JOHAN

JOHAN THAWNGṬHA

A:BIAHMAIṬHI

1 A hramthawk ah Bia a rak um; cu Bia cu Pathian he a rak um i cu Bia cu Pathian a si. 2 Amah cu a hramthawk in Pathian he a rak um cang. 3 Amah thawng in zeizongte cu a hung si i amah thawng lo in ser mi thil zei hmanh a um lo. 4  Amah chung in a rak si mi vialte cu nunnak a si i cu nunnak cu minung ca ah ceunak a si, 5 Cu ceunak cu khuamui ah a ceu i muihnak nih a khuh kho lo.

6 Pathian nih a thlah mi pa cu a ra. A min cu Johan a si. 7Amah cu ceunak kha tehte khaan awk ah tehte in a ra, cucu amah thawng in mi vialte nih ceunak kha an zumh khawh nakhnga caah a si. 8 Amah cu ceunak a si lo, ceunak kha tehte khaan awk ah a ra. 9 Bia cu mikip kha ceunak a pe mi ceunak taktak a si; vawlei ah hin a rak ra. 10 Amah cu amah thawng in a rak cang mi vawlei ah hin a rak um, nain vawlei nih amah kha a hngal lo. 11 A mi hna sin ah a rak ra i a mi nih an cohlang lo. 12  Sihmanhsehlaw amah a cohlang i a min a zum mi hna cu Pathian fale sinak huham kha a pek hna: 13 annih cu minung hrihhram, minung pumsa thisa duhnak le minung duhnak in a chuak mi si lo in Pathian hrimhrim sin in a chuak mi an si. 14 Bia cu thisa ah a cang i kan lak ah khua a sa, a sunparnak cu kan hmuh, cu a sunparnak cu Pathian Fapa ngeihchun a sinak thawng in a ngeih mi a si i  veel le biatak in a khat.

15 Johan nih amah cu tehte a khaan. Amah nih, ‘Hihi pei ka hnu in a ra nain, ka hlan ah a rak um cang caah a ka chawhkanh ka ti mi pa cu a si,’ ti in a thanh.

16 A taktak ti ahcun, amah a tlinnak in kannih vialte cu veel kha pakhat hnu pakhat kan co. 17 Zei cah tiah Phungbia cu Moses sin in pek kan si, veel le biatak cu Jesuh Khrih sin in a ra. 18 Aho hmanh nih Pathian an hmu bal lo, Pa lungthin naih ah a um mi Fapa ngeihchun hi Pathian a kan hngalhtertu cu a si.

B:  JESUH RIANTHIANG  ṬUANNAK

I: PENNAK THAR THANHNAK

JESUH RIANTHIANG  ṬUANNAK

A: HUNNAK ZARH

Johan tehte khaannak

19 Hihi cu amah kha, “Aho dah na si?” ti hal awk ah Jew hna nih a sin ah Jerusalem in tlangbawi hna le Levimi hna kha an thlah hna tik i Johan i tehte a khaannak a si. 20 Amah nih i pheh lo tein, “Keimah cu Khrih ka si lo,” ti in a chimh hna. 21 Cu tikah annih nih, “A si ahcun Elijah maw na si?” tiah an hal. Anih nih, “Ka si lo,” tiah a leh hna. “Profet na si maw?” tiah an ti. Anih nih, “Ka si lo,” ti in a leh hna. 22 Cu tikah annih nih, “Aho  dah na si kun? A kan thlahtu hna sin ah biahmaan kan phorh a herh. Nangmah  kong ah zei dah chim na duh?” tiah an ti. 23 Cu tikah Johan nih, Profet Isaiah nih a rak chimchung bang in “Kei cu Bawipa ca ah lam sialpiak u. A lam cu dinter u, ti in thetse ram ah a au mi aw ka si,” tiah a ti hna.

24 Atu an thlah mi hna lak ah khan Farasimi an i tel ve i annih nih amah kha hi biahalnak an tuah, 25 “Nang cu Khrih na si lo, Elijah na si lo, profet na si fawn lo ahcun, zei ca hdah baptisma cu na pek len kun hna?”. 26 Johan nih, “Kei nih ti in baptisma ka pek hna, sihmanhsehlaw nan lak ah a dir mi-nanmah nih nan hngalh lo mi- 27 pa cu ka hnu in a ra ding mi cu a si; kei cu a kedan hri phoih ding hmanh kaa tlak lo,” tiah a leh hna. 28 Hihi cu Jordan tiva khattelei ral, Johan nih baptisma a pek hnanak, Bethani ah a cang mi a si.

29 A thaizing ah Johan nih a sin ah a ra mi Jesuh cu a hmuh tikah, “Zoh hmanh uh, Pathian Tuufa vawlei sualnak a kalpitu cu khika a um ko khih. 30 Amah hi pei, “A ka chawhkanhtu pa cu ka hnu in a ra khih, zei cah tiah amah cu ka hlan ah a rak um cang,’ ka rak ti mi pa cu a si cu. 31 Keimah tein ka hngal lo, nain ti in baptisma pek awk ah ka rat hnawhchan cu amah hi Isrealmi hna sin ah phuan awk ah a si,” tiah a ti hna. 32 Cun Johan nih hiti hin a thanh, “Vancung in Thlarau cu ṭhuro bantuk in a rung ṭum i a cung ah aa fut kha ka hmuh. 33 Amah cu ka rak hngal ṭhiamṭhiam lo, sihmanhsehlaw ti in baptisma pek awk ah a ka thlahtu pa nih khan, ‘Thiang Thlarau a rung ṭum i a cung i aa fut na hmuh mi pa cu Thiang Thlarau in baptisma a petu ding a si,’ a ka ti. 34 Cucu ka hmuh i amah cu Pathian nih a thim mi Pa a si ti kha tehte ka khaan,"tiah a ti.

Zultu hmasa hna

35 A thaizing ah Johan cu a zultu pahnih hna he khika i a dir ṭhan lio ah khan Jesuh nih a rak tanpah, 36 Johan nih a hei zoh i, “Zoh hmanh uh, khika ah Pathian Tuufa a um khih,” tiah a ti. 37  A zultu pahnih hna nih a chim mi cu an theih i Jesuh cu an zulh. 38 Jesuh cu a hun i mer, an zulh kha a hmuh i annih kha, “Zei dah nan duh?” tiah a hal hna. Annih nih, “Rabbi - cucu Saya tinak- khuazei ah dah na um,” tiah an leh. 39 Amah nih,“Ra ulaw rak zoh tuah u,” tiah a ti hna; cucaah  an kal i a umnak cu an va zoh, cu ni cu amah sin ah an cam. Cucu suimilam pahra hrawng ah   si.

40  Johan bia a thei i Jesuh hnu a zul mi pahnih hna lak i pakhat cu Simon Peter nau Andru kha a si. 41Andru nih a tuah hmasa mi cu a u Simon va kawl i amah kha, "Messiah – cucu Khrih tinak a si- cu kan hmuh cang, ti va chimh kha a si, 42 Cun Jesuh sin ah a ratpi. Jesuh nih a zoh i amah kha,"Nang cu Johan fapa Simon na si; na min cu Kefas’- cucu Lungpi tinak-  ti in auh na si cang lai," tiah a ti. 

Filip le Nathanael a auh hna.

43A thaizing ah Jesuh cu Galileelei ah kal ding aa timh hnu ah khan, Filip kha a ton i, “Ka zul,” tiah a ti. 44 Filip cu Andru le Simon hna khua, Bethsaida, in a ra mi a si. 45 Filip nih Nathanael cu a va hmuh i amah kha, “Moses nih Phungbia cauk ah le Profet hna nih a kong an ṭialmi, Nazareth khuami Josef fapa Jesuh, kan hmuh cang,” tiah a ti.

46Nathanael nih a thawh i, “Nazareth in? Khika hmun in thil ṭha zeital a chuak kho maw?” tiah a ti. Filip nih, ‘Ra law rak zoh ngat,” tiah a leh. 47Jesuh nih Nathanael cu amahlei a rat kha a hmuh tikah, “Hlenthawinak lungthin zei hmanh a ngei lo mi Isrealmi taktak cu khika ah a um ko khih,” tiah a ti hna. 48 Nathanael nih, “Zei tin dah na ka hngalh?” tiah a hal. Jesuh nih, “Filip nih an kawh hlan, theipi kung tang i na um lio ah khan kan hmuh cang,” ti in a leh. 49 Nathanael nih, “Rabbi, nangmah cu Pathian fapa na si, Isreal Siangpahrang na si,” tiah a ti. 50 Jesuh nih, “Theipi kung tang kan hmuh,’ ka ti caah na ka na zumh.  Hi nakin thil lianngan deuh na hmuh te lai,” tiah a ti. 51Cun annih cu, “Biatak kan chimh, van aa hung i Pathian vancungmi hna cu Mi Fapa cung ah an ṭum an kai len kha na hmuh te lai,” tiah a ti hna.

Cana khua nupi ṭhit puai

2 Ni thumnak ni ah Galilee ram Kana khua ah nupi ṭhit puai a um. Cuka ah cun Jesuh nu a um ve, 2 cun Jesuh le a zultu hna zong an sawm ve hna. 3 Puai ca i an timh mi mitsur zu vialte a dih tik ah mitsur zu an ngei ti lo, cun a nu nih Jesuh cu, “Mitsur zu an ngei ti lo,” tiah a ti. 4  Jesuh nih, “Minu, ka sinin zei dah na herh? Ka caan a phan rih lo,” tiah a ti. 5 A nu nih chungṭuan hna cu, “An chimh mi hna poh kha tuah te u,” tiah a ti hna. 6 Cuka ahcun Jew hna phung bantuk in i thianhnak ca ti in chiah mi lung ralca paruk a um i pakhat nih galan kul le sawmthum karlak cio an tlum. 7 Jesuh nih chungṭuan pawl cu, “Raca kha ti khat lak in ṭhemh u,” tiah a ti hna i annih nih khat tein an ṭhemh hna. 8 Cun annih kha, “Atu tlawmpal in suak ulaw puai hotu kha va pe u,” tiah a ti hna. An hei pek i 9 puai hotu nih ti cu a hei teh i mitsur zu ah aa cang cang. Amah nih cun khuazei in a rat ti a hngal lo - ti a thantu chungṭuan hna nih cun an hngalh ko- cucaah nupi ṭhi tlangvalpa kha a auh i amah kha, 10 “Mikip nih mitsur zu thaw kha an pek hmasa i khual hna an vuai tik ah a chia deuh mi kha an pek tawn hna; sihmanhsehlaw nang nihcun atu tiang a ṭha bik kha naa chiah rih ko," tiah a ti.

11 Hihi Jesuh nih Galilee peng Kana khua i a tuah mi hmelchunhnak hmasa bik a si. A sunparnak kha a langhter i a zultu nih khan an zumh. 12 Cu hnu ah a nu, a unau le a zultu hna he ti in Kapernaum ah an ṭum, sihmanhsehlaw khika ah khan ni tlawmpal lawng an cam.

B: LANHTAK PUAI

Temple thianhnak

13 Jew hna Lanhtak Puai a naih cang caah Jesuh cu Jerusalem ah khan a kai, 14 cun biakinn chung ah khan caw le tuu le laileng a zuar mi hna le tangka thlengtu pawl cu an cabuai i an ṭhut ko kha a hmuh hna. 15 Hri kha aa hrual i Biakinn i an caw le an tuu hna kha a ṭhawl dih hna; tangka-thlengtu pawl an tangka pia cu a hlonhpiak dih hna i an cabuai kha a leh dih, 16 cun laileng zuartu hna cu, “Hi hmun hin chuahpi dih hna uh, ka Pa inn chawdawrnak hmun in ser cu ngol cang u,” tiah a ti hna.

17 Cun a zultu hna lungchung ah cathiang bia, “Na inn ka ṭanhnak nih mei bang a ka kangh,” ti mi kha a hung chuak. 18 Jew pawl nih an tlangtlak i amah kha, “Hiti hin na tuah khawh nakhnga zei hmelchunhnak dah na kan hmuhsak lai?” tiah an ti. 19 Jesuh nih, “Hi Biakinn hi hrawk uh, cun nithum chung ah ka sak ṭhan lai,” tiah a leh hna. 20 Jew pawl nih, “Hi Biakinn saknak ah kum sawmli le kumruk a rak rau: nithum chung ah maw na sak ṭhan khawh lai?’ tiah an leh. 21 Sihmanhsehlaw a pum a si mi Biakinn kha a chim duh mi a si, 22 cun Jesuh cu thihnak in a thawh ṭhan ti kah a zultu hna nih khan a rak chim mi kh an i thei ṭhan, cun Cathiang le Jesuh nih a chim  mi kha an zumh.

Jesuh cu Jerusalem ah a um 23 Lanhtak Puai ca Jerusalem i a cam lio i a tuah mi hmelchunhnak hna kha an hmuh tikah, mi tampi nih a min cu an zumh. 24 Sihmanhsehlaw Jesuh nih mi vialte kha a hngalh hna caah an kut chung ah cun aa chan duh lo. 25  Minung kong ah aho tehte hmanh a herh lo; mi pakhat nih an lungchung ah zei khua dah an ruah ti kha a chim khawh dih.

Nicodemus he bia an i ruahnak

3 Farasimi hna lak i Nicodemus an ti mi, Jew mi hruaitu pakhat, cu 2 Zan ah Jesuh sin ah a ra i amah kha, “Rabbi, nangmah cu Pathian sin in saya in a ra mi na si cu kan hngalh; zei cah tiah Pathian nih a umpi lo mi aho  hmanh nih nangmah na tuah mi hmelchunhnak hna cu an tuah kho lai lo,” tiah a ti. 3 Jesuh nih, “Bia ngaite kan chimh: cunglei in hrin ṭhannak a hmuh lo a hmuh lo ahcun aho hmanh Pathian Pennak an hmu kho lai lo,” tiah a leh.

4 Nicodemus nih, “Zei tin dah a kum a upa cang mi pakhat cu a hrin ṭhan khawh lai? A nu paw chung ah lut in chuah ṭhan khawh a si lai maw?” tiah a ti. 5 Jesuh nih: “Biatak te kan chimh, ti le Thlarau in a hrin ṭhan lo mi aho hmanh Pathian Pennak chung ah an lut kho lai lo; 6 Minung phung in a chuak mi cu minung a si i Thlarau in a chuak mi cu thlarau a si. 7 Cunglei in hrin ṭhan na si lai ka ti tikah hin na khuaruah har hlah. 8 Thli cu a duhnak ah a hrang, a thawng cu na theih khawh, sihmanhsehlaw khuazei in a rat le khuazei ah a kal ti cu na chim kho lo. Cucaah Thlarau in hrin mi poh cu cu bantuk in an si ve,” tiah a ti.

9 Nicodemus nih, “Zei tin dah a si khawh?” tiah a hal. 10 Jesuh nih, “Nangmah cu Israel Cawnpiaktu na si; cun hi hna hi na hngal hna lo!’ 11 Biatak tein kan chimh: kannih cu kan hngalh mi kong lawng kha kan chim i kan hmuh mi lawng kha tehte kan khaan, nain nannih minung nih cun kan tehte khaannak kha nan cohlang lo. 12 Vawlei thil hna kong ka chim tikah na ka zumh lo ahcun zei tin dah vancung thil hna kong ka chim tikah na ka zumh khawh lai? 13 Vancung in a rung ṭum mi mi Fapa dah ti lo cu aho hmanh vancung ah an kai rih lo; 14 Moses nih rul kha thetse ram ah a tar bang in mi Fapa zong tar a si ve lai; 15 cucu amah a zum mi poh nih amah thawng in zungzal nunnak an ngeih nakhnga caah a si. 16 Zei cah tiah Pathian nih vawlei cu hiti hin a dawt caah a Fapa ngeihchun kha a pek, cucu amah a zum mi poh cu rawkral lo in zungzal nunnak an ngeih nakhnga caah a si. 17 Zei cah tiah Pathian nih a Fapa vawlei ah a thlah cu vawlei kha biaceih awk ah si lo in amah thawng in vawlei hi khamh a si nakhnga caah a si.

18Amah a zum mi aho hmanh biaceih a si lai lo, sihmanhsehlaw amah a zum lo mi poh cu biaceih a tong cang; zei cah tiah kha pa nih khan Pathian Fapa ngeihchun i min kha a zum ti lo. 19 Cun biaceihnak cu hiti hin a si: ceunak cu vawlei ah a rak phan cang, nain mi cu an tuahsernak a ṭhat lo caah ceunak nakin muihnak kha an i thim deuh. 20 A ngaingai ti ahcun thilsual a tuah mi poh nih ceunak kha a huat i a hrial, cucu a tuah mi a langh nakhnga lo caah a si; nain biatak a zul mi poh nih cun ceunak ah an rak chuak, cucu a tuah mi cu Pathian hmai ah tuah mi a si ti fiang ngai in a langh nakhnga caah a si,” tiah  a ti.

Judea ram chung Jesuh rianthiang ṭuannak

Johan nih hmanung bik ah tehte a khaan

22 Hi hnu ah, Jesuh cu a zultu hna he Judea khuatelei ah a tlawng i cuka ah cun anmah he a um i baptisma kha a pek hna. 23 Johan zong nih ti a tamnak Salim pawng Aenon ah khan baptisma a pek ve hna. Cun mi cu khika ah khan an va kal i baptismanak an hmuh. 24 Zei cah tiah Johan kha thong an thla rih lo.

25 Atu i thianhnak kong ah Johan zultu cheukhat le Jew pakhat karlak ah bia alnak a chuak, 26  cucaah Johan sin ah khan an va kal i amah cu, “Rabbi, Jordan tiva ralpi i na sin ah a rak um mi pa, nang nih tehte na rak khaan mi pa, kha atu baptisma a pek len hna i mikip nih an fuh ko,” ti in an chimh. 27 Johan nih, “Vancung in pek mi ti dah lo aho hmanh nih zei hmanh a ngei kho lo. 28 Nanmah hrimhrim nih tehte nan khaan khawh cang. Kei cu Khrih ka si lo; keimah cu a hmai kal ding in thlah chung mi ka si. 29 Monu a ngeitu cu nupi ṭhi tlangvalpa a si; nain khika ah a dir mi a kawipa nih nupi ṭhi tlangvalpa aw a theih tikah lawmhnak in a khat. Cucu keimah lawmhnak a si; atu a tling cang. 30 Amah cu a lianngan lai i keimah cu ka zor lai.

31 Cunglei in a rung ṭum  mi cu midang hna cung ah a um; vawlei in a chuak mi cu vawlei ta a si i leimi bantuk in bia a chim. 32 Vancung in a rung ṭum mi nih cun a hmuh mi le a theih mi thil kong kha tehte a khaan, sihmanhsehlaw a tehte khaannak cu aho hmanh nih an cohlang lo; 33 a tehte khaannak a cohlang mi poh nih cun Pathian cu a hmaan ti kha an langhter, 34 zei tin tiah Pathian nih a thlah mi nih cun Pathian bia hrimhrim kha a chim, zei cah tiah Pathian nih amah cu Thlarau kha nganh bang lo in a pek cang. 35 Pa nih Fapa kha a dawt i zeizongte cu a kut ah a chanh. 36 Fapa a zum mi poh nih zungzal nunnak an ngei, sihmanhsehlaw Fapa a zum lo mi poh cu nunnak an ngei bal lai lo: Pathian dantatnak nih a zulh zungzal hna.

