a si ahcun aho dah khamhnak a hmu kho lai?” tiah an ti. 27 Amah nih, “Minung si ning in a si kho lo mi thil hna cu Pathian ca ah cun an si kho ko,” tiah a ti hna.

Zeizongte kaltak man

28 Sihmanhsehlaw Peter nih, “Zoh hmanh, kan ngeih mi vialte hlawt in kan in zulh cang,” tiah a ti.  29 Annih kha, “Biatak kan chimh hna, Pathian Pennak ca ah a inn, a nupi, a unau, a nule a pa, asilole, a fale a kaltak mi poh, 30 atu chan ah a let tam khawh chung in, cun a ra lai mi chan ah zungzal nunnak a hmu lo mi aho hmanh an um lai lo,” tiah a ti hna.

A temh-innak kong a voithumnak a chim

31 Cu tikah hleihnih hna cu hmundang ah a kalpi hna i annih kha, " Zoh hmanh u “Jerusalem ah kan kal lai, cun Mi Fapa kong ah Profet cauk hna ah aa ṭial mi vialte an tling cang lai. 32 Zei cah tiah amah cu Jentailmi hna kut ah chanh a si lai i capo ah an saih lai, an serhsat lai i an cil an chak lai, 33 cun fung in an tuk hnu ah an thah lai; cun nithumnak ah a tho ṭhan lai,” tiah a ti hna. 34 Sihmanhsehlaw zei dah a chim duh ti an hngal lo; a bia cu an ca  ah a thuk ko, a chimh mi hna cu an lung a tliang kho lo. 

Jeriko a luhnak le Mitcaw pa

35 Cun Jeriko a hei naih ah khan lamkam ah ṭhu in thil a hal mi mitcaw pakhat a um. 36 Mibupi an lanh thluahmah thawng a theih tikah zei dah a cang tiah a hal hna, 37 cun annih nih, ‘Nazareth khuami Jesuh a lanh lio a si,’ an ti. 38 Cu tikah amah nih, “David fapa, Jesuh, ka zaangfah tuah,” ti in a au. 39 Hmai i a kal mi hna nih amah cu an hro i daite in a um nakhnga an chimh, sihmanhsehlaw anih nih cun, “David fapa, ka zaangfah tuah,” ti in a au chinchin. 40 Jesuh cu a dir i mipa cu a sin ratpi awk ah a chimh hna, an ratpi tikah 41 amah nih, “Zei dah tuahpiak na duh?” tiah a hal. Anih nih, “Bawipa, khua hmu ṭhan ka duh ko!” tiah a leh. 42 Jesuh nih, “Khua hmu ṭhan ko cang; na zumhnak nih an khamh cang,” tiah a ti. 43 Cun hmakhatte ah khua a hmu ṭhan i Pathian thangṭhat in Jesuh cu a zulh, mi zapi nih an hmuh i Pathian cu an thangṭhat.

Zacchaeus

19 Jeriko khua ah a lut i khuapi chung cu a hrawn, 2 cun ruah lo pi in Zakheus an ti mi mipa pakhat cu a hung chuak; amah cu ngunkhuai khawltu lak i upa le mirum pakhat a si. 3 Jesuh cu aho a si ti hmuh aa zuam len, sihmanhsehlaw a tung a niam tuk i mibupi nih an phenh caah a hmu kho lo; 4 cucaah hmai ah a tli i kha lam in a ra lai mi Jesuh kha chikkhat tal hmuh awk ah saikamu kung ah a kai. 5J esuh cu a hmun a phak tikah a hun zoh i amah kha, “Zakheus, khulrang in rung ṭum, zei cah tiah nihin cu na inn ah ṭhumh ka tim,” tiah a ti.  6 Cu tikah a rung ṭum i amah cu lunglawm tein a cohlan. 7 Thil si ning kha an hmuh tikah an zapi in, “Misual inn i i ṭhumh awk ah a kal cang,” ti in an zai. 8 Sihmanhsehlaw Zakheus cu a hung dir i Bawipa kha, “Zoh hmanh, bawipa, ka chawva hnarcheu cu misifak ka pek hna lai, cun mi pakhatkhat ka rak hlen sual ahcun a let li in ka cham lai,” tiah a ti. 9 Cu tikah Jesuh nih amah cu, “Nihin ah khamhnak cu hi inn ah a phan cang, zei cah tiah hi pa zong hi Abraham fapa a si ve; 10 zei cah tiah Mi Fapa cu a tlau mi kawl i khamh awk ah a ra,” tiah a ti.

Ngun tangka bianabia

11 Mizapi nih hi bia an ngaih lio ah khan bianabia pakhat a chimh rih hna, zei cah tiah amah cu Jerusalem a hei naih cang i Pathian pennak cu khika le khi tikah aa phuang cang lai ti in an ruah. 12 Cucaah amah nih, “Ramuk bawi pakhat cu siangpahrang can ding ah lamhlapi ah kal in rak kir ṭhan ding a si. 13 A sal pahra kha a auh hna i phaisa poundhra cio a pek hna i annih kha, “Ka rak kir hlan lo, hi tangka hin chaw rak let u,” tiah a ti hna. 14 A ram mi nih amah cu an duh lo i, ‘Hi pa hi kan siangpahrang ah kan duh lo,’ ti mi bia he lamkaltu phu cu a hnu in an dawiter hna.

 15 Cun siangpahrang cannak kha a hmuh i a rak kir tikah, chawlehnak in a miak zei zat dah an hmuh cang ti hngalh duh ah tangka a pek mi hna cu a auhter hna. 16 Pakhatnak pa cu a ra i, “Bawipa, na tangka poundkhat nih poundhra a chuahpi cang,” tiah a ti. 17 Amah nih, “A ṭha tuk, ka sal ṭha! Thil hme tete ah zumhtlak na sinak na langhter cang caah khualipi khuahra uktu ah kan chiah lai,” tiah a leh. 18 Cun a pahnihnak a ra i amah kha, “Bawipa, na tangka poundkhat nih pound nga a chuahpi cang,” tiah a ti. 19 Hi pa zong cu “Cun khualipi panga zohkhenhtu na si lai,” tiah a ti.  20 Cun adang pa kha a ra i amah kha, “Bawipa, na tangka cu hika ah a um ko. Puanchia in ka fun i him tein ka chiah ko, 21 nangmah cu kan ṭih; zei cah tiah nang cu mikhepkha na si; na pho lonak ah na ruh ton i na tuh lonak zong ah na zun tawn,” tiah a ti.   22 Amah kha, “Nang sal chiahru! Na bia lila in sual kan phawt. Kei cu mikhepkha ka si; ka pho lonak ah ka ruh i ka tuh lonak ah ka zun tawn cu na hngalh tih? 23 Asi ahcun zei cah dah ka tangka cu ban ah na rak chiah ko lo? Ka kir tikah a karh he ka chuah hnga lo maw,” tiah a ti.  24 Cun a pawng i a dir mi hna kha, “A sin in tangka cu la ulaw poundhra a ngei mi pa kha pe u,” tiah a ti hna. 25 Cu tikah annih nih, “Sihmanhsehlaw Bawipa, amah cu poundhra a ngeih cang ṭung- - - -,” tiah an ti. 26 Amah nih, “Kan chimh hna, a ngei mikip cu chapchih an si lai; sihmanhsehlaw a ngei lo mi poh cu a ngeihcia hmanh kha chuh an si lai. 27 “Cun an siangpahrang si ding in a ka duh lo mi ka ral hna tu cu, hika ah hin rak chuahpi hna ulaw ka hmaika ah hin that hna u,’ tiah a ti,” tiah a ti hna.

