Zarhkel (31)nak Zarhpi Ni
November 3, 2024 (Year B)
Lectionary: 152
Avoikhatnak Bible
Deuteronomy 6:2-6
Bawipa na Pathian cu na ṭih nakhnga le na chan cu a sau nakhnga, Bawipa nan Pathian nih nannih kha cawnpiak awkah nawl a ka pekmi nawlbia hna le phunglam hna le phungbia hna cu mah hihi an si. 3 Cucaah, maw Israel, Bawipa na pupa Pathian nih bia an kam bangin, cawhnuk le khuaihliti in a luangmi ram chungah cun, nan i remrel i tam piin nan karh nakhnga, thei tuah law, ṭha tein zul tuah hna u. 4 "Thei hmanh, maw Israel: Bawipa hi kan Pathian a si, Bawipa lawnglawng hi; 5 Bawipa na Pathian cu na lungthin dihlak le na ruahnak dihlak le na ṭhawnnak dihlak in na dawt lai. 6 Cun nihin ah kan pekmi bia hi na lung chungah na riahter lai.
Psalm 18:2-3, 3-4, 47, 51
R/Maw Bawipa ka ṭhawnnak, nangmah cu kan dawt hringhran ko!
2 Bawipa cu ka khamhtu a si, amah cu a fekmi ka ralhruang a si. Ka Pathian cu a ka hupphengtu a si, amah sinah cun him tein ka um. Phaw bantukin a ka huhphenh, a ka ven i him tein a ka umter. 3 Bawipa cu ka auh i ka ral hna kut chungin a ka khamh. Bawipa cu thangṭhat ko u.
3 Bawipa cu ka auh i ka ral hna kut chungin a ka khamh. Bawipa cu thangṭhat ko u. 4 Thihnak nih a hri in a ka ṭem, rawhralnak tilian nih a ka tlunhnawh. 5 Thihnak nih a hri in a ka ṭem, thlan nih a rap kha a ka chiahhnawh.
47 ka ral hna teinak kha a ka pek i miphun tampi kha ka kut tangah a chiah hna:50 Pathian nih a siangpahrang cu teinak nganpi a ka pek; a fekmi a dawtnak kha a thimmi keimah David le Ka tefa hna cungah zungzal in a langhter.
Avoihnihnak Bible Hebrews 7:23-28
. 23 Cun an i dannak dang a um rih: tlangbawi dang hna kha cu a thi lengmangmi an si caah an rian kha aa pehtlai kho lo i a tam zong an tam a herh. 24 Sihmanhsehlaw Jesuh cu zungzal in a nungmi a si caah zungzal in tlangbawi a si. 25 Cucaah cun amah thawngin Pathian a fuhmi hna paoh cu a khamh khawh zungzal ko hna; zeicahtiah zungzal in a nun caah Pathian kha a nawlpiak khawh zungzal hna. 26 Cucaah Jesuh cu kan duhnak a tlinter khotu Tlangbawi Ngan cu a si; palhnak a ngei lo, sualnak a ngei lo; misual mi hna lak khan ṭhen a si i vancung ah khin cawi a si. 27 Amah cu tlangbawi dang hna bantuk kha a si lo, amah sualnak caah siseh, midang sualnak caah siseh, ni fate in raithawinak tuah kha a herh lo. Amah le amah raithawinak i aa pek ah khan zungzal ca za in raithawinak pakhat a tuah. 28 Moses Nawlbia nih cun a tling lomi minung kha tlangbawi ngan ah a ser hna, sihmanhsehlaw chiatser tein tuahmi biakamnak, Moses Nawlbia hnu deuh ah a rami nih cun zungzal in a tlingmi tlangbawi ah Fapa kha a ser.
Alleluia Johan 14:23
23 Jesuh nih: “A ka daw mi poh nih ka bia kha an zulh lai, cun ka Pa nih a dawt lai, cun a sin ah kan ra lai i a chung ah kan um lai.
Thawngtthabia (Gospel)
Mark 12:28-34
"Nawlbia lak i a nganbik"
28 Bia an i al mi a rak ngai ve mi phungbia cawnpiaktu pakhat cu Jesuh nih ṭha ngai in a leh mi hna kha aa lungsi ngai i amah kha, “Nawlbia lak ah hin zei hi dah pakhatnak a si?” ti in a dang biahalnak a tuahchap. 29 Jesuh nih, “Hihi pakhatnak a si: “Maw Israel, ngai hmanh, Bawipa kan Pathian cu pakhatte lawng Bawipa a si, 30 cun Bawipa na Pathian cu na lungthin dihlak, na nunnak dihlak, na ruahnak dihlak le na thazaang dihlak in na dawt lai. 31 A pahnihnak cu hihi a si: na innpa cu nangmah bantuk tein na dawt ve lai. Hi hna nakin a ngan deuh mi nawlbia a um ti lo,” tiah a ti. 32 Phungbia cawnpiaktu nih cun, “Bawipa, na chim thiam tuk, na chim mi cu a hmaan, amah cu pakhatte lawng a si i a dang a um ti lo. 33 Amah kha na lungthin dihlak, na hngalhthiamnak le na thazaang dihlak in daw, cun na innpa cu nangmah bantuk in daw ve, hihi cu khangh thawinak le raithawinak vialte nakin a biapi deuh,” tiah a leh. 34 Zei tluk fim in dah a leh ti kha a hmuh tikah, Jesuh nih, “Pathian pennak he naa hlat lo,” tiah a ti. Cun hi hnu ah cun aho hmanh nih bia an hal ngam ti lo.