Jesuh le Samaria minu

4 Johan nakin zultu tam deuh a hmuh cang i tam deuh Baptisma a pek cang hna ti kha  Jesuh nih an hngalh cang ti kha a theih tikah- 2 a ngaingai ti ahcun Baptisma a petu cu Jesuh si lo in amah zultu hna an si- 3 Judea ram khan a chuak i Galilee ram ah a kir ṭhan. 4 Samaria ram kha a tanpah a herh. 5 Lam ah khan Jakob nih a fapa Josef a roh  mi lo pawng i Saikhar an ti mi Samariami khua cu a va phan . 6 Cuka ah cun Jakob tikhor a um, Jesuh cu a khualtlawnnak ah a bat caah tikhor pawng ah cun a ṭhu. A caan cu suimilam paruk hrawng a si. 7 Samaria minu pakhat ti than awk ah a rat tikah Jesuh nih, “Din awk ti hraikhat in ka pe tuah,” tiah a ti. 8 A zultu pawl cu rawl cawk awk ah khuapi chung ah an va kal ta. 9 Samaria nu nih amah cu, ‘Nang cu Jewmi na si. Zei tin dah Samaria nu hi din awk ti na ka hal ning?” tiah a ti. Jewmi hna nih Samariami hna kha an kom hna lo. 10 Jesuh nih: “Pathian nih zei dah pek an duh ti mi le ‘Din awk ti hraikhat in ka pe tuah,’ an titu pa hi aho a si ti na hngalh ahcun, nangmah tu nih na hal ko hnga i amah nih nunnak ti a hei in pek ko hnga," ti in a leh.

11 Minu nihcun, “Bawipa, ti thannak thawl na ngei lo, cun tikhor le a thuk fawn, zei tin dah nunnak ti cu na than khawh lai?’ 12 Nang cu kan pu Jakob nakin na ngan deuh maw? Amah nih hi tikhor cu a kan pek, cun amah le a fapa hna le a saṭil run hna zong hi tikhor in an rak din,” tiah a leh.13 Jesuh nih, “Hi ti a ding mi poh cu an ti a hal ṭhan lai; 14 sihmanhsehlaw keimah nih ka pek lai mi ti a ding mi poh cu an ti a hal ṭhan bal ti lai lo; zei cah  tiah ka pek lai mi ti cu a chung ah cerhtiput ah a cang lai i zungzal nunnak ca ah aa dil lai," tiah a leh.

15 Minu nih cun, “Bawipa, ti hal in ka um ti nakhnga lo, cun, hika zong ah hin ti than awk i ka rat ti nakhnga lo cu bantuk ti cu ka pe tuah,” tiah a ti. 16 Jesuh nih, “Va kal law na va va ko, cun hika ah hin ra ṭhan,” tiah a ti. 17 Cu tikah minu nih, “Va ka ngei lo,” ti in a leh. Jesuh nih, “Va ka ngei lo,’ na ti cu na hmaan, 18 sihmanhsehlaw va panga na rak ngei cang i atu na va hi na va taktak a si lo. Hika ah cun biatak na chim,” tiah a ti. 19 Minu nih “Bawipa, ka theih cang, profet na si cu ka hngalh cang. 20 Nannih nih biaknak ding hmun cu Jerusalem a si nan ti nain kan pupa hna nih cun hi tlang ah hin an rak biak,” tiah a ti.

21 Jesuh nih: “Minu, ka zum tuah; Pa Pathian cu hi tlang le Jerusalem ah si lo in nan biak caan a phan lio. 22 Nannih nih cun nan hngalh lo mi kha nan biak; kannih nih cun kan hngalh mi kha kan biak; zei cah tiah khamhnak cu Jew sin in a ra. 23 Sihmanhsehlaw a caan a phan lio –hika ah a phan taktak cang- cucu biatak in a biatu hna cu Pa kha thlarau le biatak in an biak caan cu a ra lio–cucu Pa nih a duh mi a biatu hna cu an si. 24 Pathian cu Thlarau a si, cun a biatu hna nih thlarau le biatak in an biak awk a si,” tiah a ti.

25 Minu nih aa thawh i, “Messiah- Khrih tinak- timi cu a ra lai ti cu ka hngalh; cun a rat tikah zeizongte cu a kan chimh te lai,” tiah an ti. 26 Jesuh nih, “Cucu nangmah he bia aa ruah mi, keimah hi ka si ko,” tiah a ti.

27 Cu lio ah a zultu hna cu an hung kir i Samaria minu he bia an i ruah kha an hmuh tikah an khuaruah a har, nain ahohmanh nih amah kha, “Amah sin in zei dah na herh?”asilole, “Amah cu zei kong dah na ruah,” ti an hal lo. 28 Minu nih cun a ti-um kha a ṭhumh, khua chung ah a va tli i khuami hna cu, 29  “Ka rak tuah mi vialte a ka chimtu hi ra zoh hmanh u; amah hi Khrih cu a si kho hnga maw?” tiah a ti hna. 30 Hi nih hin mi cu khuapi chung in a chuahter hna i Jesuh cu an rak fuhpanh.

31 Cu lio ah a zultu hna nih khan, “Bawipa, zei tal na ei lo,” ti in an fialchih. 32 sihmanhsehlaw amah nih, “A kong nan hngalh lo mi ei awk rawl ka ngei,” tiah a ti hna. 33 Cu tikah a zultu hna cu pakhat le pakhat kha, “Mizeimaw nih maw rawl an rak chanh cang rua,” tiah an i ti. 34 Sihmanhsehlaw Jesuh nih,“Ka rawl cu a ka thlahtupa duhnak tuah le a rian lim a si. 35 Thlali hnu cun thlairawl ti nan chim ton mi a um ko lo mei? A ṭha tuk, kan chimh hna, i mer ulaw lo cu zoh tuah u; an vaam i ṭuan an cu cang. 36 A zuntu cu a ṭuan man pek a si cang, a vorhtu le a zuntu an i lawmhṭi khawh naklai thlairawl cu  zungzal nunnak ca ah a luhpi cang hna,.

37 Zei cah  tiah hika ah hin phungthluk bia cu a hmaan ngaingai: cucu Pakhat nih a tuh i pakhat nih a zun. 38 Nan rak thlawhpiak lo mi fang zun awk ah kan thlah hna. Midang nih an rak thlawh i a theipar  cu nanmah nih nan hmuh,” tiah a ti hna.

 39 Minu nih, “Ka rak tuah mi vialte a ka chimtu,” tiah tehte a khaan mi thawng in cuka khua i Samariami tampi nih amah cu an zumh. 40 Cucaah, Samariami hna cu a sin an rat tikah, anmah he cam awk ah an nawl. Anmah he ni hnih a cam,  41 amah a chim mi bia thawng in mi tampi nih an zumh chinchin;  42 cun annih nih minu kha, “Atu cu nangmah nih na kan chimh mi ruang ah si ti lo in kanmah nih kan theih i amah cu vawlei Khamhtu hrimhrim a si ti kan hngalh caah kan zumh cang,” tiah an ti.

Galilee i Jesuh

43 Nihnih a caam hnu ah Jesuh cu Galileelei ah aa thawh. 44 Zei cah tiah amah hrimhrim nih profet cu a khua ah upatnak a tong lo a rak ti cang. 45 A va phak tikah Galileemi hna nih ṭha tein an rak cohlan, zei cah tiah puai lio i Jerusalem ah a tuah mi vialte kha an rak hmuh cang.

Kana khua i a voihnihnak hmelchunhnak

Zunguk bawi fapa a damter

46 Ti in mitsur zu a thlennak, Galilee peng Kana khua ah khan a va kal ṭhan. Kapernaum ah khan a zaw mi fapa a ngei mi biaceih  bawi pakhat a um; 47Jesuh cu Judea ram in Galilee ah a rak phan ti a theih tikah a sin ah a va kal i amah kha rat in a thi deng mi a fapa a damter nakhnga a va nawl. 48 Jesuh nih amah cu, “Hmelchunhnak le khuaruahharnak nan hmuh lo ahcun nan zum lai lo tih!” tiah a ti. 49 Cun zung upa nih khan, “Bawipa, ka fa a thih hlan ah rak ṭum hram ko,” ti in a leh. 50 Jesuh nih, “Inn ah va ṭin, na fa cu a nung ko lai,” tiah a ti. Cu pa cu Jesuh nih a chim mi kha a zumh i inn ah a ṭin; 51 lam i a um lio ah khan na fapa cu a dam cang ti mi bia he amah cu an rak ton. 52 Anih nih zei tik ah dah ngakchiapa cu a dam tiah a hal hna. Annih nih, “Zahan suimilam pasarih ah khan a zawtnak nih a kaltak,” ti in an leh. 53 A pa nih cu caan cu Jesuh nih, ‘Na fapa cu a nung lai,’ a rak ti caan hrimhrim a si ti kha a hngalh; cun amah le a chungkhar dihlak nih an zumh. 54 Hi hmelchunhnak thar, a pahnihnak, cu Judea in Galilee ah a rak kir hnu Jesuh nih a tuah mi a si.

II: JERUSALEM I A VOIHNIHNAK PUAI

VOI KHATNAK BIAPHUAN DOHNAK

Bethzatha tidil ah a zaw mipa damternak

5 Hi hnu ah Jerusalem ah Jew hna puai pakhat a um ṭhan, Jesuh cu Jerusalem ah a vung kal. 2 Atu Jerusalem ah khan Tuu Tidil kam ah cun Hebrew holh in Bethzatha an ti mi Tidil pakhat a um i cuka ah cun deu panga a um; 3 cun hi deu hna tang ah hin mizaw bupi: mitcaw, kebei le mizeng hna an i pum.4  5 Cuka ah cun kum sawmthum le kumriat chung a rak zaw cang mi mipa pakhat a um, 6 Jesuh nih khika a rilh ko kha a hmuh i kha can riamruam a rak zawt cang kha a hngalh tikah amah cu, “Dam na duh maw?” ti in a hal. 7 Mizaw nih, “Bawipa, ti a hung cangh tikah kei cu ti chung ah paihtu ka ngei lo, vung kal kaa timh poh ah pakhatkhat nih an ka chawhkanh lengmang,” ti in a leh. 8 Jesuh nih amah cu, “Tho, na ihnak-pher kha i lak law kal tuah,” tiah a ti. 9 Hmakhatte ah mipa cu a dam, cun a pher kha a lak i aa herlen.

Cu ni cu Sabbath ni a si, 10 cucaah Jew hna nih damnak a hmu mi pa cu, “Sabbath ni a si; na ihnak pher na pu kho lo,” tiah an ti. 11Anih nih, “Damnak a ka petu nih, ‘Na pher i lak law kal,’ a ka ti,” tiah a ti hna. 12 Annih nih, “Na pher i lak law kal,’ an titu cu aho dah a si?” tiah an ti. 13 Mipa nih khan aho a si ti ka hngal ti lo, zei cah tiah Jesuh cu a kal cang, cun cu hmun cu mibupi in an khatṭhup. 14 Cu hnu tlawmpal ah khan Jesuh nih cu pa cu Biakinn ah khan a hmuh i amah kha, “Atu cu na dam cang, hi nakin a zual deuh mi thil nih an tlak nakhnga lo, va sual ti hlah,” tiah a ti. 15 Mipa cu a va kir i damnak a ka petu cu Jesuh a si ti kha Jew pawl cu a va chimh hna. 16 Hi bantuk thil hi Sabbath Ni ah a tuah hna caah Jew hna nih hnahnawh an pek mi cu a si. 17Amah nih a thawh hna i, “Ka Pa nih rian a ṭuan rih ko i keimah zong nih ka ṭuan rih ko,” tiah a ti hna. 18 Sihmanhsehlaw hi nih hin Jew upa pawl nih amah thah an duhnak tu kha  a zualter chin; zei cah tiah annih nih,”Sabbath ni a buar lawng si lo in Pathian kha a Pa ah a chim i amah le amah cu Pathian tluk in aa chiah,” tiah an ti. 

19 Cu tikah Jesuh nih annih, “Biatak tein kan chimh hna: Fapa nih amah tein zei hmanh a tuah kho lo; Pa nih a tuah mi a hmuh mi lawng kha a tuah kho: cun Pa nih a tuah mi poh cu Fapa zong nih a tuah ve. 20 Zei cah tiah Pa nih Fapa cu a dawt i amah hrimhrim nih a tuah mi vialte kha a hmuhsak, cun hi hna nakin a lianngan deuh mi, nan khuaruah an harter hna ding mi thil tiang an hmuhsak rih hna lai. 21 Cucaah Pa nih mithi kha a thawhter i nunnak a pek ṭhan bantuk in, Fapa zong nih a thi mi poh kha nunnak a pek ve hna; 22 zei cah tiah Pa nih aho hmanh bia a ceih lo, biaceihnak vialte cu a Fapa kut ah a chanh cang, 23 cucu mi vialte nih Pa an upat bang in Fapa zong an upat nakhnga caah a si.  Fapa a upat lo mi poh cu a thlahtu a Pa kha a upat lo a si.

24 “Biatak tein kan chimh hna: ka bia a ngai i a ka thlahtu a zum mi poh nih zungzal nunnak an ngei. Cu bantuk mi cu biaceihnak kha ing lo in thihnak in nunnak ah a lan cang. 25 Biatak tein kan chimh hna: Mithi nih Pathian Fapa aw kha an theih lai i a thei mi poh nih an nun lainak caan cu a ra lio- a tu hika ah hin a phan taktak cang- 26 Zei cah tiah Pa nih a chung ah nunnak a ngeih bang in a Fapa zong a chung i nunnak ngeih khawhnak nawl a pek ve cang; 27 mi Fapa a si caah biaceihnak nawl a pek cang. 28 Hi kong ah hin nan khuaruah har hlah seh, zei cah tiah a aw kha an theih tikah mithi cu thlaan in an chuah caan cu a ra lio: 29 ṭhatnak a tuah mi cu nunnak ah an lan lai i ṭhat lonak a tuah mi hna cu biaceihnak ah an kal lai.

30 Keimah tein zei hmanh ka tuah kho lo; a ka chimh ning lawng in bia ka ceih i keimah duhnak si lo in a ka thlahtu duh mi kha tuah kaa zuam caah ka biaceihnak cu a dik, 31 zei cah tiah keimah duhnak kha kawl lo in a ka thlahtu duhnak kha ka kawl caah a si. Keimah tein tehte kaa khaan a si ahcun ka tehte khaannak cu a hman lai lo, 32 sihmanhsehlaw keimah aiawh in bia a chim ding mi tehte dang pakhat ka ngei rih, cun a tehte khaannak cu a hmaan ti in ka hngalh. 33 Johan sin ah lam kaltu nan thlah i amah nih biatak kha tehte a khaan- 34 cucu minung tehte khaannak kaa hngatchan mi a si lo, nanmah khamhnak ca ah ka chim mi a si.

35 Johan cu van in a ceu mi mei-inn a si; caan khatte cu a pek mi ceunak ah nan i lungsak ngai ko. 36 Sihmanhsehlaw keimah tehte khaannak cu Johan nakin a ngan deuh: ka Pa nih tuah ding a ka fial mi rian, hi ka tuah mi rian hna nih hin ka Pa nih a ka thlah kha tehte an khaan. 37 Cu lawng a si lo, a ka thlahtu ka Pa hrimhrim nih keimah cu tehte a ka khaan. A aw nan thei bal lo, a muisam nan hmu bal lo, 38 cun a bia cu nan lung chung ah a thla a tla lo; a ruang cu a thlah mi pa kha nan zum lo.

39 Cathiang thawng in zungzal nunnak kan hmuh lai ti nan zumh caah cathiang cu nan purdah len; hi cathiang nih tehte a khaan mi cu keimah hi ka si, 40 nain nunnak hmuh awk ah ka sin ah nan ra duh lo. 41Ka caah minung sunparnak cu zei hmanh a si lo. 42 Cu lawng a si lo,  kan hngalh ngai ve ko hna: nan chung ah Pathian dawtnak a um lo. 43 Ka Pa min in ka ra i nan ka cohlang lo; mi pakhatkhat nih amah min in a rat a si ahcun nan cohlan ṭung lai. 44 Zei tin dah nan zumh khawh hnga,  zei cah tiah Pathian pakhat lawng sin in a ra mi sunparnak cu zei ah nan rel lo i pakhat le pakhat sin in sunparnak hmuh ding tu nan i ruahchan. 45 Ka Pa hmai ah sual a phaw ding in ka ruat hlah u: Moses cung ah nan ruahchannak nan chiah i Moses tu nih sual an phawt te hna lai. 46 Amah kha nan rak zum taktak a si ahcun keimah zong nan ka zumh ve ko hnga, zei tin tiah a rak ṭial mi cu keimah kong a si; 47 sihmanhsehlaw a ṭial mi kha nan zumh lo tikah zei tin dah ka chim mi cu nan zumh khawh fawm lai?” tiah a ti hna.

4 A zeimaw caan ah hin Bawipa vancungmi cu tidil ah a vung ṭum i ti cu a cangh tawn. Ti a cangh lio hmasa bik i aa paih mi poh cu an zawtnak in an dam tawn, cucaah ti cangh cu an hngak.

III: NUNNAK CHANGREU LANHTAK PUAI

BIAPHUAN AN DOH RIHNAK

Changreu khuaruahharnak

6 Hi hnu ah Jesuh cu Galilee Rili -asilole Tiberias- kha a tan, cun mibu nganpi nih an zulh, 2 cucu mizaw a damternak in a tuah mi hmelchunhnak nih an lung a lak ngai hna caah a si. 3 Jesuh cu fingbo ah a kai i cuka ah cun a zultu hna he a ṭhu. 4 Jew hna Lanhtak Puai cu a nai cang.

5 Khua a hei zoh i mibupi nih an rak fuh ko kha a hmuh hna tikah Filip cu, “Hi mi hna ei awk khuazei ah dah rawl kan cawk khawh hnga?” tiah a ti. 6 Cuti a ti mi cu Filip hneksaknak ca ah a si; amah nih zei ka tuah lai ti cu a hngalh dih ko. 7 Filip nih, “Changreu tlawmte cio pek ding hmanh ah denarii zahnih nih a za lai lo,” ti in a leh. 8 A zultu adang pakhat, Peter nau Andru nih khan, 9 “Hika ah hin barley changreu hlumnga le ngapahnih a ngei mi ngakchiapate a um; asinain cu tham cu hi mi vialte ca ah zei hmanh a si lai lo,” tiah a ti. 10 Jesuh nih, “Mi kha ṭhutter hna u,” tiah a ti hna. Cuka ah cun ramhring aa hnuai dut ko, pa thongnga tluk an ṭhu. 11Cu hnu ah Jesuh nih changreu kha a lak, lawmhnak bia a chim, cun cuka i a ṭhu mi hna cu a phawt hna; cu bantuk in nga zong cu a tuah ve, an duhzat in a phawt hna. 12 An khim tikah a zultu hna kha, “An ei bang a ṭiltlawt kha pakhatte hmanh a lohlak nakhnga lo char uh,” tiah a ti hna. 13 Cucaah an char i mi nih an ei mi barley changreu hlumnga khan a ṭiltlawt sei hleihnih khat in an char. 14 A tuah mi hmelchunhnak kha an hmuh tikah mi nih, “Hi pa cu vawlei ah a ra ding an ti mi Profet a si hrimhrim,” tiah an ti. 15 Jesuh nih hramhram in hnuh i siangpahrang an ka ser cang lai ti kha a a hngalh caah tlanglei ah amahte lawng in a zaam ṭhan.