V: JERUSALEM I CAWNPIAKNAK

Messiah  cu Jerusalem ah a lut

28 Hihi a chim dih tikah a khualtlawn cu a peh i Jerusalem lei ah aa thawh. 29 Cun Oliv Tlang tiah auh mi pawng i a um mi Bethfeih le Bethani khua a phak tikah a zultu pahnih cu a thlahchung hna i annih kha, 30 “Kan ralchan khua ah khin va kal u, cun khuachung nan luh tikah cit rih bal rih lo mi laa note nan va hmuh lai. A hri phoih ulaw hika ah rak hruai u. 31 Mi pakhatkhat nih, ‘Zei cah dah nan phoih,’ an in ti hna ahcun, ‘Kan Bawipa nih a herh’ nan ti hna lai,” tiah ati hna. 32 Lamkaltu hna cu an kal i zeizongte cu a chimh hna ning in an va hmuh. 33 Laa note an phoih lio ah khan a ngeitu hna nih, “Zei ruang ah dah nan phoih len?” tiah a ti hna, 34 cu tikah annih nih, “Kan Bawipa nih a herh,” ti in an leh.

35 Cun laa note cu Jesuh sin ah an rak hruai, a keng ah an puan an phah,  Jesuh cu an citter. 36 A kal tikah khan  an hnipuan cu lam ah an phah hna. 37 Oliv Tlang chukzuan a hei naih tikah a zultu hna phu cu an ningpi in an hmuh mi khuaruahharnak vialte ca ah lunglawmhnak in an aw dih-um in Pathian cu an thangṭhat. 38 Annih nih:

Bawipa min in Siangpahrang in a ra mi cung ah thluachuah vanluhnak um ko seh! Vancung ah daihnak um she law a sang bik van hna ah sunparnak um ko seh! tiah an au.

Jesuh nih a conglawmh mi a zultu hna cu a dirkamh hna

39 Mibupi lak i Farasimi cheukhat nih amah cu, “Bawipa, na zultu hna hi chimhring hna,” tiah an ti, 40 sihmanhsehlaw annih kha, “Kan chimh hna, hi hna an daih ahcun lung hna nih an au lai,” ti in a leh hna.

Jerusalem a ṭahnak

41 A vun naih deuh i khualipi a langhnak a vun phak tikah a caah a mithli a thlak, 42 cun amah nih, “Nihin ni ah hin nangmah zong daihnak lam na hei hngalh ahcun mu! Sihmanhsehlaw na mit in thuhkanh a si cang! 43 A si, na ral hna nih ralhruang in an in kulh caan cu a phan lio, an in kulh lai i a kenkip in an in sam lai; 44 An in thluk lai i na vanpang chung i na fale hna cu vawlei ah an tengh hna lai: lung pakhat cung ah pakhat hmanh i chonh lo in an kaltak lai, zei cah tiah Pathian nih an veh hnanak caan kha na rak hngal ti lo,” tiah a ti.

Biakinn in chawdawr hna a ṭhawl hna

45 Cun Biakinn chung ah a lut i chawletthal pawl kha, 46 “Cathiang ning in cun ka inn cu thlacamnak inn a si ding a si, sihmanhsehlaw nannih nih cun mifir kua ah nan ser cang,” tiah a ti i a ṭhawl dih hna.

Jesuh nih Biakinn ah a cawnpiak hna                                                  

47 Nifa tein Biakinn ah a cawnpiak hna. Tlangbawi luban hna le phungbia cawnpiaktu hna nih, khuapi hruaitu phu hna he, amah kha hloh an i zuam, 48 sihmanhsehlaw zei tin tuah awk an hngal lo, zei cah tiah mi cu an ningpi in a bia ah an i awk cang.

Judah pawl nih Jesuh nawlngeihnak kha biahalnak an tuah

20 Cun nikhat ah Biakinn chung ah a cawnpiak hna i thawngṭha a chim lio ah tlangbawi luban hna le phungbia cawnpiaktu hna cu upa hna he hmunkhat in an rak chuak,  2 cun amah kha, “Kan chim tuah, hiti hin na cawl hi  zei nawlngeihnak dah na ngeih? Asilole, aho nih dah hi nawlngeihnak cu an pek?” tiah an ti. 3 Lehnak hna cu, “Cun bia pakhat, pakhatte lawng kan hal ve hna lai. Ka chim tuah u:  4 Johan Baptismanak aa thawknak hi vancung in maw? asilole vawlei in dah?” tiah a ti hna. 5 Cu tikah anmah le anmah kha hiti hin bia an i al, ‘Vancung in kan ti ahcun, “Zei cah dah amah cu nan zumh kun lo,’ ti in a kan hro lai, 6 cun minung sin in kan ti ahcun mi nih an ningpi in lung in an kan cheh lai, zei cah tiah annih nih Johan cu profet a si ti cu an i fiang tuk. 7 Cu tikah an lehnak cu, “Khuazei in a rat kan hngal lo,” ti a si. 8 Cu tikah Jesuh nih annih kha, “Kei zong nih hiti hin ka cawlcanghnak ca i ka nawlngeihnak cu kan chim ve hna lai lo,” tiah a ti hna.

Miṭhalo dum zohkhenhtu hna

9 Cun biachim kha a peh i hi bianabia cu a chimh hna, “Mi pakhat nih mitsur dum a tuah i mi kha a hlanh hna, cun  caan saunawn um awk ah ramdang ah aa thawh. 10 A caan a cut tikah dum chuak a theipar zun awk ah a sal cu a hlanh mi hna sin ah a thlah. Sihmanhsehlaw hlanh mi hna nih a hngawng in an dih, cun kut-lawng in an thlah. 11 Sihmanhsehlaw a sal dang kha a thlah ṭhan. Amah zong kha a hngawng in an dih i ningzak ngai in an tuah, cun kut-lawng in an kirter ve. 12 A pathumnak a thlah ṭhan rih; hi pa zong cu an hliam i leng ah an hlonh. 13 Cu tikah mitsur dum ngeitupa nih a lung chung in, ‘Zei dah ka tuah lai? Ka fapa ngeihchunte ka thlah lai. Amah cu an upat khawh men,”ti in a ruah. 14 Sihmanhsehlaw hlanh mi hna nih amah kha an hmuh tikah an lu an tonter i, “Hihi roco a si, that u sih, cuti cun a ro cu kanmah ta a si lai,” tiah an ti. 15 Cucaah dum leng ah an chuah i an thah.

