Zarhkel (31)nak Cawn nikhat ni

November 4, 2024

Avoikhatnak Bible           Filipi 2:1-4

Khrih Toidornak le Lianhngannak

1Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw? 2Kan fial duhmi hna cu hihi a si: lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u. 3Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. 4Cun midang duhning kha hmuh thiam i zuam u law nanmah duhnak lawng kha ruat hlah u.

Psalm 131:1-3

R/ Maw Bawipa, nangmah cungah ka hna ngam i ka lung a dai ko.

1Maw Bawipa, kaa porhlawtnak kha ka hlawt cang, ka ruamkainak kha ka chuahtak cang. Thil lianngan kha biapi ah ka ruat ti hna lo, ka ca i a har tukmi thil kha zei ah ka rel ti hna lo.

2Ka hna a ngam i ka lung a dai ko. Ngakchia cu a nu ṭang ah dai tein a ih bantukin ka lung cu ka chungah dai tein a um ko.

3Israel, atu in zungzal tiang, Bawipa cu i bochan ko.

Alleluia   John 8:31b-32         “Ka cawnpiaknak kha nan zulh ahcun a ka zultu taktak cu nan si; biatak cu nan hngalh lai i biatak nih cun an luatter hna lai,” tiah a ti hna.

Thawngtthabia (Gospel)                Luke 14:12-14

12Cun Jesuh nih rawlhrawn a sawmtu cu a thawh i, “Chuncaw ei siseh, zanriah ei siseh, na sawm hna tikah na hawi na kom le na unau hna le na sahlawh na rualchan hna le na innpa mi rumrum kha va sawm hna hlah. Zeicahtiah anmah zong nih an in sawm ve lai i na tuahmi kha cham na si ko lai. 13Rawl danghnak na tuah tikah, misifak, kutzeng, kezeng le mitcaw kha va sawm hna law 14annih nih an in cham khawh lai lo caah thluachuahnak na hmu lai. Miṭha mi kha thihnak in an thawh ṭhan tikah Pathian nih an cham lai,” tiah a ti.