Jesuh cu ti cung kal in a zultu hna sin ah a ra

16 Zanlei ah cun a zultu hna cu rili kam ah khan an va ṭum i 17 rili ral khattelei a um mi Kapernaum khualei kal awk ah lawng cung ah an kai. Atu cu khua a mui cang nain Jesuh cu an sin ah a ra rih lo. 18 Thlichia a hrang, cun tilet thawh a tim. 19 Khanthum khanli tluk an zah ah khin Jesuh cu rili cung ah a ke in a ra i an lawng a hun naih kha an hmuh. An ṭih, sihmanhsehlaw amah nih, 20 “Ṭih hlah u, keimah ka si,” tiah a ti hna. 21 Lawng chung ah an cawi i luklakte ah khin an i tinhnak hmun rilikam cu an phan colh.

Kapernaum pumhnak inn i bia an i ruahnak

22 A thaizing ah rili khattelei ral i a um mi mibupi nih khan lawng pakhatte lawng a tang, cun Jesuh cu lawng chung ah a lut lo ti le a zultu pawl cu anmah te lawng an kal ti kha an hmuh. 23 Sihmanhsehlaw Tiberias khua in a ra mi adang tilawng hna cu changreu an rak einak hmun ah khan an hung i din. 24 Mi nih khika ah Jesuh siseh a zultu si hna seh an um lo ti kha an hmuh tikah kha lawng cung ah an kai i Jesuh kawl awk ah Kapernaum khualei ah an pet. 25 Amah kha rili khattelei ral ah an va hmuh tikah Jesuh cu, “Bawipa, zei tik ah dah hika ah na rat?” tiah an ti.

26 Jesuh nih, “Biatak tein kan chimh hna: nan ka kawl hi hmelchunhnak nan hmuh caah si lo in  nan duh zat in changreu nan ei caah a si. 27 A rawk kho mi rawl ca ah si lo in zungzal a hmun  mi rawl, cucu  Mi Fapa nih an pek hna hnga mi rawl ca ah ṭuan u, zei tin tiah Pa Pathian hrimhrim nih a cung ah  hmelchunhnak a khenh cang,” tiah a ti hna.

28 Cu tikah annih nih, “Pathian rian kan ṭuan ding a si ahcun zei dah kan tuah lai?” tiah an ti. 29 Jesuh nih, “Hihi Pathian rianṭuan cu a si: a rak thlah mi kha nan zumh lai,” ti in a leh hna. 30 Cu tikah annih nih, “Kan in zumh khawh nakhnga kan mithmuh ah zei hmelchunhnak dah na tuah lai? Zei rian dah na ṭuan lai? 31Cathiang nih, ‘Ei awk changreu kha van in a pek hna,’ a ti bang in kan pupa hna cu thetse ram ah manna changreu an rak ei taktak,” tiah an ti. 32 Jesuh nih, “Biatak tein kan chimh hna: Van in changreu a rak in petu hna cu Moses a si lo, vancung in changreu an petu hna cu ka Pa a si, 33 cucu changreu taktak a si, zei cah tiah vancung in a rung ṭum mi changreu cu Pathian changreu a si i vawlei hi nunnak a pek,” ti in a  leh hna.

34 Annih nih, “Bawipa, cu changreu cu zungzal in kan pe tuah,” tiah an ti. 35 Jesuh nih, “Keimah hi nunnak changreu ka si. Ka sin i a ra mi aho hmanh an rawl a ṭam bal ti lai lo; a ka zum mi aho hmanh an ti a hal bal ti lai lo. 36 Sihmanhsehlaw kan chimh cang hna bang in nan ka hmuh ko nain nan ka zum rih lo. 37 Pa nih a ka pek mi poh cu ka sin ah an ra lai; ka sin ah a ra mi aho hmanh ka khirh hna lai lo. 38 Zei cah tiah vancung in ka rung ṭum cu keimah duhnak tuah awk ah  si lo in a ka thlahtu duhnak tuah awk ah a si. 39 Atu a ka thlahtu i duhnak cu a ka pek mi vialte pakhat hmanh thlau lo in ni hmanung bik ni ah ka thawhter hna nakhnga caah a si. 40 Fapa a hmu i a zum mi poh nih zungzal nunnak an ngei, cun cu pa cu ni hmanung bik ni ah ka thawhter cu ka Pa duhnak a si,” ti in a leh hna.

41 Cu lio ah, ‘Kei cu vancung in a rung ṭum mi changreu ka si,’ a ti caah amah kong ah Jew pawl cu pakhat le pakhat an i zaihnawh. 42 Annih nih, “Hi pa hi Josef fapa a si bak, a nu le a pa cu kan hngalh hna, zei cah dah atu ah, ‘Vancung in ka rung ṭum,’ a ti khawh?” tiah an ti.

43 Jesuh nih annih kha, “Pakhat le pakhat nan i zaihnawh cu ngol u. 44 A ka thlahtu ka Pa nih a hnuh mi dah ti lo cu aho hmanh ka sin ah an ra kho lo, cun cu pa cu ni hmanung bik ni ah ka thawhter lai. 45 Profet cauk hna ah; annih cu Pathian nih a cawnpiak te hna lai,’ tiah  aa ṭial. Ka Pa bia a ngai i a sin in a cawng mi poh cu ka sin ah an ra. 46 Pathian sin in a sinak a ngei mi dah ti lo cu aho hmanh nih Pa kha an hmu bal lo, amah nih cun Pa kha a hmu cang. 47 Biatak tein kan chimh hna: a zum mi poh cu zungzal nunnak an ngei. 48 Kei cu nunnak changreu ka si. 49 Nan pupa hna nih thetse ram ah khan manna an rak ei i an thi, 50 sihmanhsehlaw hihi cu vancung in a rung ṭummi changreu a si, cucu nan ei tikah nan thih nakhnga lo a si. 51 Kei cu vancung in a rung ṭummi a nung mi changreu ka si; hi changreu a ei mi poh cu zungzal in an nung lai; ka pek hngami changreu cu ka sa a si, cucu vawlei nunnak ca ah a si,” tiah a ti hna.

52 Cu tikah Jew hna cu anmah lak ah khan, “Zei tin dah hi pa nih hin a sa cu ei awk ah a kan pek khawh hnga?” ti in bia-alnak a chuak.

53 Jesuh nih annih kha, “Biatak tein kan chimh hna, mi Fapa sa nan ei lo i a thi nan din lo ahcun nan chung ah nunnak nan ngei lo. 54 Ka sa a ei i ka thi a ding mi poh cu zungzal nunnak a ngei, cun kha pa cu hmanung bik ni ah nunnak ah ka thawhter lai. 55 Zei cah tiah ka sa cu rawl taktak a si i ka thi cu din awk taktak a si. 56 Ka sa a ei i ka thi a ding mi poh cu ka chung ah an um i kei zong cu pa chung ah cun ka um ve. 57 A nung mi Pa nih a ka thlah i Pa sin in nunnak ka ngeih bantuk in, a ka ei mi poh cu ka sin in nunnak a ngei ve lai. 58 Hihi cu vancung in a rung ṭum mi changreu a si; kan pupa hna nih an rak ei mi changreu bantuk a si lo; annih cu an thi, sihmanhsehlaw hi changreu a ei mi poh cu zungzal in a nung lai,” tiah a ti hna.

59 Hihi Kapernaum pumhnak inn i a cawnpiak mi a si.  60 Hi bia an theih hnu ah cun a zultu tampi nih, “Hihi cohlan khawh lo ding mi a si. Aho nih dah a cohlan khawh lai?” tiah an ti. 61 A zultu pawl cu hi kong ah an phunzai len ti kha Jesuh nih a hngalh tikah annih kha, “Hi nih hin nan lung an tuai hna maw? 62 Mi Fapa hi hmasa a rak umnak ah a kai nan hmuh ahcun zei tin dah nan um lai? 63  Nunnak a petu cu thlarau a si; thisa nih zei hmanh a pe kho lo. Nan sin ah ka chim mi bia hna hi thlarau an si i nunnak an si.

64 Sihmanhsehlaw nanmah lak ah hin a zum lo mi mizeimaw nan um,” tiah a ti hna. Zei cah tiah a hramthawk tein Jesuh nih aho hi dah a ka zum lo i aho dah a ka rawitu a si lai ti kha a rak hngalh cang. 65 Cun aa thawh ṭhan i, “Hi ruang ah hin ka Pa veel laksawng tel lo in aho hmanh ka sin ah an ra kho lo ti cu ka rak in chimh hna,” tiah a ti hna. 66 Hi hnu ah cun zultu tampi cu an chuak i amah kha an kawm ti lo.

Peter nih a zumhnak a phuan

67  Cu tikah Jesuh nih hleihnih hna cu, “Nannih tah, kal nan duh ve maw?” tiah a ti hna. 68 Simon Peter nih, “Bawipa, aho sin ah dah kan kal lai? Nangmah nih zungzal nunnak bia na ngei ti cu 69 kan zumh; nang cu Pathian i a Mithiang na si ti cu kan hngalh cang,” ti  in a leh. 70 Jesuh nih annih kha, “Nannih Pahleihnih hna hi kan thim hna a si lo mei? Nain nanmah lak i pakhat cu khuachia a si,” tiah a ti hna. 71 Simon Iskariot fapa Judas kha a chim hnawh duh mi a si, zei tin tiah amah cu Hleihnih lak i pakhat, amah kha a rawitu ding a si.

IV: DEU PUAI

Hnonnak nganpi

Jesuh cu puai ca ah Jerusalem ah a kai i a cawnpiak hna

 7 

Hi hnu ah hin Jesuh cu Galilee cul in a tlawng; Judea ram cu a cul kho lo, a ruang cu Jew pawl nih amah kha thah awk ah an kawl cang. 2 Jew hna Deu puai cu a nai, 3 a unau hna nih amah kha, “Hika hin chuak law Judea ram ah va kal; cuti cun na zultu hna zong nih na thil tuah mi cu an hmuh khawh ve lai, 4 zapi nih theih a duh mi aho hmanh nih a thlithup in an cawl bal lo; hihi na tuah mi a si ahcun vawleimi sin ah naa phuan cang ding a si,” tiah an ti. 5A unau hna hmanh nih amah cu an zum ti lo. 6 Jesuh nih, “Ka ca ah caan rem a phan rih lo, nanmah ca tu ah cun caan vialte hi caan rem a si ko. 7 Vawlei nih an hua kho hna lo, sihmanhsehlaw kei cu a ka huat, a ruang cu a cawlcangh ning a ṭha lo ti ka langhter caah a si. 8 Puai ah cun nanmah tein va kal ko u: hi puai cu ka kal lai lo, zei cah tiah ka caan a cu rih lo,” tiah a leh hna. 9 Cuti a chim dih hnu ah amahtu cu Galilee ah a taang ko.

      10 Hmanhsehlaw, a unau hna puai ah an i thawh hnu ah amah zong langhngan in si lo in a thli tein aa thawh ve. 11 Puai chung ah cun Jew pawl nih amah cu an kawl: “Khua zei ah dah a um?” tiah an ti. 12 Mibupi lak ah khan a kong cu an i ceih lulh ko. Acheu nih, “Amah cu miṭha a si,” an ti; adang nih, “Si hlah, mi kha a pialpi hna,” an ti. 13 Nain Jew pawl kha an ṭih hna caah aho hmanh nih langhngan in an chim ngam lo. 14 Puai tanṭim a dih tikah khan Jesuh cu Biakinn ah a kal i a cawnpiak hna.  15 Jew pawl cu an khuaruah a har i annih nih, “Zei tikah dah carel a cawn? Sianginn a kai bal ṭung lo?” tiah an ti.

16 Jesuh nih annih kha, “Ka cawnpiaknak hna hi keimah sin in si lo in a ka thlahtu ka Pa sin in a ra mi a si. 17 Pathian duhnak kha tuah awk ah timhcia in a um mi poh nih cun ka cawnpiaknak hi Pathian sin in maw a si, asilole keimah duh in maw ka chim ti cu an hngalh lai. 18 Mi pakhat nih amah kong aa chim a si ahcun upatnak a kawl a si; sihmanhsehlaw a thlahtu pa i upatnak a kawl a si ahcun amah cu mihmaan a si i hlenthawinak pakhat hmanh a ngei lo. 19 Moses nih Phungbia an pek hna a si lo maw? Cun pakhat hmanh nih cu Phungbia cu nan zul lo!

 Zei ruang ah dah thah nan ka duh?” ti in a leh hna. 20 Mibupi nih, “Na hrut cang! Aho nih dah thah an duh?” ti in an leh. 21 Jesuh nih, “Rian pakhat ka tuah, cun nan khuaruah a har dih. 22 Moses nih cuarpar tan ding an chimh hna - amah sin in aa thawk mi a si theng lo, pupa hna chan in a rak i thawk cang mi a si- cun Sabbath ni ah cuarpar tannak nan tuah. 23 Atu mipakhat nih Moses Phungbia buar lo in Sabbath ni ah cuarpar tannak a hmuh khawh ahcun, zei ruang ah dah Sabbath ni ah mi pakhat kha damnak tlamtling ka pek caah ka cung ah nan thin a hun?  24 Lenglei hmuhnak in bia ceih hlah uh, nan biaceihnak cu a hmaan ning in siseh,” tiah a ti hna.

Mipi nih Messiah hramthawhnak kong kha an ceih

25 Cu lio ah cun Jerusalem i mi cheukhat nih, “Thah an duh mi pa cu hihi a si ko lo maw?  26 Atu hika ah hin a um, langhngan in bia a chim len ko, cun zei hmanh an chim fawn ṭung lo. Khrih a si kha nawlngeitu hna nih an cohlan cang a si hnga maw? 27 Nain amah cu khuazei in a rat ti kha kan hngalh, sihmanhsehlaw Khrih a rat tikah khuazei in a rat kha aho hmanh nih an hngal lai lo," tiah an ti.

28 Cu tikah, Jesuh cu biakinn chung i a cawnpiak hna lio ah khan, aw thang pi in:

“Keimah cu nan ka hngalh i khuazei in ka rat nan hngalh! Nain keimah nawl in ka ra lo: sihmanhsehlaw a ka thlahtu cu a hmaan; amah cu nan hngal lo nain 29 kei nih cun ka hngalh, a ruang cu ka sinak cu amah sin in a si i amah cu a ka thlahtu a si caah a si,” ti in a au.

30 Cu tikah amah kha tlaih an duh, sihmanhsehlaw a caan a phanh rih lo caah aho hmanh nih a cung ah an kut an zao lo.

Jesuh nih a chuah lainak a naihzia kha a chimchung

31Sihmanhsehlaw mibupi lak ah khan amah a zum mi tampi an um ve; annih nih, “Khrih a rat tikah hi pa nakin hmelchunhnak tam deuh a tuah hnga dek maw?” tiah an ti.  32 Mizapi lak ah hi bantuk bia a leng ti kha Farasi pawl nih an theih tikah, amah tlaih awk ah biakinn veng pawl kha an thlah hna.

33 Cu tik ah Jesuh nih, “Caan tlawmpal cu nanmah he ka um rih lai; cun a ka thlahtupa sin ah ka kir ṭhan lai. 34 Nan ka kawl lai nain nan ka hmu lai lo; ka umnak ah cun nan ra kho lai lo,” tiah a ti hna.

35 Cucaah Jew pawl cu pakhat le pakhat kha, “Kan hmuh khawh lai lo cu khuazei ah dah kal aa timh? Grikmi hna lak i aa ṭhekzamh mi hna umnak ram dang ah maw kal in Grikmi hna cu cawnpiak a timh hna hnga? 36 ‘Nan ka kawl lai i nan ka hmu lai lo, ka umnak ah nan ra kho lai lo,’ a ti tikah zei dah a chim duh mi a si hnga?” tiah an i ti.

A nungmi ti biakamnak

37 Ni hmanung  bik ni, a sunglawi bik ni ah khan, Jesuh cu a dir i, “A ti a hal mi poh cu ka sin ah ra hna seh! A ka zum mi poh cu ra in rak ding hna seh! 38 Cathiang nih “Keimah a ka zum mi poh cu a lung chung in nunnak tiva an luang lai, a ti bang khan a si,” tiah a ti. 39 Amah a zum mi nih an co hnga ding mi Thlarau kha a chim duh mi a si; zei cah tiah Thlarau cu pek an si rih lo, zei cah tiah Jesuh cu sunparnak a hmu rih lo.

Messiah a hramthawknak kong ceih ṭhannak

40 Mibupi lak i bia a rak ngai mi cheukhat nih khan, “Hipa hi Profet a si hrimhrim,” an ti i 41 a cheu nih, "Amah cu Khrih a si," an ti, sihmanhsehlaw adang ve nih, "Khrih cu Galilee in a ra hnga maw?  42 Cathiang nih Khrih cu David thlak a si lai i David a rak umnak khua, Bethlehem in a ra lai a ti lo maw kha?” tiah an ti.  43 Cucaah amah kong ah mi cu an lung aa ṭhen. 44 A cheu nih amah kha tlaih an duh, asinain aho hmanh nih a cung ah an kut an thla taktak lo.

45 Ralveng pawl cu an kir ṭhan tikah tlangbawi luban hna le Farasimi hna nih annih kha, “Zei cah dah nan ratpi lo?” tiah an rak ti hna. 46 Ralvengtu hna nih,“Hipa bantuk hin aho hmanh bia an chim bal lo,” ti in an leh. 47 Farasi pawl nih, “Cu a si ahcun, nanmah zong an pialpi cang hna tih? 48 Nawlngeitu aho tal nih amah cu an zum maw? Farasimi aho tal nih teh? 49 Hi thluak ngei lo hna cu Phungbia zei hmanh an hngalh ṭung lo – annih cu chiatserh mi an si,” tiah an ti hna. 50 An lak i pakhat, Nicodemus, Jesuh sin i khuatuan deuh ah a rak ra mi pa nih khan annih cu, 51 “Sihmanhsehlaw kan Phungbia nih cun aho hmanh a bia ngaihta lo le zei dah a tuah ti zoh hmasa lo in sual phawtnak nawl a kan pe lo a si lo maw?” tiah a ti hna. 52 Cu tikah annih nih, “Galileemi na si ve tih? Thil si ning hi zoh tuah; cun nangmah tein Galilee in profet an chuak lo ti cu hngal tuah,” tiah an ti.

Nupa sualnak a tuah mi minu

53 Cun inn ah an ṭin dih,

8 Jesuh cu Oliv Tlang ah a kai. 2 Khua a dei in Biakinn ah a rak chuak ṭhan;  cun mi vialte nih an fuh bang in, a ṭhu i a cawnpiak hna.

3 Phungbia cawnpiaktu hna le Farasimi hna nih khan nu le pa sualnak a tuah lio ah an tlaih mi minu pakhat kha an rak luhpi; a laifang ah an dirter i 4 Jesuh cu, “Saya, hi nu hi nupa sualnak a tuah lio hrimhrim ah tlaih mi a si, 5 cun Phungbia ah Moses nih hi bantuk nu cu lung in cheh ding tiah nawl a kan pek. Zei dah na chim duh?” tiah an ti. 6 Hihi cu hneksaknak ca ah an hal mi a si i sual an phawt khawh nakding lam an kawl mi a si. Sihmanhsehlaw Jesuh cu a kun i vawlei ah a kutdong in ca a ṭial. 7 An halchih lengmang caah a lu a tun i annih kha, “Nan lak i sualnak a ngei lo mi nih lung cun a chep hmasa siseh,” tiah a ti hna. 8 Cun a kun i vawlei ah ca a ṭial ṭhan. 9 Cu bia an theih tikah, upa bik in hmanung bik tiang, pakhat hnu pakhat  in an chuak i Jesuh cu zapi laifang i a dir mi minu he lawng an kaltak. 10 Jesuh cu ding tein a hung ṭhu i, “Minu, khua zei ah dah an si dih? Aho hmanh nih sual an in phaw lo maw?” tiah a ti. 11 Minu nih, “Bawipa, aho hmanh nih,” ti in a leh. Cu tikah Jesuh nih, “Kei zong nih kan phaw lo. Va kal, cun atu thawk in va sual ti hlah," tiah a ti. 