16 A si ah dum ngeitu nih zei tin dah a tuah hna lai? A ra lai i kha hlanh mi hna cu a hloh dih hna lai, cun dum cu midang kha a hlanh hna lai,” tiah a ti hna. Cucu an theih tikah annih nih, “Pathian nih a thlauh, “tiah an ti. 17 Sihmanhsehlaw dengteo in a zoh hna i annih kha, “Cu a si ahcun cathiang chung hi bia: 

 Innsatu nih an hlawt mi lung cu

innkil lung ah a cang cang,’ ti mi hi zei sullam dah a ngeih?

18 Cu lung aa sukmi poh cu an maan dih; a tlakhnawh mi poh cu an kuai dih,” tiah a ti hna. 19 Cu tikah tlaangbawi luban hna le phungbia cawnpiaktu hna nih mah caan hrimhrim ah khan tlaih an duh, zei c ahtiah hi bianabia cu anmah a chimhhnawh mi hna a si ti kha an hngalh, sihmanhsehlaw mi kha an ṭih hna.

Sisar ngunkhuai peknak

20 Cucaah caan rem kha an hngak i miding in aa umter ding mi kha an thlah hna, cucu amah kha a chim mi bia zeimaw in tlaih i biaceihnak zung le uktu hna nawlngeitu hna sin i an chanh khawh nakhnga caah a si.

21 Cun annih nih hi biahalnak hi an tuah, “Bawipa, nang cu a hman mi kha na chim i na cawnpiak; aho hmanh dudanh lo in Pathian lam cu lung thiang tein na cawnpiak ti kan hngalh. 22 Sisar hi ngunkhuai pek ding maw a si pek lo ding dah?” tiah an ti. 23 Sihmanhsehlaw an zernak kha a hngalh caah annih kha, 24 “Nan denari piakhat in ka hmuhsak tuah u. Aho mui le min dah a cuang,” tiah a ti hna. Annih nih, “Sisar,” tiah an leh. 25 Amah nih “A ṭha tuk, Sisar ta cu Sisar pe ko uh - cun Pathian ta cu Pathian kha pe ko uh,” tiah a ti hna.

26 Mizapi hmai i a chim mi in zei ti hmanh in an foih kho lo; a bialehnak ah an khuaruah a har i an dai ko.

Mithi hna thaw ṭhannak

27 Saddusimi cheukhat – thawh ṭhannak a um lo tilei in a ṭang mi hna- nih an fuh i amah kha hi biahalnak hi an tuah,  28 “Bawipa, Moses nih, ‘Mi pakhat i a unau, nupi a ngei mi, cu fa ngei lo in a thih ahcun a unau ca ah fa hrinpiak naklai kha pa nih Nuhmeinu cu ṭhi seh,” tiah phung a kan serpiak. 29 A ṭha, unau pasarih an rak um; pakhatnak cu, nupi a ṭhit hnu ah fa ngei lo in, a thi. 30 Pahnihnak, 31 cun pathumnak nih nuhmeinu cu a ṭhit. An pasarih ning in cuti cun an tuah, fa roh lo in an thi dih.  32 Hmanung  bik ah minu zong a thi ve. 33Atu, thawh ṭhannak ah, aho nupi dah a si hnga, zei tin tiah an pasarih ning in a rak vat cang hna,” tiah an ti.

34 Jesuh nih, “Hi leicung fale hna cu an i ṭhi an i um, 35 sihmanhsehlaw vawlei dang i um aa tlak mi hna le thihnak in a tho ṭhan cang mi hna cu an i ṭhi ti lo, 36 zei cah tiah annih cu an thi kho ti lo, annih cu vancungmi bantuk an si cang, tho ṭhan fale an si cang bang in Pathian fale an si cang. 37 Cun Moses hrimhrim nih mithi an tho ṭhan ti mi cu Bawipa kha Abraham Pathian, Isak Pathian le Jakob Pathian ti a auhnak burbuk kong catlang ah khan a rak langhter cang. 38 Atu amah cu a thi mi hna si lo in a nung mi hna Pathian a si; amah caah cun mikip cu an nung,” tiah a ti hna.

39 Cu tikah phungbia cawnpiaktu cheuhkhat nih, 40 “Saya, na chim mi cu a ṭha tuk,’ tiah an ti. Amah kha zei biahalnak hmanh an tuah ngam ti lo.

Khrih cu David i fapa lawng si lo in a Bawi zong a si

41 Cu tikah annih kha, “Zei tin dah mi nih Khrih cu David fapa a si ti in an i tlaihpeng ning a si? 42 Zei ruang ah tiah David hrimhrim nih Saam cauk chung  ah:

‘Bawipa nih ka Bawipa cu, na ral hna cu 43  na ke chiahnak ah ka ser hna hlan lo ka orhlei kam ah ṭhu tuah,’ tiah a ti khah. 44 David nih hika ah hin ka Bawipa ti in a auh, cuti a si ah zei tin dah a fapa cu a si khawh hnga?” tiah a ti hna.

Jesuh nih Phungbia cawnpiaktu hna cu a mawhchiat hna

45 Mi vialte nih a bia an ngaih lio ah khan a zultu hna cu, 46 “Angkifual pipi i hruk in i chawhvah a duh mi, chawdawr hmun i mi nih upatnak he chawnhbiak a duh mi, pumhnak inn i hmaitlang ṭhutnak le rawldanghnak ah upa ṭhutnak i ṭhut a duh mi, 47 nuhmei chawva kha a ei dihtu, cun mi nih kan hmu hna seh ti in thla saupi aa camter mi Phungbia cawnpiaktu hna kha vaa ralring hna uh. An hmuh ding mi dantatnak cu a fak chinchin lai,” tiah a ti hna. 

Nuhmeinu piasen

21 Cung a vun zoh tikah, mirum hna nih thawhlawm kuang ah an thawhlawm an thlak kha a  hmuh hna;  2 cun misifak nuhmeinu te piasen pharhnih a thlak kha a hmuh ve, 3 cun amah nih, “Biatak tein kan chimh hna, “Hi hna nakin hi nuhmeinu nih hin tam deuh a thlak; 4 zei cah tiah annih cu an ngeih mi a hleivuang kha an thlak; sihmanhsehlaw hi nuhmeinu cu a si a fah tuk bu tein a ngeihchunte kha a pek cang,” tiah a ti.

Jerusalem hrawhnak kong ceihkhannak: Biahmaiṭhi

5 Micheu khat nih Biakinn kong, lung ṭhaṭha hna le an thawhlawm hna nih zei tluk in an dawhter ti kha an chimh tikah amah nih, 6 “Atu ar ko in nan cuanh mi vialte hna hi lung pakhat cung ah adang pakhat hmanh a taan lo caan a phan te lai; zeizongte cu hrawh dih an si te lai,” ti in a ti hna. 7 Cu tikah annih nih, “Bawipa, a si ahcun, hihi zei tik ah dah a si te lai, cun a can lai tikah zei hmelchunhnak dah a um te lai,” tiah an hal. 

