Zarhkel (33)nak Caw ninga ni

November 22, 2024 (Year B)

Avoikhatnak Bible               Biathlam 10:8-11

8Cun vancung in aw ka theihmi nih khan a run ka chawnh ṭhan i, “Rili cung le vawlei cungah a dirmi vancungmi nih aa putmi cazual aa samhmi kha va la tuah,” a ti. *

9Vancungmi sinah cun ka va kal i cazual hmete cu ka pe, tiah ka va ti. A ka thawh i, “I lak law ei tuah; na pawpi chungah cun a kha lai, sihmanhsehlaw na ka chungah cun khuaihliti bantukin a thlum lai,” a ti.

10A kut i cazual hmete cu ka lak i ka ei, ka ka chungah cun khuaihliti bantukin a thlum. Sihmanhsehlaw ka vun dolh tikah ka paw chungah cun a kha. 11Cun, “Pathian nih miphun dangdang hna le ram dangdang hna le holh phun dangdang hna le siangpahrang tampi hna kong i a chimmi bia kha na chim ṭhan awk a herh lai,” an ka ti.

Psalm 119:14, 24, 72, 103, 111, 131 (103)

R/ Zeitluk in dah na nawlbia cu an thlum, khuaihliti nakin an thlum deuh.

14Chawva tampi ngeih nakin na nawlbia zulh cu ka duh deuh.

24Na ka cawnpiaknak nih lawmhnak a ka pek; fim a ka chimtu a si.

72Na ka pekmi nawlbia cu ka caah vawlei cung tangka vialte nakin a ṭha deuh.

103Zeitluk in dah na nawlbia cu an thlum, khuaihliti nakin an thlum deuh.

111Na nawlbia cu zungzal ka ro an si, ka lung a ka lawmhtertu an si.

131Na nawlbia kha ka duh tuk hna caah, ka kaa kaa an i ka thaw aa su.

Alleluia   John 10:27 Ka tuu nih cun ka aw kha an ngaih, annih kha ka hngalh hna i an ka zulh

Thawngtthabia (Gospel)            Luke 19:45-48

Jesuh Cu Biakinn Ah A Kal

(Mat 21.12-17; Mar 11.15-19; Jhn 2.13-21)

45Jesuh cu Biakinn chungah khan a vung lut i chawdawr pawl kha a ṭhawl hna i, 46“Cathiang chungah, ‘Pathian nih ka inn cu thlacamnak inn a si lai,’ a ti, tiah aa ṭial. Sihmanhsehlaw nannih nih cun mifir thuhnak kua ah nan ser cang,” a ti hna. *

47Jesuh nih Biakinn ah khan nifate in a cawnpiak hna. Tlangbawi upa pawl hna le Phungbia cawnpiaktu saya hna le hruaitu pawl nih khan thah an duh, * 48sihmanhsehlaw mi vialte nih khan a bia cu an ngaih i pakhat hrelh hmanh kha an duh lo caah annih nih cu tuahnak ding caah cun lam an hmu kho lo.