Jesuh, vawlei ceunak

12 Jesuh nih mizapi kha bia a chimh ṭhan hna tikah annih kha, “Keimah cu vawlei ceunak ka si; ka hnu a ka zul mi poh nih cun khuamui ah an vak lai lo i nunnak ceunak cu an ngei lai,” tiah a ti hna.

Jesuh nih amahte in tehte aa khaannak kong ceihkhannak

13 Cu tikah Farasi pawl nih amah cu, "Atu cu nangmah le nangmah tehte naa khan cang, na tehte khaannak cu a dik lo," tiah an ti.

14 Jesuh nih: “Keimah le keimah tehte kaa khaan hmanh ah ka tehte khaannak cu a hmaan rih, zei ruang ah tiah khuazei in ka rat i khuazei ah ka kal lai ti ka hngalh, sihmanhsehlaw nannih nih cun khuazei in ka rat le khuazei ah ka kal lai kha nan hngal lo. 15 Nannih nih cun minung khel in bia nan ceih, kei nih cun aho hmanh bia ka ceih hna lo, 16 sihmanhsehlaw bia ka ceih ahcun ka biaceihnak cu a dik lai, zei cah tiah keimah lawng ka si lo: a ka thlahtu cu keimah he a um; 17 cun nan Phungbia ah mi pahnih i tehte khaannak cu a hmaan ti in aa ṭial. 18 Keimah le keimah tehte kaa khaan, sihmanhsehlaw a ka thlahtu ka Pa zong nih keimah aiawh in tehte a khaan ve,” tiah a leh hna.

19 Annih nih, “Cu a si ahcun, na Pa cu khuazei ah dah a um kun?” tiah an hal. Jesuh nih: “Keimah zong nan ka hngal lo i ka Pa zong nan hngal lo; Keimah kha rak ka hngal ulaw cu ka Pa zong nan hngalh ko hnga,” tiah a leh hna. 20 Hi bia cu Biakinn i a cawnpiak hna lio, thawhlawm inn ah a chim mi bia an si. Aho hmanh nih an tlai lo, zei cah tiah a caan a phan rih lo.

21 Cun annih kha, “Kei cu ka kal lai; nan ka kawl lai i nan sualnak ah nan thi lai. Ka kalnak ah cun nan ra kho lai lo,” tiah a ti hna.

 22 Cucaah Jew hna cu pakhat le pakhat kha, ‘Ka kalnak ah nan ra kho lai lo,’ a ti tikah hin amah le amah maw aa thah hnga?” tiah an i ti.

23 Jesuh nih, “Nannih cu tanglei in nan si; kei cu cunglei in ka si. Nannih cu hi leimi nan si, kei cu hi leimi ka si lo. 24 Nan sualnak ah nan thi lai,’ tiah ka rak in ti cang hna. A si, kei cu Amah ka si kha nan zumh lo ahcun nan sualnak ah nan thi ko lai,” tiah a ti hna.

25 Cu tikah annih nih, “Aho dah na si?” tiah an ti. Jesuh nih, “A hramthawk tein ka rak in chimh cang hna kha. 26 Nanmah kong ah chim ding tampi ka ngei i tampi biaceih ding ka ngei rih: sihmanhsehlaw a ka thlahtupa cu a hmaan, cun vawlei ah ka phuan mi cu amah sin i ka theih mi a si” ti in a leh hna.

27 A Pa kong a chimh hna kha an hngal kho lo. 28 Cucaah Jesuh nih: “Mi Fapa hi nan taar tikah Kei cu Amah ka si ti le keimah duh in zei hmanh ka tuah lo ti cu nan hngal te lai. Ka chim mi cu ka Pa nih a ka cawnpiak mi a si; 29 a ka thlahtu cu keimah he a um i keimah te lawng a ka kaltak bal lo, zei cah tiah a lung a tong mi kha ka tuah zungzal,” tiah a ti. 30 Hiti bia a chim tikah mi tampi nih an hung zumh.

Jesuh le Abraham

31 Amah a zum mi Jew hna kha Jesuh nih, “Nan lung ah ka bia nan camter ahcun a ka zultu taktak nan si lai; 32 biatak nan hngalh lai i biatak nih an luatter hna lai,” tiah a ti hna.

33 Annih nih, “Kannih cu Abraham tefa kan si i aho sal hmanh kan si bal lo; “Nan luat lai,’ na ti tikah zei dah na chim duh,” ti in an leh.  34 Jesuh nih: “Biatak tein kan chimh hna: sualnak a tuah mi poh cu sal an si. 35 Sal cu innchungkhar ah a hmun  mi dirhmun a ngei lo, sihmanhsehlaw fapa tu cu zungzal in amah inn a si. 36  Fapa nih an luatter hna ahcun nan luat taktak lai. 37 Abraham tefa nan si cu ka hngalh ko; asinain thah nan ka duh mi a ruang cu nan chung ah ka bia a um lo caah a si. 38 Ka chim mi bia hna hi ka Pa kam i ka hmuh mi hna an si, nannih zong nan pa sin in nan cawn mi fimnak cu nan ṭuanchuah hna,” tiah a ti hna.

39 Annih nih, “Kan pa cu Abraham a si,” tiah an nolh ṭhan. Jesuh nih: “Abraham fale nan si ahcun Abraham nih a rak tuah mi kha tuah ve uh. 40 Atu thil a si mi cu ka Pa sin in ka theih bang in biatak an chimtu cu thah nan ka duh, cucu Abraham nih a rak tuah mi a si lo. 41 Nan pa rian kha nan ṭuan a si ko,” tiah a ti hna.

Annih nih, “Kannih cu lakfa kan si lo, pakhat te lawng kan ngeih  mi Pa cu Pathian a si,” ti in an leh.

42 Jesuh nih, “Pathian hi nan Pa rak si siseh law nan ka dawt ko hnga, zei tin tiah Kei kaa thawknak cu Pathian a si i amah sin in ka ra; keimah duh in ka ra lo, amah nih a ka thlah. 43 Zei ruang ah dah ka chim mi bia nan fian khawh lo?  Cucu ka bia nan in khawh lo caah a si. 44 Nannih cu nan pa khuachia sin in nan si i nan pa nih a duh mi kha tuah nan duh deuh. Amah cu a hramthawk in lainawng a si; biatak ah a dir bal lo; a chung ah biatak a um hrimhrim lo; lih a chim tikah a si ning tein a chim mi a si, zei cah tiah amah cu mi lihchim a si, cun lihbia i pa a si. 45 Biatak ka chim caah nan ka zum lo. 46 Aho tal nih ka sualnak nan sawh kho maw?  Biatak ka chim ahcun, zei ruang ah dah nan ka zumh lo? 47 Pathian sin in a ra mi poh nih Pathian bia kha an ngaih; ka bia nan ngaih lonak a ruang cu Pathian sin in a ra mi nan si lo caah a si,” tiah a ti hna.

48 Jew hna nih, “Samariami na si i khuachia na ngei kan in ti tikah kan hmaan a si lo maw?” ti in an leh.

49 Jesuh nih: “Khuachia ka ngei lo; ka Pa ka upat, nannih nih upatnak nan ka pe duh lo. 50 Sunparnak ka kawl lo, sunparnak a ka kawl mi mizeimaw a um i amah cu biaceihtu a si. 51 Biatak tein kan chimh hna, ka bia a zul mi poh cu thihnak an tep lai lo,” tiah a leh hna.

52 Jew hna nih, “Atu khuachia na ngeih cu kan hngalh cang. Abraham cu a thi, cun profet hna cu an rak thi, nain nangmah nih, ‘Ka bia a zul mi poh cu thihnak an tep bal lai lo,’ na ti. 53 Kan pa Abraham nakin maw na ngan deuh? Amah cu a rak thi. Profet hna zong an thi ve. Aho ah dah naa rel?"tiah an ti.

54 Jesuh nih, “Sunparnak ka kawl a si ahcun ka sunparnak cu zei hmanh a tlak lai lo; a taktak ti ahcun ka sunparnak cu nannih nih nan hngal lo nain, ‘Kan Pa a si,’ nan ti mi ka Pa nih a ka pek mi a si. 55 Sihmanhsehlaw kei nih cun ka hngalh, cun ka hngal lo ka ti sual ahcun nanmah bantuk lihchim ka si ve lai. Sihmanhsehlaw ka hngalh taktak, cun a bia ka zulh. 56 Nan pa Abraham cu ka Ni a hmuh te lai ti kha a ruah tikah a rak i nuam; a hmuh i a rak i lawm,” tiah a ti hna. 

57 Cu tikah Jew hna nih, “Nang cu kum sawmnga hmanh na tling rih lo nain Abraham cu na hmu tih?” tiah an ti.

58 Jesuh nih, “Biatak kan chimh hna: Abraham a um hlan ah ka rak um cang,” ti in a leh hna. 59 Cu tikah amah chehnak ca lung kha an i char; sihmanhsehlaw Jesuh cu aa thup i Biakinn in a chuak.

Mitcaw in a chuak mi a damternak

9 Cuti aa chawhpah in a chuahka in a mit a caw mi pakhat kha a hmuh. 2 A hnuzul hna nih, “Rabbi, mitcaw in a chuah cu aho sual dah a si? Amah maw a nu le a pa dah?” tiah an hal. 3 Jesuh nih, “Aho hmanh an sual lo; mitcaw in a chuah cu a sin in Pathian lianhngannak aa phuan nakhnga caah a si. 4 Chun ni a hmunh chung poh cu a ka thlahtupa i a  rian cu kan ṭuan ko lai; aho hmanh an ṭuan khawh lo caan, zan caan cu a phan zau lai. 5 Vawlei cung ka um chung poh cu vawlei i ceunak ka si,” ti in a leh hna.

6 Hi bia a chim hnu ah vawlei ah a cil a chak, a cil in tlak a ser i mitcawpa mit ah a nalh, 7 cun amah kha, “Va kal law Siloam (cu min sullam cu ‘thlah mi’ tinak a si)  Tidil ah vaa ṭawl,” tiah a ti. Cucaah a chuak i aa va ṭawl i khua hmu kho in a rak kir ṭhan.

8 A innpa hna le cu hlan ah a rak hmu tawn mi (zei cah tiah amah cu halchawm nung a si) hna nih khan, “Hi pa hi a ṭhu i a hal tawn mi kha a si lo mei?” tiah an ti.  9 A cheu nih, “A si, khapa kha a si ko,” an ti. Adang nih, “A si lo, amah a lawh caah a si,” an ti. Khapa hrimhrim nih khan, “A si, keimah ka si,” tiah a ti hna.10 Cu tikah annih nih, “Cu asi ahcun zei tin dah khua na hmuh ning?” tiah an ti.11 Anih nih, “Jesuh an ti mi pa nih tlak a ser, ka mit ah a ka thuh i, ‘Siloam ah va kal law vaa ṭawl,’ a ka ti; cucaah ka va kal, cun kaa ṭawl i khua ka hmuh khawh,” ti in a leh hna. 12 Annih nih, “Amah cu khua zei ah dah a um?” tiah an hal. Amah nih, “Ka hngal lo,” ti in a leh hna.

13 A mit a rak caw mipa cu Farasimi hna sin ah an kalpi. 14 Jesuh nih tlak a ser i mipa khua a hmuhter ni cu Sabbath Ni a si, 15 cucaah Farasimi hna nih, “Zei tin dah khua na hmuh ṭhan ning,” tiah an hal, anih nih, “Tlak kha ka mit ah a ka nalh, cun kaa ṭawl i khua ka hmu,” tiah a chimh hna. 16 Cu tikah Farasi mi cheukhat nih, “Cu pa cu Pathian sin in a ra mi a si kho lo: Sabbath ni a ul lo,” tiah an ti. Adang nih, “Zei tin dah misual nih hi bantuk hmelchunhnak cu a tuah khawh,” tiah an ti ve. Cun an karlak ah lung i khah lonak a um. 17 Cucaah mitcawpa cu, “Khua an hmuhtertu hi zei tin dah na ruah?" Atu khua an hmuhter cang si kaw,” tiah an hal ṭhan. Mipa nih cun,“Amah cu profet a si,” ti in a leh hna.

18 Sihmanhsehlaw Jew pawl nih khan, atu khua a hmu ṭhan mi a nu le a pa kha auh i annih kha, 19 ‘A chuakka in a mit a caw,’ nan ti mi pa hi nan fapa a si taktak maw? A si ahcun, zei tin dah khua a hmuh ṭhan ning?’ ti hal hmasa lo cun an zum duh lo. 20 A nu le a pa nih cun, “Amah hi kan fa a si ti cu kan hngalh i mitcaw in a rak chuak ti cu kan hngalh; 21 Asinain zei tin dah atu khua a hmuh ṭhan ti le aho nih dah khua a hmuhter ṭhan ti cu kan hngal lo. A kum a upa cang, amah kha hal ko uh. Amah tein a kong cu i chim ko seh,” ti in an leh hna. 22 Hi bantuk in a nu le a pa nih an chim mi cu Jew pawl kha an ṭih hna caah a si, zei cah tiah annih nih Jesuh cu Khrih a si ti a cohlang mi poh cu pumhnak inn khan chuah awk ah hnatlaknak an rak ngei cang. 23 Cu ruang ah a nu le a pa nih, “A kum a upa cang, amah kha hal ko u,” tiah an ti hna.

24 Cucaah mitcaw in a chuak mipa cu an kawh ṭhan i amah kha, “Pathian cu sunparnak pe ko, hipa cu misual a si caah kan i lungsi ko," tiah an ti. 25 Mipa nih cun, “Misual a si le si lo cu ka hngal lo. Ka hngalh mi cu ka mit a rak caw i atu khua ka hmu ṭhan,” tiah a leh hna. 26 Annih nih, “Na cung ah zei dah a tuah? Zei tin dah na mit a hun ṭhan?” tiah an ti. 27Anih nih, “Voikhat kan chimh cang hna i nan ngai duh lo. Zei ruang ah dah nan theih duh ṭhan. Nanmah hrimhrim nih maw a hnuzul si nan duh ve?” tiah a leh hna. 28 Cu tikah chiatserhnak bia kha an burhhnawh i amah kha, “A hnuzul cu nangmah hi na si, kannih cu Moses hnuzul kan si: 29 Pathian nih Moses sin ah bia a rak chim ti cu kan hngalh, sihmanhsehlaw hi pa tu cu khuazei in a rat kan hngal lo,” tiah an ti. 30 Mipa nih, “Cucu khuaruahhar tuk hringhran a si! Khuazei in a rat nan hngal lo i ka mit cu a ka hunpiak cang! 31 Pathian nih misual hna thlacamnak a ngai lo, sihmanhsehlaw biaknaklei aa zuam i a duhnak a tuah mi hna cu a ngaih hna ti kan hngalh. 32 Vawlei hramthawk in mi pakhat nih mitcaw in a chuak mi an mit a hunpiak hna ti cu kan thei bal lo; 33 hi pa hi Pathian sin in a si lo a si ahcun zei hmanh a tuah kho hnga lo,” ti in a leh hna. 34 Annih nih, “Cawnpiak maw na kan timh, nangmah tham cu na chuakka in misual pei na rak si zungzal ko cu," ti in a bia kha an tan, cun leng ah an chuah.

35 Leng ah an chuah ti kha Jesuh nih a theih, cun amah kha a hmuh tikah, “Mi Fapa cu na zum maw?” tiah a ti. 36 Mipa nih, “Bawipa, ka zumh khawh naklai amah cu aho dah a si ka chim tuah?” tiah a leh. 37 Jesuh nih: “Na hmuh cang: bia an ruah len ko hih,” tiah a ti. 38 Cu pa nih cun, “Bawipa ka zumh,” a ti i amah kha a biak.

39 Jesuh nih: “Biaceihnak tuah ding in hi vawlei ah ka rat cu a si, cucu mitcaw nih khua an hmuh i khua a hmu mi an mit a cawt nakhnga caah a si," tiah a ti.

40 Hi bia an theih tikah, cuka i a um mi Farasi mi cheukhat nih, “A si ahcun, kan mit a caw tih, a si maw?" tiah an ti. 41 Jesuh nih, “Nan mit rak caw seh law sualnak nan ngei hnga lo, sihmanhsehlaw, ‘Khua kan hmu,’ nan ti caah nan sualnak cu a hmun," tiah a leh hna.

Tuukhal  ṭha Jesuh

10 Biatak tein kan chimh hna: tuukawm kutka in lut lo in kaa dang in a kai mi poh cu mifir le damiah an si. 2 Kutka in a lut mi cu tuukhal a si; 3 Innka cawng nih a luhter, tuu nih a aw an theih, a tuu cu pakhat hnu pakhat in a auh hna i leng ah a chuahpi hna. 4 A tuu kha a chuahpi dih hna tikah an hmai ah a kal, cun a aw kha an i chinchiah caah a hnu in an zulh. 5 Midang hnu cu an zul bal lai lo, a sin in an zaam lai, zei ruang ah tiah midang aw cu an i chinchiah mi aw a si lo,” tiah a ti. 6 Jesuh nih hi tahchunhnak hi a chimh hna nain zei a chimh duh hna ti an fiang kho lo.

7 Cucaah Jesuh nih annih kha, “Biatak tein kan chimh hna: tuukawm kutka cu keimah hi ka si. 8 Ka hmai i a ra mi vialte cu mifir le damiah an si; tuu nih a hngal hna lo. 9 Kei cu kutka ka si. Ka sin in a lut mi poh cu an him lai: cu bantuk mi cu a lut a chuak lai i ram hninghno kha a hmuh lai. 10 Mifir cu fir le thah le hrawh duh lawng ah a ra. Kei nih cun, “Nunnak kha an ngeih i duhdim tein an ngeih khawh nakhnga caah ka ra.

11 Kei cu tuukhal ṭha ka si: tuukhal ṭha nih cun a tuu caah a nunnak kha a pek. 12 Hlanchom cu a khaltu a si lo caah le tuu cu amah ta an si lo caah, cenghngia an rat a hmuh cangka in a kaltak hna i a zaam; cu tikah cenghngia nih tuu cu a dawi i a ṭhek dih hna; 13 hlanchom lawng a si caah a zaam i tuu kong ah a lungre a thei lo.14 Kei cu tuukhal ṭha ka si; ka tuu cu ka hngalh hna i ka tuu zong nih an ka hngalh ve, 15 cucu ka Pa nih a ka hngalh i kei zong nih ka Pa cu ka hngalh ve bantuk a si; cun ka tuu ca ah ka nunnak ka pek. 16 Hi tuurun chung a si lo mi tuu dang ka ngei rih hna, annih zong ka rak hruai ve hna lai. Annih zong nih ka aw kha an ngaih lai i tuukhal pakhat ah tuurun pakhat lawng a um lai. 17 “Ka Pa nih a ka dawtnak a ruang cu ka nunnak ka hmuh ṭhan nakhnga ka nunnak ka pek sian caah a si. 18 Aho hmanh nih ka nunnak cu ka sin in an la lo, keimah lungtho tein ka pek mi a si, pek khawhnak nawl ka ngeih bang in  lak ṭhan khawhnak nawl zong ka ngei ve; hihi cu ka Pa sin in ka hmuh mi nawlngeihnak a si," tiah a ti hna.