Ralrin pek hmelchunhnak

8 Sihmanhsehlaw amah nih, “Hlen nan ton nakhnga lo i ralring u, zei cah tiah ka min hmang in mi tampi an ra lai i, “Keimah hi amah cu ka si,’ cun, ‘A caan a nai cang,’ an in ti hna lai. An hnu va zul hna hlah u.  9 Raltuknak le kahdohnak nan theih tikah lau hlah u, zei cah tiah hihi cu a cang hmasa ding mi thil an si, sihmanhsehlaw a donghnak cu a si colh rih lai lo,” tiah a ti hna.  10 Cun annih kha, “Ram pakhat le pakhat an i do lai, cun pennak pakhat le pakhat an i tu lai. 11 Hmun tampi ah ṭihnung lihninh, mangṭam le ngal-eu zawtnak a tlung lai; 12 van ah khin ṭihnung thil le hmelchunhnak nganpi a um lai.

12 Sihmanhsehlaw hi vialte an tlun hlan ah, nannih cu keimah min ruang ah, an in tlaih hna lai i an in hrem hna lai; pumhnak inn ah le thong thlak awk ah an in chanh hna lai, cun siangpahrang le uktu hna hmai ah an in chuahpi hna lai, 13 - - -cucu nanmah ca ah tehte khaan khawhnak caan ṭha a si lai. 14 I runvennak ca timhtuahnak ngeih lo ding nan lung i thlek u, 15 zei cah tiah nan ral aho hmanh nih an in doh an in tei khawh hna nakhnga lo keimah hrimhrim nih biachim thiamnak le fimnak kan pek hna lai. 16 Nan nu le nan pa, nan unau, nan rualchan le nan hawikom hna hmanh nih an in rawi hna lai; cun a cheu cu an  in thah hna lai. 17 Ka min ruang ah vawleimi vialte nih an in huat hna lai, 18 sihmanhsehlaw nan lu cung samfa fakhat hmanh a tlau lai lo. 19 Nan teirialnak nih nunnak an hmuhpiak hna lai.

Kharkhumhnak caan

20 Jerusalem cu ral nih an kulh dih cang kha nan hmuh tikah a rauh hlan ah a rawk dih cang lai ti kha hngal u.  21 Cun Judea ah a um mi hna cu tlang ah nan zam hna lai, khualipi chung a um mi hna cu nan chuak lai, cun khuate i a um mi hna cu khualipi chung ah nan i dor lai lo. 22 Zei cah tiah hihi cu cathiang nih a chim mi vialte a tlinnak hnga dantatnak caan a si. 23 Cu caan a phak tikah, fapawi nu, asilole, hnuktlai lio nu hna ca ah cun vanchiat tuk an si!

Rawhralnak le Jentailmi hna chan

Zei cah tiah vawlei i hi miphun hna cung ah ngaihchiat harsatnak nganpi le dantatnak a tlung lai. 24 Vainam har in an thi lai i Jentailmi hna sin ah sal in hruai an si lai; cun an caan a tlin hlan poh cu Jentailmi hna nih Jerusalem cu an ke tang ah an chiah hna lai.

Khuaci muihnak le sunparnak he Mi fapa a rat lainak

25 Cun nika, thlapa le arfi hna ah khin hmelchunhnak an lang lai; cun vawlei ah hin miphun hna cu rili le a tilet hna an cawlcanghnak ruang ah lungsivang in an um lai; 26 vawlei ah a tlung mi ṭihnung thlalaunak ruang ah mi cu a uai in an uai te lai, zei cah tiah vancung ṭ hawnnak an i hnin lai. 27 Cu nhnu ah Mi Fapa cu ṭhawnnak le sunparnak nganpi he minmei chung in a run ṭum kha an hmuh lai. 28 Hi thil hna an can tikah, fek tein dir u, nan lu tung u, zei cah tiah nan khamhnak cu a nai tuk cang,” tiah a ti.

Ratnak caan

29 Cun bianabia pakhat a chimh hna, “Theipi kung le thingkungkip kha zoh tuah u. 30 An hnah no tete an corh nan hmuh in cun ṭhal caan a nai cang ti nan hngalh. 31 Cu bang in nannih zong hi thil an can nan hmuh tikah Pathian Pennak a nai cang ti kha hngal u. 32 Biatak kan chimh hna, hi chan a liam hlan ah, hi thil vialte cu an cang lai. 33 Van le vawlei cu an lo lai, sihmanhsehlaw ka bia cu an lo bal lai lo.

I hliphlau u

34 I veng uh, cu lo ah cun nan lungthin cu duhfahnak, rithainak le nitin lungretheihnak nih a hahter sual lai, cun cu ni nih ruah lo pi in 35 rap bang an foih sual hna lai. Zei cah tiah hihi cu vawleicung thilnung vialte cung i a tlung ding mi thil a si. 36 I hliphlau uh, cun a cang ding mi caan vialte chung in him tein nan um khawh nakhnga le Khrih kha fek tein nan i tlaih khawh naklai ngol lo in thla cam u.

Jesuh hmanung bik caan hna

37 Chun nitlak Biakinn ah a cawnpiak hna, sihmanhsehlaw zaantu ahcun Oliv Tlang ti mi fingbo hmunrawn ah khan thla a cam tawn. 38 Cun mizapi cu zingka tuan tein a bia ngaih awk ah Biakinn chung ah an rak i pum lulh tawn.

VI: TEMH INNAK

Jesuh thahnak ding khuakhannak: Judas nih a rawi 

22 1Lanhtak puai ti mi thilhnu tel lo changreu puai cu a nai cang, 2 tlangbawi luban hna le phungbia cawnpiaktu hna nih khan a thli tein amah hloh khawh nakding lam kha an kawl, zei cah tiah mizapi kha an ṭih hna. 

3 Cun Hleihnih lak i aa tel ve mi, a min ah Iskariot an ti mi pa Judas chung ah Satan a lut. 4 Cucaah Judas nih khan an kut ah Jesuh chanh khawhnak ding zeimaw lam a um maw ti ceihkhan awk ah tlaangbawi luban hna le ralveng upa hna kha a fuh hna. 5 An lung a si ngaingai i amah kha tangka pek awk ah an hna a tla. 6 Tangka cu a cohlan i mi hngalh lo in an kut ah Jesuh chanh khawhnak lam kha a kawl.

Lanhtak zanriah timhlamhnak

7 Lanhtak puai thawinak pekchanhnak, Thilnu tel lo Changreu puai ni cu a hung phan, 8  Peter le Johan kha, “Lanhtak puai rawl kan ei nakding timhlamh awk ah va kal u,” ti in a thlah chung hna. 9 Annih nih, “Khuazei ah dah va timh na kan duh,” tiah an hal. 10  Anih nih, “Ngaihmanh u, khualipi chung nan vung luh ah khan tithawl aa put  mi pakhat nan ton lai. 11A luhnak inn tiang va zul u, cun inn ngeitupa kha, ‘Kan Bawipa nih: ka zultu hna he zanriah ka ei nakding khaan cu khua zei ah dah a si a ti?’ tiah  va chim u. 12 Khapa nih khan ṭhutdan  sau he aa rem ngai mi cungdot khaan - khaan kaupi cu an sawhpiak hna lai. Khaka ah khan va tim uh,” tiah a ti hna. 13  Annih cu an chuak i zeizongte cu a chimh hna ning in an va hmuh i Lanhtak puai cu an timhlamh.

