Christ The King

November 24, 2024 (Year B)

Avoikhatnak Bible Daniel 7:13-14

13Zan i langhnak ka hmuhmi ah cun minung a lomi pakhat cu van khuadawm he a rat kha ka hmuh; zungzal in a nungmi kha a hei naih i a hmaiah cun a va dir. * 14Bawinak le sunparnak le siangpahrang ṭhawnnak kha amah cu pek an si i cucaah miphun zakip le holh phun zakip nih a rian kha an ṭuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak a ngeihmi cu zeitikhmanh i hrawh khawh lomi ṭhawnnak a si. 

Psalm 93:1, 1-2, 5 (1a)

R/ Bawipa cu siangpahrang a si!

1 Bawipa cu siangpahrang a si! Rumra in aa thuam i a tai cu thazang in aa sawmh. Vawlei cu a umnak hmun ah khan fek tein a chiah i a hninh in hninh khawh a si lo.

2 Bawipa, na bawiṭhutdan cu a hramthawk tein a fek i nangmah cu caan thawk hlan in na rak um cang.

5 Bawipa, na phunglam cu zungzal in an hmun, na Biakinn cu zungzal in zungzal tiang a thiang taktak.

Avoihnihnak Bible, Biathlam 1:5-8

5Jesuh Khrih cu zumh awk a tlakmi tehte, hrin hmasa bikmi Fapa, thihnak in thawhter a simi a si i vawlei cung siangpahrang hna a uktu zong a si fawn.

Kannih cu a kan dawt i a thihnak thawngin kan sualnak chungkhan a kan chuah i * 6a Pathian le a Pa rian kha tlangbawi bantukin a ṭuantu dingah siangpahrang phun ah a kan ser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen. *

7Zohhmanh u, khuadawm sin khin a ra lio! Mi kip nih an hmuh lai, a rak chuntu hna zong nih khan an hmuh lai. Cun vawlei cung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen. *

8Lianngan Bik Bawipa Pathian nih cun, “Kei cu Alfa le Omega ka si,” a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si. *

Alleluia   Mark 11:10 - Kan pu David pennak a ra liomi cu thluachuahnak hmu ko seh! Hosanna! A sang bik van ah khin Pathian cu thangṭhat si ko seh,” tiah an ti.

Thawngtthabia,John 18:33b-37

33b“Judah mi hna siangpahrang cu na si maw?” tiah a hal. 34Jesuh nih cun, “Hi ti na ka hal hi nangmah lungtho in maw a si, midang nih dah ka kong kha an in chimh?” tiah a hal. 35Pilat nih cun, “Kei cu Judah mi ah maw na ka ruah? Nangmah na phun hawile an tlangbawi upa hna nih pei ka sin an in phakter ko cu. Na tuahmi cu zeidah a si?” tiah a leh. 36Jesuh nih cun, “Kei ka pennak cu hi vawlei ta hi a si lo; ka pennak cu hi vawlei ta hi rak si seh law cu, Judah mi nih an ka tlaih khawh nakhnga lo, ka zultu hna hi heh tiah an cawl ve hnga. Kei ka pennak cu hi vawlei ta hi a si lo,” tiah a ti.

37Cucaah Pilat nih cun, “Siangpahrang cu tah na si kun maw?” tiah a hal.

Jesuh nih, “Siangpahrang na si tiah na ka ti. Hi vawlei ahka chuah chan le ka rat chan cu biatak kong chim hi a si. Biatak kha a hna a phihkanh lomi paoh nih cun ka bia kha an ngaih,” tiah a ti.