19 Hi nih hin Jew lak ah ṭhennak thar a chuahter ṭhan. 20 Mi tampi nih, amah cu, “Khuachia a ngei, a hrut cang; zei ruang a dah a bia nan ngaih?” tiah an ti. 21 Cheukhat nih, “Hi hna hi khuachia a ngei mi i bia an si lo; khuachia nih mitcaw kha khua a hmuter ṭhan khawh maw?” tiah an ti ve.

V: PEKCHANHNAK PUAI

JESUH THAHNAK DING BIAKHIAHNAK

Jesuh nih Pathian Fapa a sinak a phuan

22 Atu cu Jerusalem ah Pekchanhnak Puai an tuah lio cante a si. Khuasik caan a si,  23 cun Jesuh cu Biakinn ah a um i Solomon Innleng ti mi ah khan aa chawk len ko. 24 Jew pawl nih amah kha an kulh i amah cu, “Lungawṭawm in zei tik tiang dah na kan chiah rih lai? Khrih na si ahcun fiang ko in kan chim ko," tiah an ti.

25 Jesuh nih: “Kan chimh cang hna nain nan ka zum lo. 26 Ka Pa min in ka tuah mi rian hna hi ka tehte an si; sihmanhsehlaw nan zum lo, a ruang cu nannih cu ka tuu nan si lo. 27 Ka tuu nih cun ka aw kha an ngaih; ka hngalh hna i ka hnu in an ka zulh. 28 Annih kha zungzal nunnak ka pek hna; an tlau bal ti lai lo. Cun aho hmanh nih ka kut in an ka chut kho lai lo. 29 Ka Pa, zei cah tiah anmah a rak ka petu cu zeizongte nakin a lianngan deuh i aho hmanh nih ka Pa kut in zei hmanh an chut kho lo. 30 Ka Pa le keimah cu pakhat kan si,” tiah a ti hna.

31 Jew pawl cu amah cheh awk ah lung an i char, 32 cu tikah Jesuh nih, “Ka Pa sin in tuahsernak ṭha tampi kan hmuhsak hna; zei ca ah hin dah lung in cheh nan ka timh?” tiah a ti hna. 33  Jew pawl nih, “Lung in cheh kan in timh mi cu tuahsernak ṭha na tuah ruang ah si lo in Pathian thang na chiat caah a si; minung menmen na si ko nain Pathian ah naa chia,” tiah an leh.

34 Jesuh nih, “Nan Phungbia ah, 'Nannih cu pathian nan si kan ti hna,' ti in aa ṭial a si lo mei? 35 Cucaah Pathian biaphuan a thei mi hna ca ah,'pathian hna,' ti mi biafang a hman -cun cathiang cu hlawt khawh a si lo- 36 Nain Pa nih chiti thuh in a thianter i vawlei ah a run thlah mi pa cu, ‘Pathian fapa ka si’ ka ti ruang ah, ‘Pathian na thangchiat,’ nan ka ti. 37 Ka Pa rian ka ṭuan lo ahcun nan ka zumh a herh lo; 38 sihmanhsehlaw ka ṭuan a si ahcun keimah nan ka zumh duh lo hmanh ah ka tuah mi rian tal cu zum uh, cu tikah ka Pa cu keimah chung ah a um i kei zong ka Pa chung i ka um kha nan hngalh hrimhrim lai,” ti in a leh hna. 39 Tlaih an timh ṭhan, sihmanhsehlaw an kut in a zukphiak ṭhan.

Jesuh cu Jordan khattelei ral ah aa zuk

40 Amah cu Jordan tiva khattelei ral, Johan nih hmasa Baptisma a rak peknak peng, lam hlatpi ah khan, a va kal ṭhan i cuka ah  cun a va um. A sin i a ra mi, mi tampi nih khan, 41 Johan nih hmelchunhnak zei hmanh a tuah lo, sihmanhsehlaw hi pa kong a chim mi vialte cu a hmaan dih,” tiah an ti,  42 cun anmah lak i mi tampi nih an zumh.

VI: JESUH CU A THIHNAK LEI AH A PANH

Lazarus thawh ṭhannak

11 Mary le a unu Martha te khua, Bethani, ah khan Lazarus an ti mi mipa pakhat a um i amah cu a zaw. 2 Bawipa ke kha zihmui a thuh i a sam in a rak hnawttu nu cu Mary ṭhiamṭhiam kha a si i amah cu a zaw mi Lazarus i farnu a si. 3 A farle hna nih khan Jesuh cu, “Bawipa, na dawtte kha a zaw,” ti in bia an cah. 4 Cu bia a theih tikah Jesuh nih, “Hi zawtnak cu thihnak in a dong lai lo, sihmanhsehlaw Pathian sunparnak ca ah a si, cuti cun Pathian Fapa cu sunparnak a hmuh lai,” tiah a ti.

5 Jesuh nih Martha le a naunu le Lazarus kha a dawt hna; 6 Lazarus a zaw ti thawng a theih hnu ah a umnak hmun ah khan nihnih a cam rih. 7 Cu hnu ah a zultu hna kha, “Judea ah va kir hna usih,” tiah a ti hna. 8 A zultu hna nih, “Rabbi, Jew hna nih lung in cheh an in timhnak a sau rih lo; cuka ah cun maw na kir ṭhan ko lai?” tiah an ti.

9 Jesuh nih, “Chun ah suimilam hleihnih a um a si lo maw? Chun ah a vak mi aho hmanh an i chuihpah bal lo, zei cah tiah hmuhnak ca ah hi vawlei ceunak an ngei; 10 zan ah a vak mi poh cu an i chuihpah hna, zei cah tiah lam hruaitu ah khuaceu an ngei lo,” tiah a leh hna.

11 Cu hnu ah a chapchih mi cu, “Kan hawi Lazarus cu aa din; ka va ṭhangh lai,” tiah a ti hna. 12 A zultu hna nih amah cu, “Bawipa, aa dinh ahcun khamh a si ko lai,” ti in an leh. 13 Jesuh nih cun Lazarus a thihnak kong kha a chim, nain annih nih cun,‘aa din’ ti mi cu, ‘aa hngilh,’ ti mi ah an ruah; 14 cucaah Jesuh nih fiang tein, “Lazarus cu a thi: 15 cun cuka i ka rak um lo cu nanmah ca ah kaa lawm, zei ruang ah tiah atu cu nan zumh cang lai.  Sihmanhsehlaw a sin ah va kal usih,” tiah a ti hna. 16 Cun faphir ti in hngalh mi Thomas nih adang zultu hna cu, “Amah he thih ve awk ah va kal ve hna usih,” tiah a ti hna.

17An va phak tikah, Lazarus cu thlaan chung ah nili chung a um cang ti kha Jesuh nih a theih. 18 Bethani cu Jerusalem in khanhnih tluk lawng a si, 19 cun Jew hna tampi cu an ṭa a thi mi Martha le Mary hnemh awk ah an ra. 20 Jesuh a ra ti kha Martha nih a theih tikah va ton awk  ah a chuak.  Mary tu cu inn ah a taang ko. 21 Cun Martha nih Jesuh cu, “Bawipa hika ah hin rak um law cu ka ṭa hi a thi hnga lo; 22  sihmanhsehlaw atu hmanh  ah Pathian nih na hal mi poh an pek lai ti ka hngalh,” tiah a ti. 23 Jesuh nih, “Na ṭa cu a tho ṭhan ko lai,” tiah a ti. 24 Martha nih, “Hmanung bik thawh ṭhannak ni ahcun a tho ṭhan lai ti ka hngalh ko,” tiah a ti.

25 Jesuh nih, “Kei cu thawh ṭhannak ka si, keimah a ka zum mi poh cu a thih hmanh ah a nung lai, 26 cun aho hmanh a nung in a ka zum mi poh cu an thi bal lai lo. Hihi na zum maw?” tiah a ti.

27 Amah nih, “A si, Bawipa, nangmah cu vawlei ah a ra lai ding mi, Pathian Fapa, Khrih na si ti cu ka zumh ko,” ti in a leh.

28 Hi bia a chim dih khan a kal i a nau Mary kha din tein, “Bawipa cu hika ah a um i ton an duh,” tiah a ti. 29 Cucu a theih tikah, Mary cu leklak a tho i a sin ah a kal. 30 Jesuh cu khua a phan rih lo, Martha nih a va tonnak ah khan a um rih ko. 31 Mary a ṭhutpi i innchung i a um mi Jew hna nih khan Mary cu tluk rang in a thawh i a kal kha an hmuh tikah thlan i va ṭah awk ah a kal rua tiah an ruah i a hnu in an zulh.

32 Mary cu Jesuh sin ah a va kal, cun a hmuh cangka in, a kehram ah a bawk i amah cu,“Bawipa, hika ah hin rak um law ka ṭa cu a thi hnga lo,” tiah a ti. 33 Jesuh cu mitthli he aa ciah mi Mary, cun amah he a rak ra mi Jew hna kha a hmuh hna tikah a ngaih a chia ngaingai, cun a thawpi a chuah i amah kha, 34 “Khuazei ah dah nan vui?” tiah a ti. Annih nih, “Bawipa, ra zoh tuah,” ti in an leh. 35 Jesuh cu a ṭap; 36 cun Jew pawl nih khan, “Zei tluk in dah a dawt ti cu hmu tuah uh!” tiah an ti. 37 Sihmanhsehlaw, “Mitcawpa mit cu a deiter. Hipa hi thi lo ding in a rak khamh kho lo maw?” a ti mi cheukhat zong an um ve.  38 A thawpi voikhat a vung chuah ṭhan, Jesuh cu thlaan a phan. Thlaan cu lungpher in an khar mi lungkua thlaan a si. 39 Jesuh nih, “Lung kha thawn u,” tiah a ti hna. Mithi far Martha nih khan, “Bawipa, a thihnak nili a si cang i atu cu a nam cang lai,” tiah a ti. 40 Jesuh nih, “Na zumh ahcun Pathian sunparnak na hmuh lai ti kan chimh cang a si lo maw?" tiah a ti. 41 Cucaah lung cu an thawn. Jesuh cu van a cau i a ti mi cu, “Ka Pa, ka thlacamnak na theih caah kan lawmh. 42 Keimah hrimhrim nih ka thlacamnak na theih zungzal ti cu ka hngalh, sihmanhsehlaw ka pawng i a dir mi hna ca ah hin ka cam, cucu nangmah nih na ka thlah ti an zumh nakhnga caah a si,” tiah a ti.

43 Hi bia a chim dih tikah aw thangpi in, “Lazarus, rak chuak tuah,” tiah a ti. 44 Mithi cu a kut le a ke kha aa ṭem bu le a hmai an khuh mi puan he khan a hung chuak. Jesuh nih, “Phoihpiak uh, zalawng tein kal cang seh,” tiah a ti hna

Jew hruaitu hna nih Jesuh thihnak ding bia an khiah

45 Mary ṭhutpi ah a ra i a tuah mi kha a hmu mi Jew tampi hna nih amah cu an zumh, 46 sihmanhsehlaw a cheu cu Jesuh nih a tuah mi hna kha va chimh awk ah Farasi mi hna sin ah an va kal. 47 Cu tikah Tlangbawi ngan hna le Farasimi hna cu tonnak an ngei i annih nih, “Hipa nih hin hi hmelchunhnak vialte hi a tuah lengmang hna, zei tin dah kan tuah hna lai? 48 Hiti kan thlah ko ahcun mikip nih an zumh lai, cun Rom pawl cu an ra lai i hi Hmunthiang le kan miphun  cu an kan cil an kan naan dih lai,” tiah an ti.

49 An lak i pakhat, Kaiafas, cu kum i Tlangbawi Ngan nih khan, “Thil si ning hi a hngal hrimhrim mi nan lo lo; 50 miphunpi a rawh nakin mizapi ca ah mi pakhat a thih cu nan ca ah a ṭha deuh ti hi nan hmu kho rua lo.” tiah a ti hna. 51 Hihi amah pumpak ca si lo, amah cu, cu kum i Tlangbawi Ngan a si bang in Jesuh cu miphun ca ah – 52 miphun ca lawng si lo in aa ṭhek mi Pathian fale vialte, pumh ṭhan dih awk ah a thi lai - ti kha a chim chung  mi a si. 53 Cuni thawk in amah kha thah awk ah an i sehchih cang. 54 Cucaah Jesuh cu Jew hna lak ah langhngan in aa chawk ti lo, kha pengtlang in thetse ramri i a  um mi Efraim an ti mi khuate ah a va kal, cun khika ah khan a hnuzul hna he a um.

Lanhtak Puai a nai

55 Jew hna Lanhtak puai cu a nai cuahmah cang. Lanhtak Puai hlan i thianhnak tuah awk ah khuate lei in Jerusalem ah a rak kai mi tampi nih 56 Jesuh kha an kawl, Biakinn tual i an dirpah ah khan pakhat le pakhat cu, “Zei tin dah nan ruah? Puai ah a ra hnga maw?” tiah an i ti hna. 57 Tlangbawi luban hna le Farasimi hna nih khan an tlaih khawhnak hnga a umnak a hngal mi poh nih anmah kha thawng thanh awk ah nawl an rak chuah cang.

Bethani i zihmui thuhnak

12 Lanhtak Puai hlan niruk ah khan Jesuh cu thihnak in a rak thawhter mi Lazarus a umnak, Bethani, ah khan a va kal. 2 Cuka ah cun zanriah dumṭinak an tuahpiak; Martha nih a bultlawl hna i Lazarus cu cabuai ah khan a dum ve. 3 Mary cu a man a fak ngaingai mi zihmui phun ṭha, poundkhat he a rak lut i Jesuh ke cu a thuh, cun a sam in a hnawh; inn cu zihmui rim in a khat. 4 Cu tikah, Judas Iskariot- a zultu pakhat, amah a rawitu dingpa, nih khan, 5 “Zei cah dah mah zihmui hi tangka denarii zathum ah zuar in tangka cu misifak a pek hna hnga lo?” tiah a ti. 6 Hiti a chim mi cu misifak a sia herh hna caah a si lo, amah cu mifir a si, zapi tangka a ken i a duhzat in amah ca ah a hman tawn caah a si. 7  Cu tikah Jesuh nih, “Hnahnawhnak pe hlah u. Ka ruak vui ni ca ah i chiah ko seh. 8 Misifak cu nanmah he an um zungzal ko, keimah tu cu nan sin ah ka um zungzal lai lo,” tiah a ti hna.

9 Cu lio ah Jew tampi nih khika ah Jesuh a um ti an theih tikah amah hmuh duh lawng si lo in thihnak in a thawhter mi Lazarus hmuh duh zong ah an ra. 10  Cucaah tlangbawi luban pawl nih Lazarus zong thahchih ding in bia an chah; 11  zei tin tiah amah ruang ah Jew tampi nih anmah kha an chuahtak i Jesuh kha an zumh.

Jerusalem ah Messiah a lut

12 A thaizing ah Lanhtak Puai ca i a rami mibu nganpi nih khan Jesuh cu Jerusalem ah a ra lio ti an theih. 13 Kuhchuk hnah i put in amah don awk ah an chuak, cun, “Hosanna! Bawipa min in a ra mi Isreal Pathian cung ah thluachuahnak um ko seh!” ti in an au.

14 Jesuh cu laa note kha a hmuh i aa cit - cathiang nih, 15“Zion fanu, ṭih hlah, zoh hmanh, na Bawipa cu laa note i cit in a ra lio,” a ti bantuk khan a si. 

16 Hmasa ah cun a zultu hna nih hihi an hngal fiang kho lo, sihmanhsehlaw a hnu, Jesuh cu sunparnak he a thawh ṭhan tikah, hihi cu amah kong ah rak ṭial cang mi a si i atu a cung ah a tlung taktak cang ti kha an hngalh ṭhan. 17 Lazarus kha thlaan in a auh i thihnak in a thawhter lio i amah he a rak um mi mibupi hna cu mithmuh tehte an si rih; 18 amah cohlan awk ah mibupi an rak chuahnak a ruang pakhat cu hihi a si ve: hi khuaruahharnak a tuah ti kha an rak theih cang. 19 Cu tikah Farasi mi pawl cu pakhat le pakhat kha, “Zei hmanh nan tuah khawh ti lo cu nan hmu ko lo maw; zoh hmanh uh, vawlei pumpi nih a hnu in an zulh cang,” tiah an i ti.

Jesuh nih a thihnak le a sunparnak ding cu a chim chung

20 Puai caan lio, Pathian biak awk i a rak kai mi hna lak ah khan Grikmi cheukhat an i tel ve. 21 Hi hna nih  hin, Galilee peng Bethsaida in a ra mi, Filip cu an fuh i amah kha, “Saya, Jesuh hmuh kan duh ko,” tiah an ti. 22 Filip nih Andru kha a va chimh, cun Andru le Filip nih hmunkhat tein Jesuh cu an va chimh.

23 Jesuh nih annih kha, “Atu cu Mi Fapa nih sunparnak a hmuh caan a phan cang. 24 Biatak tein kan chimh hna: changvut ci cu vawlei ah a tla i a thih hmasa lo ahcun mu khat lawng a si peng ko; sihmanhsehlaw a thih ahcun thlairawl tampi a chuahpi. 25 A nunnak a daw mi poh nih a nunnak a sung; hi vawlei ah a nunnak a hua mi poh nih zungzal nunnak ca ah a nunnak cu a huhhim lai. 26 A ka rianh mi poh nih ka hnu an ka zulh lai, cun ka sal cu ka umnak ah a um ve lai. Mi pakhatkhat nih a ka rianh ahcun ka Pa nih a upat lai. 27 Atu ka lungre a thei ko, zei dah ka chim lai: “Ka Pa, hi suimilam caan hin ka khamh ko? Sihmanhsehlaw hi ruang hrimhrim ah hin hi can ka phanh hi a si. 28 Ka Pa, na min cu sunparnak pe ko tuah,” ti in a leh hna.

Van in, “Sunparnak ka pek cang, cun ka pek rih lai” ti in aw pakhat a rak thang. 29 Cuka i a dir mi mibupi, hi bia a thei mi hna nih khan khuari thawng a si an ti; adang nih, “Amah a chawnhbiak mi vanmi a si,” an ti. 30 Jesuh nih, “Hi aw a rat cu keimah ca ah si lo  in nanmah ca ah a si.

31 Atu cu hi vawlei ca ah biachahnak tuah a si cang; atu hi vawlei bawi cu ṭhawl a si cang. 32  Cun kei cu hi vawlei in thlai ka si tikah mi vialte cu ka sin ah ka hnuh dih hna lai,” ti in a leh hna.

33 Hi bia hna nih zei bantuk thihnak dah a huah lai ti kha a langhter. 34 Mibupi nih, “Phungbia nih Khrih cu zungzal in a hmun lai ti a kan cawnpiak. Asi ahcun zei tin dah ‘Mi Fapa cu thlai a si lai,’ na ti khawh? Cu Fapa cu aho dah a si?” ti in an leh..