Bawipa Zanriah 

14  A caan a phanh tikah rawl einak ah  cun hmunhma a lak, cun lamkaltu hna zong

an um ve. 15 Cun annih kha, “Temh-innak ka tuar hlan nannah he hi Lanhtak

rawl ei ding hi ka rak hngakhlang ngai mi a si; 16 zei cah tiah, biatak kan chimh

 hna, Pathian Pennak ah a sullam a tlin hlan lo hihi cu ka ei ti lai lo,” tiah a ti hna.

17 Cu hnu ah, hrai kha a lak, lawmhnak bia a chim i a ti mi cu, “Hihi i lak ulaw i hrawm tuah u, 18 zei cah tiah, atu thawk in, Pathian pennak a phanh hlan lo cu hi mitsurhang hi ka ding ti lai lo,” tiah a ti hna.

Bawipa thi le sa sernak

19 Cun changreu kha a lak, lawmhnak bia a chim hnu ah, a cheu i annih kha a pek hna, cun, “Hihi nanmah ca ah ka pekchanh mi ka pum a si, hihi keimah ruahnolhnak ah rak tuah u,” tiah a ti hna. 20 Zanriah an ei dih tikah cu bantuk in hrai cu a tuah ve, cun, “Hi hrai hi nanmah ca ah thlet hnga mi biakamnak thar i ka thi hrai a si,” tiah a ti.

Judas rawiphiarnak ding a chim chung

21 Sihmanhsehlaw zoh hmanh u, a ka rawitu ding kut cu hika cabuai ah hin keimah he a um ve ko. 22 Mi Fapa cu khaukhihcia a si bang in a lam cu a zawh ko lai, sihmanhsehlaw amah a rawitu ca ah cun ngaihchia a va si dah!” tiah a ti. 23 Cu tikah hi thil a tuahtu ding cu aho a si hnga ti in pakhat le pakhat an i hal.

Aho dah a nganbik

24  Anmah lak ah khan aho  dah a nganbik hnga ti mi kong ah bia-alnak a chuak; 25 sihmanhsehlaw annih kha, “Jentailmi hna lak ah a bawi hnawh mi hna cu siangpahrang an si, cun an cung i nawlngeitu hna kha Bawmtu ti mi min kha an pek hna. 26 Sihmansehlaw nanmah lak ah cun cutin a si awk a si lo. Nan lak i a ngan bik cu nauta bik bang, hruaitu cu mi a rianhtu bang a cawlcangh awk a si. 27 Zei cah tiah aho dah a ngan deuh? Cabuai i rawl a eitu maw?’ asilole, rawl a petu dah? Cabuai i a ei mi a si ko lo maw? Asinain hika ah hin kei cu nan lak i rawl petu bang khua ka sa.

Lamkaltu hna kamh mi thluachuahnak hna

28 Nanmah cu hneksaknak ka ton can ah fel tein a ka dirpitu nan si; 29 cucaah ka Pa nih pennak cu ka kut ah a ka chanh bang in atu kei zong nih nan kut ah kan chanh ve hna: 30 Ka pennak chung i ka cabuai ah keimah he nan ei nan ding ve te lai, cun Isreal phun hleihnih kha biaceih awk ah ka bawi ṭhutdan ah nan ṭhu ve te lai.

Peter hlawtnak le aa ngaihchihnak ding a chim chung

31 “Simon, Simon!  Zoh hmanh, Satan nih fang bang duhduh in an vamh duhnak a saduhthah cu a tling cang; 32 sihmanhsehlaw Simon, na zumhnak a tlau nakhnga lo, cun voikhat naa hrimh ṭhan tikah na unau hna kha thazaang na pek hna nakhnga thla kan campiak cang,” tiah a ti. 33 Amah nih, “Bawipa nangmah he cun thong tlak ding, cun thih ding tiang timhcia ka si ko,” tiah a leh. 34 Jesuh nih, “Peter, kan chimh, tuzan ar a khuan tikah voithum tiang ka hngal lo na ka ti lai,” tiah a leh.

Harnak caan

35 Annih kha, “Phaisa bawm, zal le kedan lo in ka rak in thlah hna ah khan zei tal nan bau maw?” tiah a ti hna. Annih nih, “Bau hlah,” tiah an ti. 36 Anih nih, “Sihmanhsehlaw atu cu nan ngeih ahcun, tangka bawm siseh zal siseh i lak u; hriamnam nan ngeih lo ahcun nan angkileng kha zuar ulaw pakhat in i cawk u, 37 Zei cah tiah kan chimh hna, “Amah cu dohdal hmang pakhat ah hmuh a si cang,” ti mi Cathiang hi keimah cung ah a tling ding mi a si.38 A si, ka kong a chim  mi cu atu hmanh ah hin a tling cuahmah cang,” tiah a ti hna. Annih nih, “Bawipa, hika ah hin vainam pahnih a um ko,” tiah an ti. Anih nih, “Cucu a za ko,” tiah a ti hna.

Oliv tlaang

39 Cu hnu  ah a tuah tawn bang in, a zultu hna nih an zulh i Oliv tlang ah aa thawh. 40 A hmun a phak tikah annih kha, “Tukforhnak chung i nan luh nakhnga lo thla cam u,” tiah a ti hna. 41 Cun an sin khan lung chep tluk hlat, ah aa zuk, cun a khuk aa bil i, 42 “Maw ka Pa, na duh ahcun hi hrai hi ka lakpiak ko. Nain keimah duh bang si lo in nangmah duhnak bang si ko seh,” tiah a ti. 43 Cu caan ah vancungmi pakhat cu amah kha thazaang pek awk ah van in a rung lang. 44 Lungsivang in fak chinchin thla a cam, a thlan cu vawlei ah thidor pipi bang an tla. 

45 A thlacamnak in a thawh tikah a zultu hna sin ah a kir i an lungre a theih tuknak ah an rak i hngilh ko kha a hmuh hna. 46 Cun annih kha, “Zei cah dah nan i hngilh? Tukforhnak chung i na luh nakhnga lo tho ulaw thla cam u,” tiah a ti hna.

An tlaihnak

47 Bia a chim lengmang lio ah khan, ruah lo pi in, mi tamnawn cu an hung chuak, Hleihnih lak i pakhat a si ve mi Judas an ti mi nih khan a rak hruai hna, amah nih Jesuh kha hnamh awk ah a va fuh. 48 Jesuh nih, “Judas, Mi Fapa cu voikhat hnamhnak in maw na rawi lai?” tiah a ti. 49 A hnuzul hna nih, a si ding mi thil kha an hmuh tikah, “Bawipa, kan vainam kan hmang lai maw?” tiah an ti. 50 Cun anmah lak i pakhat nih tlangbawi ngan i salpa kha a tuk i a orhlei hnakhaw cu a pheh.  51 Cu tikah Jesuh nih, “A za cang,” tiah a ti. Cu tikah mipa cu a tongh i a damter.

52 Cun Jesuh nih amah tlaih ding i a ra mi tlaangbawi luban hna, Biakinn cawngtu ralbawi hna le upa hna kha, “Keimah cu mifir maw ka si i hriamnam le thingtan he nan rak chuah? 53 Nifate pei nanmah he Biakinn ah ka um ko cu, keimah tlaih awk ah nan cawl bal ṭung lo. Sihmanhsehlaw atu cu nanmah caan a si; khuamui pennak caan a si,” tiah a ti hna.

