Zarhkel (32)nak Zarhte ni

November 16, 2024 (Year B)

Avoikhatnak Bible               3John 1:5-8

Gaius Kha A Thangṭhat

5Ka dawtmi ka hawi, kan unau hna kha na theihhngalh bal lomi an si nain an ca i nan rak tuahmi kha rian ṭha le zumhawktlak ngaingai a si. 6Na rak dawt hnanak kha hika Khrihfabu sinah hin an chim. Hmailei an kalnak ding zongah Pathian duhnak he aa tlak dingin rak bawm ko rih hna. 7Zeicahtiah Khrih rian ṭuan awk khualtlawn ah khan, a zum lomi sinin bawmhnak zeihmanh la loin, an i thawh. 8Cucaah biatak rian kha a ṭuanpitu kan si nakhnga, kannih Khrihfami nih hi hna cu kan bawmh awk an si.

Psalm 112:1-6 (1)

R/ Bawipa cu thangṭhat u! Bawipa a ṭihmi cu mi lunglawm an si. A nawlbia zulh a nuam in a theimi cu mi lunglawm an si.

1 Bawipa cu thangṭhat u! Bawipa a ṭihmi cu mi lunglawm an si. A nawlbia zulh a nuam in a theimi cu mi lunglawm an si.

2Cu bantuk mi hna fale cu ram chungah hin miṭhawng an si lai, miṭha mi hna fale cu thluachuah hmumi an si lai.

3An innchungkhar hna cu an rum an lian lai i khua awng an pem zungzal lai.

4Miṭha mi hna caah cun muihnak chungah khan ceunak a tlang, mi cungah vel a ngeimi le mi zaangfah a thiammi le miding mi hna caah cun ceunak kha a tlang.

5Mi chaw a cawih hna tikah siang ngaiin a cawih i a rian a ṭuannak ah lihchim lo tein a ummi cu milunglawm an si.

6Miṭha cu an sung bal lai lo, philh an si bal lai lo.

Alleluia  2Thesalon 2:14 Pathian nih an kawhnak hna cu kan in chimhmi hna Thawngṭha kha hmang in a si; cun an kawh hna cu kan Bawipa Jesuh sunparnak i hrawm ve awkah a si.

Thawngtthabia (Gospel)            Luke 18:1-8

Nuhmeinu le Biaceihtu Bawi Bianabia

1Lungdong loin thla nan cam zungzal awk a si, ti cawnpiaknak caah Jesuh nih hi bianabia hi a chimh hna. 2Aa thawh i, “Khua pakhat ah hin Pathian zong a ṭih lo i mi zong a hmaizah lomi biaceihtu bawi pakhat a rak um. 3Cun cuka khua ah cun nuhmei pakhat a um ve i ka bia kha ka ceihpiak tuah, tiah atu le atu a ra ti lengmang. 4Biaceihtu nih caan saupi chung cu a al lengmang, 5sihmanhsehlaw a donghnak ah cun, ‘Pathian cu ka ṭih lo i minung kha ka hmaizah hna lo nain, hi nuhmeinu nih hin hnahnawhnak a ka pek lengmang caah a bia cu ka ceihpiak ko lai; cu lo ahcun a ra lengmang ko lai i ka re lam a ka theihter chin lai,’ a ti,” tiah a ti. 6Cun Bawipa nih cun a peh ṭhan i, “A ding lomi biaceihtu bawi nih a chimmi cu nan theih cang. 7Pathian nih tah amah a mi hna chunzan hlan in a sinah bawmh hal awkah a au lengmangmi hna cu thiamcoh loin maw a um hna hnga? Anmah bawmh awkah cun a khul a nuar ko hnga maw? 8Hihi kan chimh hna: anmah cu thiam a coh hna lai i cucu khulrang tein a tuah lai. Sihmanhsehlaw Mi Fapa nih a rat tikah vawlei ah hin zumhnak a hmu te hnga maw?” tiah a ti.