35 Jesuh nih: “Ceunak cu nanmah he caan tlawmpal lawng a um cang lai. ceunak nan ngeih lio ah hin nan lamthluan cu peh ko u, asilole muihnak nih an phak sual hna lai, cun mui lak i a vak mi aho hmanh nih khuazei a kal kha a hngal lo. 36 Ceunak nan ngeih rih lio ah hin ceunak cu zum tuah u, cuti cun ceunak fale nan si lai,” tiah a ti hna. Cu bia a chim dih in Jesuh cu a chuak i aa thup.

Biadonghnak: Jew hna zumh lonak

37 Cu tluk tam hmelchunhnak a tuah ah khan an rak um ko nain amah cu an zum hlei lo; 38 cucu profet Isaiah bia nih,“Bawipa, kan sin i an theih mi cu aho nih dah a zumh, cun Bawipa ṭhawnnak aa phuannak ti in aho nih dah a hmuh?” ti a rak chim mi a tlin nakhnga caah a si. 39 An zum kho taktak lo, cucu Isaiah nih:

40 “An mit a cawtter hna i an lung a hahter hna,

cucu an mit kha hmuhnak ca hmannak, an lung kha lungthiannak ca hmannak in kham awk ah an si, cuti cun an lung an i thleng lai lo i damnak an hmuh ti lai lo,’ tiah a rak ti bang khan a si.

41 A sunparnak kha a hmuh caah Isaiah nih hiti a rak chim hi a si, cun a bia cu Jesuh kha a sawh. 42 Cun amah a zum mi tampi, hruaitu hna lak hmanh in, an um rih, nain an chim lo, a ruang cu Farasimi hna le pumhnak inn in ṭhawl kha an ṭih caah a si: 43 Pathian sunparnak nakin minung sunparnak kha an sunsak deuh.

44 Jesuh nih langhhngan in:

“Keimah a ka zum mi poh nih keimah si lo in, a ka thlahtu pa kha a zumh a si, 45 cun keimah a ka hmu mi poh nih a ka thlahtu pa kha a hmuh a si. 46 Vawlei ceunak in ka ra, cucu a ka zum mi aho hmanh khuamui lak i an vah nakhnga lo a si. 47 Ka bia kha a thei nain fel tein a zul lo mi poh, cun cu bantuk minung bia a ceihtu ding cu keimah ka si lo, zei tin  tiah keimah cu vawlei biaceih awk ah si lo in khamh awk ah ka ra. 48 Keimah a ka hlaw i ka bia a cohlang lo mi poh cu biaceihtu a ngei diam cang: ka chim mi bia hrimhrim hi ni hmanung bik ni ah a biaceihtu a si lai. 49 Zei cah tiah keimah duh in bia ka chim lo, a ka thlahtu ka Pa nih zei tin chim awk ti le zei dah chim awk ti kha a ka chimh mi a si, 50 cun a nawlbia ti mi cu zungzal nunnak a si ti ka hngalh. Cucaah kei ka chim mi cu ka Pa nih chim a ka ti mi a si.

C: JESUH CAAN A PHAN

PATHIAN TUUFA LANHTAK PUAI

A: A ZULTU HNA HE JESUH I HMANUNG BIK ZANRIAH

Ke ṭawlnak

13 Lanhtak Puai hlan ah khan, Jesuh cu hi vawlei in a Pa sin ah a kal caan a phan cang ti kha a hngalh caah vawlei i a mi hna kha a rak dawt hna i a dongh tiang a dawt hna.

2 Zanriah dumnak ah an si, cun khuachia nih Simon Iskariot fapa Judas chung ah  khan rawinak lungthin cu a rak khumh cang. 3 Jesuh nih cun a Pa nih khan zeizongte cu a kut ah a chiah dih cang, a Pa sin in a rat bantuk in a Pa sin ah a kir ṭhan lai ti kha a hngalh, 4 a ṭhutnak khan a tho, a angkileng aa phoih, pavuah aa lak i a tai ah aa menh; 5  cu hnu ah khengpi chung ah ti a thlet i a zultu kha an ke a ṭawl hna i aa menh mi pavuah in a hnawh hna.

6 Simon Peter caan a rak phan, amah nih, “Bawipa, ka ke maw na ka ṭawl lai?” tiah a ti. 7  Jesuh nih, “Atu ah cun zei ka tuah ti na hngal lai lo, asinain a hnu ah cun na fiangte ko lai,” ti in a leh.  8 Peter nih, “Ka ke cu na ka ṭawl hrimhrim lai lo,” tiah a ti. Jesuh nih, “Kan ṭawl lo ahcun keimah he zei pehtlaihnak hmanh na ngei ti lo,” tiah a leh. 9 Simon Peter nih, “A si ahcun, Bawipa, a ṭha tuk, ka ke lawng si lo in, ka kut le ka lu tiang ka ṭawlchih ko,” tiah a ti. 10 Jesuh nih, “Aa kholh cang mi aho hmanh ṭawl ṭhan a herh ti lo, cu bantuk mi cu a pumpi in a thiang cang. Nannih zong nan zapi tein nan si lo nain nan thiang cang,” tiah a ti hna. 11 Aho nih dah a rawi te lai ti cu a hngalhcia cang, cucaah, “Nan zapi tein nan si lo nain,” tiah a ti hna.

12 An ke a ṭawl dih hna tikah a angkileng a hruk ṭhan i a ṭhutnak ah a kir ṭhan. Amah nih, “Nan cung i ka tuah mi hi nan theihthiam maw? 13 Nannih nih kei cu Saya le Bawipa nan ka ti, cun ka si taktak. 14 Cun keimah nan Bawipa le nan Saya nih nan ke kan ṭawl hna ahcun nannih zong pakhat le pakhat nan ke nan i ṭawl awk a si. 15 Nan cung i ka tuah mi hi nan tuah ve naklai zohchunh awk ah kan tuahpiak cang hna.

16 Biatak tein kan chimh hna: aho sal hmanh a bawipa nakin a ngan deuh lo, thlah mi aho hmanh a thlahtu nakin a ngan deuh lo.17 Atu hihi nan hngalh cang; hiti ning in nan ṭhutdir taktak ahcun thluachuak mi nan si. ‘

18 Nan zapi kong ka chim lo, ka thim mi hna cu ka hngalh ko hna; sihmanhsehlaw cathiang nih, “Ka sin i a ei ve mi nih a ka zuar cang, a ti mi cu a tlin a herh.

19 Atu hi caan a phan hlan ah kan chimh hna, cucu a si taktak tikah Keimah cu Amah ka si ti kha nan zumh nakhnga caah a si. 20 Biatak tein kan chimh hna: ka thlah mi a rak cohlangtu poh nih keimah an ka cohlan, cun keimah a ka cohlangtu poh nih a ka thlahtu kha a cohlan a si,” tiah a ti hna.

Judas rawiphiarnak kong a chimchung

21 Hihi a chim dih in Jesuh cu a lungsi a vang i, “Biatak tein kan chimh hna, nanmah lak i pakhatkhat nih nan ka rawi te lai,” tiah a ti hna. 22 A zultu hna cu aho dah a a chim duh hnga ti in pakhat le pakhat kha khuaruahhar in an i zoh. 23 Jesuh nih a dawt  mi zultu cu Jesuh chang ah khan a zau ko, 24 Simon Peter nih amah kha, “Aho dah a chim duh,” ti hal awk ah a kut a hei piah, 25 cucaah Jesuh ṭang he i naih in a zau ṭhan i amah kha, “Bawipa, aho dah a si?” tiah a hal. 26  Jesuh nih, “Kheng chung ka hnim mi changpar ka pek mi pa a si,” ti in a leh. Cun changpar cu a hnim i Simon Iskariot fapa Judas kha a pek. 27 Chang a cohlan cangka in Satan cu Judas a chung ah a lut. Cu hnu ah Jesuh nih, “Na tuah ding mi cu khulrang in tuah ko,” tiah a ti. 28 Zei ruang ah dah hihi a chim ti mi cu cabuai a dum mi aho hmanh nih an hngal lo. 29 Judas cu an phu tangka kengtu a si caah anmah lak i cheukhat nih cun Jesuh nih amah kha, ‘Puai ca i a herh mi va caw asilole misifak kha zeimalo va pe hna a ti rua,’ tiah an ruah. 30 Changpar a ei dih cangka in Judas cu a chuak. Cucu zan ah a si.

Thlahnak biacah

31 A chuah hnu ah Jesuh nih, “Atu cu Mi Fapa hi sunparnak pek a si cang i amah sin in Pathian cu sunparnak pek a si cang. 32 Pathian cu amah sin in sunparnak pek a si ahcun Pathian zong nih amah sin hrimhrim in sunparnak a pek ve lai, cun sunparnak a pek zau lai. 33 Ka fale hna tlawmpal lawng nanmah he ka um cang lai. Nan ka kawl lai, cun Jew hna ka chimh cang hna bang in ka kalnak ah cun nan ra kho lai lo. 34 Nawlbia thar pakhat kan pek hna: pakhat le pakhat i daw u; Keimah nih kan dawt hna bang in pakhat le pakhat nan i  daw lai. 35 Pakhat le pakhat nan i dawtnak thawng in mikip nih ka zultu nan si cu an in hngalh hna lai,” tiah a ti hna.

36 Simon Peter nih, “Bawipa, khuazei ah dah na kal lai?” tiah a ti. Jesuh nih, “Atu cu ka kalnak ah na ka zul kho lai lo, sihmanhsehlaw a hnu ah cun na ka zulh te lai,” tiah a ti. 37 Peter nih, “Zei cah dah atu ah kan zulh khawh lai lo? Ka nunnak cu nangmah ca ah ka thap lai,” tiah a ti. 38 Jesuh nih, “Na nunnak cu keimah ca ah na thaap lai tih? Biatak tein kan chimh: ar a khuan hlan ah voithum na ka hlawt lai,” tiah a leh.

14 Nan lungre thei hlah uh, Pathian kha i bochan ulaw keimah zong ka bochan uh. 2 Ka Pa inn ah umnak hmun tampi a um; cuti asiloah cun ka rak in chimh cang hna hnga. Atu nan ca ah hmun remh awk ah ka kal lai,  3 cun ka kal i nan ca ah hmun ka va remh hnu ah keimah sin lak ding in ka rak kir ṭhan lai, cuti cun ka umnak ah nan um ve lai. 4 Ka um nakding hmun lam nan hngalh cang tih,” tiah a ti hna.

5 Thomas nih, “Bawipa, khuazei na kal lai kan hngal ṭung lo, zei tin dah a lam cu kan hngalh khawh lai?” tiah a ti.

6 Jesuh nih: “Kei cu Lam ka si; Biaktak le Nunnak ka si; keimah sin dah ti lo cu aho hmanh Pa sin an phan kho lo. 7 Nan ka hngalh a si ahcun ka Pa zong nan hngalh ko lai; atu thawk in amah cu nan hngalh i nan hmuh cang,” tiah a ti hna.

8 Filip nih, “Bawipa, na Pa cu kan hmuhsak law kan lung a tling ko lai,” tiah a ti. 9 Jesuh nih, “Filip, hi caan vialte kan umpi cang hna nain na ka hngal rih lo tih? “Keimah a ka hmu mi poh nih ka Pa an hmuh; cucaah zei tin dah ‘Pa cu kan hmuhsak,’ na ti khawh? 10 Keimah cu Pa chung ah ka um i Pa cu keimah chung ah a um ti hi na zum lo maw? Nan sin i ka chim mi hna hi keimah duh in ka chim mi a si lo: ka chung i a um mi ka Pa nih a rian a ṭuan mi a si. 11Kei cu Pa chung ah ka um i Pa cu ka chung ah a um ka ti tikah nan zumh awk a si, asilole a tlawm bik ah, ka tuah mi hna tehte tal in na zumh awk a si.

12 Biatak tein kan chimh hna: keimah a ka zum mi poh nih cun keimah ka tuah mi thil hna kha an tuah ve hna lai, cun  hi hna nakin a lianngan deuh mi hmanh an tuah te lai, cucu kei cu ka Pa sin ah ka kal caah a si. 13 Pa cu Fapa sin in sunparnak pek a si naklai ka min in nan hal mi poh cu ka tuah hna lai. 14 Ka min in nan hal mi poh cu ka tuah hna lai.

15  “Nan ka dawt ahcun ka nawlbia nan zulh lai. 16 Pa kha ka hal lai i nanmah he zungzal um awk ah adang ṭanpitu pakhat an pek hna lai, 17 amah cu vawlei nih a cohlan khawh lo mi Biatak Thlarau a si; zei tin tiah amah kha a hmu lo i a hngal lo, sihmanhsehlaw nannih nih cun nan hngalh, zei cah tiah amah cu nanmah he a um i nan chung ah a um.

18 “Ngakṭah in kan kaltak hna lai lo; nan sin ah ka ra ṭhan lai. 19 Caan tlawmpal cu vawlei nih an ka hmu lai lo; sihmanhsehlaw nannih nih cun ka nun kha nan hmuh lai i nannih zong nan nung ve lai. 20 Cuni ah cun kei cu Pa chung  ah ka um, cun nannih cu ka chung ah nan um i kei zong nan chung ah ka um kha nan hngalh lai. 21 “Ka nawlbia a cohlang i a zul mi poh cu a ka daw mi an si; cun a ka daw mi poh cu ka Pa zong nih a dawt ve hna lai; cun kei zong nih ka dawt ve lai i a sin ah kaa phuang lai,” tiah a ti.

22 Judas -Judas Iskariot kha a si lo- nih khan amah cu, “Bawipa, vawleimi sin si lo in kanmah sin i phuan naa timh cu zei dah a cang cang?” tiah a ti.

23 Jesuh nih: “A ka daw mi poh nih ka bia kha an zulh lai, cun ka Pa nih a dawt lai, cun a sin ah kan ra lai i a chung ah kan um lai. 24A ka daw lo mi poh nih cun ka bia kha an zul lo. Cun nan theih mi bia hi keimah bia an si lo, a ka thlahtu Pa i bia an si. 25 “Nanmah he ka um rih lio ah hin hi vialte cu kan chimh hna; 26 Sihmanhsehlaw ka min in ka pa nih a thlah lai mi ṭanpitu, Thiang Thlarau, a rat tikah, zeizongte cu an cawnpiak hna lai i kan chimh mi hna vialte cu an theihter ṭhan hna lai.

27 “Daihnak kan chiahtak hna, keimah daihnak kan pek hna, vawlei nih a pek khawh lo mi daihnak, hihi cu keimah laksawng a si. Nan lungre thei hlah seh, cun ṭih hlah u. 28 ‘Ka kal lai i ka kir ṭhan lai,’ ka ti mi cu nan theih. Nan ka dawt a si ahcun Pa sin ka kal lai cu nan i lawmh awk a si, zei cah tiah ka Pathian cu keimah nakin a lianngan deuh. 29 Cu hlan ah hihi kan chimh hna, cucu a can taktak phak tik i nan zumh nakhnga caah a si. 30 Nan sin ah sau tuk ka chim ti lai lo, zei cah tiah hi vawlei bawi cu a ra lio. Ka cung ah nawl a ngei lo, 31sihmanhsehlaw vawlei nih hin ka Pa cu ka dawt i ka pa nih nawl a ka pek ning in ka cawl ti cu a hngalh awk a si. Atu ra uh, kal cang usih,” tiah a ti.

Mitsur ruang taktak

15 Keimah cu mitsur ruang taktak ka si, cun ka pa cu a zohkhenhtu a si. 2 Ka chung i thei a tlai lo mi nge poh cu a tan dih hna, thei a tlai mi poh cu an tlai chinchin nakhnga a zohkhenh hna. 3 Nannih cu nan sin ah ka chim mi bia thawng in nan thiang cang. 4 Nan chung ah ka um bang in, ka chung ah um ve uh. A ṭenge ti mi cu a ruang he aa peh lo ahcun amah tein a tlai khawh lo bang in, nannih zong keimah he nan i peh lo ahcun thei nan tlai kho ve lai lo. 5 Kei cu mitsur ruang ka si i nannih cu a nge nan si. Ka chung ah a um i kei zong a chung ah ka um mi poh nih thei tampi a tlai; zei cah tiah keimah tel lo in zei hmanh nan tuah kho lo. 6 Keimah he aa peh lo mi poh cu mitsur nge bang leng ah hlonh a si –cun a uai; hi bantuk nge hna cu an khawmh hna i mei ah an paih hna, cun a kang dih.

7 Ka chung ah nan um i ka bia zong nan chung ah a um a si ahcun nan duh mi poh nan ka hal lai i nan hmuh lai. 8 Thei tampi nan tlai i a ka zultu nan si ding cu ka Pa sunparnak a si. 9 Ka Pa nih a ka dawt bang in kei zong nih kan dawt ve hna. Ka dawtnak chung ah hin um tuah uh. 10 Ka Pa nawlbia ka zulh i a dawtnak chung i ka um bantuk in ka nawlbia nan zulh ahcun ka dawt nak chung ah nan um ve lai. 11 Hi vialte hi kan chimh cang hna, cucu kaa lawmhnak cu nan chung ah a um i nan i lawmhnak a tlin nakhnga caah a si. 12 Hihi ka nawlbia a si: ka rak i dawt hna bang in pakhat le pakhat i daw uh. 13 A hawi ca ah a nunnak pek nakin a ngan deuh mi dawtnak aho hmanh nih a ngei kho lo. 14 Nawl kan pek mi hna nan tuah ahcun ka hawile nan si.15 Nannih cu sal hna ti in kan au ti hna lo, zei cah tiah sal nih cun a bawipa rian kha a hngal lo. Hawile hna kan ti cang hna, zei cah tiah ka Pa sin in ka theih mi vialte cu kan theihter cang hna, 16 Nanmah nih nan ka thim lo, keimah nih kan thim hna, cucu nan kal i thei tampi, a hmun hnga mi thei, nan tlai nakhnga kan thlah hna, cuti cun ka min in nan hal mi poh cu ka Pa nih an pek hna lai. 17 Kan pek mi hna nawl cu pakhat le pakhat i daw uh ti a si.

A zultu hna le vawlei

18 Vawlei nih an huat hna ahcun nanmah hlan ah keimah a rak ka huat hmasa cang kha philh hlah u. 19 Vawlei ta nan si ahcun vawlei nih amah ta bang in an dawt ve hna lai, zei cah tiah nannih cu vawlei ta nan si ti lo, cun kan thim hna nak nih nannih cu vawlei in hnuk in an chuah cang hna, cucaah vawlei nih an huat hna. 20 Kan chimh mi hna bia hi philh hlah uh: sal cu a bawipa nakin a ngan deuh lo. Keimah kha an ka hrem ahcun nannih zong an in hrem ve hna lai; ka bia an ngaih ahcun nan bia zong an ngaih ve lai. 21 Sihmanhsehlaw keimah ruang ah hi vialte cu nan cung ah an tuah hna lai; zei cah tiah a ka thlahtu kha an hngal lo. 22 Ka rat lo i an sin ah bia ka chim lo ahcun sualnak an ngei hnga lo, sihmanhsehlaw atu cu sualnak in an luat kho ti lo. 23 Keimah a ka hua mi poh nih ka Pa kha an huat ve. 24 Cu bantuk rian cu anmah lak ah ka rak tuah lo a si ahcun aho hmanh nih an rak tuah bal lo bang in annih cu sualnak in an luat men hnga, sihmanhsehlaw atu cu an hmuh ko nain keimah le ka Pa cu an kan huat. 25 Sihmanhsehlaw hi vialte cu an Phungbia ah aa ṭialmi,  A ruang lo in an ka huat, ti mi bia  tlin nakhnga caah a si.