Peter nih a hlawtnak

54 Cu tikah amah cu an tlaih i an chuahpi, cun tlangbawi ngan inn ah khan an kalpi. Peter nih lamhlatpi khin a zulh. 55 Tual laifang ah cun meiphu an ser i Peter cu an lak ah khan a ṭhu ve, 56 cun meiphu pawng i a ṭhut lio ah khan salnu pakhat nih a hmuh, dengteo in a zoh, cun, “Hipa hi amah he a rak um ve ko,” tiah a ti. 57 Sihmanhsehlaw aa pheh i, “Minu, ka hngal lo,”tiah a ti. 58 Cu hnu tlawmpal ah adang pakhat nih a hmuh i amah cu, “Nangmah hi anmah lak i pakhat na si ve ko,” tiah a ti. Sihmanhsehlaw Peter nih, “Ka kawi, ka si lo” tiah a leh. 59 Suimilam pakhat hnu ah khin adang pakhat nih, “Hipa hi anmah he a rak um ve hrimhrim ko. Zei cah tiah amah cu Galileemi a si,” tiah a vun ti chih. 60 Peter nih, “Ka kawi, zei kong dah na chim ka hngal lo,” tiah a ti. Cu caan liote, bia a chim lio ah khan, ar a khuang, 61 cun Bawipa cu aa hun i mer i Peter cu dengteo in a zoh, cun Peter cu Bawipa nih, “Nihin ar a khuan hlan ah voithum tiang na ka hlawt cang lai,’ a ti mi bia kha a hun i theih. 62 Cun a chuak i fak piin a ṭap. 

Ralvengtu hna nih an cawhdehmi Jesuh

63 Cu lio ah a cawngtu hna nih nihchuak ah an saih i an tuk. 64 A mit kha an huh i “A si ah, aho nih dah an thongh, profet i cang tuah?” ti in an hal.  65 Cun a cung ah adang serhsatnak tampi an tuah rih.

Sanhedrin hmai i Jesuh 

66 Khua a dei tikah mipi upa hna, tlangbawi luban hna le phungbia cawnpiaktu hna cu tonnak an ngei. Amah cu an khawngcil hmai ah an rak chuahpi, 67 cun annih nih a mah cu, “Khrih na si ahcun kan chim tuah,” tiah an ti. Amah nih, “Kan chimh hna zong ah nan zum hlei lai lo, 68 cun bia kan hal hna zong ah nan ka let lai lo. 69 Sihmanhsehlaw atu in cun Mi Fapa cu Pathian Huham orhlei kam ah a ṭhu cang lai,” tiah a leh hna. 70 Annih nih an dihlak in, “Cu a si ahcun Pathian Fapa cu na si ko tih?” tiah an ti. Amah nih, “Ka si a ti mi cu nanmah nan si,” ti in a leh hna. 72 Cu tikah annih nih, “Zei dang tehte dah kan herh ti? Kanmah hrimhrim nih pei a kaa in a chim kan theih cang cu,” tiah an ti.

Pilat hmai Jesuh

23 Tonpumhnak i a um mi hna cu an ning pi in an tho, cun amah kha Pilat hmai ah an chuahpi. 2 Annih nih, “Hi pa nih hin mi kha ralthawh ding ah tha a pek hna, Sisar ngunkhuai pek a doh, cun amah le amah cu Khrih le siangpahrang ka si tiah aa thanh kha kan hmuh,” ti in sual an puh. 3 Pilat nih hitin biahalnak a tuah, “Jew hna siangpahrang cu na si maw?” tiah a ti. Amah nih, “Cuti a chimtu cu nangmah na si,” tiah a leh. 4 Cu tikah Pilat nih tlangbawi luban hna le mibupi cu, ‘Hipa hi a sualnak  pakhat hmanh ka hmu lo,” tiah a ti hna. 5Sihmanhsehlaw annih nih, “Hi pa nih hin a cawnpiaknak in, Judea ram dihlak, cun aa thawknak Galilee peng in hika tiang, hnahnawhnak a chuahpi,” tiah an ti. 6 Cu bia a theih tikah Pilat nih hi pa hi Galileemi maw a si tiah a hal hna; 7 cun amah cu Herod biaceihnak tang in a ra mi a si ti kha a hmuh tikah Herod sin ah a kuat, cu lio ah amah zong cu Jerusalem ah a um lio a si ve.

Herod hmai ah Jesuh

8 Jesuh a hmuh tikah Herod cu aa lawm ngai; amah kong cu a rak theih tawn i amah mipum hmuh a duhnak a sau tuk cang; cu lawng a si lo, amah nih a tuah mi khuaruahharnak cheukhat zong kha hmuh ding aa ruahchan. 9 Cucaah bia kha saunawn a hal, sihmanhsehlaw kaa khat hmanh a let lo. 10 Cu lio ah, tlaangbawi pawl hna le phungbia cawnpiaktu saya hna cu cuka ah an um ve i fakpi in sual an phawtchih. 11 Cu tikah Herod nih a ralkap hna he Jesuh cu capo ah a saih i zei rel lo ngai in a tuah. Bawi puan kha a aihter hna i Pilat sin ah a kuat ṭhan.  12 Herod le Pilat cu tuan deuh ahcun aa ral mi an rak si nain cu ni ah cun an i rem.

Jesuh cu Pilat hmai ah an chuahpi ṭhan

13 Cu tikah Pilat nih tlangbawi luban hna le mipi upa hna le mipi kha a auh hna.14 Amah nih,“Hi pa hi mipi hnahnawhnak petu ti in ka hmai ah nan rak chuahpi. Atu amah cu nan hmaika hrimhrim ah ka hlathlai i sual nan puhnak a ruang pakhat hmanh ka hmu lo. 15 Herod zong nih zei hmanh a hmuh ve lo caah ka sin ah a rak kuat ṭhan cu a si; nan hmuh khawh bang in, hipa nih hin thihphu sualnak zei hmanh a tuah lo, 16 cucaah fung ka tukter hna lai i ka thlah ko lai,” tiah a ti hna. 18 Sihmanhsehlaw mi pakhat aw bang in, “Amah cu i kalpi ko! Barabbas tu kan pe!” tiah an au.  19 (Hi pa cu khuachung i hnahnawhnak le lainawnnak ruang ah thong an rak thlakmi a si).

20 Jesuh kha luatter a duh caah Pilat nih bia a chim ṭhan hna, 21 sihmanhsehlaw amah cu an auhnawh i,“Vailam ah tah ko, vailam ah tah ko,” tiah an ti. 22 Cun a voithumnak ah annih kha, “Hipa nih hin zei khua dah a sual? Thihphu khua a sual mi pakhat hmanh ka hmu lo, cucaah fung in ka tukter hna lai i ka thlah lai,” tiah a ti hna. 23 Sihmanhsehlaw an aw dih-um in an au thluahmah i vailam ah khenhchih ding in an halchih. Cun an aw cu a thang chin lengmang.

24 Cu tikah Pilat nih biachahnak a tuah: an hal mi cu a pek hna. 25 An halchih mi pa cu a chuahpiak hna, amah cu hnahnawhnak le lainawnnak ruang ah thong an rak thlak mi a si, cun Jesuh cu an duhduh in an tuah khawh nakhnga an kut ah a chanh hna.