26 “Ka Pa sin in ka rak thlah ding mi ṭanpitu, Pa sin  in a chuak mi Biatak Thlarau, a rat tikah keimah i tehte a si lai. 27 Cun nannih zong a hramthawk tein keimah he nan rak um bang in ka tehte nan si ve lai.

16 Nan tluk nakhnga lo hi vialte cu kan chimh cang hna. 2 An i pumhnak inn in an in ṭhawl hna lai, cun nanmah an that mi hna poh nih Pathian rianthiang kan ṭuan tiah an i ruah can cu a tu hi a phanh taktak lio a si. 3 Ka Pa siseh keimah siseh an kan hngalh bal lo caah hi vialte cu an tuah lai. 4 Sihmanhsehlaw hi vialte cu kan chimh cang hna, cucu a caan a phak tikah ka rak in chimh cang hna ti kha nan hngalh nakhnga caah a si.

Ṭanpitu ratnak

“Hihi a hramthawk tein ka rak in chim hna lo, nanmah he ka um ruang ah a si; 5 sihmanhsehlaw atu cu a ka thlahtu pa sin ah ka kal cang lai. Aho hmanh nih, ‘Khuazei ah dah na kal lai?’ ti nan ka hal lo. 6 Nain hihi kan chimh hna ruang ah nan ngaih a chia. 7 Biatak kan chimh rih hna:  ka kal cu nanmah ṭhatnak caah a si, ka kal lo ahcun ṭanpitu cu nan sin ah a ra lai lo; ka kal ahcun nanmah sin ah ka rak thlah lai. 8 Cun a rat tikah vawlei kha sualnak kong ah, cun aho dah a hmaan ti mi kong ah, biaceihnak kong ah, sualnak kong ah: 9 keimah zumh a duh lo nak kong ah; aho dah a hmaan timi kong ah; 10 Pa sin ah ka kal lainak kong ah le nan ka hmuh ti lai lonak kong ah,11 biaceihnak kong ah; hi vawlei bawi cu sualphawt a si cang nak kong ah, zeitluk in dah a palh ti cu a langhter lai.

12 Nan sin ah chim ding tampi ka ngei rih, sihmanhsehlaw atu cu a tam tuk lai i nan ing kho lai lo. 13 Sihmanhsehlaw Biatak Thlarau a rat tikah a tling mi biatak chung ah an hruai hna lai; zei tin tiah amah duhduh in bia a chim lai lo, a theih mi lawng kha a chim lai, cun a ra ding mi thil kha nan sin ah a phuan lai. 14 Nan sin i a chim ding mi vialte cu keimah sin in a lak  mi an si caah keimah kha sunparnak a ka pek lai. 15 Ka Pa nih a ngeih mi vialte cu keimah ngeih mi an si caah nanmah sin i a phuan mi vialte cu keimah sin in a lak mi an si.

Jesuh cu a kir zau lai

16 “Caan tlawmpal ah nan ka hmu ti lai lo, cun tlawmpal hnu ah nan ka hmuh ṭhan te lai,” tiah a ti hna. 17 Cu tikah a zultu cheukhat cu pakhat le pakhat kha, “Caan tlawmpal ah nan ka hmu ti lai lo, cun can tlawmpal hnu ah nan ka hmuh ṭhan te lai,’ cun ‘Ka Pa sin ah ka kal lai, 18 cun hi,‘Caan tlawmpal,’ti mi hi zei dah a si? Zei dah a sawh duh kan hngal lo,” tiah an i ti.

19 Jesuh nih amah kha biahal an duh ti a hngalh, cucaah annih kha, “Caan tlawmpal ah nan ka hmu ti lai lo, cun tlawmpal hnu ah nan ka hmuh ṭhan te lai,’ ka ti mi sullam cu pakhat le pakhat nan i hal len.

20 Biatak tein kan chimh hna: vawleipi aa lawm lio ah nannih cu nan ṭap nan hram len te lai; nan ngaih a chia lai, sihmanhsehlaw nan ngaihchiatnak cu lunglawmhnak ah a cang te lai. 21 Nu cu a can a phak caah a ngan a fak, sihmanhsehlaw nau aa ngeih tikah a nganfahnak cu a philh, vawleicung ah naute pakhat a chuah caah aa lawm. 22 Cu bantuk in nanmah zong nan si ve te lai: atu cu nan ngaih a chia, sihmanhsehlaw kan hmuh ṭhan hna lai, cun lawmhnak in nan khat lai, cu lawmhnak cu aho hmanh nih an in chut kho hna lai lo. 23 “Cu ni a phak tikah cun zei biahalnak hmanh nan tuah ti lai lo. Biatak tein kan chimh hna: ka min in ka Pa sin nan hal mi poh cu an pek hna lai. 24 Atu tiang ah cun ka min in zei hmanh nan hal rih lo. Hal ulaw nan hmuh lai, cun nan lunglawmhnak cu a tling lai. 25 Hi hna hi biathup in kan chimh hna, sihmanhsehlaw nanmah sin ah biathup in si lo in ka Pa kong cu biafiang in ka chim caan cu a phan lio. 26 Cu ni a phanh tikah cun amah kha ka min in nan hal lai; cun ka Pa sin ah thla kan campiak hna lai ka ti lo. 27 Zei cah tiah keimah kha nan ka dawt i Pathian sin in ka rat kha nan zumh caah Pa hrimhrim nih an dawt hna. 28 Pa sin in ka chuak i vawlei ah ka ra, cun atu cu Pa sin kal awk ah vawlei in ka chuak cang lai,” tiah a leh hna.

29 A zultu hna nih, “Atu cu biathuk hmang ti lo in fiang tein na kan chimh cang. 30 Atu cu zeizongte na hngalh i kanmah biahalnak na hngak lo ti cu kan hngalh cang; hi ruang ah hin Pathian sin in na rat cu kan zumh cang,” tiah an ti.

31 Jesuh nih, “Hmanung bik ah cun nan zumh cang tih. 32 Ngai hmanh uh; nan i ṭhek dih lai, nan lam cio nan kal hna lai i keimah te lawng nan ka kaltak lainak caan cu a ra lio - a phan taktak cang. Nain keimah lawng ka si lo, zei cah tiah ka Pa cu keimah he a um. 33 Keimah sin in daihnak nan hmuh nakhnga hi vialte cu kan chimh hna. Vawlei ah hin harsatnak nan tong lai, sihmanhsehlaw nan ral ṭha seh: vawlei cu ka tei cang,” tiah a leh hna.

Jesuh thlacamnak

17 Hihi a chim dih hnu ah, Jesuh cu van a cau i hitihin a chim:

“Ka Pa, a caan a phan cang: na Fapa nih sunparnak an pek nakhnga na Fapa cu sunparnak ka pe tuah; 2 cucu minung phun vialte cung i nawlngeihnak na pek cang bang in a kut ah na chanh mi vialte zungzal nunnak a pek hna nakhnga caah a si. 3 Cun zungzal nunnak cu hihi a si: A dik mi Pathian pakhat, nangmah le na thlah mi Jesuh Khrih hngalh kha a si. 4 Tuah ding ti na ka pek mi rian ka limnak thawng in vawlei ah sunparnak ka pek cang. 5 Atu, ka Pa, vawlei a rak um hlan, nangmah he ka rak ngeih mi sunparnak cu ka pe tuah.

6 Keimah pek awk ah vawlei in na chuah mi hna sin ah na min cu ka phuan cang. Annih cu na mi an si i na rak ka pek hna, cun na bia cu an zulh cang. 7Atu hmanung bik ah na ka pek mi vialte cu nangmah sin in a ra mi an si ti kha an theihthiam cang; 8 zei cah tiah na ka pek mi cawnpiaknak cu ka pek chin cang hna, cun an cohlan taktak cang, cun nangmah sin in ka rat kha fiang tein an hngalh i a ka thlahtu cu nangmah na si ti kha an zumh cang.

9Anmah ca ah thla ka cam, vawlei ca ah ka cam lo, na ka pek mi ca ah ka cam,  zei cah tiah annih cu nangmah ta an si. 10 Ka ngeih mi vialte cu nangmah ta an si i na ngeih mi vialte cu keimah ta an si, cun annih cu ka sunparnak an si.  11 Kei cu vawlei ah ka um ti lo nain annih cu an um rih, cun na sin  ah ka ra cang lai. A Thiang mi ka Pa, na ka pek mi hna cu na min ah zumhtlak in an um naklai kilveng ko hna, cuti cun annih cu kanmah bantuk in pumkhat an si ve lai.

12 Anmah he ka rak um lio ah khan na min ah zumhtlak in an um naklai ka kilven cang hna. Ka rak zohkhenh hna i a tlau ding i khaukhih mi pakhat dah ti lo cu pakhat hmanh an tlau lo, hihi cu Cathiang a tlin nakhnga caah a si. 13 Atu cu na sin ah ka ra cang lai; sihmanhsehlaw hi hna cu vawlei ka chim, cucu anmah kha ka lunglawmhnak tling tein hrawmh awk ah a si. 14 Na bia cu ka chanhchin hna i leimi nih an huat hna, cucu keimah bang in vawlei ta an si ti lo caah a si. 15 Annih kha leicung hin lak awk ah si lo in Miṭha lopa sin in huhphenh hna awk ah kan hal. 16 Annih cu keimah bang in leimi an si ti lo. 17 Biatak ah thianter ko hna; na bia cu biatak a si. 18 Vawlei ah na ka thlah bang in kei zong nih ka thlah ve hna, 19 annih cu biatak ah thianh an si nakhnga kei cu anmah ca ah kaa thianh. 20 Hi hna ca lawng si lo in an cawnpiaknak thawng in a ka zum lai mi hna ca zong ah thla ka cam. 21 Ka Pa, nang cu ka chung ah na um i kei cu na chung ah ka um bantuk hin annih cu pumkhat si hram hna seh, cuti cun kan chung ah an um kho ve lai. 22 Nangmah le keimah cu pakhat kan si bang in annih zong pakhat an si ve naklai na ka pek mi sunparnak cu ka pek cang hna. 23 Keimah he an chung ah na um i ka chung na umnak thawng in annih cu tling cikcek in pumkhat an si lai, cuti cun vawlei nih hin a ka thlahtu cu nangmah na si i keimah na ka rak dawt bantuk in annih zong na dawt ve hna ti kha a hngalh lai.

24 Ka Pa, na ka pek mi hna cu ka umnak ah an um ve ka duh, cuti cun na ka dawt caah vawlei thawk hlan ah na rak ka pek mi ka sunparnak cu zungzal in an hmuh khawh lai. 25 Dingthlu ka Pa, vawlei nih an hngal lo, asinain kei nih cun kan hngalh i na ka thlah cu hi hna nih hin an hngalh cang. 26 Na min cu ka hngalhter cang hna i ka hngalhter rih hna lai, cucu na rak ka dawtnak cu an chung ah a um i kei cu an chung ah ka um nakhnga caah a si.

B: A TEMHINNAK

Jesuh an tlaihnak

18 Hihi a chim dih hnu ah Jesuh cu a zultu hna he khan a chuak i Kidron nelrawn ah an va pet, cuka ahcun dum pakhat a um i cu dum chung ah cun a zultu hna he an lut. 2 Cu hmun cu leitu Judas zong nih a hngalh ve, zei tin tiah Jesuh nih a zultu hna kha khika ah a ton tawn hna, 3 Judas nih tlangbawi ngan hna le Farasimi hna nih an thlah mi ralvengtu hna he hmunkhat in ralkapbu cu mei-inn, meifar le hriamnam i put cio in a rak hruai hna. 4 A cung i a tlung ding mi vialte a hngalh dih caah Jesuh cu hmai ah a hung chuak i annih kha, “Aho dah nan kawl?” tiah a ti hna. 5 Annih nih, “Nazarethmi Jesuh,” tiah an leh. Jesuh nih, “Keimah hi ka si ko,” tiah a ti hna. A leitu Judas cu anmah lak ah khan a dir ko. 6 Jesuh nih “Keimah hi ka si ko,”a ti hna tikah annih cu hnu ah an i tawn i vawlei ah an tlu. 7 Jesuh nih, “Aho dah nan kawl?” tiah a voihnihnak a hal ṭhan hna. Annih nih, “Nazareth khuami Jesuh,” tiah an leh. 8 Jesuh nih, “Amah cu keimah hi ka si ti kan chimh cang hna. Nan kawl mi cu keimah hi ka si ahcun hi hna cu kal ko hna seh,” tiah a ti hna. 9 Hihi cu, ‘Na ka pek mi hna cu pakhat hmanh ka thlau hna lo,’a rak ti mi a tlin nakhnga caah a si.

10 Simon Peter, vainam pakhat aa ken mi nih a vainam cu aa zuh i tlangbawi ngan sal cu a orhlei hnakhaw pet lak in a tuk. Cu sal i a min cu Malkhas a si. 11 Jesuh nih Peter cu, “Na nam cu a kawng ah sanh ṭhan; ka Pa nih a ka pek mi hrai cu ding lo in maw ka um lai?” tiah a ti.

Pilat le Kaiafas hmai ah Jesuh: Peter nih a hlawt

12 Ralkapbu le biaceihtu hna le Jew ralveng hna nih Jesuh cu an tlaih i an khih.13 Annas sin ah an kalpi hmasa, a ruang cu Annas cu kha kum Tlangbawi Ngan Kaiafas nupi i pa a si. 14 Jew hna kha, ‘Miphun phunkhat ca ah mi pakhat a thih cu a ṭha deuh’ tiah ruahnak a rak petu hna cu Kaiafas kha a si.

15 Simon Peter nih adang zultu pakhat he Jesuh kha an zulh. Hi zultu, Tlangbawi ngan he aa theihngal mi cu Jesuh he tlangbawi ngan innpi chung ah a lut ve, 16 sihmanhsehlaw Peter cu leng ah khan a dir ko. Cucaah Tlangbawi ngan he aa theihngal mi zultu dang cu a va chuak, innka cawngtu kha a va chimh i Peter cu a chung ah a luhter. 17 Kutka cawngtu nute nih khan Peter cu, “Khi mipa zultu na si ko lo maw kha?” tiah a ti. Amah nih, “Ka si lo,” tiah a leh. 18 Atu cu khua a sik, cun sal hna le ralvengtu hna cu meihol in meiphu an tuah i dirbu in an toh; cucaah  Peter zong cu an dir ve i adang  hna he a khua aa lumh ve.

19 Tlangbawi ngan nih khan Jesuh cu a zultu hna le a cawnpiaknak kong cu a hal. 20 Jesuh nih, “Leimi vialte theih awk ah langhngan in ka chim cang; pumhnak inn le Jew hna an i ton tawnnak Biakinn ah ka cawnpiak peng; zei hmanh biathli in ka chim bal lo. 21 Zei cah dah na ka hal? Ka bia a thei mi hna kha hal ko hna; ka chim mi cu an hngalh ko" tiah a leh. 22 Cu tikah a pawng i a dir mi ralvengtu pakhat nih Jesuh cu, “Cutin maw tlangbawi ngan cu leh awk a si?” ti in a hmai ah a bengh. 23 Jesuh nih, “Lungfah ding ka chim mi a um ahcun ka sawhpiak, a um lo ahcun, zei ruang ah dah na ka bengh,” tiah a leh. 24 Cu hnu ah khihbu in Annas nih tlangbawi ngan Kaiafas sin ah a kuat.

25 Simon Peter cu khika ah a dir i a khua aa lumh lio ah khan mipakhat nih, “Amah zultu dang na si ko lo maw kha?” tiah a ti. Amah nih,” Ka si lo,” ti in aa pheh. 26 Tlangbawi ngan i sal, Peter nih a hnakhaw pet lak a tuk mi i rualchan nih khan, “Dum ah khan amah he kan hmuh ve pei ka ti?” tiah a ti. 27 Peter nih aa pheh ṭhan; cun ar a khuang colh.

Pilat hmai ah Jesuh

28 Jesuh cu Kaiafas inn khan mangki bawi tual ah an hruai. Atu cu zingka a si. Jew hna cu i thurhnawmh i Lanhtak rawl ei khawh lai lo phan ah mangki bawi tual chung ah cun an lut lo. 29 Cucaah Pilat cu a hung chuak i annih kha, “Hipa hi zei sualnak dah nan puh?” tiah a hal hna.  30 Annih nih, “Zei khuasual a tuah lo ah na kut ah kan in chanh hnga maw,” tiah an leh. 31 Pilat nih, “I hruai ulaw nan Phungbia ning in va ceih u,” tiah a ti hna. Jew pawl nih khan, “Kannih cu aho hmanh thahnak nawl kan ngei lo,” tiah an leh. 32 Hihi cu Jesuh nih zei bantuk thihnak in dah a thih te lai ti a rak chim mi bia a tlin lainak caah a si.

33 Cucaah Pilat cu a inntual ah a kir ṭhan, cun Jesuh kha a auh i amah kha, “Jew hna siangpahrang cu na si maw?” tiah a hal. 34 Jesuh nih, “Hihi nangmah lungtho tein maw na ka kal, asilole ka kong cu mi nih an in chimh?” tiah a leh. 35 Pilat nih, “Kei cu Jew maw ka si? Na mi hna le an tlangbawi luban hna nih pei nangmah cu ka kut ah an ka chanh ko cu; zei sualnak dah na tuah?” tiah a leh. 36 Jesuh nih, “Kei ka pennak cu hi leicung hi a si lo; ka pennak cu hi leicung hi rak si seh law Jew pawl hna kut ah an ka chanh nakhnga lo ka mi hna nih an ka dirkamh ko hnga. A taktak ti ahcun ka pennak cu hika ta a si lo,” tiah a leh. 37 Pilat nih, “A si ahcun, Siangpahrang na si ko tih?” tiah a ti. Jesuh nih “Siangpahrang na si a ka titu cu nangmah na si. Ka chuahchan le hi vawlei ah ka ratchan cu hihi a si: cucu biatak kha dirpi awk ah a si; cun biatak a ṭanh mi vialte nih ka bia kha an ngaih,”tiah a leh. 38 Pilat nih, “Biatak! cucu zei dah a si?” tiah a ti. Cuti a chimpah in Jew hna sin ah a va chuak ṭhan i annih kha, “A sualnak pakhat hmanh ka hmu lo. 39 Sihmanhsehlaw nan phung bantuk in Lanhtak puai ah thongtla pakhat cu ka thlah awk a si. Jew hna siangpahrang cu in thlahpiak hna ning law nan duh maw?” tiah a ti hna. 40 Cu tikah annih nih, “Hi pa a si lo, Barabbas,” tiah an au. Barabbas cu damiah a si.

19 Cu tikah Pilat nih Jesuh cu a chuah i a tukter hna; 2 cu hnu ah ralkap hna nih hlingnge cheukhat kha luchin ah an phiar i a lu ah an chinh, cun puansen kha an aihter. 3 Hmai ah an hun chua i amah kha, “Jew hna Siangpahrang cu a nunkhua sau ko seh,” ti in a hmai ah an bengh.

4 Pilat cu a rak chuak ṭhan i annih kha, “Zoh hmanh uh, a sualnak pakhat hmanh ka hmu lo ti langhternak caah ka rak chuahpi ṭhan lai,” tiah a ti hna. 5 Cu tikah Jesuh cu hling luchin le puansen he leng ah a rak chuak.  Pilat nih, “Mipa cu hika ah a um ko hih!” tiah a ti hna. 6 Jesuh an hmuh tikah tlangbawi luban hna le ralvengtu hna nih, “Vailam ah tah ko, vailam ah tah ko!” tiah an au. Pilat nih, “Nanmah tein i hruai ulaw vailam ah va tah ko u, kei cu a sualnak pakhat hmanh ka hmu lo,” tiah a leh hna. 7 Jew pawl nih, “Phungbia kan ngei, cu Phungbia ning ah cun a mah cu a thih awk a si, zei ruang ah tiah Pathian Fapa ka si aa ti,” tiah an ti.

8 Hitin an chim cu Pilat nih a theih tikah a ṭihnak a zual chin. 9 Tual chung ah a lut ṭhan i Jesuh cu, “Khuazei in dah na rat?” tiah a ti. Sihmanhsehlaw Jesuh nih a let lo. 10  Cu tikah Pilat nih, “Na ka chawn duh lo tih? Nangmah thlahnak nawl le vailam ah tahnak nawl ka ngeih cu fiang tein na hngalh ko lai dah?” tiah a ti.11 Jesuh nih, “Cunglei in pek na si lo ahcun ka cung ah zei nawl hmanh na ngei hnga lo, cu ruang ah na kut ah a ka chantu hna hi an sual deuh,” tiah a leh.

Jesuh cu thi seh ti bia an ceih

12 Mah can thawk cun Pilat nih Jesuh cu a thlah duh tuk cang, sihmanhsehlaw Jew pawl nih, “Hipa na thlah ahcun Sisar hawi na si lo, amah tein siangpahrang aa ser mi poh cu Sisar nawl a buar mi an si,” ti an au. 13 Hi bia a theih tikah Pilat nih Jesuh cu leng ah a chuah, cun Lungṭuang ti in auh mi, Hebrew in Gabbatha, an ti mi, biaceihnak ṭhutdan cung ah khan a ṭhutter. 14 Atu cu Timhlamhnak Ni, suimilam pathum hrawng a si. Pilat nih Jew hna cu, “Hika ah hin nan siangpahrang a um hih,” tiah a ti hna.15 Annih nih, "Kalpi uh, kalpi uh, Vailam ah tah uh,” tiah an au. Pilat nih, “Nan Siangpahrang cu vailam ah ka tah ko lai maw?” tiah a ti hna. Tlangbawi luban hna nih, “Sisar ti lo siangpahrang dang kan ngei lo,” ti in an leh. 16 Cu tik ah Pilat nih vailam i tah awk ah an kut ah a chanh hna.

Vailam tahnak

Cu tikah Jesuh cu an hruai, 17 cun a vailamtah tung kha pu in, Hebrew holh in Luruh Hmun asilole Hebru holh in Golgotha an ti mi tlang ah cun an kaipi, 18 cuka ah cun adang pahnih hna he, a kam veve ah, Jesuh cu a lai ah an chiah i vailam ah an tah.19 Pilat nih ca pakhat a ṭial i vailam cung ah a khenhchihter hna. A ṭialmi cu: “Nazarethmi Jesuh, Jew hna Siangpahrang” ti a si. 20 Jesuh vailam an tahnak cu khualipi he aa hlat lo caah Jew hna tampi nih an rel, a ca cu Hebrew, Latin le Grik holh in a si. 21 Cucaah Jew tlangbawi luban hna nih Pilat cu, “Jew Siangpahrang” ti in na ṭial awk a si lo, ‘Hi pa nih hin Jew Siangpahrang ka si aa ti,’ ti in na ṭial awk a si,’ tiah an ti. 22 Pilat nih, “Ka ṭial mi cu ka ṭial cang," tiah a leh hna.

Jesuh hnipuan an i ṭhen

23 Jesuh vailam an tah kha an dih tikah ralkap hna nih a hnipuan cu cheuli ah an cheu i cheukhat cio in an i phaw. A angkifual cu hliah ngei lo in tah mi a si; 24 cucaah pakhat le pakhat kha, thlek lo in aho dah a co hnga ti hngalhnak ah camcawhfung in zuk usih,” tiah an i ti. Hiti hin, “Ka hnipuan cu an i ṭhen i ka puanthan cu camcawhfung in an zuh,” ti mi cathiang bia cu a hung tling. Hihi cu ralkap hna nih an tuah mi a si.

Jesuh le a Nu

25 Jesuh vailamtung kam ah cun a nu le a nu naunu, Clopas nupi Mary, cun Magdalami Mary cu an dir. 26 A nu le a pawng i a dir mi a dawt mi a zultu kha a hmuh hna tikah Jesuh nih a nu cu, “Minu, hihi na fapa a si," tiah a ti. 27 Cun a zultu cu, “Hihi na nu a si,” tiah a ti. Cu caan thawk cun kha zultu nih khan a inn ah a ṭinpi.

Jesuh thihnak

28 Hi hnu ah hin, Jesuh nih atu cu zeizongte a tling cang ti kha a hngalh, cucaah cathiang a tlin dih nakhnga,“Ka ti a hal,” tiah a ti. 29 Cuka ah cun mitsur zuthor he a khat mi raca pakhat a um, cucaah zuthor ah hnim mi puanchia cu feipar ah an ṭemchih, an hler i a kaa ah an tuh. 30 Jesuh nih mitsur zu cu a teh hnu ah, “A tling cang,” a ti, cun a lu a khun i a thlarau cu a thlah.

Chunh mi Jesuh

31 Cu ni cu Timhlamhnak Ni a si, cun Sabbath ni ah an ruak cu vailam ah an i thlai ko nakhnga lo – zei tin tiah kha Sabbath cu a hleice in a sunglawi mi puaipi ni a si- Jew hna nih an ke kha khiak in an ruak cu an lak nakhnga Pilat cu an hal. 32 Cucaah ralkap pawl cu an ra i amah he an tah ve mi pakhatnak pa le adang i ke kha an khiah hna. 33 Jesuh sin an rat tikah a rak thih cang kha an hmuh; cucaah a ke kha khiah lo in 34 ralkap pakhat nih a hnak cu fei in pem lak a chunh, cun hmakhatte ah thi le ti an rak chuak. 35 Hihi cu a hmutu i tehte khaannak a si, tehte dik a si, cun a chim mi cu a hmaan ti kha a hngalh- cun nan zumh nakhnga tehte a khaan mi a si. 36 Zei cah tiah hi thil vialte cu, ‘A ruh pakhat hmanh a kiak lai lo,’ ti mi Cathiang bia a tlin nakhnga caah a si; 37cun hmundang zong ah cathiang nih, “Pem ko in an chunh mipa cu an cuanh te lai,” tiah a ti rih. 

An vuinak

38 Hi hnu ah, Arimathaea khuami Josef- Jesuh zultu pakhat a si ve mi – zultu a si ve nain jew a ṭih hna caah a thli tein a zultu a si mi nih Jesuh ruak ṭhumhnak nawl cu Pilat kha a hal. Pilat nih nawl a pek, cucaah an ra i an kalpi. 39 Nicodemus- Jesuh sin ah zan ah a rak ra mi pa zong cu a ra ve. Cun mura le aloes cawh mi zihmui, pawngzakhat tluk a rit lai- cucu a rak i ken. 40 Jesuh ruak cu an lak, Jew hna phung zulh in zihmui he khiangrang puan in an zual. 41 Vailam an rak tahnak hmun ah khan dum pakhat a um, cun cu dum chung ah cun, aho hmanh vui rih lonak, thlaanthar pakhat a um. 42 Cu ni cu Jew hna Timhlamhnak Ni a si caah le thlaan cu a pawngte ah a um caah, Jesuh cu cuka ah cun an vui.

C: KHRIH A THAWH ṬHAN NI

A Lawng mi Thlan

20 Zarh khat i a nikhatnak ni zingka tuante a si i a mui rih lio ah Magdalami Mary cu thlaan ah a rak ra. 2 Thlaankhar lung cu thlaanka in a rak i thawn kha a hmuh, cun Simon Peter le adang zultu, Jesuh nih a dawt khun mi kha, hna sin ah a rak tli i annih kha, “Bawipa cu thlaan in an chuah i khuazei i an chiah ka hngal lo,” tiah a ti hna.

3 Cucaah Peter cu adang zultu he thlaan ah a tli. 4 Hmunkhat ah an tli, asinain adang zultu cu Peter nakin rang deuh a tli i thlaan kha a phan hmasa, 5 a vun bih i an tuamnak puanrang cu vawlei i aa phah ko kha a hmuh, sihmanhsehlaw a lut lo. 6 Simon Peter nih a hnu zulh in a hung phan ve i thlaan chung ah khan a lut colh, vawlei ah aa phah mi puanrang,  7 cun a lu an mennak puanthan kha a hmuh hna, hihi cu puanrang he a um lo, a hmunte ah aa zual i a um ko. 8 Cun thlaan a phan hmasa mi adang zultu zong kha a lut ve; a hmuh i a zumh. 9 Hi caan tiang ah hin, amah cu thihnak in a tho ṭhan lai ti mi cathiang bia kha an pemh rih lo. 10 Cu hnu ah a zultu hna cu inn ah an ṭin.

Magdalami Mary sin aa phuannak

11Sihmanhsehlaw Mary cu thlaan kam leng ah khan a dir i a ṭap. Cun a ṭahpah in thlaan chung kha a vun bih, 12 cun Jesuh ruak an rak chiahnak ah khan puanrang aa aih mi vanmi pahnih, a lulei ah pakhat a kelei ah pakhat, an ṭhut ko kha a hmuh hna. 13 Annih nih, “Minu, zei cah dah na ṭah,” tiah an ti. Anih nih, “Ka Bawipa an kalpi i khuazei i an chiah ka hngal lo,” tiah a leh. 14 Cuti a chimpah in a hun i mer i khika ah Jesuh a dir ko kha a hmuh, Jesuh a si ti tu cu a hngal lo. 15 Jesuh nih, “Minu, zei cah dah na ṭah? Aho dah na kawl?” tiah a ti. Amah kha dum ngeitu ah a rel i, “Saya, na lak sual a si ahcun na chiahnak ka chim, ka va kal lai i ka va lak lai,” tiah a ti. 16 Jesuh nih, “Mary,” tiah a ti. Aa mer i amah kha, Hebrew holh in “Rabbuni- Bawipa tinak a si- tiah a ti. 17 Jesuh nih, “I awk hlah, zei  ca htiah ka Pa sin ah ka kai rih lo. Sihmanhsehlaw va kal law ka unau hna kha va kawl in annih kha, “Ka Pa le nan Pa, ka Pathian le nan Pathian sin ah ka kai rih lai a ti tiah va chim hna,” tiah a ti. 18 Cucaah Magdalami Mary nih a zultu hna cu “Bawipa cu ka hmuh cang, cun hi bia hna hi amah nu cu a chimh,” tiah a ti hna. 

A zultu hna sin a langhnak

19 Cu ni zanlei, zarhkhat i nikhatnak ni ah khan, Jew hna kha an ṭih hna caah, zultu hna cu innka an i kharkhumh. Jesuh cu a ra i an lak ah a dir. Annih kha, “Nanmah he daihnak um ko seh,” tiah a ti hna; 20 cun hi bia a chim dih in a kut le a hnak kha a hmuhsak hna. A zultu hna cu Bawipa kha an hmuh ṭhan caah lawmhnak in an khat, 21 cun annih kha, “Nanmah he daihnak um ko seh. Ka Pa nih a ka thlah bantuk in kei zong nih kan thlah ve hna,” tiah a ti ṭhan hna.

22 Hi bia a chim dih in a thaw a chuahhnawh hna i annih kha, “Thiang Thlarau kha co ko u. 23 Mi kha an sual nan ngaihthiam hna ahcun ngaihthiam an si lai; an sual kha nan hmunhter a si ahcun a hmun ko lai,” tiah a ti hna.

24 Hleihnih lak i pakhat, Faphir an ti mi Thomas cu Jesuh a rat ah khan a um ve lo. 25 Cucaah a zultu dang hna nih, “Bawipa kha kan hmuh cang,” an ti tikah amah  nih, “A kut i thir hma-neh awng ka hmuh i kha thir hma-neh awng ah ka kutdong ka hrolh hlan, cun a hnak kha ka kut in ka tawngh hlan cu ka zum duh lo,” ti in a leh hna. 26 Niriat hnu ah khin zultu hna cu inn chung ah an um ṭhan i Thomas cu anmah he a um ve.  Innka cu aa khar, sihmanhsehlaw Jesuh cu a rung lut i an lak ah khan a dir. Amah nih, "Nanmah he daihnak um ko seh," tiah a ti hna.  27 Cun Thomas cu, “Zoh hmanh ka kut cu hika ah a um ko hih, na kutdong cu rak hrolh tuah; cun na kut ka chan law ka hnak ah ka hrolh tuah. Zum lo in um ti hlah, zum cang ko,” tiah a ti.  28 Thomas nih, “Ka Bawipa le ka Pathian!” tiah a ti. 29 Jesuh nih amah cu, “Na ka hmuh khawh caah na zumh. Sihmanhsehlaw hmu lo in a ka zum mi hna cu thluachuak mi an si" tiah a ti.

IV: VOI KHATNAK A DONGHNAK

30 Jesuh nih a zultu hna hmaika ah a tuah mi adang hmelchunhnak tampi an um rih, sihmanhsehlaw hi cauk ah  hin kan khumh lo. 31Hi hna kan khumh mi cu nannih nih Jesuh cu Pathian Fapa Khrih a si ti nan zumh, cun hiti nan zumhnak thawng in amah min in nunnak nan hmuh nakhnga caah a si.

D: BIADONGHNAK

1: TIBERIAS RILIKAM I A LANGHNAK

21 Hnu deuh ah khan, Jesuh cu a zultu hna sin ah a lang ṭhan. Cucu Tiberias Rili kam ah a si, cun hiti hin thil a cang: 2  Simon Peter le Faphir ti mi Thomas, Galilee peng Kana in Nathanael, Zebedi fapale hna le adang zultu pahnih hna cu hmunkhat ah an um. 3Simon Peter nih, “Ngatlaih ah ka kal lai,”tiah a ti hna. Annih nih kan ra ve lai,” tiah an leh. An tho i tilawng he an chuak; sihmanhsehlaw cu zan cu pumkhat hmanh an tlai lo.

4 Khua a dei tikah, Jesuh cu tikam ah khan a dir ko, nain zultu hna nih Jesuh a si kha an hngal lo. 5Jesuh nih annih kha, “Hawile hna, zei hmanh nan tlai lo maw?” ti in a hei auh hna. Annih nih, "Zei hmanh," tiah an leh, 6 annih cu a thawh hna i, "Nan sur cu nan hmai orhlei kam ah khan vun chep ulaw tlawmpal cu nan tlaih ko lai" tiah a ti hna. Cucaah an sur cu an vun cheh i nga tam tuk an tlaih caah an sur cu an hnuk kho lo. 7 Jesuh dawt mi zultu nih khan Peter cu, “Bawipa dah kaw a si,” tiah a ti. “Bawipa a si,” ti a theih cangka in Peter cu a angkileng kha aa menh (zei  cah tiah zei hmanh aa hruk lo) i ti chung  ah a zuang. 8 Adang zultu hna cu nga he sur cu hnukpah in, lawng in an ra; annih cu tikam in dong zakhat hrawng lawng a hlatnak ah an rak um. 9 Tikam an phak cangka in khika ah khan changreu cheukhat le nga a rak i chuang mi meiphu a meiṭil kha an hmuh. 10 Jesuh nih, “Nan tlaih mi nga cu tlawmpal in rak pu tuah u,” tiah a ti hna. 11Simon Peter cu cung ah a kai, sur cu tikam ah a hnuh; nga pipi he a khat, an zapi tein za le sawmnga le pathum an si, cun nga cu cu tluk in an tam nain sur cu a tlek lo. 12 Jesuh nih annih kha, “Ra ulaw thaithawh rak ei u,” tiah a ti hna. Zultu pakhat hmanh nih, “Aho dah na si?” tiah an hal ngam lo. Bawipa a si cu ṭha tein an hngal ko. 13 Cu tikah Jesuh cu hmai ah a rak chuak, changreu kha a lak i a pek hna i cu bantuk in nga zong cu a tuah ve. 14 Hihi cu thihnak in a thawh ṭhan hnu a zultu hna sin i Jesuh nih amah le amah aa phuan a voithumnak a si.

15 An ei dih hnu ah khan Jesuh nih Simon Peter cu, “Johan fapa Simon, hi adang hna nakin na ka daw deuh maw?” tiah a ti. Anih nih, “A si, Bawipa, kan dawt cu na hngalh ko,” tiah a leh. Jesuh nih, “Ka tuu tete kha cawm hna,” tiah a ti.16 A voihnihnak ah amah cu, “Johan fapa Simon, na ka daw maw?” tiah a ti.  Anih nih, "A si, Bawipa, kan dawt cu na hngalh ko," tiah a leh. Jesuh nih, “Ka tuu kha cawng hna,” tiah a ti. 17 Cun a voithumnak ah amah kha, “Johan fapa Simon, na ka daw maw?” tiah a ti ṭhan. A voithumnak ah amah kha, “Jonah fapa Simon, na ka daw maw?’ ti a hal tikah Peter cu a lung a fak i Jesuh cu, “Bawipa, zeizongte na hngalh dih, kan dawt cu na hngalh ko,” tiah a ti. Jesuh nih, "Ka tuu kha cawm hna.

18 Biatak tein kan chimh, Na no lio ah cun na taisawm kha nangmah tein naa sawmh i na duhnak poh ah na rak vak, sihmanhsehlaw na upat tikah cun na kut na samh lai i mizeimaw nih na taisawm an in sawmh lai i nangmah tein na kal lai lonak ah an in hruai te lai," tiah a ti. 

19 Hi bia hna nih Peter nih zei bantuk thihnak phun in dah Pathian kha sunparnak a pek te lai ti cu a langhter. Hi hnu ah hin amah cu, "Ka hnu ka zul," tiah a ti.

20 Peter cu a hun i mer i Jesuh dawt mi zultu nih an hnu in a rak zulh hna kha a hmuh –amah cu zanriah dumnak ah khan a ṭang he naihniam tein a rak i hngauh ṭhan i amah kha, “Bawipa, an leitu ding cu aho dah a si lai?” ti a rak haltu kha a si. 21 Amah kha a hmuh tikah Peter nih Jesuh cu, “Bawipa hipa hi tah?” tiah a ti. 22 Jesuh nih, “Ka rat ṭhan tiang hmunhter ka duh zong ah na ca ah zei poinak dah a um? Nang cu ka hnu zulh hi na rian a si,” tiah a ti. 23 Hi zultu cu a thi lai lo ti mi bia vaivuan cu unau hna lak ah aa zel. Nain Jesuh nih Peter kha, “A thi lai lo,” a rak ti lo nain, “Ka rat ṭhan tiang hmunhter ka duh zong ah,” tiah a rak ti.

II: VOIHNIHNAK DONGHNAK

24 Hi zultu cu hi thil hna an hmaannak tehte a khaangtu le a ṭialtu a si, cun a tehte cu an hmaan ti kha kan hngalh.

25 Jesuh nih a tuah mi tampi a um rih; annih vialte kha a nekcok tiang in ṭial a si ahcun ṭialnak cauk vialte cu vawleicung pumpi hmanh ah hin aa tlum lai lo tiah ka ruah.