17 Lanhtak puai chung ah hin Pilat nih thongtla pakhat a thlah tawn. 

Calvari tlang lam

26 Cuti cun an hruai lio ah khan, khuate lei in a rak ra mi Sairin khuami Simon cu an tlaih, cun vailam kha an putter i Jesuh hnu an zulhter. 27 Mi tampi, cun nu hna zong nih a hnu in an zulh, cun amah kha an ṭah len. 28 Sihmanhsehlaw Jesuh cu a hung i mer i annih kha, “Jerusalem fanule hna, keimah ca ah ṭap hlah u, nanmah le nan fale hna ca tu ah ṭap ko u,” tiah a ti hna.

29 Zei cah tiah, zoh hmanh uh, mi nih, “A cing mi nu, fa a zawi bal lo mi paw, cun dawp bal lo mi hnuk hna cu thluachuak an va si dah!’ an ti caan a phan hrimhrim lai. 30 Cu tikah mi nih tlang hna cu, ‘Kan tlak uh!’ fing hna cu, ‘Kan khuh uh?’ an ti te lai.  31 Zei cah tiah a hring mi thingkung cung hmanh hitin an tuah ahcun a ro tikah cun zei tin dah an tuah chinchin hnga?” tiah a ti hna. 32 Atu khuasual a tuah mi pahnih hna zong, amah he thah ve awk ah an hruai ve hna.

Vailam tahnak

33 Luruh tlang an ti mi hmun an phak tikah, khika ah khan khuasual a tuah mai pahnih hna he - pakhat cu a orhlei ah, pakhat cu a kehlei ah, ti in vailam ah an tah ve hna. 34 Jesuh nih, “Ka pa, ngaithiam ko hna, zei kan tuah ti an hngal lo,” tiah a ti. Cun a hnipuan i ṭhennak ah camcawhfung an zuh.

Vailam tah mi Khrih cu an nihsawh

35 Mi cu khika ah an dir i an zoh ko. Hruaitu hna tu nih cun tarhnak ah hi bia hna hi an chim, “Mi cu a khamh hna, Pathian i Khrih, thim mi Pa, a si ahcun amah le amah i khamh  ngat seh,” tiah an ti. 36 Ralkap pawl zong nih an nihsawh ve, a hmai ah an rak chuak i  mitsur thor kha an pek, 37 cun Jew hna siangpahrang na si ahcun i khamh tuah,” tiah an ti. 38 Alu cung ah cun, ‘Hihi Jew hna siangpahrang a si,’ ti in aa tar.

Mifir ṭha

39 Cuka i aa thlai ve mi khua a sual mi pakhat nih khan amah cu: Khrih na si lo maw? Nangmah le nangmah i khamh law kanmah zong kan khamh ve ngat,” ti in a serhsat. 40 Sihmanhsehlaw adang pakhat nih amah cu a hro i a ti mi cu, “Pathian na ṭih hrimhrim lo maw? Nangmah cu na sualnak he aa rup mi biaceihnak na in, 41 sihmanhsehlaw kannih cu kan covo a si: kan tuah man kan liam a si.  Sihmanhsehlaw hipa nih cun zei thil sual hmanh a tuah lo,” tiah a ti. 42 Cun anih nih, “Jesuh, na pennak chung na luh tikah ka philh sawh hlah mu,” tiah a ti. 43 Amah nih, “Biatak kan chimh, nihin ah nangmah cu keimah he paradise ah na um cang lai,” ti in a leh.

Jesuh thihnak

 Suimilam paruk a si cang i ni a tla cang, cucaah suimilam pakua tiang vawlei pumpaluk cu khuamui nih a khuh. 45 Hmunthiang puanzaar cu a laifang in cheuhnih ah aa cheu. 46 Jesuh cu aw thang pi in, “Ka pa, na kut chung ah ka thlarau kan chanh,”tiah a au. Hi bia a chim dih in a hmanungbik a thaw a chuah.

A thih hnu ah

47 Zauk bawi cu thil si ning vialte a hmuh tikah, Pathian kha a thang ṭhat i, “Biatak tein hipa cu miding a si,” tiah a ti. 48 Cun khuaruahhar thil si ning zoh ah a rak i pum mi mibupi nih an hmuh tikah an ṭang i cumh bu in inn ah an ṭin. 49 A hawile vialte cu lamhlatpi in an dir; cun Galilee peng in amah a rak zul mi nu hna zong nih hi thil si ning vialte cu an hmuh ve.

An vui

50 Cun khawngsil chungtel pakhat, Josef an ti mi, miding le mi ṭha, cu a rak phan. 51Amah cu midang nih khua an rak khaan i an rak ṭuanchuah mi kha a hna a rak tla lo. Amah cu Jew hna khuapi pakhat, Arimathea an ti mi in a rak ra mi a si, cun Pathian Pennak hmuh ruahchan in a nung mi a si. 52 Hi mipa cu Pilat sin ah a kal i Jesuh ruak kha a va hal. 53 Cun a ruak cu a ṭhumh, puanrang in a zual i aho hmanh an rak khumh bal rih lo mi lungkua thlaan ah khan a vui. 54 Atu cu timhlamhnak ni a si i Sabbath ni niceu a tlaang cang.

 55 Cu lio ah Jesuh he Galilee peng in a rak ra mi nu hna nih khan a hnu in an zulh. Thlan hmun le zei tin dah an vui ti kha an i chinchiah.

56 Cu hnu ah inn ah an ṭin i zihmui le hma thuhsii kha an timh. Cun Sabbath ni ah cun Phungbia nih a ti bang in an i din.

VII. A THAWH ṬHAN HNU

A lawng mi thlan. Vancungmi bia

24 Cawn nikhat ni khua a deika ah khin an rak timh mi zihhmui he thlaan ah cun an va kal. 2 Thlaankhar lung cu a rak i thawn cang kha an hmuh, 3 sihmanhsehlaw a chung an luh tikah Jesuh pum cu an hmu kho ti lo. 4 Khika ah ar ko in an dir ko lio ah khan, a lek in aa lek mi hnipuan aa hruk mi pahnih cu ruah lo pi in an pawngte ah an rung lang. 5 Nu hna cu an ṭih tuk nak ah, vawlei ah an bawk. Sihmanhsehlaw pahnih hna nih khan annih cu, “Zei cah dah a nung mi cu a thi mi lak ah nan kawl? 6 Hika ah a um lo; a tho cang. Galilee i a rak um lio an chimh mi hna kha philh hlah u; 7 cucu, “Mi Fapa cu misual hna kut ah chanh i vailam ah tah ding in khaukhih mi a si, cun nithumnak ni ah a tho ṭhan lai,’ ti a si kha. 8 Cu tikah a bia cu an I fiang ṭhan.

Lamkaltu hna nih nu hna bia kha an zum duh lo

9 Cun thlaan in an kir i hi thil vialte cu Hleikhat hna le adang vialte hna kha an chimh hna. 10 Cu nu hna cu Magdala khuami Mary, Joanna le Jeim nu Mary hna kha an si. Cun anmah he a um ve  mi adang nu hna zong nih khan Lamkaltu hna cu an chimh ve hna,11 sihmanhsehlaw an tuanbia cu sullam a ngei lo mi a lo, cucaah an zum hna lo.

Thlan i Peter

12 Sihmanhsehlaw Peter cu a tli i thlaan ah a va kal. A kun i a bih i  puanraang ti lo cu zei hmanh a hmu lo; cun inn ah a kir i thil a cang mi kha a zum kho lo.

Emmaus lei kalnak lam

13 Cu ni ṭhiamṭhiam ah cun anmah lak i pahnih hna cu Jerusalem in khaan sarih aa hlatnak, Emmaus ti mi khuate ah an kal,  14 cun thil a cang mi vialte kong cu an ceihpah hna. 15 Thil a cang mi kha cutin an i ruah an i ceih len lio ah khan Jesuh hrimhrim cu a rak chuak i an pawng in a kal ve; 16 sihmanhsehlaw an i chinchiah nakhnga lo an mit cu huhpiak an si. 17 Amah nih annih kha, “Nan kalpah in nan i ceihlen mi thil vialte hi zei dah a si?” tiah a hal hna. Hmaichia in an dir ko.

18 Cun anmah lak i pakhat, a min ah Cleopas an ti mi pa nih khan, “Jerusalem i a um mi lak ah kan hnu ni tlawmpal ah khika i a cang mi thil a thei lo mi cu nangmah pakhat lawng hi na si lai,” tiah a leh. 19 Anih nih,“Zei hna dah?” tiah a hal hna. Annih nih “Nazareth khuami Jesuh kong vialte cu tah: amah le amah cu Pathian hmai le mizapi hmai ah tuahsernak le biachimnak in profet ngan a sinak kha a langhter; 20 cun kan tlaangbawi luban hna le kan hruaitu hna nih thihdan pek ding ah zei tin dah an chanh i vailam ah an tahter hna ti mi kong hna an si. 21 Kan rak i ruahchan mi cu Isreal luatnak a petu ding cu amah hi a si te lai ti hi a si. Cun hi lawng a si rih lo: hi thil vialte a si hnu ni hnih pumpi a liam cang; 22 cun kanmah phu lak i nu cheukhat nih an kan lauter ngai: 23 zingka tuante in thlaan ah an va kal, cun a ruak cu an hmu lo, amah cu a nung ko ti anmah sin ah thawng a thanh  mi vancungmi langhnak kong cu kanmah kha chimh awk ah an rak kir ṭhan. 24 Kan hawile cheuhkhat cu thlaan ah an va kal i nu hna nih an chim ning tein an va hmuh, sihmanhsehlaw amah tu cu an hmu lo,” tiah an ti.

25 Cu tikah annih kha, “Mihrut hna! Profet hna nih an chim mi vialte zumh cu nan vaa harh hringhran dah!  26 A sunparnak chung a luh hlan ah Khrih nih hi thil vialte a in ding cu a herh hrimhrim a si lo maw?” tiah a ti hna. 27 Cun Moses cauk thawk in profet hna ṭialmi vialte lak in amah kong aa ṭial mi Cathiang catlang vialte cu a fianh hna.

28 An kalnak ding khua an hun naih tikah, hmai ah a lan lai bang aa umter; 29 sihmanhsehlaw annih nih amah kha, “Zanlei a si cang i ni zong a tla deng cang,” ti in anmah he a riah naklai an nawlchih. Cucaah anmah he a cam. 30 Anmah he cabuai an kulh lio ah khan, changreu cu aa lak i thluachuah bia a chim; cun a cheu i annih kha a chanh hna. 31 Cun an mit cu aa hung i amah a si kha an hngalh; sihmanhsehlaw a lo ṭhan. 32 Cu tikah pakhat le pakhat kha, “Lampi i bia a kan ruah i Cathiang sullam a kan chimh ah khan kan lung cu mei bang a rak alh ko lo mei kha?” tiah an i ti. 

33 Leklak an tho i Jerusalem ah an kir. Cuka ah cun an hawile hna he hmunkhat in a rak i pum mi Hleikhat hna kha an va hmuh hna, 34 annih nih anmah kha, “Bawipa cu a tho ṭhan taktak i Simon sin ah a rak lang cang,” tiah an ti. 35 Cun annih zong nih lampi a cang mi an tuanbia le changreu cheunak ah zei tin dah a mui an hliah ning kha an chimh ve hna.

Jesuh cu Lamkaltu hna sin ah a rung lang

36 Hi kong vialte an ceih cuahmah lio ah khan amah hrimhrim cu an lak ah a rung dir i annih kha, “Nanmah he daihnak um ko seh!” tiah a ti hna. 37 An lau le an thinphan tuk nak ah mithla kan hmuh rua tiah an ruah. 38 Sihmanhsehlaw amah nih, “Zei cah dah cu tluk cun nan lau, cun nan lung chung i lung awṭawmnak nan ngeih mi hi zei cah dah a si? 39 Ka kut le ka ke hi zoh tuah u,  keimah ka si. Ka tawng ulaw nanmah tein hngal tuah u; keimah nih ruh ka ngeih nan hmuh khawh bang in mithla nih ruh le sa a ngei lo,” tiah a ti hna. 40 Cun cuti a chimpah in a kut le a ke cu a hmuhsak hna. 41 An i lawmh tuk ah an zum kho ngai rih lo, an khuaruah a har tuk; cucaah annih kha, “Hika ah hin ei awk zei tal nan ngei maw?” tiah a ti hna. 42 Cun amah kha nga-em cia pakhat an pek, 43 a lak i an mithmuh ahcun a ei.

Hmanung bik lamkaltu hna a cawnpiaknak

44 Cun annih kha, “Nanmah he ka rak um lio ah, Moses Phungbia chung, Profet hna cauk ah le saam cauk chung i keimah kong an rak ṭialmi vialte cu an tlin ding hrimhrim a si ti ka rak i chimh hna tikah ka chim duh mi sullam cu hihi a si,” tiah a ti hna. 45 Cun Cathiang sullam an fian khawh naklai an lungthin innka cu a hunpiak hna, 46 cun annih kha, “Cucaah Khrih cu temfahnak a tuar lai i nithumnak ni ah a tho ṭhan lai, 47 cun, amah min in sual ngaihthiamnak ca i sual ngaihchihnak cu Jerusalem in thawk in miphun vialte hna sin ah phuan a si lai,” tiah aa ṭial mi cu a si. 48 Nannih cu hi thil i tehte nan si.

49 Cun atu ka Pa nih a rak kamh mi cu nan cung ah ka thlah. Cucaah cunglei ṭhawnnak in thuamh nan si hlan cu khuapi chung ah hin um ko u,” tiah a ti hna.

Vancung kainak

50 Cu hnu ah Bethani khuachuah tiang a kalpi hna; cun a kut a hler i thluachuah a pek hna. 51 Cutin thluachuah a pek hna lio ah khan, an sin in aa zuk i vancung ah an cawi. 52 Amah kha an biak, cu hnu ah lawmhnak he khat in Jerusalem ah an kir; 53 cun atu le tu biakinn ah an kal i Pathian cu an thangṭhat